Números 27:1-23
27 Náatsʼ túun u hijaʼob Zelofead.+ Zelofeadeʼ u hijo Éefer, u hijo Galaad, u hijo Makir, u hijo Manasés, letiʼobeʼ tiʼ u taaloʼob tiʼ u familia Manasés, u hijo Joséeʼ. U kʼaabaʼ le koʼoleloʼobaʼ letiʼe jeʼeloʼobaʼ: Malá, Noá, Oglá, Milká yéetel Tirzá.
2 Letiʼobeʼ binoʼob tu entradail le najil reuniónoʼ ka waʼalajoʼob tu táan Moisés, tu táan Eleazar le sacerdoteoʼ, tu táan u nuuktakil le kaajoʼ+ yéetel tu táan tuláakal le kaajoʼ, ka tu yaʼaloʼob:
3 «K-papáeʼ kíim teʼ desiertooʼ, chéen baʼaleʼ letiʼeʼ maʼ yanchaj ichil le grupo apoyart Coréoʼ,+ le grupo tu tsʼáajuba tu contra Jéeobaoʼ. Letiʼeʼ kíim yoʼolal u kʼeban yéetel maʼ yanchaj u hijoʼobiʼ.
4 ¿Baʼaxten túun kun saʼatal u kʼaabaʼ k-papá ichil u familia chéen tumen maʼ yanchaj juntúul u hijoiʼ? Tsʼáatoʼon junxóotʼ luʼum junmúuchʼ yéetel u sukuʼunoʼob* k-papá».
5 Moisés túuneʼ tu yaʼalaj tiʼ Jéeoba le baʼax ku kʼáatik le koʼoleloʼobaʼ.+
6 Jéeoba túuneʼ tu yaʼalaj tiʼ Moisés:
7 «Maʼalob le baʼax ku kʼáatkoʼobtech u hijaʼob Zelofeadoʼ. Beet tuláakal le ku páajtal utiaʼal a tsʼáaiktiʼob junxóotʼ luʼum junmúuchʼ yéetel u sukuʼunoʼob u papáʼoboʼ, lelaʼ yaan u pʼáatal bey u herenciaʼobeʼ. Le u herencia u papáʼoboʼ tiʼ letiʼob unaj a tsʼáaik.+
8 Aʼal xan tiʼ le israelitaʼoboʼ: ‹Wa ku kíimil juntúul máak pero maʼ yanchaj u hijoeʼ, le herencia unaj u tsʼaʼabaltiʼoʼ unaj a tsʼáaikeʼex tiʼ u hija.
9 Wa minaʼan u hija le máakoʼ, u herenciaeʼ unaj a tsʼáaikeʼex tiʼ u sukuʼunoʼob.
10 Yéetel wa maʼ yanchaj u sukuʼunoʼobeʼ, u herenciaeʼ unaj a tsʼáaikeʼex tiʼ u sukuʼunoʼob u papá.
11 Wa maʼ yanchaj u sukuʼunoʼob u papáeʼ, yaan a tsʼáaikeʼex u herencia tiʼ juntúul máax jach u láakʼtsil, tiʼ letiʼ kun pʼáatal le herenciaoʼ. Le baʼax tsʼoʼok in waʼalikaʼ yaan u pʼáatal bey junpʼéel ley utiaʼal le israelitaʼoboʼ, yaan u beetaʼal jach jeʼex tsʼoʼok u yaʼalik Jéeoba tiʼ Moisésoʼ›».
12 Jéeoba túuneʼ tu yaʼalaj tiʼ Moisés: «Naʼaken teʼ tu montañail Abarimoʼ,+ yéetel ilawil le luʼum ken in tsʼáa tiʼ le israelitaʼoboʼ.+
13 Le kéen tsʼoʼokok a wilkeʼ yaan xan a kíimil+ jeʼex úuchik u kíimil Aarón a sukuʼuneʼ.+
14 Tumen le ka tu quejartuba le kaaj tin contra teʼ tu desiertoil Zinoʼ, teʼexeʼ maʼ ta wuʼuyeʼex in tʼaaniʼ, maʼ ta weʼeseʼex tu táan u kaajil Israeleʼ de ke teneʼ santoen le ka tin tsʼáajteʼex le jaʼeʼ.+ Lelaʼ úuch teʼ tu jaʼiloʼob Meribáoʼ,+ teʼ Cadésoʼ,+ teʼ tu desiertoil Zinoʼ».+
15 Moisés túuneʼ tu yaʼalaj tiʼ Jéeoba:
16 «Jéeoba, le Dios máax tsʼáaik u kuxtal tuláakal máakoʼ, ka u tsʼáa juntúul xiib utiaʼal u nuʼuktik le kaajoʼ,
17 juntúul máax ka u nuʼuktoʼob jeʼel tuʼuxak ka xiʼikoʼobeʼ yéetel ka u nuʼuktoʼob tiʼ tuláakal baʼax ka u beetoʼob, beyoʼ u kaajal Jéeobaeʼ maʼ kun pʼáatal bey juntúul taman minaʼan mix máak kanáantikeʼ».
18 Jéeoba túuneʼ tu yaʼalaj tiʼ Moisés: «Chʼaʼ Josué u hijo Nun, letiʼeʼ juntúul máak jeʼel u páajtal u beetik le meyajoʼ, chʼaʼeʼ ka a tsʼáa a kʼab tu yóokʼol.*+
19 Bis tu táan Eleazar le sacerdoteoʼ yéetel tu táan tuláakal le kaajoʼ, yéetel tu táanoʼobeʼ tsʼáa letiʼ utiaʼal ka u nuʼuktoʼob.+
20 Tsʼáa tiʼ letiʼ junpʼíit tiʼ le autoridad yaantechoʼ+ utiaʼal ka páajchajak u yuʼubaʼal u tʼaan tumen tuláakal u kaajil Israel.+
21 Letiʼeʼ yaan u waʼatal tu táan Eleazar le sacerdoteoʼ, Eleazar túuneʼ yaan u meyajtiʼ le Urim+ utiaʼal u yojéeltik baʼax u kʼáat Jéeoba ka beetaʼak yéetel Josuéoʼ. Le baʼax ken u yaʼaloʼ yaan u beetaʼal tumen tuláakal máak, yaan u beetik letiʼ, tuláakal le israelitaʼoboʼ yéetel tuláakal le kaajoʼ».
22 Moisés túuneʼ tu beetaj jach jeʼex úuchik u yaʼalaʼaltiʼ tumen Jéeobaoʼ. Tu chʼaʼaj Josuéeʼ ka tu bisaj tu táan Eleazar le sacerdoteoʼ yéetel tu táan tuláakal le kaajoʼ,
23 ka tu tsʼáaj u kʼaboʼob tu yóokʼol yéetel ka tu tsʼáaj utiaʼal ka u nuʼuktoʼob,+ jach jeʼex tu yaʼalil Jéeoba tiʼ Moisésoʼ.+
