Kʼeʼex u kuxtaloʼob tumen le Bibliaoʼ

¿Baʼax beet u yantal kiʼimak óolal tiʼ juntúul empresario escociail? ¿Baʼax áant juntúul máak brasilil utiaʼal u pʼatik le kʼaakʼas kuxtal yaantiʼ kaʼachoʼ? ¿Baʼax áant juntúul xiʼipal esloveniail utiaʼal u xuʼulul u sen káaltal? Koʼox ilik baʼax ku yaʼalikoʼob.

«Bey jach maʼalob u binten kaʼacheʼ» (JOHN RICKETTS)

SÍIJ TU AÑOIL: 1958

TUUX SÍIJI: ESCOCIA (REINO UNIDO)

KAʼACHEʼ: EMPRESARIO YÉEETEL JACH MAʼALOB U BINTIʼ

BIX KUXLIKEN KAʼACHI: Tin chichnileʼ jach junpuliʼ maʼ tin máansaj óotsililiʼ. In papá kaʼacheʼ juntúul u nojchil le soldadoʼob yaan Gran Bretañaoʼ. Le oʼolal maʼ junpʼéeliliʼ tuʼux kajaʼanoʼon kaʼachiʼ, maʼ chéen Escocia kajlajoʼoniʼ. Binoʼon kajtal Inglaterra, Alemania, Kenia, Malasia, Irlanda yéetel Chipre. Ka tu tsʼáajten ocho añoseʼ jejeláas tuʼux xooknajen tu luʼumil Escocia. Le ka máan kʼiineʼ tin graduartinba tu universidadil Cambridge.

Le ka tu tsʼáajten 20 añoseʼ meyajnajen tiʼ junpʼéel empresa tuʼux ku jóoʼsaʼal petróleo, ocho años meyajnajeniʼ. Tu káajbaleʼ meyajnajen América del Sur, tsʼoʼoleʼ África yéetel tu tsʼookeʼ Australia Occidental. Le ka tsʼoʼokeʼ tin tsʼáaj in empresa tu luʼumil Australia yéetel le ka máan kʼiineʼ tin konaj.

Yoʼolal le taakʼin anchajten úuchik in konik le empresaoʼ páajchaj in jubilarkinba le yaanten 40 añosoʼ. Tumen jach yaʼab tiempo yaanten kaʼacheʼ kaʼatéen tin xíimbaltaj tuláakal u luʼumil Australia yéetel in moto. Tsʼoʼoleʼ viajarnajen xan tiʼ tuláakal yóokʼol kaab. Bey jach maʼalob u binten kaʼacheʼ.

BIX TU KʼEXIL IN KUXTAL LE BIBLIAOʼ: Tak antes tiʼ in jubilarkinbaeʼ taak kaʼach in tsʼáaik gracias tiʼ Dios yoʼolal le bix u binten ichil in kuxtaloʼ. Le oʼolal káaj in bin teʼ Iglesia Anglicanaoʼ, le tuʼux kin bisaʼal desde tin chichniloʼ. Chéen baʼaleʼ teʼeloʼ maʼatech u kaʼansaʼal baʼax ku yaʼalik le Bibliaoʼ. Ka tsʼoʼokeʼ káaj in kaʼansaʼal tumen le mormonoʼoboʼ, chéen baʼaleʼ letiʼob xaneʼ maʼatech u jach chʼaʼikoʼob en cuenta baʼax ku yaʼalik le Bibliaoʼ.

Juntéenjeakeʼ taal u testigoʼob Jéeoba u xíimbaltenoʼob. Tu séebaʼanil tin tsʼáaj cuentaeʼ le baʼax ku kaʼanskoʼoboʼ teʼ Biblia ku jóoʼskoʼoboʼ. Junpʼéel tiʼ le tekstoʼob tu xokoʼobtenoʼ 1 Timoteo 2:3, 4. Teʼeloʼ ku yaʼalikeʼ Dioseʼ «u kʼáat ka u salvartuba tuláakal u jejeláasil máakoʼob yéetel ka kʼuchuk u kʼaj óoltoʼob tubeel le jaajoʼ». Tin wileʼ le Testigoʼoboʼ maʼ chéen ku kaʼanskoʼob baʼax ku yaʼalik le Bibliaoʼ, baʼaxeʼ ku yáantkoʼob máak utiaʼal u kan tubeel baʼax ku yaʼalik.

