Números 20:1-29
20 Teʼ yáax mesoʼ* tuláakal u kaajil Israeleʼ kʼuch tu desiertoil Zin yéetel joʼopʼ u kajtal tu luʼumil Cadés.+ Teʼeloʼ tiʼ kíim Míriamiʼ+ yéetel tiʼ xan muʼukiʼ.
2 Le ka pʼáat minaʼan jaʼ utiaʼal u yukʼ le israelitaʼoboʼ,+ letiʼobeʼ tu muchʼubaʼob tu contra Moisés yéetel Aarón.
3 Le kaajoʼ táan kaʼach u quejarkuba tu contra Moisés+ táan u yaʼalik: «¡Maas maʼalob ka kíimkoʼon kaʼach le ka kíim k-sukuʼunoʼob tu táan Jéeobaoʼ!
4 ¿Baʼaxten tsʼoʼok a taaskeʼex u kaajal Jéeoba teʼ desiertoaʼ? ¿Baʼaxten tsʼoʼok a taaskoʼoneʼex teʼ desierto utiaʼal ka kíimkoʼon paʼteʼ yéetel k-aalakʼoʼoboʼ?+
5 ¿Baʼaxten ta jóoʼsoʼoneʼex Egipto utiaʼal ka a taasoʼoneʼex teʼ lugar jach kʼaasaʼ?+ Le luʼumaʼ maʼ maʼalob utiaʼal u yúuchul paakʼaliʼ, maʼ maʼalob utiaʼal u paʼakʼal higoʼobiʼ, mix uvaʼob mix granadasiʼ, tsʼoʼoleʼ minaʼan mix jaʼ utiaʼal ukʼbil».+
6 Moisés yéetel Aarón túuneʼ lukʼoʼob tu táan le kaajoʼ ka binoʼob tu entradail le najil reuniónoʼ, le ka kʼuchoʼobeʼ xolajoʼobeʼ ka chinlajoʼob, u nojoch sáasilil u poder Jéeoba túuneʼ káaj u juul tu táanoʼob.+
7 Jéeoba túuneʼ tu yaʼalaj tiʼ Moisés:
8 «Chʼaʼ le xóotʼ cheʼoʼ, teech túun yéetel Aarón a sukuʼuneʼ, muchʼkíinteʼex le kaajoʼ, yéetel tu táanoʼobeʼ aʼaleʼex tiʼ le nuxiʼ tuunich ka u tsʼáateʼex jaʼoʼ. Techeʼ yaan a beetik ka jóokʼok jaʼ tiʼ le tuunichoʼ yéetel yaan a tsʼáaik tiʼ le kaaj utiaʼal ka u yukʼoʼ bey xan utiaʼal ka u yukʼ u yalakʼ baʼalcheʼoboʼ».+
9 Moisés túuneʼ tu chʼaʼaj le cheʼ tu táan Jéeoba+ jach jeʼex úuchik u yaʼalaʼaltiʼoʼ.
10 Moisés yéetel Aarón túuneʼ tu muchʼkíintoʼob le kaaj tu táan le nuxiʼ tuunichoʼ, Moiséseʼ tu yaʼalajtiʼob: «¡Terco máakeʼex, uʼuyeneʼexiʼ! ¿Táan wa a exigirkeʼextoʼon ka k-jóoʼs jaʼ tiʼ le nuxiʼ tuunich utiaʼal ka k-tsʼáateʼexaʼ?».+
11 Moisés túuneʼ tu tichʼaj u kʼabeʼ ka tu jatsʼaj kaʼatéen le nuxiʼ tuunich yéetel le cheʼ u machmoʼ, ka túun joʼopʼ u sen tuul jaʼiʼ, le israelitaʼob bey xan u yalakʼ baʼalcheʼoboʼ joʼopʼ túun u yukʼikoʼob le jaʼoʼ.+
12 Le ka tsʼoʼokeʼ Jéeobaeʼ tu yaʼalaj tiʼ Moisés yéetel tiʼ Aarón: «Teʼexeʼ maʼ ta weʼeseʼex de ke yaan a fejeʼex tiʼ teniʼ yéetel maʼ ta weʼeseʼex tu táan u kaajil Israel de ke teneʼ santoen, yoʼolal lelaʼ teʼexeʼ maʼ ken a wokseʼex u kaajil Israel teʼ luʼum in waʼalmaj in tsʼáaiktiʼoboʼ».+
13 Le jeʼeloʼobaʼ u jaʼiloʼob Meribá,*+ le tuʼux tu quejartuba le israelitaʼob tu contra Jéeobaoʼ, teʼeloʼ Dioseʼ tu yeʼesaj tu táan le kaaj de ke letiʼeʼ santo.
14 Le tiaʼanoʼob Cadésoʼ Moiséseʼ tu túuxtaj jujuntúul máakoʼob aʼalik tiʼ u reyil Edom:+ «Lelaʼ letiʼe baʼax ku yaʼalik Israel,+ a sukuʼunoʼ: ‹Techeʼ a wojel bukaʼaj baʼaloʼob tsʼoʼok k-sen muʼyajtik.
