Jueces 2:1-23
2 U ángel Jéeobaeʼ+ lukʼ Guilgaleʼ+ ka bin Bokim, ka tu yaʼalaj tiʼ le israelitaʼoboʼ: «Teen jóoʼseʼex Egipto ka tin taaseʼex teʼ luʼum in jurarmaj in tsʼáaik tiʼ a úuchben láakʼtsileʼexoʼ.+ Tsʼoʼoleʼ tin waʼalaj: ‹Mix bikʼin in jubik le pacto* tin beetaj ta wéeteleʼexoʼ.+
2 Chéen baʼaleʼ teʼexeʼ maʼ unaj a beetkeʼex junpʼéel acuerdo yéetel u kajnáaliloʼob le luʼumaʼ+ yéetel unaj a nikikeʼex u altaroʼob›.*+ Pero teʼexeʼ maʼ a wuʼuyeʼex in tʼaaniʼ.+ ¿Baʼaxten maʼ a beeteʼexiʼ?
3 Le oʼolal tsʼoʼok xan in waʼalik: ‹Maʼ ken in luʼsoʼob ta táaneʼex,+ yaan u pʼáatloʼob bey junpʼéel trampa tiʼ teʼexeʼ,+ yéetel u diosoʼobeʼ yaan u beetkoʼob a náachtaleʼex tiʼ teen›».+
4 Ka tsʼoʼok u yuʼubik le israelitaʼob le baʼax tu yaʼalaj u ángel Jéeobaoʼ tuláakal le kaajoʼ káaj u yawat okʼol.
5 Le oʼolal letiʼobeʼ tu yaʼaloʼobeʼ le lugaroʼ yaan u kʼaabaʼtik Bokim.* Ka tsʼoʼokeʼ tu beetoʼob sacrificioʼob tiʼ Jéeoba teʼ lugaroʼ.
6 Le ka tu yaʼalaj Josué tiʼ le kaaj ka xiʼikoʼ cada juntúul tiʼ le israelitaʼoboʼ binoʼob u chʼaʼob le luʼum tsʼaʼantiʼob bey herenciaoʼ.+
7 Le kaajoʼ maʼ xuʼul u meyajtik Jéeoba tuláakal le kʼiinoʼob kuxaʼan Josuéoʼ bey xan tuláakal le kʼiinoʼob kuxaʼan u nuuktakil le kaaj kuxlajoʼob maas yaʼab kʼiinoʼob ke Josué, yéetel tu yiloʼob tuláakal le nukuch baʼaloʼob tu beetaj Jéeoba tu yoʼolal u kaajil Israeloʼ.+
8 Josué u hijo Nun, le máax meyajtik Jéeobaoʼ, kíim le yaantiʼ 110 añosoʼ.+
9 Ka túun tu mukoʼob teʼ luʼum tsʼaʼantiʼ bey herenciaoʼ, lelaʼ tiaʼan Timnat-eres,*+ teʼ montañaʼob yaan Efraín tu xamanil* le Montaña Gaasoʼ.+
10 Tuláakal le generación jeʼeloʼ kíimoʼob jeʼex kíimik u yúuchben láakʼtsiloʼobeʼ, ka tsʼoʼokeʼ yanchaj uláakʼ generación. Letiʼobeʼ maʼ u kʼaj óoloʼob kaʼach Jéeobaiʼ yéetel maʼ u yojloʼob le baʼaxoʼob tu beetaj yoʼolal Israeloʼ.
