• SÍIJ TU JAʼABIL: 1963

• TUʼUX SÍIJI: GRAN BRETAÑA

• KAʼACHEʼ: CHÉEN TÁAN U TUKLIK U MAAS KAʼANTAL U XOOK

BIX KUXLIKEN KAʼACHI:

Síijen tu noojolil u luʼumil Londres, u kʼaabaʼ le kaajoʼ Croydon. In taataʼobeʼ síijoʼob tu islail San Vincente. Letiʼobeʼ anchaj nueve u túulal u paalaloʼob. In maama kaʼacheʼ ku bin teʼ Iglesia Metodistaoʼ, chéen baʼaleʼ teneʼ maʼ taak kaʼach in wokol tiʼ mix junpʼéel religióniʼ. Tin chichnileʼ jach taak in wojéeltik tuláakal baʼal, le oʼolal le kéen yanakten vacacioneseʼ kin bin in majáant yaʼab libroʼob teʼ biblioteca utiaʼal in bin in xok yiknal junpʼéel lagooʼ.

Le ka jóokʼen tin xookeʼ káaj in wáantik le máakoʼoboʼ. Táanileʼ joʼopʼ in wáantik le máaxoʼob minaʼan u yotochoʼoboʼ, le máaxoʼob yaan wa baʼax discapacidad tiʼoboʼ bey xan le máaxoʼob istikyaj u kaanbaloʼoboʼ. Le ka tsʼoʼokeʼ ooken universidad utiaʼal in chʼaʼik junpʼéel curso utiaʼal in kanik bix jeʼel u tsʼaʼakal máakeʼ. Le ka tin tsʼoʼoksaj in xookeʼ tin wileʼ jach maʼalob úuchik u binten tumen le meyajoʼob anchajtenoʼ jach maʼalob úuchik u boʼotaʼalten. Ka tsʼoʼokeʼ joʼopʼ in meyaj tin cuenta, chéen kʼaʼabéetten kaʼach junpʼéel computadora yéetel Internet utiaʼal in beetik in meyajoʼ. U suukileʼ kin viajar táanxel luʼumil yéetel kin pʼáatal teʼ hotel maas uts tin wichoʼ. Teʼeloʼ kin bin teʼ gimnasiooʼ, teʼ tuʼux ku tsʼaʼabal masajeʼoboʼ yéetel teʼ salón de bellezaoʼ. Tsʼoʼoleʼ kin xíimbal teʼ jatsʼuts lugaroʼob yanoʼob teʼeloʼ. Kin tuklik kaʼacheʼ mix baʼal ku bineltikten, chéen baʼaleʼ mantatsʼ kin tuukul xan tiʼ le máaxoʼob kʼaʼabéet áantaj tiʼoboʼ.

BIX TU KʼEXIL IN KUXTAL LE BIBLIAOʼ:

Xáanchaj taak in wojéeltik baʼax oʼolal kuxaʼanoʼon yéetel baʼax u biilal le kuxtalaʼ. Chéen baʼaleʼ mix juntéen tin xokaj le Bibliaoʼ. Tu añoil 1999, taal u xíimbalten in wíitsʼin Margaret yéetel juntúul u amiga, tu kaʼatúulaloʼob u testigoʼob Jéeoba. U amiga in wíitsʼinoʼ jach táaj maʼalob úuchik u tratarken, hasta maʼ tin tsʼáaj cuenta baʼax hora ka tin waʼalajtiʼ jeʼel in xokik le Biblia tu yéeteloʼ. Chéen baʼaleʼ in meyaj yéetel le bix kuxliken kaʼachoʼ jach yaʼab tiempo ku bisikten, le oʼolal xáanchaj ka joʼopʼ in tsʼáaik ichil in kuxtal le baʼax táan in kanikoʼ.