Le Testigoʼoboʼ tu yáantenoʼob in kan baʼax ku yaʼalik le Bibliaoʼ. Por ejemploeʼ tu kaʼansoʼobteneʼ Dios yéetel Jesúseʼ maʼ táakaʼanoʼob tiʼ junpʼéel trinidadiʼ (Juan 14:28; 1 Corintios 11:3). Teneʼ desde úuch taak kaʼach in wojéeltik baʼax le trinidadoʼ, chéen baʼaleʼ tin tsʼáaj cuentaeʼ chéen tin perdertaj tiempo. Jeʼel bakáanaʼ maʼ istikyaj u naʼataʼal u jaajiliʼ.

Maʼ xáanchaj ka káaj in bin teʼ reuniónoʼob ku beetik u testigoʼob Jéeobaoʼ. Jach jatsʼuts tin wilil bix u modosoʼob yéetel bix u kuxtaloʼob. Yoʼolal le yaabilaj ku yeʼeskoʼob ichiloʼoboʼ tin tsʼáaj cuentaeʼ letiʼob u jaajil religiónoʼ (Juan 13:35).

UTSILOʼOB TSʼOʼOK U TAASIKTEN: Le ka tsʼoʼok in wokjaʼeʼ tin kʼaj óoltaj Diane, desde tu chichnileʼ u taataʼobeʼ u testigoʼob Jéeoba. Letiʼeʼ jach kiʼichpan yéetel jatsʼuts u modos, le oʼolal tsʼoʼok in beel tu yéetel. Dianeeʼ jach ku yáantken, le oʼolal kin wilkeʼ bey junpʼéel bendición tu tsʼáajten Jéeobaeʼ.

Toʼon kaʼacheʼ jach k-kʼáat bin áantaj tuʼux maas kʼaʼabéet u kaʼansaʼal u Reino Dios. Le oʼolal tu añoil 2010, binoʼon Centroamérica tu luʼumil Belice, wayeʼ k-áantik le máakoʼob taak u kaanbaloʼob tiʼ Diosoʼ.

Bejlaʼeʼ jach kiʼimak in wóol tumen tsʼoʼok in kanik u jaajil yoʼolal Dios yéetel yoʼolal le Bibliaoʼ. Ikil in beetik in precursorileʼ yaʼab máakoʼob tsʼoʼok in wáantik u kanoʼob baʼax ku yaʼalik le Bibliaoʼ. Jach jatsʼuts in wilik bix u kʼexik u kuxtal le máakoʼob yoʼolal le baʼax ku kaʼansik le Bibliaoʼ, jach jeʼex úuchik u kʼexik in kuxtal xaneʼ. Hasta ka tin kanaj bix jeʼel in tsʼáaik gracias tiʼ Jéeoba yoʼolal le kuxtal yaantenoʼ.

«Jach maʼalob úuchik u tratarkenoʼob» (MAURÍCIO ARAÚJO)

SÍIJ TU AÑOIL: 1967

TUʼUX SÍIJI: BRASIL

KAʼACHEʼ: JACH KʼAAS BIX U KUXTAL

BIX KUXLIKEN KAʼACHI: Líikʼen Avaré, junpʼéel chan kaaj yaan São Paulo. U maas yaʼabil le máakoʼob kajaʼanoʼob teʼeloʼ óotsiloʼob.

