Nehemías 6:1-19
6 Chéen pʼel aʼalaʼabik tiʼ Sanbalat, tiʼ Tobías,+ tiʼ Guésem le árabe+ yéetel tiʼ u maasil k-enemigoʼob tsʼoʼok in jel beetik u baʼpakʼiloʼob+ le kaaj yéetel mix junpʼéel jool pʼaatleʼ (kex teʼ kʼiinoʼob jeʼeloʼ maʼ in tsʼáa kaʼach u joonajiloʼob le kaajoʼ),+
2 Sanbalat yéetel Guésemeʼ tu séebaʼanil tu túuxtoʼob aʼalbilten lelaʼ: «Koʼoten ka k-múul chʼaʼtukult baʼax kʼiin ken k-muchʼba tiʼ le mejen kaajoʼob yaan tu Táax Luʼumil Onóoʼ».+ Pero chéen taak kaʼach u beetkoʼobten loob.
3 Le oʼolal teneʼ tin túuxtaj aʼalbiltiʼob: «Maʼ kun páajtal in taal tumen nojoch le meyaj táan in beetkoʼ. Wa kin pʼatik le meyaj utiaʼal in bin ta wiknaleʼexoʼ yaan u jeʼelel le meyajoʼ».
4 Letiʼobeʼ kantéen tu túuxtoʼob aʼalbilten jach lo mismo, cada juntéen xaneʼ lo mismo tin núukajtiʼob.
5 Sanbalat túuneʼ tu túuxtaj juntúul u j-meyaj yéetel le mismo mensajeoʼ, lelaʼ u cinco u téeneloʼ, le j-meyajoʼ u chʼaʼamaj junpʼéel carta jeʼekʼab yanil.
6 Le cartaoʼ ku yaʼalik: «Ichil le kaajoʼoboʼ táan u yaʼalaʼaleʼ teech yéetel le judíoʼoboʼ táan bin a tuklikeʼex a líikʼleʼex tu contra le reyoʼ,+ leloʼ bey xan u yaʼalik Guésem.+ Le oʼolal táan bin a beetik u baʼpakʼiloʼob le kaajoʼ. Ku yaʼalaʼaleʼ teech ken a beetaba u reyoʼob.
7 Tsʼoʼok bin xan a tsʼáaik profetaʼob utiaʼal u tʼaanoʼob ta woʼolal tiʼ tuláakal Jerusalén, letiʼobeʼ ku yaʼalikoʼob: ‹¡Yaan juntúul rey tu luʼumil Judá!›. Le baʼaloʼobaʼ jeʼel u kʼuchul u yojéelt le reyoʼ. Le oʼolal maʼalob ka taalakech utiaʼal k-múul tsikbaltik baʼax ken k-beete».
8 Chéen baʼaleʼ teneʼ tin túuxtaj aʼalbiltiʼ: «Mix junpʼéel tiʼ le baʼaloʼob ka waʼalik táan u yúuchloʼ, chéen teech inventartik».
9 Utiaʼal u xuʼulul k-beetik le meyajoʼ mantatsʼ kaʼach taak u sajakkúuntkoʼonoʼob tumen ku tuklikoʼob: «Beyoʼ yaan u desanimaroʼob u beetoʼob le meyajoʼ.* Yaan u xuʼulul u beetaʼal le meyajoʼ».+ Le oʼolal beoraaʼ teneʼ táan in kʼáatiktech ka a tsʼáa in muukʼ.*+
10 Ka tsʼoʼokeʼ binen tu yotoch Semaya u hijo Delayá, u hijo Meetabel mientras u kʼalmuba kaʼach tu yotoch, letiʼeʼ tu yaʼalajten: «Koʼox chʼaʼtuklik baʼax hora jeʼel u páajtal k-ilikba teʼ templooʼ, tu yotoch u jaajil Diosoʼ. Le kéen tsʼoʼokkeʼ k-kʼalik u joonajiloʼob le templooʼ tumen letiʼobeʼ yaan u taal u kíimsechoʼob, de áakʼab ken taalak u kíimsechoʼob».
11 Chéen baʼaleʼ teneʼ tin waʼalaj: «¿Unaj wa in púutsʼul kex teen le gobernadoroʼ? ¿Maʼ wa jeʼel u kíimsaʼal juntúul máax jeʼex teen wa ka okok teʼ templooʼ?+ ¡Junpuliʼ maʼ kin ookliʼ!».
12 Teen túuneʼ tin tsʼáa cuenta maʼ Dios túuxtmil le profetaoʼ, baʼaxeʼ Tobías yéetel Sanbalat+ contratart utiaʼal ka u tusen.
13 Letiʼeʼ contratartaʼab utiaʼal ka u sajakkúunten yéetel utiaʼal in kʼebantal, beyoʼ jeʼel u káajal u tʼaanoʼob kʼaas tin woʼolaleʼ yéetel jeʼel u yantal baʼax oʼolal u burlarkenoʼobeʼ.
14 In Dios, maʼ a tuʼubsik Tobías+ yéetel Sanbalat mix le baʼaxoʼob ku beetkoʼoboʼ, maʼ a tuʼubsik xan Noadías le profetisaoʼ, mix u maasil profetaʼoboʼ tumen letiʼobeʼ mantatsʼ táan kaʼach u yilkoʼob u sajakkúuntkenoʼob.
15 U baʼpakʼiloʼob túun le kaajoʼ tsʼoʼoksaʼab tu kʼiinil 25 tiʼ u mesil Elul,* 52 días tu bisaj.
16 Le máaxoʼob pʼekmiloʼon yéetel le kaajoʼob yanoʼob t-baʼpachoʼ chéen pʼel tu yuʼubiloʼob yéetel tu yililoʼob tsʼoʼok le meyajoʼ, jach suʼlakchajoʼob+ tumen tu tsʼáajoʼob cuenta áantaʼaboʼon tumen k-Dios utiaʼal k-beetik le meyajoʼ.
17 Teʼ kʼiinoʼob jeʼeloʼ le tsʼuuloʼob+ yaan Judáoʼ táan kaʼach u túuxtikoʼob yaʼab cartaʼob tiʼ Tobías, letiʼ xaneʼ táan kaʼach u núukiktiʼob.
18 Yaʼab tiʼ u kajnáaliloʼob Judáeʼ tu apoyartoʼob Tobías tumen letiʼeʼ u jaʼan Sekanías, u hijo Araj.+ Tsʼoʼoleʼ Jeyoanán u hijo Tobíaseʼ tsʼokaʼan kaʼach u beel yéetel u hija Mesulam+ u hijo Berekías.
19 Mantatsʼ kaʼach ku yaʼalikoʼobten baʼaloʼob maʼalobtak tu yoʼolal Tobías, le kéen tsʼoʼokkeʼ ku bin u tsikbaltoʼobtiʼ le baʼaxoʼob kin waʼalikoʼ. Tobías túuneʼ ku túuxtikten cartaʼob utiaʼal u sajakkúuntken.+
Notas
^ Ich hebreoeʼ ku yaʼalaʼal kaʼach «yaan u chʼúukul u kʼaboʼob utiaʼal le meyajoʼ».
^ Ich hebreoeʼ ku yaʼalaʼal kaʼach «u muukʼ in kʼaboʼob».
^ Ilawil página 2562.
