Josué 23:1-16
23 Jéeobaeʼ tu beetaj u yantal jeetsʼelil tiʼ u kaajil Israel+ úuchik u salvartik tiʼ tuláakal u enemigoʼob yaan tu baʼpachoʼ. Ka máan yaʼab kʼiinoʼob úuchuk leloʼ, le tsʼoʼok u chʼíijil Josué yéetel u kuxtal yaʼab añosoʼ,+
2 Josuéeʼ tu muchʼaj tuláakal u kaajil Israel,+ u nuuktakil le kaajoʼ, u líderiloʼob, u jueziloʼob yéetel u jefeiloʼobeʼ+ ka tu yaʼalajtiʼob: «Tsʼoʼok in chʼíijil yéetel tsʼoʼok in kuxtal yaʼab años.
3 Teʼexeʼ tsʼoʼok a wilkeʼex tuláakal le baʼax tu beetaj Jéeoba a Dioseʼex tiʼ tuláakal le kaajoʼob ta woʼolaleʼexoʼ. Jéeoba a Dioseʼexeʼ baʼatelnaj ta woʼolaleʼex.+
4 Ilawileʼex, teneʼ tin beetaj junpʼéel rifa+ utiaʼal in tʼoxik tiʼ le tribuʼob le luʼum tuʼux yaan le kaajoʼob pʼaatloʼob tak bejlaʼoʼ,+ bey xan le luʼum tuʼux yaan tuláakal le kaajoʼob tsʼoʼok in xuʼulsiktiʼoboʼ,+ desde teʼ Jordánoʼ tak teʼ Mar Grande* yaan tu tojil le tuʼux ku tʼúubul kʼiinoʼ.
5 Jéeoba a Dioseʼex tojolchʼint le kaajoʼob ta táaneʼexoʼ,+ letiʼ jóoʼsoʼob ta woʼolaleʼex, teʼex túuneʼ ta chʼaʼajeʼex le luʼum tuʼux yanoʼob kaʼachoʼ, úuch jach jeʼex u yaʼalmilteʼex Jéeoba a Dioseʼexeʼ.+
6 Beoraaʼ teʼexeʼ jach unaj a tsʼáaik a wóoleʼex a beeteʼex bey xan a tsʼoʼokbeskeʼex tuláakal baʼax tsʼíibtaʼan tu libroil u Ley+ Moisés. Maʼ unaj a kʼéechleʼex ta x-noʼojeʼexiʼ mix ta x-tsʼíikeʼexiʼ.+
7 Junpuliʼ maʼ unaj a xaʼakʼbeskabaʼex yéetel le kaajoʼob+ pʼaatloʼob ichileʼexoʼ. Mix tak u kʼaabaʼ u diosoʼob+ unaj a chʼaʼchiʼitkeʼex yéetel mix unaj a jurareʼex tu kʼaabaʼobiʼ. Junpuliʼ maʼ unaj a meyajtikeʼexoʼobiʼ mix unaj a chintaleʼex tu táanoʼobiʼ.+
8 Baʼaxeʼ unaj a pʼáatleʼex naatsʼ tiʼ Jéeoba a Dioseʼex+ jeʼex táan a beetkeʼex tak bejlaʼoʼ.
9 Jéeobaeʼ yaan u luʼsik ta táaneʼex nukuch kaajoʼob jach yaan páajtalil tiʼob.+ Tak bejlaʼeʼ mix juntúul máak páajchajak u pʼáatal waʼatal ta táaneʼex.+
10 Tak chéen juntúul tiʼ teʼexeʼ yaan u chʼaʼpachtik 1,000 u túulal máak,+ tumen Jéeoba a Dioseʼexeʼ táan u baʼateʼel ta woʼolaleʼex+ jeʼex u yaʼalmilteʼexoʼ.+
11 Le oʼolaleʼ jach ilawileʼex maʼ u xuʼulul+ a yaabiltikeʼex Jéeoba a Dioseʼex.+
12 Pero wa ka sutik a paacheʼex tiʼ Dios, ka xaʼakʼbeskabaʼex yéetel le kaajoʼob pʼaatal+ ichileʼexoʼ, ku tsʼoʼokol a beeleʼex tu yéeteloʼob,+ ka biskabaʼex tu yéeteloʼob, tsʼoʼoleʼ letiʼob xaneʼ bey u beetkoʼob ta wéeteleʼexoʼ,
13 unaj a wojéeltikeʼexeʼ, Jéeoba a Dioseʼexeʼ maʼ kun seguer u jóoʼsik le kaajoʼob ta woʼolaleʼexoʼ.+ Le kaajoʼobaʼ yaan u pʼáatloʼob bey junpʼéel trampa tiʼ teʼexeʼ, bey junpʼéel chicote utiaʼal u jaʼatsʼal a puʼucheʼexeʼ,*+ yéetel bey kʼiʼixoʼob chʼiikil ta wicheʼexeʼ, tak ken chʼéejkeʼex tiʼ le maʼalob luʼum u tsʼaamajteʼex Jéeoba a Dioseʼexoʼ.
14 Beoraaʼ ilawileʼex, teneʼ taʼaytak in kíimil, teʼexeʼ a wojleʼex yéetel tuláakal a puksiʼikʼaleʼex bey xan yéetel tuláakal a kuxtaleʼex de ke mix junpʼéel tiʼ tuláakal le maʼalob baʼaloʼob u yaʼalmajteʼex Jéeoba a Dioseʼex tsʼoʼok u fallaroʼ. Tuláakal tsʼoʼok u béeytaloʼob, mix junpʼéel pʼáatak maʼ u béeytaliʼ.+
15 Jeʼex tuláakal le maʼalob baʼaloʼob u yaʼalmajteʼex Jéeoba a Dioseʼex tsʼoʼok u taal ta wóokʼoleʼexoʼ,+ Jéeobaeʼ bey xan ken u beet u taal ta wóokʼoleʼex tuláakal le baʼax kʼaas u yaʼalmaj kun úuchulteʼexoʼ. Jéeoba a Dioseʼexeʼ yaan u xuʼulsikteʼex. Mix juntúul tiʼ teʼex kun pʼáatal teʼ maʼalob luʼum u tsʼaamajteʼexoʼ.+
16 Wa teʼex maʼ ta tsʼoʼokbeskeʼex le pacto u beetmaj Jéeoba a Dioseʼex ta wéeteleʼexoʼ, le pacto tu yaʼalajteʼex unaj a tsʼoʼokbeskeʼexoʼ, yéetel wa ka bin a meyajteʼex yaanal diosoʼob yéetel ka chintaleʼex tu táanoʼobeʼ, Jéeobaeʼ yaan u pʼuʼujul ta contraʼex+ yéetel séebaʼan kan chʼéejleʼex tiʼ le maʼalob luʼum u tsʼaamajteʼexoʼ».+