In papáeʼ kíim le maʼ síijkenoʼ. Tin paalileʼ le kéen in wil maʼ kulaʼan kaʼach in maamaeʼ kin búukintik u nookʼ. Tsʼoʼoleʼ káaj xan in portarkinba jeʼex juntúul koʼoleleʼ, yéetel le máakoʼoboʼ ku yilkenoʼob jeʼex juntúul homosexualeʼ. Le ka máan kʼiineʼ joʼopʼ u yantalten relaciones sexuales yéetel uláakʼ xiʼipalaloʼob bey xan yéetel máakoʼob tsʼoʼok u yantal u jaʼabiloʼob.

Le táan in maas nojochtaloʼ joʼopʼ in bin teʼ centros nocturnosoʼ, teʼ baroʼob yéetel teʼ iglesiaʼob utiaʼal in kaxtik xiiboʼob yéetel koʼoleloʼob utiaʼal u yantalten relaciones sexuales tu yéeteloʼoboʼ. Le kéen yanak carnavaleʼ u suukileʼ kin vestirkinba kaʼach de koʼolel yéetel kin wóokʼot kéen desfilarnak le escuelaʼob tuʼux ku kaʼansaʼal sambaoʼ. Jach yaʼab máaxoʼob kʼaj óoltmilen kaʼachi.

Ichil in amigoʼob kaʼacheʼ yaan homosexualoʼobiʼ, prostitutaʼob yéetel máaxoʼob jach ku drogarkubaʼob. Jujuntúul tiʼ in amigoʼobeʼ tu yaʼaloʼobten ka in tsʼuʼutsʼ junpʼéel clase droga ku kʼaabaʼtik crack, jach maʼ xáanchaj ka viciochajteniʼ. Yaan horaeʼ bul áakʼab táan in tsʼuʼutsʼik crack tu yéeteloʼob. Yéetel yaan kʼiineʼ bul kʼiin táan in tsʼuʼutsʼik chéen tin juunal. Jach sakpileʼenchajen, hasta joʼopʼ u yaʼalaʼaleʼ yaanten sida bin.

BIX TU KEXIL IN KUXTAL LE BIBLIAOʼ: Teʼ kʼiinoʼoboʼ tin kʼaj óoltaj u testigoʼob Jéeoba, letiʼobeʼ jach maʼalob úuchik u tratarkenoʼob. Junpʼéel tiʼ le tekstoʼob tu xokoʼob tenoʼ Romanos 10:13, tuʼux ku yaʼalik: «Tumen ‹tuláakal máax kun chʼaʼchiʼitik u kʼaabaʼ Jéeobaeʼ yaan u salvartaʼal›». Le tekstooʼ tu yeʼesajteneʼ jach kʼaʼabéet in waʼalik u kʼaabaʼ Dios. Yaʼab u téeneleʼ le kéen tsʼoʼokok in tsʼuʼutsʼik crack bul áakʼabeʼ kin jeʼekʼabtik le ventanaoʼ yéetel kin paakat kaʼan, táan in wokʼol le táan in orar tiʼ Jéeoba utiaʼal in kʼáat óoltiktiʼ ka u yáanten.

In maama kaʼacheʼ jach ku yaatal u yóol kéen u yil baʼax táan in beetik yéetel in kuxtaloʼ, le oʼolal tin chʼaʼtuklaj in pʼatik le drogaʼoboʼ. Maʼ úuch tiʼ leloʼ káaj u tsʼaʼabalten xook tumen le Testigoʼoboʼ. Letiʼobeʼ tu yaʼaloʼobteneʼ le xookoʼ yaan u yáantken utiaʼal ka in xúumpʼat le drogaʼoboʼ, jach bey úuchik xanoʼ.

Jeʼex u bin in xokik le Bibliaoʼ tin tsʼáaj cuentaeʼ kʼaʼabéet in kʼexik bix in kuxtal. Le baʼax maas istikyaj úuchik in wilik in pʼatkoʼ letiʼe in beetik in homosexualiloʼ tumen desde tin paalil bey kuxlikenoʼ. Junpʼéel tiʼ le baʼax áantenoʼ letiʼe u xuʼulul in biskinba yéetel le amigoʼob yaanten kaʼachoʼ. Xuʼul xan in bin teʼ baroʼoboʼ yéetel teʼ centros nocturnoʼoboʼ.