Tu añoil 2002, binen kajtal tu noojol-chikʼinil Inglaterra tumen in kʼáat ka maas kaʼanchajak in xook. Teʼeloʼ káaj u suuktal in bin yéetel in hijo teʼ reuniónoʼob ku beetik u testigoʼob Jéeobaoʼ. Kex in xokmaj in universidadeʼ mix juntéen in tukult bix jeʼel u yutstal tuláakal le problemasoʼ, hasta ka joʼopʼ in xokik le Biblia ka tin naʼatoʼ. Yoʼolal le baʼax ku yaʼalik Mateo 6:​24, tin tsʼáaj cuentaeʼ maʼ tu páajtal in meyajtik kaʼatúul tsʼuuloʼob. Kʼaʼabéet kaʼach in yéeyik máax ken in meyajte: Dios wa le ayikʼaliloʼoboʼ.

Junpʼéel año antes tiʼ leloʼ tsʼokaʼaniliʼ in bin yaʼab u téenel in muchʼinba tu yotoch jujuntúul testigoʼob utiaʼal k-xokik le libro ¿Existe un Creador que se interese por nosotros? * Yoʼolal le baʼax tin kanoʼ tin naʼateʼ chéen Jéeoba kun páajtal u yutskíintik tuláakal le problemas yanoʼ. Chéen baʼaleʼ teʼ universidadoʼ ku kaʼansaʼal kaʼacheʼ utiaʼal u yantal u biilal u kuxtal máakeʼ maʼ kʼaʼabéet u creertik Diosiʼ, le baʼax ku kaʼansaʼaloʼ jach tu beetaj in kʼuuxil. Kex chéen dos meses káajak in xookeʼ tin xúumpʼattaj ka tin chʼaʼtuklaj in maas kʼaj óoltik Dios.

Junpʼéel baʼax beet in kʼexik in kuxtaleʼ letiʼe baʼax ku yaʼalik Proverbios 3:​5, 6. Teʼeloʼ ku yaʼalik: «Kʼub a wóol tiʼ Jéeoba yéetel tuláakal a puksiʼikʼal, maʼ a confiar chéen tiʼ le naʼat yaantechoʼ. Chʼaʼ en cuenta tiʼ tuláakal baʼax ka beetik, letiʼ túuneʼ yaan u beetik u bintech utsil ichil a kuxtal». Mix baʼal jeʼel u páajtal u keʼetel yéetel u kʼaj óoltik máak Dioseʼ mix u xook universidad mix le taakʼinoʼ. Úuchik in kanik baʼaloʼob jeʼex u promesaʼob Jéeoba yéetel úuchik u kʼubik u kuxtal Jesúsoʼ maas taakchaj in kʼubik in kuxtal tiʼ Jéeobaoʼ. Le oʼolal tu mesil abril tiʼ 2003, okjaʼanajen bey u testigo Jéeobaeʼ. Desde le jeʼeloʼ joʼopʼ in wilik in kuxtal chéen yéetel le baʼaxoʼob jach kʼaʼabéettenoʼ.

UTSILOʼOB TSʼOʼOK U TAASIKTEN:

Jach jatsʼuts in wilik in biskinba yéetel Jéeoba, maʼ tu páajtal in ketik yéetel mix baʼal. Bejlaʼeʼ jach yaanten jeetsʼelil yéetel kiʼimak in wóol. Tsʼoʼoleʼ jach uts tin tʼaan in biskinba yéetel le máaxoʼob meyajtik Jéeobaoʼ.

Jach jatsʼuts in wilik in bin teʼ reuniónoʼoboʼ tumen teʼeloʼ kin kanik baʼax ku yaʼalik le Bibliaoʼ. Tsʼoʼoleʼ jach jatsʼuts in wilik in kaʼansik tiʼ u maasil le baʼax táan in kanikoʼ. Le oʼolal desde junio tiʼ 2008, joʼopʼ in maas tsʼáaik in wóol in kaʼans tiʼ u maasil le baʼax táan in kanikoʼ. Beyoʼ ku páajtal in wáantik le máakoʼob utiaʼal ka yanak u biilal u kuxtaloʼoboʼ yéetel utiaʼal ka páajchajak u yantaloʼob tiʼ junpʼéel jatsʼuts paraíso. Yáax in wuʼuyik jach kiʼimak in wóolaʼ, le oʼolal kin tsʼáaik u graciasil tiʼ Jéeoba tumen bejlaʼeʼ yaan u biilal in kuxtal.

