Esdras 5:1-17
5 Profeta Ageo+ yéetel profeta Zacarías+ u yáabil Idóeʼ,+ tʼaanajoʼob yéetel le judíoʼob yanoʼob Judá yéetel Jerusalénoʼ, tu beetoʼob tu kʼaabaʼ u Dios u kaajil Israel, le máax nuʼuktikoʼoboʼ.
2 Le oʼolal Zorobabel+ u hijo Sealtiel, yéetel Jesúa+ u hijo Jeozadakeʼ káaj u jel líiʼskoʼob u yotoch Dios,+ le yaan Jerusalénoʼ. Tiaʼan kaʼach u profetaʼob Dios tu yéeteloʼobeʼ yéetel táan kaʼach u yáantaʼaloʼob.+
3 Teʼ kʼiinoʼob jeʼeloʼ Tatenay u gobernadoril le kaajoʼob yanoʼob maas paachil tiʼ le Ríooʼ* bey xan Setar-bozenay yéetel u yéet meyajoʼobeʼ, binoʼob tu yiknal le judíoʼoboʼ ka tu kʼáatoʼobtiʼob: «¿Máax tsʼáateʼex permiso a beetkeʼex le naj yéetel a tsʼáaikeʼex le cheʼob tu lugaroʼ?».
4 Letiʼobeʼ tu kʼáatoʼob xan: «¿Bix u kʼaabaʼ le máakoʼob táan u beetkoʼob le meyajaʼ?».
5 Chéen baʼaleʼ Dioseʼ táan kaʼach u kanáantik u nuuktakil le judíoʼoboʼ.+ Maʼ jeʼelsaʼab le meyaj ku beetkoʼoboʼ tumen kʼaʼabéet u túuxtaʼal aʼalbil tiʼ rey Darío baʼax táan u yúuchul yéetel kʼaʼabéet u páaʼtaʼal junpʼéel carta tu parte le reyoʼ.
6 Lelaʼ junpʼéel copia tiʼ le carta túuxtaʼab tiʼ rey Darío tumen Tatenay le máax gobernartik le kaajoʼob yanoʼob maas paachil tiʼ le Ríooʼ, tumen Setar-bozenay yéetel u yéet meyajoʼob bey xan tumen le uláakʼ gobernadoroʼob yanoʼob maas paachil tiʼ le Ríooʼ.
7 Letiʼobeʼ tu túuxtoʼob junpʼéel carta tiʼ le reyoʼ, letiʼe baʼax tu tsʼíibtoʼobaʼ:
«Lelaʼ utiaʼal rey Darío:
¡Yanaktech yaʼab jeetsʼeelil!
8 Toʼoneʼ k-kʼáat k-tsʼáa u yojéelt le reyoʼ de ke binoʼon tu luʼumil Judá, tu yotoch le nojoch Diosoʼ. Le máakoʼoboʼ táan u meyaj nukuch tuunichoʼob tiʼob utiaʼal u jel líiʼskoʼob le naj teʼ tuʼux yaan kaʼachoʼ, yéetel táan u tsʼáaikoʼob cheʼob teʼ pakʼoʼoboʼ. Le kaajoʼ jach u tsʼaamaj u yóol u beet le meyajoʼ, le oʼolal jach maʼalob u bin le meyajoʼ.
9 Ka túun t-kʼáataj tiʼ u nuuktakil le kaajoʼ: ‹¿Máax tsʼáateʼex permiso a beetkeʼex le naj yéetel a tsʼáaikeʼex le cheʼob tu lugaroʼ?›.+
10 T-kʼáataj xan bix u kʼaabaʼob utiaʼal k-tsʼíibtik yéetel utiaʼal k-tsʼáaik a wojéelt u kʼaabaʼ le máakoʼob nuʼuktik le meyajoʼ.
11 Lelaʼ letiʼe baʼax tu núukoʼobtoʼonaʼ: ‹Toʼoneʼ k-meyajtik u Diosil le kaʼan yéetel le luʼumoʼ, yéetel táan k-jel líiʼsik le naj beetaʼan úuchjeakiloʼ, le najaʼ beetaʼab tumen juntúul tiʼ le maas nojoch reyoʼob yanchajaʼan tu luʼumil Israeloʼ.+
12 Chéen baʼaleʼ k-úuchben láakʼtsiloʼobeʼ tu beetoʼob u pʼuʼujul u Diosil le kaʼanoʼ,+ le oʼolal tu kʼuboʼob tu kʼab Nabucodonosor,+ u reyil Babilonia, juntúul caldeo. Letiʼ túuneʼ tu nikaj le najoʼ,+ ka tu bisaj le máakoʼob tu luʼumil Babiloniaoʼ.+
13 Chéen baʼaleʼ tu yáax añoil u reinar Ciro, u reyil Babiloniaeʼ, rey Ciroeʼ tu tsʼáaj u ordenil utiaʼal u jel líiʼsaʼal le naj utiaʼal Diosaʼ.+
14 Tsʼoʼoleʼ rey Ciroeʼ tu chʼaʼaj teʼ templo yaan Babilonia le vasoʼob de oro yéetel de plata ku meyaj kaʼach tu yotoch Diosoʼ, le baʼaloʼobaʼ letiʼe tu chʼaʼaj Nabucodonosor teʼ templo yaan kaʼach Jerusalénoʼ ka tu bisaj teʼ templo yaan Babiloniaoʼ.+ Ka tsʼoʼokeʼ le baʼaloʼobaʼ tsʼaʼab tiʼ juntúul máak ku kʼaabaʼtik Sesbazar,*+ le máax tsʼaʼab u beet u gobernadoril tumen Cirooʼ.+
15 Aʼalaʼab xan tiʼ tumen Ciro: «Chʼaʼ le vasoʼobaʼ ka a bisoʼob teʼ templo yaan Jerusalénoʼ yéetel ilawil u jel líiʼsaʼal u yotoch Dios teʼ tuʼux yaan kaʼachoʼ».+
16 Le oʼolal Sesbazar túuneʼ taaleʼ ka tu tsʼáaj u cimientoil u yotoch Dios,+ le yaan Jerusalénoʼ. Desde teʼ kʼiin jeʼeloʼ káaj u beetaʼal, pero tak bejlaʼa maʼ tsʼoʼokkeʼ›.+
17 Le oʼolal wa maʼalob u yilik le reyoʼ, xakʼaltaʼak u tesorería le rey yaan Babiloniaoʼ utiaʼal u yilaʼal wa Ciro le rey aʼal ka jel líiʼsaʼak u yotoch Dios, le yaan Jerusalénoʼ.+ Yéetel le kéen tsʼoʼokkeʼ ka túuxtaʼak tiʼ toʼon le baʼax ken u decidirt u beetik le reyoʼ».
Notas
^ Wa «tuláakʼ u tséel le Éufratesoʼ».
^ Maʼ xaaneʼ letiʼe Zorobabel ku yaʼalaʼal teʼ Esdras 2:2 yéetel 3:8.
