Kʼáatchiʼob ku beetaʼal

¿Máaxoʼob le «maʼatech u meyajtikoʼob Dios» ku yaʼalik 2 Corintios 6:​14?

Kaʼapʼéel tiʼ Corintios 6:​14, ku yaʼalik: «Maʼ a nupkabaʼex yéetel máaxoʼob maʼatech u meyajtikoʼob Dios». U contextoil le versículoaʼ ku yeʼesikeʼ Pabloeʼ táan kaʼach u tʼaan tiʼ le máaxoʼob maʼatech u meyajtikoʼob Dios teʼ yáax siglooʼ.

Por ejemploeʼ, Pabloeʼ tu kʼeyaj le yáax cristianoʼoboʼ tumen ku biskoʼob u sukuʼunoʼob tu táan le máaxoʼob «maʼatech u meyajtikoʼob Diosoʼ» (1 Corintios 6:6). Pabloeʼ táan kaʼach u tʼaan tiʼ le juezoʼob ku meyajoʼob teʼ tribunal yaan Corintooʼ. Teʼ kaʼapʼéel carta tu tsʼíibtaj apóstol Pablooʼ tu yaʼaleʼ le máaxoʼob maʼatech u meyajtikoʼob Dios wa le «maʼatech u creerkoʼob Diosoʼ» pixaʼan u tuukuloʼob tumen Satanás, bey tsʼaʼantiʼob junpʼéel jaajay nookʼ tu táan u yichoʼobeʼ. Le máakoʼobaʼ maʼ u kʼáat u meyajtoʼob Jéeobaiʼ, tumen jeʼex tu yaʼalil apóstol Pabloeʼ, le kéen u «natsʼuba máak yiknal Jéeobaeʼ, ku luʼsaʼal le jaajay nookʼoʼ» (2 Corintios 3:​16; 4:4).

Jujuntúul máaxoʼob maʼatech u meyajtikoʼob Dioseʼ ku adorarkoʼob yaanal diosoʼob yéetel ku yoksikubaʼob tiʼ política (2 Corintios 6:​15, 16). Chéen baʼaleʼ maʼ tuláakloʼob ku tsʼáaikubaʼob tu contra le máaxoʼob meyajtik Jéeobaoʼ. Jujuntúuloʼobeʼ u kʼáat u kanoʼob u jaajil. Uláakʼoʼobeʼ tsʼokaʼan u beeloʼob yéetel máaxoʼob meyajtik Jéeoba, chéen baʼaleʼ kex beyoʼ u kʼáatoʼob pʼáatal yéetel u núupoʼob (1 Corintios 7:​12-​14; 10:27; 14:​22-​25; 1 Pedro 3:​1, 2). Jeʼex k-ilkoʼ apóstol Pabloeʼ táan kaʼach u tʼaan tiʼ le máaxoʼob maʼ táakaʼanoʼob ichil le múuchʼulil teʼ yáax siglooʼ (Hechos 2:​41; 5:​14; 8:​12, 13).

Le baʼax ku yaʼalik 2 Corintios 6:14, jach ku yáantik le máaxoʼob meyajtik Diosoʼ. U suukileʼ ku meyaj utiaʼal u tsʼaʼabal consejo tiʼ le máaxoʼob taak u tsʼoʼokol u beeloʼoboʼ (Mateo 19:​4-6). Le máax tsʼoʼok u kʼubik u kuxtal tiʼ Jéeoba yéetel tsʼoʼok u yokjaʼoʼ maʼ unaj u kaxtik u núup ichil le máaxoʼob maʼatech u meyajtikoʼob Diosoʼ, tumen letiʼobeʼ yaanal baʼax ku creerkoʼob yéetel yaanal baʼax ku tsʼáaikoʼob táanil ichil u kuxtaloʼob.

Chéen baʼaleʼ, ¿kux túun le máaxoʼob táan u tsʼaʼabaltiʼob xook yéetel le Biblia yéetel ku muchʼkubaʼob t-éetel bey xan le publicadoroʼob maʼ okjaʼanajaʼanoʼoboʼ? ¿Jeʼel wa u páajtal u yaʼalaʼaleʼ maʼatech u meyajtikoʼob Dios? Maʼatech, tumen letiʼobeʼ táan u beetkoʼob kʼeexoʼob ichil u kuxtaloʼob utiaʼal u meyajtikoʼob Dios (Romanos 10:10; 2 Corintios 4:​13). Por ejemploeʼ Cornelioeʼ kʼaj óoltaʼab bey juntúul máak «jach u kʼubmaj u yóol u adorart Dios» tak táanil tiʼ u yokjaʼ (Hechos 10:2).

Juntúul publicador maʼ okjaʼanajaʼaneʼ maʼ táakaʼan ichil le máaxoʼob maʼatech u adorarkoʼob Dios ku yaʼalik 2 Corintios 6:​14. ¿U kʼáat wa túun u yaʼaleʼ juntúul máax okjaʼanajaʼaneʼ maʼalob ka tsʼoʼokok u beel yéetel juntúul máax maʼ okjaʼanajaʼaniʼ? Maʼatech. ¿Baʼaxten? Yoʼolal le consejo tu tsʼáaj apóstol Pablo tiʼ le viudaʼob ku meyajtikoʼob Diosoʼ. Letiʼeʼ tu yaʼalaj: «Jeʼel u páajtal u tsʼoʼokol u beel yéetel jeʼel máaxak u kʼáateʼ, pero chéen yéetel juntúul máax ku meyajtik Yuumtsil» (1 Corintios 7:​39). Jeʼex k-ilkoʼ le máaxoʼob okjaʼanajaʼanoʼoboʼ chéen unaj u tsʼoʼokol u beeloʼob yéetel máaxoʼob «meyajtik Yuumtsil».