• SÍIJ TU JAʼABIL: 1973

• TUʼUX SÍIJI: AUSTRIA

• KAʼACHEʼ: JACH KU APOSTAR

BIX KUXLIKEN KAʼACHI:

Síijen tu kaajil Braunau (Austria). In familia kaʼacheʼ católicoʼob. Teʼ tuʼux síijenoʼ maʼ jach óotsil le máakoʼoboʼ yéetel maʼ jach yaʼab maleanteʼob yaniʼ.

Tu añoil 1984 le yaanten 11 añosoʼ úuch junpʼéel baʼal jach mix bikʼin ken in tuʼubse, kíim juntúul in amigo tiʼ junpʼéel accidente. Tsʼoʼoleʼ jach teʼ mismo kʼiinoʼ tin báaxtaj fútbol tu yéetel, jach xáanchaj táan u afectarken úuchik u kíimil in amigo. Maʼ tu xuʼulul in tuklik kaʼach baʼax wal ku yúuchul tiʼ máak kéen kíimkeʼ.

Le ka jóokʼen tin xookeʼ káaj in meyaj de electricista, maʼ xáanchaj tiʼ leloʼ joʼopʼ u suuktalten in apostar. Kex yaʼab taakʼin kin xupik ikil in apostareʼ láayliʼ yaʼab taakʼin ku pʼáatalteneʼ. Jach yaʼab tiempo kin máansik kaʼach táan in beetik deporte yéetel táan in wuʼuyik junpʼéel clase paax ku kʼaabaʼtik heavy metal yéetel punk. Jach kʼaas in kuxtal kaʼachi, tsʼoʼoleʼ jach yaʼab in bin tiʼ discotecaʼob yéetel tiʼ fiestaʼob. Kex kin beetik jeʼel baʼaxak in kʼáateʼ kin wuʼuyik maʼ kiʼimak in wóoliʼ yéetel minaʼan u biilal in kuxtal.

BIX TU KʼEXIL IN KUXTAL LE BIBLIAOʼ:

Tu añoil 1995, juntúul u testigo Jéeoba tsʼoʼok u chan antal u jaʼabileʼ taal tin wotocheʼ ka tu tsʼáajten junpʼéel libro tuʼux yaan le preguntaaʼ: «¿Baʼax ku yúuchul tiʼ máak kéen kíimik»? Teneʼ tin wóotaj in chʼaʼ le librooʼ tumen láayliʼ jach yaachajaʼan in wóol úuchik u kíimil in amigoeʼ. Maʼ chéen tin xokaj u núukil le pregunta jeʼeloʼ, baʼaxeʼ tin láaj xokaj le librooʼ.

Tin kanaj baʼax ku yúuchul tiʼ máak kéen kíimik yéetel tin kanaj xan uláakʼ baʼaloʼob. Teen kaʼacheʼ católicoen, le oʼolal chéen Jesús kin creertik. Chéen baʼaleʼ úuchik in maas kaanbal tiʼ le Bibliaoʼ páajchaj in biskinba yéetel Jéeoba Dios, u taata Jesús. Kiʼimakchaj in wóol ka tin kaneʼ Jéeobaeʼ maʼ náach yanil tiʼ le máaxoʼob meyajtikoʼ (Mateo 7:​7-​11). Tin kanaj xaneʼ letiʼeʼ jach uts u modos yéetel ku beetik baʼax ku prometertik. Le jeʼeloʼ tu beetaj u maas taaktal in wojéeltik bix tsʼoʼok u béeytal le profecíaʼob yanoʼob teʼ Bibliaoʼ. Le baʼax tin xokoʼ tu beetaj u maas yantal in fe tiʼ Jéeoba.

Maʼ xáanchaj ka tin tsʼáaj cuentaeʼ chéen u testigoʼob Jéeoba ku tsʼáaik u yóol u yáantoʼob le máakoʼob utiaʼal u kankoʼob baʼax ku yaʼalik le Bibliaoʼ. Kin tsʼíibtik tuláakal le tekstoʼob yaan ichil le publicaciónoʼoboʼ kéen tsʼoʼokkeʼ kin kaxtik teʼ Biblia católica yaanten kaʼachoʼ. Jeʼex úuchik in xakʼaltik baʼax táan in kanikeʼ bey úuchik in tsʼáaik cuentaeʼ tsʼoʼok in kaxtik le jaajil religiónoʼ.

Teʼ Bibliaoʼ tin kaneʼ Jéeobaeʼ u kʼáat ka k-beet baʼax ku yaʼalik. Le ka tin xokaj Efesios 4:​22-​24, tin naʼateʼ kʼaʼabéet in pʼatik le «úuchben modos» yaanten kaʼachoʼ utiaʼal ka yanakten «le túumben modos [...] uts tu tʼaan Diosoʼ». Tu séebaʼanil tin chʼaʼtuklaj in pʼatik le kʼaakʼas kuxtal kin bisik kaʼachoʼ bey xan in apostar (1 Corintios 6:​9, 10). Utiaʼal ka páajchajak in beetik tuláakal le kʼeexoʼoboʼ kʼaʼabéet in pʼatik tuláakal le amigoʼob yaanten kaʼachoʼ yéetel in kaxtik amigoʼob ku beetkoʼob baʼax ku yaʼalik Dios.

Maʼ chéen chʼaʼabil úuchik in beetik tuláakal le kʼeexoʼoboʼ. Chéen baʼaleʼ páajchaj in kaxtik maʼalob amigoʼob le ka káaj in bin teʼ reuniónoʼob ku beetik u testigoʼob Jéeobaoʼ. Seguernaj in kanik baʼax ku yaʼalik le Bibliaoʼ yéetel in tuukul tiʼ baʼax táan in kanik. Jujunpʼíitil úuchik u xuʼulul in wuʼuyik le paaxoʼob suuk ten kaʼachoʼ. Tin kʼexaj bix in vestirkinba yéetel tin kʼexaj baʼaxoʼob kin tsʼáaik táanil ichil in kuxtal. Tu añoil1995, okjaʼanajen bey u testigo Jéeobaeʼ.

UTSILOʼOB TSʼOʼOK U TAASIKEN:

Bejlaʼeʼ maʼ tin sen tsʼíiboltik taakʼin, maʼ tin séeb pʼuʼujul yéetel maʼ tin chiʼichnaktal yoʼolal le baʼax ku taal u kʼiin u yúuchloʼ.

Jach kiʼimak in wóol tumen táan in meyajtik Jéeoba junmúuchʼ yéetel máakoʼob jejeláas tuʼux u taaloʼob. Letiʼobeʼ kex jeʼel baʼaxak táan u aktáantkoʼob ichil u kuxtaloʼobeʼ chúukaʼan u yóoloʼob tiʼ Jéeoba. Kiʼimak in wóol xan tumen maʼ táan in kaxtik in wutsiliʼ, baʼaxeʼ táan in tsʼáaik táanil ichil in kuxtal in meyajtik Jéeoba yéetel in wáantik u maasil máakoʼob.

• SÍIJ TU JAʼABIL: 1963

• TUʼUX SÍIJI: GRAN BRETAÑA

• KAʼACHEʼ: KU YUʼUBIK MINAʼAN U BIILAL U KUXTAL

BIX KUXLIKEN KAʼACHI:

Síijen tu luʼumil Inglaterra, chéen baʼaleʼ le ka tu tsʼáajten siete añoseʼ in familiaeʼ bin kajtal Australia tiʼ junpʼéel lugar ku kʼaabaʼtik Gold Coast, tu estadoil Queensland. Teʼ lugaroʼ yaʼab u kʼuchul turistaʼobiʼ. Maʼ ayikʼaloʼon kaʼachiʼ, chéen baʼaleʼ mix baʼal ku bineltiktoʼon.

