Ezequiel 8:1-18
8 Teʼ año seisoʼ* taal tin wóokʼol u poder Jéeoba, le máax yaan tuláakal autoridad tiʼoʼ. Lelaʼ úuch teʼ día cinco tiʼ le mes seisoʼ le kulukbalen kaʼach tin wotoch yéetel tiʼ kulukbal kaʼach u nuuktakil Judá tin táanoʼ.
2 Le táan kaʼach in paakatoʼ tin wilaj junpʼéel baʼal, lelaʼ bey juntúul máak táan u tóochʼbal u kʼáakʼileʼ. Desde tu chúumuk u wíinklil tak kabaleʼ tin wilaj yaan kʼáakʼiʼ.+ Desde tu chúumuk u wíinklil tak kaʼanaleʼ tin wilaj táan u léetsʼbal jeʼex u léetsʼbal le sak orooʼ.*+
3 Teneʼ tin wileʼ bey u kʼab tu tichʼaj tin tojileʼ ka tu machen tu tsoʼotsel in pool. Le ka tsʼoʼokeʼ ichil le baʼax tu tsʼáaj in wil Diosoʼ tin wilaj tu chʼúuyen kaʼanal junpʼéel baʼal yaan u muukʼeʼ* ka tu bisen Jerusalén. Tu bisen naatsʼ tiʼ le joonaj yaan tu tojil xamanoʼ,+ le yaan tu chan táankabil le templooʼ, teʼ tuʼux yaan le imagen ku beetik u pʼuʼujul Diosoʼ.+
4 Teʼeloʼ tin wilaj le páajtalil yéetel le kiʼichkelmil yaan tiʼ u Dios Israel+ jeʼex le tsʼaʼab in wil teʼ táax luʼumoʼ.+
5 Letiʼ túuneʼ tu yaʼalajten: «U paal máak, líiʼs a paakat tu tojil xaman». Teen túuneʼ tin líiʼsaj in paakat tu tojil xamaneʼ ka tin wileʼ tu yookbal le joonaj yaan naatsʼ tiʼ le altaroʼ tiaʼan le imagen ku beetik u pʼuʼujul Diosoʼ.
6 Le ka tsʼoʼokeʼ letiʼeʼ tu yaʼalajten: «U paal máak, ¿táan wa a wilik le baʼaloʼob jach táaj kʼaastak ku beetik u kaajil Israeloʼ?+ Le baʼaloʼobaʼ ku beetik in náachtal tiʼ le lugar santooʼ.+ Chéen baʼaleʼ yaan a wilik uláakʼ baʼaloʼob maas jach táaj kʼaastak tiʼ le jeʼeloʼobaʼ».
7 Le ka tsʼoʼokeʼ tu bisen tu yookbal u táankabil le templooʼ, le ka paakatnajeneʼ tin wilaj yaan junpʼéel jool teʼ pakʼoʼ.
8 Letiʼ túuneʼ tu yaʼalajten: «U paal máak, maas nojochkíint le jooloʼ». Le oʼolal teneʼ tin maas nojochkíintaj le jooloʼ ka tin wilaj jeʼel u páajtal u yokol máakeʼ.