¿Baʼax u kʼáat u yaʼal le tʼaanoʼob máaxoʼob ‹meyajtik Yuumtsil› yéetel ku ‹tsʼáaik u fejoʼob tiʼ Cristooʼ›? Le tʼaanoʼobaʼ ku chíikpajal tiʼ Romanos 16:8-10 yéetel tiʼ Colosenses 4:7. Apóstol Pabloeʼ meyajnajtiʼ le tʼaanoʼob utiaʼal u tʼaan tiʼ u ‹yéet meyajoʼob Cristo›, tiʼ máaxoʼob ‹beetik baʼaloʼob maʼalobtak›, tiʼ máaxoʼob ‹chúukaʼan u yóoloʼob› yéetel tiʼ u yéet ‹esclavoiloʼob tiʼ Yuumtsil›.

¿Bix túun u pʼáatal máak «esclavoil tiʼ Yuumtsil»? Letiʼe kéen u beet yéetel kiʼimak óolal le baʼax ku yaʼalaʼaltiʼoʼ yéetel le kéen u tsʼáa táanil ichil u kuxtal le baʼaxoʼob ku yaʼalik Cristooʼ. Jesúseʼ tu yaʼalaj: «Wa yaan máax u kʼáat taal tin paacheʼ u pʼektuba yéetel u chʼaʼ u cheʼil u muʼyaj, ka taalak mantatsʼ tin paach» (Mateo 16:24). ¿Bix túun u káajal u bin máak tu paach Cristo? Letiʼe kéen u kʼub u kuxtal tiʼ Diosoʼ yéetel kéen okjaʼanakoʼ. Le kéen okjaʼanakeʼ ku yeʼesik tsʼoʼok u kʼubik u kuxtal tiʼ Dios. * Le máax meyajtik Diosoʼ wa taak u tsʼoʼokol u beeleʼ kʼaʼabéet u kaxtik juntúul máax u esclavo Dios yéetel u esclavo Yuumtsil Jesucristo (Santiago 1:1).

Le máax ku xokik le Biblia yéetel u testigoʼob Jéeoba yéetel táan u tsʼáaik ichil u kuxtal le baʼax táan u kanikoʼ jach maʼalob baʼax ku beetik. Chéen baʼaleʼ todavía maʼ u kʼub u kuxtal tiʼ Jéeobaiʼ, maʼ u chʼaʼtukult u meyajtikiʼ yéetel u tsʼáaik táanil ichil u kuxtaliʼ. Letiʼeʼ todavía táan u beetik kʼeexoʼob ichil u kuxtal utiaʼal ka páajchajak u kʼubik u kuxtal tiʼ Jéeoba yéetel u yokjaʼ. Le oʼolal todavía maʼ listo utiaʼal u beetik junpʼéel nojoch kʼeex ichil u kuxtal jeʼex u tsʼoʼokol u beeloʼ.

Koʼox aʼalikeʼ juntúul máax meyajtik Dioseʼ ku joʼopʼol u enamorartik juntúul máax táan u tsʼaʼabal xook tiʼ yéetel le Bibliaoʼ. Chéen baʼaleʼ u kʼáat u páaʼt hasta u yokjaʼ utiaʼal u tsʼoʼokol u beel tu yéetel. ¿Maʼalob wa le baʼax ku beetkoʼ? Maʼatech, tumen maʼ xaaneʼ le máax táan u tsʼaʼabal xook tiʼoʼ yaan u yokjaʼ chéen tumen taak u tsʼoʼokol u beel yéetel le máax meyajtik Diosoʼ.

Jach maʼalob le consejo tu tsʼáaj apóstol Pablo yoʼolal le tsʼoʼokol beeloʼ tumen le máaxoʼob táan u tsʼaʼabal xook tiʼoboʼ yaan u kʼuchul u kʼiinil u yokjaʼob. ¿Maʼalob wa túun ka tsʼoʼokok u beel máak yéetel juntúul máax líikʼ ichil u kaajal Jéeoba yéetel úuch joʼopʼok u beetik u publicadoril pero maʼ okjaʼanajaʼaniʼ? Wa beyoʼ, ¿baʼaxten túun maʼ u kʼub u kuxtal tiʼ Jéeobaiʼ? ¿Ku creertik wa le baʼax táan u kanikoʼ? Juntúul máax beyoʼ ku creertik Dios, chéen baʼaleʼ maʼ u chʼaʼtukult u meyajtikiʼ.

Le consejo tu tsʼáaj apóstol Pablo yoʼolal le tsʼoʼokol beeloʼ utiaʼal u bin utsil tiʼ máak (Isaías 48:17). Le máaxoʼob taak u tsʼoʼokol u beeloʼoboʼ kʼaʼabéet tu kaʼatúuliloʼob u kʼubmaj u kuxtaloʼob tiʼ Jéeoba, beyoʼ yaan u bin maʼalobil tiʼob yéetel yaan u kiʼimaktal u yóoloʼob. Wa ku tsʼoʼokol u beel máak yéetel juntúul máax ku meyajtik Dioseʼ táan u yeʼesik chúukaʼan óolal tiʼ letiʼ. Ikil u beetik beyoʼ yaan u bin utsil tiʼ tumen Dioseʼ chúukaʼan u yóol tiʼ máax chúukaʼan xan u yóol (Salmo 18:25).

[Nota]

[Oochel]

Dioseʼ chúukaʼan u yóol tiʼ máax chúukaʼan xan u yóol