11 Le oʼolal le israelitaʼoboʼ káaj u beetkoʼob baʼax maʼ maʼalob tu táan Jéeobaiʼ, yéetel káaj xan u adorarkoʼob le Baaloʼoboʼ.+
12 Bey úuchik u xúumpʼatkoʼob Jéeoba, le máax jóoʼsoʼob Egiptooʼ.+ Tu xúumpʼattoʼob u Dios u papáʼob, ka binoʼob tu paach uláakʼ diosoʼob, u diosoʼob le kaajoʼob yanoʼob tu baʼpachoʼoboʼ.+ Letiʼobeʼ chinlajoʼob tu táanoʼob, le oʼolal tu beetoʼob u pʼuʼujul Jéeoba.+
13 Tu xúumpʼattoʼob Jéeobaeʼ ka káaj u adorarkoʼob Baal bey xan u imageniloʼob Astoret.*+
14 Yoʼolal lelaʼ jach pʼuʼuj Jéeoba tu contra u kaajil Israel, ka tu chaʼaj u yokol máakoʼob tokik le baʼaxoʼob yaantiʼoboʼ.+ Letiʼeʼ tu kʼuboʼob* tu kʼab le u enemigoʼob yanoʼob tu baʼpachoʼoboʼ,+ le oʼolal maʼ páajchaj u pʼáatloʼob waʼatal tu táan u enemigoʼobiʼ.+
15 Jeʼel tuʼuxak ka u sutubaʼob kaʼacheʼ tiaʼan u kʼab Jéeoba tu contraʼobeʼ. Dioseʼ tu beetaj u taal kʼaas tu yóokʼoloʼob,+ úuch jach jeʼex u yaʼalmil Jéeobaoʼ, úuch jeʼex tu jurartil Jéeoba tiʼ letiʼoboʼ.+ Le oʼolal jach muʼyajnajoʼob.*+
16 Jéeoba túuneʼ tu tsʼáaj juezoʼob utiaʼal u salvartaʼaloʼob tiʼ le máaxoʼob tokik le baʼaxoʼob yaantiʼoboʼ.+
17 Kex beyoʼ letiʼobeʼ maʼ tu yóotoʼob u yuʼuboʼob u tʼaan le juezoʼoboʼ yéetel binoʼob tu paach uláakʼ diosoʼob yéetel chinlajoʼob tu táanoʼob. Letiʼobeʼ tu séebaʼanil tu pʼatoʼob le maʼalob bej tuʼux máan u yúuchben láakʼtsiloʼoboʼ. Kex u yúuchben láakʼtsiloʼob tu tsʼoʼokbesoʼob u mandamientoʼob Jéeobaeʼ+ letiʼobeʼ maʼ tu beetoʼobiʼ.
18 Le kéen u tsʼáa Jéeoba juntúul juez tiʼobeʼ,+ mantatsʼ tiaʼan kaʼach Jéeoba yéetel le juezoʼ, yéetel ku salvarkoʼob kaʼach tu kʼab u enemigoʼob tuláakal le kʼiinoʼob kuxaʼan le juezoʼ. Jéeobaeʼ ku chʼaʼik óotsilil tiʼob*+ kéen u yil bix u beetaʼal u muʼyajoʼob tumen le máaxoʼob maltratarkoʼob+ yéetel ku beetik u kʼasaʼaniloʼob tiʼoboʼ.
19 Pero le kéen kíimik le juezoʼ letiʼobeʼ ku kaʼa joʼopʼol u beetkoʼob baʼaloʼob kʼaastak, maas ke tiʼ le tu beetaj u papáʼoboʼ. Ku binoʼob kaʼach tu paach uláakʼ diosoʼob, ku adorarkoʼob yéetel ku chintaloʼob tu táanoʼob.+ Maʼ tu pʼatoʼob le baʼax ku beetkoʼoboʼ mix xuʼul u beetik u tercoiloʼobiʼ.
20 Tak ka kʼuch u kʼiinil u sen pʼuʼujul Jéeoba tu contra Israel+ ka tu yaʼalaj: «Le kaajaʼ maʼ u tsʼoʼokbes le pacto tin beetaj+ yéetel u yúuchben láakʼtsiloʼoboʼ yéetel maʼ u yuʼub in tʼaaniʼ,+ le oʼolaleʼ
21 teneʼ maʼ ken in luʼs tu táanoʼob mix junpʼéel tiʼ le kaajoʼob tu pʼataj Josué ka kíimoʼ.+
22 Lelaʼ utiaʼal in wilik wa u kaajil Israeleʼ yaan u seguer u xíimbal teʼ bej uts tu tʼaan Jéeoba+ jeʼex úuchik u beetik u papáʼoboʼ».
23 Le oʼolal Jéeobaeʼ tu chaʼaj u pʼáatal le kaajoʼobaʼ, maʼ tu jáan jóoʼsoʼobiʼ yéetel maʼ tu kʼuboʼob tu kʼab Josuéiʼ.
Notas
^ Wa «acuerdo».
^ Ilawil página 2554.
^ U kʼáat u yaʼal «Máakoʼob ku Yokʼoloʼob».
^ Tiʼ Josué 19:50 yéetel 24:30 ku yaʼalaʼaltiʼ «Timnat-séra».
^ Wa «norte».
^ Ilawil página 2557.
^ Ich hebreoeʼ ku yaʼalaʼal kaʼach «tu konoʼob».
^ Wa «jach sufrirnajoʼob».
^ Wa «yaatal u yóol».
