Josué 20:1-9
-
Kaajoʼob utiaʼal u taʼakikuba máak (1-9)
20 Jéeoba túuneʼ tu yaʼalaj tiʼ Josué:
2 «Aʼal tiʼ le israelitaʼoboʼ: ‹Yéeyeʼex le kaajoʼob kun meyaj utiaʼal u taʼakikuba máakoʼ,+ le kaajoʼob tsʼoʼok u yaʼalikteʼex Moisés jeʼex úuchik in waʼaliktiʼeʼ,
3 tumen tiʼ kun bin le máax maʼ u yóoliliʼ úuchik u kíimsik wa máaxoʼ, tumen maʼ u tukultmaj kaʼach u beetkiʼ. Tiʼ kun bin u taʼakuba máak utiaʼal maʼ u kíimsaʼal tumen le máax vengartik u kʼiʼikʼel le máax tu kíimsoʼ.+
4 Letiʼeʼ unaj u bin tiʼ junpʼéel tiʼ le kaajoʼobaʼ.+ Le kéen kʼuchkeʼ unaj u waʼatal tu joonajil le kaajoʼ+ yéetel unaj u yaʼalik tiʼ u nuuktakil le kaaj le baʼax tsʼoʼok u yúuchloʼ. Letiʼob túuneʼ unaj u kʼamkoʼob ichil le kaajoʼ yéetel unaj u tsʼáaikoʼob tuʼux u yantal. Letiʼ túuneʼ yaan u pʼáatal kajtal tu yéeteloʼob.
5 Wa chʼaʼpachtaʼan tumen le máax vengartik u kʼiʼikʼel le máax tu kíimsoʼ, maʼ unaj a kʼubkeʼex tu kʼabiʼ, tumen maʼ taaliʼtiʼ úuchik u kíimsik u yéet máakiliʼ, yéetel mix u pʼekmaj kaʼachiʼ.+
6 Tiʼ unaj u pʼáatal teʼ kaaj tak ken kʼuchuk u kʼiinil u juzgartaʼal tumen le kaajoʼ.+ Tiʼ unaj u pʼáatal tak ken kíimik u maas nojchil le sacerdoteʼob+ yaan teʼ kʼiinoʼob jeʼeloʼ. Le kéen tsʼoʼokkeʼ le máax tu kíimsaj wa máaxoʼ jeʼel u páajtal u suut teʼ kaaj tuʼux púutsʼoʼ, yaan u páajtal u bin tu kaajal yéetel tu yotoch›».+
7 Letiʼob túuneʼ tu junpáaykuntoʼob le kaajoʼobaʼ: Kedes+ le yaan Galileaoʼ le yaan teʼ montañaʼob yaan Neftalíoʼ, Sikem+ le yaan teʼ montañaʼob yaan Efraínoʼ, Kiriat-arbá,+ uláakʼ bix kʼaj óolaʼanileʼ Hebrón, lelaʼ tiaʼan teʼ montañaʼob yaan Judáoʼ.
8 Tu lakʼinil le Jordán, naatsʼ tiʼ Jericóeʼ, tu yéeyoʼob Bézer+ le yaan teʼ desiertooʼ, lelaʼ tiaʼan teʼ kaʼanal táax luʼum utiaʼal u tribu Rubénoʼ. Tu yéeyoʼob xan Ramot+ le yaan Galaadoʼ, lelaʼ u tiaʼal u tribu Gad. Yéetel tu yéeyoʼob Golán+ le yaan Basánoʼ, lelaʼ u tiaʼal u tribu Manasés.+
9 Letiʼe kaajoʼob yéeyaʼaboʼob utiaʼal u bin tuláakal le israelitaʼob bey xan le j-táanxel luʼumiloʼob kajaʼanoʼob ichiloʼoboʼ. Jeʼel máaxak tiʼ letiʼob maʼ u yóoliliʼ ka u kíims wa máaxeʼ tiʼ kun bin+ utiaʼal maʼ u kíimsaʼal tumen le máax vengartik u kʼiʼikʼel le máax tu kíimsoʼ, tumen yáax unaj u yantal tu táan u nuuktakil le kaaj utiaʼal u juzgartaʼaloʼ.+