Jueces 21:1-25
-
Ku salvartaʼal u tribu Benjamín (1-25)
21 Le tiaʼanoʼob túun Mizpáoʼ+ le israelitaʼoboʼ tu jurartoʼob lelaʼ: «Mix juntúul tiʼ toʼon ken u tsʼáa u hija tiʼ juntúul benjaminita utiaʼal u yatante».+
2 Le oʼolal le israelitaʼoboʼ binoʼob Beteleʼ+ ka pʼáatoʼob kutal tu táan u jaajil Dios tak ka tardechaji, táan kaʼach u yawat okʼoloʼob.
3 Yéetel táan kaʼach u yaʼalikoʼob: «Yuum Jéeoba, u Dios u kaajil Israel, ¿baʼaxten tsʼoʼok u yúuchul tu luʼumil Israel junpʼéel baʼal beyaʼ? ¿Baʼaxten unaj u saʼatal junpʼéel u tribuil Israel?».
4 Ka sáaschaj tuláakʼ kʼiineʼ le kaajoʼ líikʼ tempranoeʼ ka tu beetoʼob junpʼéel altar utiaʼal u kʼubkoʼob tóokbil ofrendaʼob bey xan ofrendaʼob utiaʼal múul janal.+
5 Ka tsʼoʼokeʼ u kaajil Israeleʼ tu yaʼalaj: «Tiʼ tuláakal u tribuiloʼob Israeleʼ, ¿máaxoʼob maʼ taaloʼob u muchʼuba yéetel u kaajal Jéeobaiʼ?», tumen letiʼobeʼ tu jurartoʼobeʼ jeʼel máaxak maʼ u bin tu táan Jéeoba teʼ lugar ku kʼaabaʼtik Mizpáoʼ, yaan u kíimsaʼal, maʼ ken u jeche.
6 Le israelitaʼoboʼ jach yaachaj tu yóoloʼob le baʼax úuch tiʼ Benjamín, u sukuʼunoʼoboʼ. Letiʼobeʼ tu yaʼaloʼob: «Bejlaʼeʼ tsʼoʼok u xuʼulsaʼal tiʼ junpʼéel u tribuil Israel.
7 ¿Baʼax unaj k-beetik utiaʼal k-kaxtik u yatan le benjaminitaʼob pʼaatloʼob wa k-jurarmaj tu táan Jéeoba+ maʼ ken k-tsʼáatiʼob mix juntúul tiʼ k-hijaʼob utiaʼal u yatantoʼoboʼ?».+
8 Letiʼobeʼ tu kʼáatoʼob xan: «Ichil u tribuiloʼob Israeleʼ, ¿máaxoʼob maʼ taaloʼob Mizpá tu táan Jéeobaiʼ?».+ Teʼ kʼiin u muchʼmuba le israelitaʼoboʼ mix juntúul kaʼach tiʼ u kajnáaliloʼob Jabés-galaad yanoʼobiʼ.
9 Le ka xoʼok le máakoʼob u muchʼmubaʼoboʼ ilaʼab minaʼan mix juntúul tiʼ u kajnáaliloʼob Jabés-galaadiʼ.
10 Le oʼolal u kaajil Israeleʼ tu túuxtaj 12,000 máakoʼob jach u yojloʼob baʼateʼel tu kaajil Jabés-galaad, ka tu yaʼaloʼobtiʼob: «Xeen a xuʼulseʼex u kajnáaliloʼob Jabés-galaad yéetel espada, tak le koʼoleloʼoboʼ bey xan le mejen paalaloʼoboʼ.+
11 Letiʼe baʼax unaj a beetkeʼexaʼ: unaj a xuʼulskeʼex tuláakal le xiiboʼoboʼ bey xan tuláakal le koʼoleloʼob tsʼoʼok u yantal baʼal u yiloʼob yéetel juntúul xiiboʼ».
12 Ichil u kajnáaliloʼob Jabés-galaadeʼ tu kaxtoʼob 400 x-chʼúupalaloʼob junpuliʼ maʼ yanak baʼal u yiloʼob yéetel xiibiʼ, ka tu bisoʼob Siló,+ teʼ tuʼux muchʼukbaloʼob tu luʼumil Canaánoʼ.
13 Le ka tsʼoʼokeʼ tuláakal le kaajoʼ tu túuxtoʼob tʼaan tiʼ le benjaminitaʼob yanoʼob teʼ kaʼanal lugar ku kʼaabaʼtik Rimónoʼ,+ tu yaʼaloʼobtiʼob maʼ ken u beetoʼob mix baʼal tiʼob.