Mantatsʼ anchajten baʼax kʼaʼabéet, kex beyoʼ maʼ kiʼimak in wóol kaʼachiʼ kin wuʼuyik minaʼan u biilal in kuxtal. In papá kaʼacheʼ jach ku káaltal, le oʼolal kin wuʼuyik bey maʼ in yaabiltmeʼ. Maʼ uts tin tʼaan kaʼach ka káalakiʼ tumen jach ku maltratartik in maama. Xáanchaj hasta ka tin naʼataj baʼaxten bey u modos in papáoʼ. Letiʼeʼ jach yaʼab baʼaxoʼob tu muʼyajtaj le ka bin u beet u soldadoil tu luʼumil Malasiaoʼ.

Tin paalil ka tin kanaj káaltal. Le ka tu tsʼáajten 16 añoseʼ tin pʼataj le escuelaoʼ ka ooken utiaʼal in beetik in soldadoil. Teʼ tiempo jeʼeloʼ joʼopʼ in probartik jejeláas drogaʼob, tsʼoʼoleʼ jach viciochajten in tsʼuʼutsʼik chamal yéetel in káaltal. Kaʼacheʼ chéen sábado yéetel domingo kin káaltal, chéen baʼaleʼ ka tin tsʼáaj cuentaeʼ sáamsamal táan in wukʼik.

Kex 20 años yaanten ka joʼopʼ in tuklik wa jach tu jaajil yaan Dios. Kin waʼalik kaʼachi: «Wa yaan Dioseʼ, ¿baʼaxten ku chaʼik u kíimil yéetel u sufrir máak?». Hasta káaj in beetik poemaʼob tuʼux kin culpartik Dios yoʼolal le kʼasaʼanil yaan way yóokʼol kaabaʼ.

Veintitrés años yaanten ka xuʼul in beetik in soldadoil. Anchajten uláakʼ meyajoʼob, hasta binen junpʼéel año táanxel luʼumil. Chéen baʼaleʼ láayliʼ kin wuʼuyik minaʼan u biilal in kuxtaleʼ. Como bey in wuʼuyikinbaoʼ hasta maʼ tin tsʼíiboltik u yantal in wotoch wa u yantalten junpʼéel maʼalob meyaj. Chéen baʼax in kʼáat kaʼacheʼ in káaltal yéetel in wuʼuyik paax.

Jach kʼajaʼanten baʼax kʼiin ka taakchaj in maas ojéeltik baʼax u biilal le kuxtalaʼ. Letiʼe ka binen Polonia utiaʼal in xíimbaltik le campo de concentración yaan Auschwitzo’. Tsʼokaʼaniliʼ in xokik tuláakal le baʼaloʼob jach kʼaastak beetaʼab teʼ campooʼ. Le ka tin wilaj bukaʼaj nojchileʼ káaj u yaatal in wóol. Maʼ tu páajtal in naʼatik baʼaxten jach kʼasaʼan wíinik. Le táan in xíimbal teʼ campooʼ táan u bin u yáalal u jaʼil in wich yéetel táan in tuklik baʼaxten úuch leloʼ.

BIX TU KʼEXIL IN KUXTAL LE BIBLIAOʼ:

Tu añoil 1993 ka suunajen tiʼ in xíimbaleʼ joʼopʼ in kaxtik teʼ Biblia u núukil le preguntaʼob yaanten kaʼachoʼ. Maʼ xáanchaj tiʼ leloʼ taal u xíimbalten kaʼatúul u testigoʼob Jéeoba. Letiʼobeʼ tu invitartenoʼob tiʼ junpʼéel asamblea kun beetbil tiʼ junpʼéel estadio yaan naatsʼ tiʼ in wotochoʼ, ka túun tin chʼaʼtuklaj in biniʼ.

