Levítico 18:1-30
-
Núupkʼeban ku bin tu contra le leyoʼ (1-30)
-
Maʼ unaj u beetaʼal jeʼex le cananeoʼoboʼ (3)
-
U yantal baʼal u yil máak yéetel u láakʼtsil (6-18)
-
Tu kʼiiniloʼob u menstruación le koʼoleloʼ (19)
-
U yantal baʼal u yil máak yéetel u yéet xiibil (22)
-
U yantal baʼal u yil máak yéetel baʼalcheʼ (23)
-
Unaj u pʼáatloʼob limpioil wa maʼeʼ ku tojolchʼintaʼaloʼob (24-30)
-
18 Jéeobaeʼ seguernaj u yaʼalik tiʼ Moisés:
2 «Tʼan le israelitaʼoboʼ ka a waʼaltiʼob: ‹Teneʼ Jéeobaen, teen a Dioseʼex.+
3 Teʼexeʼ maʼ unaj a beetkeʼex le baʼaloʼob ku beetik le máakoʼob kajaʼanoʼob Egiptooʼ, le tuʼux kajaʼaneʼex kaʼachoʼ. Maʼ unaj xan a beetkeʼex le baʼaloʼob ku beetik le máakoʼob kajaʼanoʼob tu luʼumil Canaánoʼ, le luʼum tuʼux táan in biskeʼexoʼ.+ Maʼ unaj a kuxtaleʼex jeʼex letiʼobeʼ.
4 Teʼexeʼ unaj a beetkeʼex tuláakal le baʼaxoʼob kin waʼalikteʼexoʼ yéetel unaj a kuxtaleʼex jeʼex u yaʼalik in leyoʼoboʼ.+ Teneʼ Jéeobaen, teen a Dioseʼex.
5 Maʼ unaj u xuʼulul a beetkeʼex le baʼaxoʼob ku yaʼalik in leyoʼoboʼ, le máax kun beetkeʼ yaan u kuxtal.+ Teneʼ Jéeobaen, teen a Dioseʼex.
6 Mix juntúul tiʼ teʼex unaj u yantal baʼal u yil* yéetel u láakʼtsil.+ Teneʼ Jéeobaen, teen a Dioseʼex.
7 Maʼ unaj u yantal baʼal a wil yéetel a papáiʼ. Maʼ unaj xan u yantal baʼal a wil yéetel a maamaiʼ. Letiʼeʼ a maama, le oʼolal maʼ unaj u yantal baʼal a wil tu yéeteliʼ.
8 Maʼ unaj u yantal baʼal a wil yéetel u yatan a papáiʼ,+ tumen wa ka beetkeʼ yaan a taasik suʼtsilil tiʼ a papá.
9 Maʼ unaj u yantal baʼal a wil yéetel a kiik wa yéetel a wíitsʼiniʼ kex wa u hija a papá wa u hija a maama, yéetel kex tiʼ junpʼéeliliʼ familia a taaleʼex wa maʼ.+
10 Maʼ unaj u yantal baʼal a wil yéetel u hija a hijoiʼ mix yéetel u hija a hijaiʼ, tumen leloʼ suʼtsil a tiaʼal.
11 Maʼ unaj u yantal baʼal a wil yéetel u hija u yatan a papáiʼ, tumen letiʼeʼ u hija a papá, letiʼeʼ a kiik wa a wíitsʼin.
12 Maʼ unaj u yantal baʼal a wil yéetel u kiik wa u yíitsʼin a papáiʼ, tumen letiʼeʼ u láakʼtsil a papá.+
13 Maʼ unaj u yantal baʼal a wil yéetel u kiik wa u yíitsʼin a maamaiʼ. Tumen letiʼeʼ u láakʼtsil a maama.
14 Maʼ unaj u yantal baʼal a wil yéetel u yatan a tíoiʼ,* tumen letiʼeʼ a tía, wa ka beetkeʼ suʼtsil utiaʼal a tío.*+
15 Maʼ unaj u yantal baʼal a wil yéetel a wilibiʼ.+ Letiʼeʼ u yatan a hijo, le oʼolal maʼ unaj u yantal baʼal a wil tu yéeteliʼ.
16 Maʼ unaj u yantal baʼal a wil yéetel a cuñadaiʼ,+ tumen wa ka beetkeʼ suʼtsil utiaʼal a sukuʼun wa utiaʼal a wíitsʼin.
17 Maʼ unaj u yantal baʼal a wil yéetel juntúul koʼolel bey xan yéetel u hija le koʼoleloʼ.+ Maʼ unaj u tsʼoʼokol a beel mix unaj u yantal baʼal a wil yéetel u yáabil* le koʼoleloʼ.* Tumen letiʼobeʼ u láakʼtsiloʼob le koʼoleloʼ yéetel leloʼ junpʼéel baʼal jach suʼtsil.
