Ester 4:1-17
4 Le ka tu yojéeltaj Mardoqueo+ le baʼax tsʼoʼok u beetaʼaloʼ+ jach yaachaj u yóol. Le oʼolal tu jataj u nookʼ, tu takaj junpʼéel toʼotoch nookʼ* yéetel tu tosaj taʼan tu yóokʼol. Tsʼoʼoleʼ ka jóokʼ tu chúumuk le kaajoʼ, letiʼeʼ táan kaʼach u yawat okʼol.
2 Chéen tu jool u palacio le rey kʼuchoʼ tumen mix máak unaj u yokol tu palacio le rey wa u takmaj toʼotoch nookʼoʼ.
3 Tiʼ tuláakal le luʼumiloʼoboʼ+ le kéen kʼuchuk kaʼach le ley tu tsʼáaj le reyoʼ le judíoʼoboʼ ku yaatal u yóoloʼob, ku ayunaroʼob,*+ ku yokʼoloʼob yéetel ku yawat okʼoloʼob. Yaʼab judíoʼobeʼ tiʼ pekekbaloʼob kaʼach yóokʼol toʼotoch nookʼoʼob yéetel yóokʼol taʼaneʼ.+
4 Le ka aʼalaʼab tiʼ reina Ester le baʼax táan u yúuchul tumen le koʼoleloʼob yéetel tumen le xiiboʼob* ku meyajoʼob tu yiknaloʼ, jach chiʼichnakchaji. Le oʼolal tu túuxtaj jujunpʼéel nookʼ tiʼ Mardoqueo utiaʼal ka u tak tu lugar le toʼotoch nookʼ u takmoʼ, pero letiʼeʼ maʼ tu yóotaj u chʼaʼiʼ.
5 Ester túuneʼ tu tʼanaj Atak, juntúul tiʼ le xiiboʼob* túuxtaʼab tumen le rey utiaʼal meyaj tu yiknaloʼ. Estereʼ tu túuxtaj Atak u kʼáat tiʼ Mardoqueo baʼaxten táan u beetik beyoʼ yéetel baʼax táan u yúuchul.
6 Le oʼolal Atakeʼ bin u yil Mardoqueo tu kʼíiwikil le kaajoʼ, tiaʼan kaʼach naatsʼ tu jool u palacio le reyoʼ.
7 Mardoqueoeʼ tu yaʼalajtiʼ tuláakal le baʼax tsʼoʼok u yúuchultiʼoʼ bey xan bukaʼaj taakʼin+ tu yaʼalaj u tsʼáaik Amán tu tesorería le rey utiaʼal ka xuʼulsaʼak tiʼ le judíoʼoboʼ.+
8 Tu tsʼáaj xan tiʼ Atak junpʼéel u copiail le ley tsʼíibtaʼab yéetel beetaʼab tu kaajil Susa+ utiaʼal u xuʼulsaʼal tiʼ le judíoʼoboʼ. Letiʼeʼ unaj kaʼach u yeʼesik tiʼ Ester yéetel u tsoliktiʼ+ baʼax ku yaʼalik le leyoʼ. Tsʼoʼoleʼ unaj u yaʼalik tiʼ Ester ka xiʼik yiknal le rey utiaʼal u kʼáatik ka chʼaʼabak óotsilil tiʼ u kaajal, u kaajal Ester.
9 Ka suunaj Atakeʼ tu yaʼalaj tiʼ Ester le baʼax tu yaʼalaj Mardoqueooʼ.
10 Ester túuneʼ tu tsolaj tiʼ Atak baʼax ken u yaʼal tiʼ Mardoqueo,+ tu yaʼalajtiʼ:
11 «Tuláakal u j-meyajoʼob le rey bey xan le kaajoʼob yanoʼob teʼ luʼumoʼob ku gobernartaʼal tumen le reyoʼ u yojloʼobeʼ yaan junpʼéel ley ku yaʼalikeʼ unaj u kíimsaʼal le xiib wa le koʼolel ku bin tu táankabil+ le tuʼux yaan le rey sin ke u tʼaʼanloʼ. Chéen jeʼel u páajtal u seguer u kuxtal wa le rey ku tichʼik u xóolteʼ de oro+ tu tojiloʼ. Tsʼoʼoleʼ teneʼ tsʼoʼok 30 días maʼ tʼaʼanken utiaʼal in wokol teʼ tuʼux yaan le reyoʼ».
12 Le ka aʼalaʼab tiʼ Mardoqueo le baʼax tu yaʼalaj Esteroʼ,
13 letiʼeʼ tu yaʼalaj tiʼ Ester: «Mix a chéen tuklikeʼ tumen tiaʼanech tu yotoch le reyoʼ maas jeʼel a salvarkaba ke tuláakal u maasil judíoʼoboʼ.
14 Tumen wa beora maʼ ta waʼalik mix baʼalaʼ, yaanal tuʼux kun taal le áantaj+ kʼaʼabéet tiʼ le judíoʼob utiaʼal u salvarkubaʼoboʼ, chéen baʼaleʼ teech yéetel u láakʼtsiloʼob a papáeʼ yaan a xuʼulsaʼaleʼex. ¿Kux túun wa kʼuchech a beetaba reinail utiaʼal a salvartik a kaajal tiʼ junpʼéel kʼiin beyaʼ?».+
15 Ester túuneʼ tu yaʼalaj tiʼ Mardoqueo:
16 «Xeeneʼ ka a muchʼ tuláakal le judíoʼob yanoʼob Susa utiaʼal a ayunareʼex+ tin woʼolaloʼ. Durante óoxpʼéel kʼiineʼ+ maʼ unaj a jaantikeʼex yéetel a wukʼikeʼex mix baʼaliʼ, bey unaj a beetkeʼex bul kʼiin yéetel bul áakʼaboʼ. Teen yéetel in x-meyajoʼobeʼ yaan xan k-ayunar. Kex tu contra baʼax ku yaʼalik le leyoʼ teneʼ yaan in bin teʼ tuʼux yaan le reyoʼ. Wa ku kʼaʼabéettal in kíimsaʼaleʼ, kin kíimsaʼal».
17 Mardoqueo túuneʼ bineʼ ka tu beetaj tuláakal le baʼax aʼalaʼabtiʼ tumen Esteroʼ.
Notas
^ Ilawil «Toʼotoch nookʼ», página 2582.
^ Ilawil página 2557.
^ Ich hebreoeʼ ku yaʼalaʼal kaʼach «eunucoʼob».
^ Ich hebreoeʼ ku yaʼalaʼal kaʼach «eunucoʼob».
