Ester 3:1-15
3 Ka tsʼoʼok tuláakal lelaʼ rey Asueroeʼ tu tsʼáaj maas autoridad tiʼ Amán+ u hijo Amedata le agaguitaoʼ,+ tu tsʼáajtiʼ maas autoridad ke tiʼ u maasil príncipeʼob yanoʼob tu yéeteloʼ.+
2 Tuláakal u j-meyajoʼob le rey yanoʼob tu jool u palaciooʼ ku chintaloʼob yéetel ku noktaloʼob tu táan Amán tumen bey u yaʼalmil le reyoʼ, chéen baʼaleʼ Mardoqueoeʼ maʼatech u yóotik kaʼach chintal yéetel noktal tu táan Amán.
3 Le oʼolaleʼ u j-meyajoʼob le rey yanoʼob tu jool u palaciooʼ tu yaʼaloʼob tiʼ Mardoqueo: «¿Baʼaxten maʼ ta beetik le baʼax u yaʼalmaj le reyoʼ?».
4 Sáamsamal le ku yaʼalikoʼob kaʼach tiʼ Mardoqueo pero letiʼeʼ maʼ tu beetaj u cuentail baʼax ku yaʼalikoʼobiʼ, tumen letiʼeʼ u yaʼalmajtiʼob de ke judío.+ Letiʼob túuneʼ tu yaʼaloʼob tiʼ Amán utiaʼal u yilkoʼob wa yaan u chéen ilaʼal+ baʼax ku beetik Mardoqueo.
5 Amáneʼ jach pʼuʼuj ka tu yilaj maʼ tu yóotik Mardoqueo chintal yéetel noktal tu táan.+
6 Chéen baʼaleʼ junpuliʼ maʼ u kʼáat u xuʼuls chéen tiʼ Mardoqueoiʼ tumen tsʼoʼok u yaʼalaʼaltiʼ tuʼux kaajil u taal Mardoqueo, le oʼolal Amáneʼ joʼopʼ u kaxtik bix jeʼel u xuʼulsik tiʼ tuláakal le judíoʼob yanoʼob tiʼ tuláakal u reino Asuerooʼ tumen taak u xuʼulsik kaʼach tiʼ tuláakal u kaajal Mardoqueo.
7 Teʼ yáax mes wa tu mesil Nisán,* tu 12 años+ táan u gobernar rey Asueroeʼ le máakoʼoboʼ tu jóoʼsoʼob Pur+ (lelaʼ u kʼáat u yaʼal Suerte) tu táan Amán utiaʼal u yilkoʼob baʼax kʼiin yéetel baʼax mesil ken u xuʼuls tiʼ le judíoʼoboʼ, ka tu yiloʼobeʼ lúub teʼ mes 12 wa tu mesil Adaroʼ.*+
8 Amán túuneʼ tu yaʼalaj tiʼ rey Asuero: «Yaan junpʼéel kaaj kʼiʼitpajaʼan ichil le kaajoʼob+ yaan tiʼ tuláakal le luʼumoʼob yaan yáanal u páajtalil le reyoʼ,+ le leyoʼob yaantiʼoboʼ jelaʼan tiʼ u leyoʼob u maasil kaajoʼoboʼ yéetel maʼatech u tsʼoʼokbeskoʼob le leyoʼob u tsʼaamaj le reyoʼ, maʼ tu taasik mix junpʼéel utsil tiʼ le rey u chéen ilik baʼax ku beetkoʼoboʼ.
9 Wa maʼalob u yilik le reyoʼ tsʼíibtaʼak junpʼéel ley utiaʼal u xuʼulsaʼaloʼob. Teneʼ jeʼel in tsʼáaik 342 toneladas* plata tiʼ le máaxoʼob yaan autoridad tiʼoboʼ utiaʼal ka u bisoʼob tu tesorería le reyoʼ».*
10 Le rey túunoʼ tu luʼsaj tu kʼab le anillo ikil u sellaroʼ+ ka tu tsʼáaj tiʼ Amán+ u hijo Amedata le agaguitaoʼ,+ u enemigo kaʼach le judíoʼoboʼ.
11 Ka tsʼoʼokeʼ le reyoʼ tu yaʼalaj tiʼ Amán: «Le plata yéetel le kaajoʼ ku tsʼaʼabaltech utiaʼal a beetik tu yéeteloʼob jeʼex maʼalob a wilkeʼ».
12 Teʼ día 13 tiʼ le yáax mesoʼ tʼaʼan tuláakal u secretarioʼob+ le reyoʼ. Letiʼobeʼ tu tsʼíibtoʼob+ tuláakal baʼax tu yaʼalaj Amán tiʼ le nukuch gobernadoroʼob tsʼaʼan tumen le reyoʼ* bey xan tiʼ le máaxoʼob ku gobernaroʼob tiʼ u maasil luʼumoʼob yanoʼob yáanal u páajtalil le reyoʼ yéetel tiʼ u príncipeiloʼob le jejeláas kaajoʼoboʼ. Tiʼ cada luʼumileʼ tsʼíibtaʼab jeʼex suuk u tsʼíibeʼ yéetel tiʼ cada kaajeʼ según u idioma. Tsʼíibtaʼab tu kʼaabaʼ rey Asuero, tsʼoʼoleʼ ka sellartaʼab yéetel le anillo ikil u sellaroʼ.+
13 Túuxtaʼab máakoʼob utiaʼal u biskoʼob le cartaʼob tiʼ tuláakal le luʼumoʼob ku gobernartaʼal tumen le reyoʼ. Le cartaʼoboʼ ku yaʼalikeʼ unaj u xuʼulsaʼal yéetel u kíimsaʼal tuláakal le judíoʼob tiʼ junpʼéeliliʼ kʼiinoʼ, táankelmoʼob yéetel chʼijaʼanoʼob, paalaloʼob yéetel koʼoleloʼob. Lelaʼ unaj u beetaʼal teʼ día 13 tiʼ le mes 12, lelaʼ u kʼáat u yaʼaleʼ tu mesil Adar,+ yéetel unaj u chʼaʼabal tuláakal le baʼaxoʼob yaantiʼoboʼ.+
14 Le baʼax ku yaʼalik le cartaʼoboʼ unaj u pʼáatal bey junpʼéel ley tiʼ tuláakal le luʼumoʼob yaan yáanal u páajtalil le reyoʼ yéetel unaj u tsʼaʼabal u yojéelt tuláakal le kaajoʼoboʼ, utiaʼal u prepararkubaʼob utiaʼal le kʼiin jeʼeloʼ.
15 Le máaxoʼob bis le cartaʼoboʼ binoʼob tu séebaʼanil+ jeʼex úuchik u ordenartik le reyoʼ. Le leyoʼ beetaʼab tu palacioil Susa.+ Ka tsʼoʼokeʼ le reyoʼ kulaj u yukʼ vino yéetel Amán, chéen baʼaleʼ u kajnáaliloʼob Susaeʼ maʼ tu jach naʼatkoʼob kaʼach baʼax táan u yúuchul.
Notas
^ Ilawil página 2573.
^ Ilawil página 2554.
^ Ich hebreoeʼ ku yaʼalaʼal kaʼach «10,000 talentos». Ilawil «Talento», página 2581.
^ Uláakʼ bix u traducirtaʼaleʼ «teneʼ yaan in tsʼáaik 10,000 talentos tu tesorería le rey utiaʼal u boʼotaʼal le máaxoʼob kun beetik le meyajoʼ».
^ Wa «le sátrapaʼoboʼ». Ilawil «Sátrapa», página 2579.