9 Ka tsʼoʼokeʼ tu yaʼalajten: «Ookkecheʼ ka a wil le baʼaloʼob maʼ maʼalobtak yéetel jach kʼaastak ku beetkoʼoboʼ».
10 Teen túuneʼ ookeneʼ ka tin wilaj yaan baʼaloʼob póolaʼanoʼob tiʼ tuláakal le pakʼoʼ. Tin wilaj póolaʼan u jejeláasil baʼalcheʼob ku jíiltikubaʼob, baʼalcheʼob maʼ limpioʼob tu táan Diosiʼ+ bey xan tuláakal u x-lalaʼ* imagenoʼob u kaajil Israel.+
11 Tu táan le baʼaloʼobaʼ tiʼ waʼalakbal 70 u nuuktakil u kaajil Israeliʼ, ichiloʼobeʼ tiaʼan Jaazanías u paal Safániʼ.+ Cada juntúul tiʼ letiʼobeʼ u machmaj u nuʼukulil u tóokik incienso, u buutsʼil le kiʼibok inciensooʼ táan kaʼach u bin kaʼanal.+
12 Ka tsʼoʼokeʼ tu yaʼalajten: «U paal máak, ¿táan wa a wilik le baʼax táan u beetik ich éeʼjochʼeʼenil u nuuktakil Israeloʼ? ¿Táan wa a wilik le baʼax ku beetkoʼob teʼ cuarto tuʼux u tsʼaamaj u imagenoʼoboʼ? Letiʼobeʼ ku yaʼalikoʼob: ‹Jéeobaeʼ maʼ tu yilik baʼax k-beetik. Jéeobaeʼ tsʼoʼok u xúumpʼattik le luʼumaʼ›».+
13 Letiʼeʼ tu yaʼalaj xan ten: «Yaan a wilik táan u beetkoʼob baʼaloʼob maas jach táaj kʼaastak tiʼ le jeʼeloʼobaʼ».
14 Letiʼ túuneʼ tu bisen naatsʼ tiʼ u joonajil u yotoch Jéeoba, le yaan xamanoʼ, ka tin wileʼ yaan koʼoleloʼob kulukbaloʼob táan u yokʼoloʼob tu yoʼolal dios Tamuz.
15 Le ka tsʼoʼokeʼ tu yaʼalajten: «U paal máak, ¿táan wa a wilik leloʼ? Yaan a wilik baʼaloʼob maas jach táaj kʼaastak tiʼ le jeʼeloʼobaʼ».+
16 Ka tsʼoʼokeʼ tu bisen teʼ chan táankab yaan tu yotoch Jéeobaoʼ.+ Ka tin wileʼ jach tu jool u templo Jéeoba, entre le altar yéetel le templooʼ, yaan kex 25 xiiboʼob u sutmaj u paachoʼob tiʼ u templo Jéeoba. Letiʼobeʼ u sutmaj u yichoʼob tu tojil lakʼin* yéetel táan u chintaloʼob tu táan le Kʼiinoʼ.+
17 Letiʼ túuneʼ tu yaʼalajten: «U paal máak, ¿táan wa a wilik leloʼ? U kaajil Judáeʼ táan u beetik baʼaloʼob jach táaj kʼaastak, táan u beetkoʼob loob tiʼ tuláakal le luʼumoʼ+ yéetel maʼ tu xuʼulul u ofenderkenoʼob, chéen baʼaleʼ maʼ chéen leloʼ, beoraaʼ táan u máanskoʼob tu jool in wich junpʼéel baʼal jach táaj in pʼekmaj.*
18 Le oʼolal yaan in láalik in pʼujaʼanil tu yóokʼoloʼob. Maʼ ken in chʼaʼ óotsilil tiʼob mix kun yaatal in wóol kéen in wil bix u tsʼoʼokoltiʼob.+ Kex ka awatnakoʼob tin xikineʼ maʼ ken in wuʼuyoʼob».+
Notas
^ Tu seis años bisaʼak táanxel luʼumil rey Joaquín, Ezequiel yéetel uláakʼ judíoʼob.
^ Lelaʼ oro xaʼakʼtaʼan yéetel plata.
^ Maʼ xaaneʼ teʼelaʼ táan u tʼaan tiʼ u poder Dios wa tiʼ juntúul ángel.
^ Ich hebreoeʼ le tʼaanaʼ yaan yil yéetel u «taʼ baʼalcheʼ», yéetel ku meyaj utiaʼal u yúuchul tʼaan tiʼ baʼaloʼob pʼektaʼanoʼob.
^ Wa «este».
^ Ich hebreoeʼ ku yaʼalaʼal kaʼach «junpʼéel gajo». Maʼ xaaneʼ le gajoaʼ ku meyaj kaʼach utiaʼal u adorartaʼal imagenoʼob.