Jach maʼ chéen chʼaʼabil úuchik in pʼatik le kuxtal yaanten kaʼachoʼ. Chéen baʼaleʼ tu líiʼsaj in wóol in wojéeltikeʼ Jéeobaeʼ u kʼáat u kanáanten yéetel ku naʼatik bix in wuʼuyikinba (1 Juan 3:19, 20). Tu añoil 2002, tsʼokaʼaniliʼ u xuʼulul in beetik in homosexualileʼ, le oʼolal páajchaj in wokjaʼ bey juntúul u testigo Jéeobaeʼ.

UTSILOʼOB TSʼOʼOK U TAASIKTEN: In maamaeʼ jach jaʼakʼ u yóol ka tu yilaj tsʼoʼok in kʼexik in kuxtal, hasta taakchaj xan u xokik le Bibliaoʼ. Chéen baʼaleʼ tu tsʼáaj junpʼéel infarto cerebral tiʼ. Kex beyoʼ letiʼeʼ láayliʼ táan u kʼaj óoltik Jéeoba bey xan baʼax ku yaʼalik le Bibliaoʼ.

Tsʼoʼok u máan 8 años jach in tsʼaamaj in wóol in kaʼans baʼax ku yaʼalik le Biblia tiʼ le máakoʼoboʼ. Yaan horaeʼ kin jáan tuukul tiʼ baʼaloʼob kʼaastak, chéen baʼaleʼ como maases taak in kiʼimakkúuntik u yóol Jéeobaeʼ tu séebaʼanil kin luʼsik tin tuukul.

Bejlaʼeʼ kiʼimak in wóol tumen kin biskinba yéetel Jéeoba yéetel kin kuxtal jeʼex uts tu tʼaan letiʼoʼ.

«Jach yaʼab in wukʼik kaʼachi» (LUKA ŠUC)

SÍIJ TU JAʼABIL: 1975

TUʼUX SÍIJI: ESLOVENIA

KAʼACHEʼ: JACH KU PÍIT MÁAN U YUKʼIK

BIX KUXLIKEN KAʼACHI: Síijen Liubliana, u noj kaajil Eslovenia. Jach kiʼimak in wóol kaʼachi, chéen baʼaleʼ le yaanten cuatro añosoʼ in taataeʼ tu kíimsuba. Yoʼolal le jeʼeloʼ in maamaeʼ kʼaʼabéetchaj u sen meyaj utiaʼal ka páajchajak u tsʼáaik baʼax kʼaʼabéet tiʼ teen yéetel tiʼ in sukuʼun.

Le yaanten 15 añosoʼ binen kajtal tu yotoch in abuela. Uts tin tʼaan kaʼach in pʼáatal tu yéetel tumen yaʼab tiʼ in amigoʼobeʼ teʼ banda kajaʼanoʼoboʼ. Tsʼoʼoleʼ in abuelaeʼ maas ku chaʼik in beetik wa baʼax ke in maama. Le ka tu tsʼáajten 16 añoseʼ joʼopʼ in biskinba yéetel máaxoʼob cada ocho días táan u káaltaloʼob. Tin chaʼaj u chowaktal u tsoʼotsel in pool, káaj in tsʼáaik in nookʼ jeʼex le maleanteʼoboʼ, tsʼoʼoleʼ tin kanaj in tsʼuʼutsʼ chamal.

Tin probartaj jejeláas drogaʼob, chéen baʼaleʼ baʼax maas uts tin tʼaan kaʼacheʼ letiʼe in wukʼikoʼ. Ka káajeʼ chéen wa jaypʼéel u copasil vino kin wukʼik, chéen baʼaleʼ ka máan kʼiineʼ kin wukʼik maas tiