Números 32:1-42
-
Luʼumoʼob yaan tu lakʼinil le Jordánoʼ (1-42)
32 U paalal Rubén+ yéetel u paalal Gadeʼ+ jach yaʼabchaj u yalakʼ baʼalcheʼob, tu yiloʼobeʼ u luʼumil Jazer+ yéetel u luʼumil Galaadeʼ* junpʼéel lugar jach maʼalob utiaʼal u tséentaʼal baʼalcheʼob.
2 Le oʼolal u paalal Gad yéetel u paalal Rubéneʼ náatsʼoʼob tu yiknal Moisés, tu yiknal Eleazar le sacerdote yéetel tu yiknal u nuuktakil le kaajoʼ ka tu yaʼaloʼob:
3 «Atarot, Dibón, Jazer, Nimrá, Esbón,+ Elealé, Sebam, Nebo+ yéetel Beóneʼ,+
4 letiʼe luʼum tsʼoʼok u yáantik Jéeoba u ganart u kaajil Israeloʼ,+ junpʼéel luʼum maʼalob utiaʼal u tséentaʼal baʼalcheʼob, yéetel toʼoneʼ jach yaʼab k-alakʼ baʼalcheʼob yaan».+
5 Letiʼobeʼ tu yaʼaloʼob xan: «Wa tsʼoʼok k-lúubul utsil ta táaneʼ, tsʼaʼabak tiʼ toʼon le luʼum jeʼeloʼ. Maʼ a beetik k-kʼáatmáansik le Jordánoʼ».
6 Moisés túuneʼ tu yaʼalaj tiʼ u paalal Gad yéetel tiʼ u paalal Rubén: «¿Yaan wa túun u bin a sukuʼuneʼex baʼateʼel mientras teʼexeʼ yaan a pʼáatleʼex kajtal wayeʼ?
7 ¿Baʼaxten bíin a desanimarteʼex u kaajil Israel utiaʼal maʼ u yookloʼob teʼ luʼum seguro u tsʼaʼabaltiʼob tumen Jéeobaoʼ?
8 Leloʼ letiʼe baʼax tu beetaj a papáʼex le ka tin túuxtoʼob desde Cadés-barnea utiaʼal u chʼúuktoʼob le luʼumoʼ.+
9 Le ka naʼakoʼob tu Táax Luʼumil Escol+ yéetel le ka tu yiloʼob le luʼumoʼ tu desanimartoʼob u kaajil Israel utiaʼal u yookloʼob teʼ luʼum kun tsʼaabiltiʼob kaʼach tumen Jéeobaoʼ.+
10 Teʼ kʼiin jeʼeloʼ Jéeobaeʼ jach pʼuʼuji, le oʼolaleʼ tu jurartaj:+
11 ‹Le xiiboʼob jóokʼoʼob tu luʼumil Egipto yaan 20 años tiʼob wa maasoʼ maʼ tu yuʼuboʼob in tʼaan yéetel tuláakal u puksiʼikʼaloʼobiʼ, le oʼolaleʼ maʼ ken u yiloʼob le luʼum+ tin jurartaj in tsʼáaik tiʼ Abrahán, Isaak yéetel Jacoboʼ,+
12 chéen máax kun ilkeʼ Caleb+ u hijo Jefuné le kenizitaoʼ yéetel Josué+ u hijo Nun, tumen letiʼobeʼ tu yuʼuboʼob u tʼaan Jéeoba yéetel tuláakal u puksiʼikʼaloʼob›.+
13 Jéeoba túuneʼ jach pʼuʼuj tu contra Israeleʼ ka tu beetaj u máanoʼob chéen minaʼan u cuentail teʼ desierto durante 40 añosoʼ,+ hasta ka kíim tuláakal le generación beetik baʼax kʼaas tu táan Jéeobaoʼ.+
14 Beoraaʼ, j-kʼeban máakeʼex, táan a beetkeʼex le baʼax tu beetaj a papáʼex úuchoʼ yéetel táan a beetkeʼex u maas jach pʼuʼujul Jéeoba tu contra Israel.
15 Wa teʼex ku xuʼulul a wuʼuyikeʼex u tʼaan Dioseʼ letiʼeʼ seguro yaan u kaʼa pʼatik le kaaj teʼ desiertooʼ yéetel teʼexeʼ yaan a beetkeʼex u xuʼulsaʼal tiʼ tuláakal le kaajaʼ».
16 Le ka tsʼoʼokeʼ letiʼobeʼ náatsʼoʼob tu yiknaleʼ ka tu yaʼaloʼobtiʼ: «Chaʼa k-beetik corraloʼob de tuunich utiaʼal k-alakʼ baʼalcheʼob wayeʼ bey xan kaajoʼob utiaʼal u kajtal k-paalaloʼobiʼ.
17 Chéen baʼaleʼ toʼoneʼ yaan k-listokíintikba utiaʼal le baʼateloʼ+ yéetel yaan k-bin táanil tiʼ u maasil israelitaʼoboʼ tak ken k-áantoʼob okol teʼ lugar tuʼux kun pʼáatloʼoboʼ. Mientraseʼ k-paalaleʼ yaan u pʼáatloʼob kajtal teʼ kaajoʼob yaan u pakʼiloʼob tu baʼpachoʼoboʼ, tuʼux maʼ tu páajtal u beetaʼal loob tiʼob tumen le máaxoʼob kajaʼanoʼob teʼeloʼ.
18 Toʼoneʼ maʼ ken k-suut t-otoch hasta u tsʼaʼabal tiʼ cada juntúul israelita u luʼum bey herenciaeʼ.+
19 Tumen toʼoneʼ maʼ ken k-kʼam junpʼéel herencia tu yéeteloʼob teʼ tuláakʼ u tséel le Jordánoʼ bey xan maas paachil, tumen tsʼoʼok u tsʼaʼabaltoʼon k-herencia teʼ tu lakʼinil le Jordánoʼ».+
20 Moiséseʼ tu núukajtiʼob: «Wa ka chʼaʼik a armaʼex tu táan Jéeoba utiaʼal le baʼateloʼ,+
21 wa cada juntúul ku chʼaʼik u arma yéetel ku kʼáatmáansik le Jordán tu táan Jéeoba mientras táan u tojolchʼintik u enemigoʼob tu táanoʼ,+
22 hasta ken láaj ganartaʼakoʼob tumen Jéeobaeʼ,+ jeʼel u páajtal a suuteʼexeʼ+ yéetel maʼ kun antalteʼex culpa tu táan Jéeoba mix tu táan u kaajil Israel. Le luʼum jeʼelaʼ yaan a tiaʼalintkeʼex tu táan Jéeoba.+
23 Chéen baʼaleʼ wa maʼ ta beetkeʼex lelaʼ yaan a kʼebantaleʼex tu contra Jéeoba. Yéetel le kéen úuchuk leloʼ ojéelteʼexeʼ yaan a castigartaʼaleʼex yoʼolal a kʼebaneʼex.
24 Beoraaʼ jeʼel u páajtal a beetkeʼex kaajoʼob utiaʼal u kajtal a paalaleʼexeʼ bey xan corraloʼob utiaʼal a walakʼ tamaneʼex,+ chéen baʼaleʼ unaj a beetkeʼex le baʼax tsʼoʼok a prometerkeʼexoʼ».
25 U paalaloʼob túun Gad yéetel u paalaloʼob Rubéneʼ tu núukoʼob tiʼ Moisés: «In yuum, toʼoneʼ yaan k-beetik jach jeʼex tsʼoʼok a waʼalikoʼ.
26 K-paalal, k-atanoʼob yéetel tuláakal k-alakʼ baʼalcheʼobeʼ yaan u pʼáatloʼob teʼ kaajoʼob yanoʼob teʼ Galaadoʼ,+
27 chéen baʼaleʼ toʼoneʼ, in yuum, tuláakal máax u prepararmuba tu táan Jéeoba+ utiaʼal u bin teʼ baʼateloʼ yaan u kʼáatmáansik le Jordán jach jeʼel bix tsʼoʼok a waʼaliktoʼonoʼ».
28 Moisés túuneʼ tu yaʼalaj baʼax kun beetbil tu yéeteloʼob, lelaʼ tu yaʼalaj tiʼ Eleazar le sacerdoteoʼ, tiʼ Josué u hijo Nun bey xan tiʼ u nuuktakil le familiaʼob yaan ichil u tribuʼob Israeloʼ.
29 Moiséseʼ tu yaʼalajtiʼob: «Wa u paalal Gad yéetel u paalal Rubén, tuláakal le máaxoʼob u prepararmubaʼob utiaʼal le baʼateʼel tu táan Jéeoba, ku kʼáatmáanskoʼob le Jordán ta wéeteleʼexoʼ yéetel ka ganarkeʼex le luʼumoʼob yanoʼob teʼeloʼ, teʼex túuneʼ yaan a tsʼáaikeʼextiʼob u luʼumil Galaad bey u herenciaʼobeʼ.+
30 Chéen baʼaleʼ wa letiʼob maʼ tu chʼaʼik u armaʼob utiaʼal u kʼáatmáanoʼob ta wéeteleʼexeʼ, letiʼobeʼ yaan u pʼáatloʼob kajtal ta wéeteleʼex teʼ tu luʼumil Canaánoʼ».
31 U paalaloʼob túun Gad yéetel u paalaloʼob Rubéneʼ tu yaʼaloʼob: «Toʼoneʼ yaan k-beetik le baʼax tsʼoʼok u yaʼaliktoʼon Jéeobaoʼ.
32 Yaan k-chʼaʼik k-armaʼob yéetel yaan k-kʼáatmáan tu táan Jéeoba utiaʼal k-bin tu luʼumil Canaán,+ chéen baʼaleʼ k-herenciaeʼ letiʼe luʼum yaan teʼ tu tséel le Jordánaʼ».
33 Tiʼ u paalal Gad, tiʼ u paalal Rubén+ yéetel tiʼ u táanchumuk tribu Manasés,+ u hijo Joséeʼ, Moiséseʼ tu tsʼáajtiʼob le luʼum ku gobernartik Seón,+ u rey le amorreoʼoboʼ bey xan le luʼum ku gobernartik Og,+ u reyil Basánoʼ, le luʼum ku pertenecer kaʼach tiʼ le kaajoʼob yanoʼob teʼeloʼ, tu tsʼáaj xan tiʼob le kaajoʼob yanoʼob tu baʼpachoʼoboʼ.
34 U paalaloʼob túun Gadeʼ tu beetoʼob* u kaajiloʼob Dibón,+ Atarot,+ Aroer,+
35 Atrot-sofán, Jazer,+ Jogbeá,+
36 Bet-nimrá+ yéetel Bet-arán,+ kaajoʼob yaan u pakʼiloʼob tu baʼpachoʼob, tsʼoʼoleʼ tu beetoʼob corraloʼob de tuunich utiaʼal u yalakʼ tamanoʼob.
37 U paalaloʼob Rubéneʼ tu beetoʼob u kaajiloʼob Esbón,+ Elealé,+ Kiriataim,+
38 Nebo,+ Baal-meón+ (le kaajoʼobaʼ kʼexaʼan u kʼaabaʼob) yéetel Sibmá. Yéetel joʼopʼ u tsʼáaikoʼob uláakʼ kʼaabaʼ tiʼ le kaajoʼob tu jel líiʼsoʼoboʼ.
39 U paalaloʼob Makir+ u hijo Manaséseʼ, binoʼob baʼateʼel tu contra Galaad, tu ganartoʼobeʼ ka tu tojolchʼintoʼob le amorreoʼob kajaʼanoʼob teʼeloʼ.
40 Moisés túuneʼ tu tsʼáaj Galaad tiʼ Makir u hijo Manasés, letiʼ túuneʼ tiʼ pʼáat kajtaliʼ.+
41 Jaír u hijo Manaséseʼ bin baʼateʼel tu contraʼobeʼ ka tu chʼaʼaj le chan kaajoʼob u tiaʼaloʼob kaʼachoʼ, ka tu tsʼáaj u kʼaabaʼtoʼob Avot-jaír.*+
42 Noba xaneʼ bin baʼateleʼ ka tu chʼaʼaj Kenat bey xan le mejen kaajoʼob yanoʼob tu baʼpachoʼ, letiʼ túuneʼ tu tsʼáaj u kʼaabaʼt Noba tiʼ le lugaroʼ, jeʼex u kʼaabaʼ letiʼeʼ.