18 Mientras kuxaʼan a wataneʼ maʼ unaj u tsʼoʼokol a beel+ mix u yantal baʼal a wil yéetel u kiik wa u yíitsʼiniʼ.
19 Maʼ unaj u yantal baʼal a wil yéetel juntúul koʼolel tiaʼan tu kʼiiniloʼob u menstruacióneʼ.+
20 Maʼ unaj u yantal baʼal a wil yéetel u yatan a wéet máakiliʼ,* tumen wa maʼeʼ jeʼel a pʼáatal maʼ limpio yanilech tu táan Dioseʼ.+
21 Maʼ unaj a kʼubik* mix juntúul tiʼ a paalal tiʼ Mólekiʼ,*+ tumen wa ka beetik beyoʼ maʼ táan a weʼesik respeto tiʼ in kʼaabaʼiʼ,+ teneʼ Jéeobaen, teen a Diosen.
22 Maʼ unaj a múul chital yéetel a wéet xiibil jeʼex a múul chital yéetel juntúul koʼoleleʼ,+ tumen leloʼ junpʼéel baʼal jach táaj kʼaas.
23 Juntúul xiibeʼ maʼ unaj u yantal baʼal u yil yéetel juntúul baʼalcheʼiʼ, tumen wa maʼeʼ jeʼel u pʼáatal maʼ limpio tu táan Dioseʼ. Juntúul koʼoleleʼ maʼ unaj xan u yantal baʼal u yil yéetel juntúul baʼalcheʼiʼ.+ Le baʼaloʼob beyaʼ maʼ bey tsʼaʼanil tumen Diosiʼ.
24 Maʼ unaj a beetkeʼex mix junpʼéel tiʼ le baʼaloʼobaʼ, tumen wa maʼeʼ yaan a pʼáatleʼex sucioil tin táan. U máakiloʼob le kaajoʼob ken in tojolchʼintoʼob ta táaneʼexoʼ, tu beetoʼob tuláakal le baʼaloʼob kʼaastakaʼ yéetel pʼáatoʼob maʼ maʼalob tin táaniʼ.+
25 Tu yoʼolal leloʼ le luʼumaʼ tsʼoʼok u chuʼupul yéetel baʼaloʼob kʼaastak, le oʼolal yaan in castigarkoʼob. Yaan u jóoʼsaʼaloʼob teʼ luʼum tuʼux kajaʼanoʼoboʼ.+
26 Chéen baʼaleʼ teʼexeʼ unaj a beetkeʼex tuláakal le baʼaxoʼob kin waʼalikteʼexoʼ yéetel unaj a kuxtaleʼex jeʼex u yaʼalik in leyoʼoboʼ.+ Teʼex yéetel le j-táanxel luʼumiloʼob yanoʼob ichileʼexoʼ maʼ unaj a beetkeʼex mix junpʼéel tiʼ le baʼaloʼob kʼaastakaʼ.+
27 Tuláakal le baʼaloʼob kʼaastakaʼ letiʼe ku beetik le máakoʼob kajaʼanoʼob teʼ luʼum tuʼux kan ookleʼexoʼ,+ le oʼolal le luʼumoʼ tsʼoʼok u chuʼupul yéetel baʼaloʼob kʼaastak.
28 Wa ka beetkeʼex le baʼaloʼob kʼaastakoʼ yaan xan a tojolchʼintaʼaleʼex jeʼex kun tojolchʼintbil le máakoʼob kajaʼanoʼob teʼ luʼum tuʼux kan ookleʼexoʼ.
29 Jeʼel máaxak kajaʼan ichileʼex ka u beet le baʼaloʼob kʼaastakaʼ unaj u xuʼulsaʼaltiʼ.
30 Teʼexeʼ unaj a beetkeʼex le baʼaxoʼob tsʼoʼok in waʼalikteʼexoʼ, pero maʼ unaj a beetkeʼex mix junpʼéel tiʼ le baʼaloʼob kʼaastak tsʼoʼok u beetik le máakoʼob yanoʼob teʼ luʼum tuʼux kan ookleʼexoʼ.+ Wa ka beetkeʼex le baʼaloʼob kʼaastakoʼ yaan a pʼáatleʼex maʼ limpioʼex tin táaniʼ. Teneʼ Jéeobaen, teen a Dioseʼex›».
Notas
^ Teʼelaʼ bey xan tuláakʼ versículoʼobeʼ, ich hebreoeʼ ku yaʼalaʼal kaʼach «u yilaʼal x-maʼ nookʼil».
^ Wa «u yatan u sukuʼun a papá wa u yatan u yíitsʼin a papá».
^ Ich hebreoeʼ ku yaʼalaʼal kaʼach «a beetik u yilaʼal a tío x-maʼ nookʼil».
^ Wa «yéetel u hija u hijo, wa yéetel u hija u hija le koʼoleloʼ».
^ Teʼelaʼ táan u yúuchul tʼaan tiʼ koʼolel.
^ Wa «a vecino; a wéet máan».
^ Ilawil página 2572.
^ Wa «tsʼáaik; sacrificartik».