Kex wa jaypʼéel meses anteseʼ binen teʼ estadio utiaʼal in chaʼantik junpʼéel partidooʼ. Chéen baʼaleʼ teʼ vezaʼ jach jelaʼan le baʼax beetaʼaboʼ. Le Testigoʼoboʼ jach uts u modosoʼob yéetel jach maʼalob bix u vestirmilubaʼob. Tsʼoʼoleʼ u mejen paalaloʼobeʼ jach maʼalob u portarkubaʼob. Mix bikʼin kun tuʼubulten baʼax tu beetoʼob tu yorail le janaloʼ. Le Testigoʼoboʼ binoʼob janal teʼ tuʼux ku yúuchul báaxaloʼ, chéen baʼaleʼ le ka tsʼoʼok u janaloʼobeʼ mix junpʼéel chan basura tu pʼatoʼob teʼ suʼukoʼ. Pero le baʼax maas jatsʼuts úuchik in wilkoʼ letiʼe in wilik jach maʼalob u biskubaʼob yéetel kiʼimak u yóoloʼoboʼ. Le jeʼeloʼ desde úuch joʼopʼok in tsʼíiboltik u yantalten. Maʼ kʼajaʼanten baʼax aʼalaʼab teʼ discursoʼob máansaʼaboʼ, pero le baʼax maʼ tuʼubten tak bejlaʼoʼ letiʼe bix úuchik u portarkuba le Testigoʼoboʼ.

Teʼ áakʼab jeʼeloʼ kʼaʼajten baʼax u yaʼalmajten juntúul in primo, letiʼeʼ jach ku xokik le Bibliaoʼ yéetel u yojel baʼax ku kaʼansik jejeláas religiónoʼob. Úuchjeakileʼ in primoeʼ tu yaʼalajteneʼ Jesúseʼ tu tsolaj bix jeʼel u páajtal u kʼaj óoltaʼal máaxoʼob u jaajil cristianoʼoboʼ (Mateo 7:​15-​20). Teen túuneʼ taakchaj in wojéeltik baʼaxten le Testigoʼoboʼ maʼ beyoʼob jeʼex u maasil religiónoʼoboʼ. Yáax in wuʼuyik yaanten junpʼíit esperanzaoʼ.

Ka máan junpʼéel semanaeʼ suunaj le Testigoʼob tu invitartenoʼob teʼ asambleaoʼ. Tu kʼáatoʼobten wa jeʼel in xokik le Biblia tu yéeteloʼoboʼ ka tin waʼaleʼ jeʼel in wóotkeʼ. Tsʼoʼoleʼ káaj xan in bin teʼ reuniónoʼob ku beetkoʼoboʼ.

Jeʼex u bin in xokik le Bibliaoʼ bey úuchik in kanik maʼ tiʼ Dios yaan u culpail le baʼaloʼob kʼaastak ku yúuchloʼ. Tsʼoʼoleʼ tin kanaj xaneʼ letiʼeʼ ku yaatal u yóol kéen u yil u beetaʼal baʼaloʼob kʼaastak tumen le máakoʼoboʼ (Génesis 6:6; Salmo 78:40, 41). Tin chʼaʼtuklaj maʼ in beetik u yaatal u yóol Jéeoba, baʼaxeʼ in kiʼimakkúuntik u yóol (Proverbios 27:11). Xuʼul in tsʼuʼutsʼik chamal, in káaltal yéetel xuʼul xan in núupkʼebantal. Marzo tiʼ 1994 ka okjaʼanajen bey u testigo Jéeobaeʼ.

UTSILOʼOB TSʼOʼOK U TAASIKTEN:

Bejlaʼeʼ kiʼimak in wóol yéetel kin wuʼuyikeʼ tuláakal baʼax yaanten. Wa yaanten problemaseʼ maʼatech in káaltal, baʼaxeʼ kin pʼatik tuláakal tu kʼab Jéeoba (Salmo 55:22).

Tsʼoʼok u máan diez años tsʼoʼokok in beel yéetel juntúul u testigo Jéeoba ku kʼaabaʼtik Karen, letiʼeʼ jach kiʼichpan yéetel yaan juntúul u hija ku kʼaabaʼtik Nella. Tu yóoxtúuliloʼon jach jatsʼuts k-ilik k-áantik u maasil máakoʼob utiaʼal u kaanbaloʼob yoʼolal Jéeoba. Bejlaʼeʼ jach yaan u biilal in kuxtal.