15 K-úuchben láakʼtsiloʼobeʼ binoʼob Egipto+ yéetel tiʼ pʼáatoʼob kajtal yaʼab añosiʼ.*+ Teʼeloʼ le egipcioʼoboʼ jach tu maltratartoʼonoʼob yéetel jach tu maltratartoʼob k-úuchben láakʼtsiloʼobiʼ.+
16 Toʼon túuneʼ t-kʼáataj tiʼ Jéeoba ka u yáantoʼon,+ letiʼeʼ tu yuʼuboʼoneʼ ka tu túuxtaj juntúul ángeleʼ+ ka tu jóoʼsoʼon tiʼ u luʼumil Egipto, yéetel beoraaʼ way yanoʼon Cadéseʼ, le kaaj yaan tu fronterail a luʼumeʼexoʼ.
17 Le oʼolaleʼ beet uts a chaʼik k-kʼáatmáan teʼ ta luʼumeʼexoʼ. Maʼ ken k-okol tiʼ mix junpʼéel terreno mix teʼ tuʼuxoʼob a pakʼmeʼex uvaoʼ, yéetel maʼ ken k-ukʼ u jaʼil le chʼeʼenoʼob yaanteʼexoʼ. Yaan k-bin chéen teʼ bej ku kʼaabaʼtik u Beel le Reyoʼ, mix tuʼux ken k-kʼéechel,* hasta ken kʼáatmáankoʼon teʼ ta luʼumeʼexoʼ›».+
18 Chéen baʼaleʼ u reyil Edomeʼ tu yaʼalajtiʼ: «Maʼ kun páajtal a kʼáatmáaneʼex teʼ t-luʼumaʼ. Wa ka beetkeʼexeʼ yaan in jóokʼol baʼateʼel ta contraʼex yéetel espada».
19 Le israelitaʼob túunoʼ tu yaʼaloʼobtiʼ: «Chéen teʼ noj bej ken k-binoʼ, yéetel wa toʼon bey xan wa k-alakʼ baʼalcheʼob k-ukʼik le jaʼ yaanteʼexoʼ yaan k-boʼotik.+ Chéen baʼax k-kʼáateʼ ka a chaʼa k-kʼáatmáan ta luʼum».+
20 Kex beyoʼ letiʼeʼ tu yaʼalaj: «Maʼ kun páajtal a máaneʼex».+ U reyil Edom túuneʼ jóokʼ baʼateʼel tu contra le israelitaʼoboʼ. Jóokʼ yéetel junpʼéel ejército jach nojoch yéetel yaan u páajtalil.*
21 U reyil Edom túuneʼ maʼ tu yóotaj u chaʼa u máan u kaajil Israel teʼ luʼum tuʼux yanoʼ, le oʼolal le israelitaʼoboʼ tu chʼaʼajoʼob yaanal bej.+
22 Tuláakal túun u kaajil Israeleʼ, lukʼ Cadéseʼ ka bin tak teʼ Montaña Horoʼ.+
23 Le tiaʼanoʼob teʼ Montaña Hor, tu fronterail u luʼumil Edomoʼ, Jéeobaeʼ tu yaʼalaj tiʼ Moisés yéetel tiʼ Aarón:
24 «Aaróneʼ yaan u kíimil yéetel yaan u muʼukul jeʼex úuchik u muʼukul u yúuchben láakʼtsiloʼobeʼ.+ Letiʼeʼ maʼ kun okol teʼ luʼum ken in tsʼáa tiʼ le israelitaʼoboʼ, tumen teʼex kaʼatúuleʼexeʼ maʼ ta beeteʼex le baʼax tin waʼalajteʼex le tiaʼaneʼex kaʼach tu jaʼiloʼob Meribáoʼ.+
25 Chʼaʼ Aarón bey xan Eleazar, u hijoeʼ, ka naʼakakeʼex teʼ Montaña Horoʼ.
26 Teʼeloʼ yaan a luʼsik le nookʼ u takmaj Aarón+ utiaʼal u meyaj bey sacerdoteoʼ, yéetel yaan a tsʼáaik u búukint Eleazar,+ u hijo. Teʼeloʼ tiʼ kun kíimil Aaróniʼ».
27 Moisés túuneʼ tu beetaj jach jeʼex aʼalaʼabiktiʼ tumen Jéeobaoʼ, tu yóoxtúuliloʼobeʼ naʼakoʼob tak teʼ Montaña Hor, tu táan u yich tuláakal u kaajil Israeloʼ.
28 Moisés túuneʼ tu luʼsaj le nookʼ u takmaj Aarónoʼ ka tu tsʼáaj u búukint Eleazar, le u hijo Aarónoʼ. Le ka tsʼoʼokeʼ Aarón túuneʼ kíim teʼ tu yóokʼol le montañaoʼ.+ Moisés yéetel Eleazar túuneʼ éemoʼob teʼ montañaoʼ.
29 Le ka tu yilaj tuláakal le kaaj tsʼoʼok u kíimil Aarónoʼ tuláakloʼobeʼ joʼopʼ u yoʼtikoʼob durante 30 días.+
Notas
^ U kʼaabaʼ le mesaʼ Abib.
^ U kʼáat u yaʼal «Baʼateltʼaan».
^ Ich hebreoeʼ ku yaʼalaʼal kaʼach «kʼiinoʼob».
^ Ich hebreoeʼ ku yaʼalaʼal kaʼach «mix x-noʼoj mix x-tsʼíik».
^ Ich hebreoeʼ ku yaʼalaʼal kaʼach «yéetel yaʼab máakoʼob bey xan yéetel junpʼéel muʼukʼaʼan kʼab».
