2 Tesalonicenses 3:1-18
3 Bey túunoʼ, sukuʼuneʼex, tsʼáa a wóoleʼex orar t-oʼolal+ utiaʼal ka seguernak u kʼiʼitpajal u tʼaan Jéeoba tu séebaʼanil+ yéetel utiaʼal ka alabartaʼak jeʼex táan u yúuchul teʼ tuʼux yaneʼexoʼ.
2 Orarneneʼex xan utiaʼal ka salvartaʼakoʼon tiʼ le kʼasaʼan máakoʼoboʼ+ yéetel tiʼ le máaxoʼob ku beetkoʼob looboʼ, tumen le fejoʼ maʼ tiʼ tuláakal máak yaniʼ.+
3 Yuumtsileʼ ku béeykuntik baʼax ku yaʼalik, yaan u muʼukʼaʼankúuntik a wóoleʼex yéetel yaan u kanáantkeʼex tiʼ le Kʼaasilbaʼaloʼ.*
4 Tsʼoʼoleʼ tumen táan k-múul meyajtikeʼex Yuumtsileʼ toʼoneʼ k-confiar de ke táan a beetkeʼex le baʼaxoʼob t-aʼalajteʼexoʼ yéetel k-ojel yaan u seguer a beetkeʼex.
5 K-tsʼíiboltik ka seguernak u nuʼuktaʼal a puksiʼikʼaleʼex tumen Yuumtsil utiaʼal ka a yaabilteʼex Dios+ yéetel utiaʼal ka chúukpajak a wóoleʼex+ a meyajteʼex Cristo.
6 Beora túunaʼ, sukuʼuneʼex, tu kʼaabaʼ Yuumtsil Jesucristoeʼ k-aʼalikteʼex ka a náachkuntabaʼex tiʼ jeʼel máaxak sukuʼunil maʼ tu yuʼubik tʼaan+ yéetel maʼ tu kuxtal jeʼex t-kaʼansajteʼexoʼ.+
7 Tumen teʼexeʼ a wojleʼex baʼax unaj a beetkeʼex utiaʼal a kuxtaleʼex jeʼex t-beetaj toʼonoʼ,+ toʼoneʼ maʼ t-beetaj k-maʼ uʼuyaj tʼaanil le tiaʼanoʼon kaʼach ta wiknaleʼexoʼ.
8 Toʼoneʼ maʼ t-jaantaj u yoʼoch mix máak wa maʼ k-boʼotmiʼ,+ baʼaxeʼ t-ilaj k-tsʼáaik k-óol sen meyaj bul kʼiin yéetel bul áakʼab utiaʼal maʼ k-chʼuytal tiʼ mix juntúul tiʼ teʼexiʼ.+
9 Maʼ tumen wa minaʼantoʼon autoridad utiaʼal k-beetkiʼ,+ baʼaxeʼ t-beetaj beyoʼ utiaʼal k-eʼesikteʼex bix unaj a kuxtaleʼex.+
10 U jaajileʼ tak le tiaʼanoʼon ta wiknaleʼexoʼ suuk kaʼach k-aʼalikteʼex lelaʼ: «Wa yaan máax maʼ u kʼáat meyajeʼ, maʼ u janal xan».+
11 Toʼoneʼ táan k-uʼuyik u yaʼalaʼaleʼ yaan jujuntúul ichileʼexeʼ maʼ u kʼáat u yuʼuboʼob tʼaaniʼ+ yéetel mix tech u meyajoʼob, baʼaxeʼ chéen ku yoksikubaʼob tiʼ baʼaxoʼob maʼ unajiʼ.+
12 Tiʼ le máakoʼob beyaʼ táan k-jach aʼalik yéetel táan k-kʼáatiktiʼob tu kʼaabaʼ Yuumtsil Jesucristoeʼ maʼ u yoksikubaʼob tu kuxtal yaanal máak, yéetel ka meyajnakoʼob utiaʼal u náajaltikoʼob baʼal u jaantoʼob.+
13 Sukuʼuneʼex, teʼexeʼ maʼ u xuʼulul a beetkeʼex baʼax uts.
14 Chéen baʼaleʼ wa yaan máax maʼ u kʼáat u tsʼoʼokbes le baʼax k-aʼalikteʼex teʼ cartaaʼ unaj a kanáantkabaʼex tiʼ letiʼ* yéetel unaj u xuʼulul a biskabaʼex tu yéetel+ utiaʼal ka suʼlakchajak.
15 Chéen baʼaleʼ maʼ a wilkeʼex bey juntúul enemigoeʼ, baʼaxeʼ seguernak a tsolkeʼex u nuʼuk tiʼ+ jeʼex juntúul sukuʼuneʼ.
16 Toʼoneʼ k-kʼáat óoltik tiʼ u Yuumtsilil le jeetsʼeliloʼ ka u tsʼáateʼex jeetsʼelil mantatsʼ.+ Yuumtsil ka yanak ta wéeteleʼex.
17 Teen Pabloeʼ kin túuxtikteʼex saludos. Lelaʼ teen tsʼíibt yéetel in kʼaboʼob,+ jeʼex suuk in beetik teʼ cartaʼob kin túuxtikoʼ. Teneʼ deporsi bey in tsʼíiboʼ.
18 U nojoch utsil Yuumtsil Jesucristo ka yanak ta wéeteleʼex.