14 Le oʼolal suunaj le benjaminitaʼoboʼ. Ka tsʼoʼokeʼ le israelitaʼoboʼ tu tsʼáajoʼob tiʼ le benjaminitaʼob le x-chʼúupalaloʼob maʼ tu kíimsoʼob ichil le koʼoleloʼob yaan kaʼach Jabés-galaadoʼ,+ chéen baʼaleʼ maʼ chúukpaj utiaʼal tuláakaliʼ.
15 Le kaajoʼ yaachaj tu yóol le baʼax úuch tiʼ Benjamínoʼ+ tumen Jéeobaeʼ tu beetaj u yantal división ichil u tribuiloʼob Israel.
16 U nuuktakil le kaajoʼ tu yaʼaloʼob: «Bey tsʼoʼok u láaj xuʼulsaʼal tiʼ le koʼoleloʼob yaan kaʼach Benjamínoʼ, ¿baʼax jeʼel u páajtal k-beetik utiaʼal k-kaxtik u yatan le xiiboʼob maʼ tocarnajtiʼoboʼ?».
17 Jujuntúul tiʼ letiʼobeʼ tu núukoʼob: «Unaj u yantal u herencia le benjaminitaʼob pʼaatloʼoboʼ, utiaʼal maʼ u saʼatal junpʼéel u tribuil Israel.
18 Chéen baʼaleʼ toʼoneʼ maʼ tu páajtal k-tsʼáaik k-hijaʼob utiaʼal u yatantoʼob tumen u kaajil Israeleʼ u jurarmaj lelaʼ: ‹Maldecirtaʼak le máax ken u tsʼáa juntúul koʼolel tiʼ Benjamín utiaʼal u yatante›».+
19 Ka tsʼoʼokeʼ tu yaʼaloʼob xan: «¡Ilawileʼex! Cada añoeʼ ku beetaʼal junpʼéel fiesta tiʼ Jéeoba tu kaajil Siló,+ le yaan tu xamanil Betel yéetel tu chikʼinil le bej ku lukʼul Betel utiaʼal u bin Sikemoʼ yéetel tiaʼan xan tu noojolil Lebonáeʼ».
20 Le oʼolal tu yaʼaloʼob tiʼ u paalal Benjamín: «Xeeneʼex utiaʼal a taʼakikabaʼex teʼ tuʼux pakʼaʼan le uvaʼoboʼ.
21 Le kéen a wileʼex u jóokʼol óokʼot u x-lóoʼbayan chʼúupalalil* Silóeʼ unaj a jóokʼleʼex teʼ tuʼux pakʼaʼan le uvaʼob utiaʼal a chʼaʼikeʼex juntúul tiʼ le x-chʼúupalaloʼob yaan Siló utiaʼal a watanteʼexoʼ, le kéen tsʼoʼokkeʼ unaj a suuteʼex teʼ luʼum u tiaʼal Benjamínoʼ.
22 Wa ku taal u papáʼob yéetel u sukuʼunoʼob u quejartubaʼobeʼ, toʼoneʼ yaan k-aʼaliktiʼob: ‹Eʼeseʼex a wutsileʼex tiʼ toʼon bey xan tiʼ letiʼob, tumen le ka binoʼon baʼateʼel utiaʼal k-kaxtik u yatanoʼobeʼ maʼ páajchaj k-kaxtik utiaʼal tuláakaliʼ,+ tsʼoʼoleʼ teʼexeʼ maʼ culpableʼex tiʼ mix baʼaliʼ, tumen maʼ teʼex kʼub a hijaʼex utiaʼal u yatantoʼobiʼ›».+
23 Ka tsʼoʼokeʼ le benjaminitaʼoboʼ tu beetoʼob jach jeʼex aʼalaʼabiktiʼoboʼ. Cada juntúul tiʼ letiʼobeʼ tu pʼíitkuchtaj juntúul tiʼ le x-chʼúupalaloʼob ku yóokʼotoʼob utiaʼal u kʼuchul u beetuba u yatanoʼ. Ka tsʼoʼokeʼ suunajoʼob teʼ luʼum tsʼaʼantiʼob bey herenciaoʼ, tu jel líiʼsoʼob le kaajoʼoboʼ+ ka pʼáatoʼob kajtaliʼ.
24 Teʼ kʼiinoʼob jeʼeloʼ le israelitaʼoboʼ lukʼoʼob teʼ tuʼux u muchʼmubaʼoboʼ, cada juntúuleʼ bin teʼ tuʼux yaan u tribu yéetel teʼ tuʼux yaan u familiaoʼ. Lukʼoʼob teʼeloʼ ka binoʼob teʼ luʼum tsʼaʼantiʼob bey herenciaoʼ.
25 Teʼ kʼiinoʼob jeʼeloʼ minaʼan kaʼach juntúul rey tu luʼumil Israel,+ cada juntúuleʼ ku beetik kaʼach le baʼax maʼalob u yilkeʼ.*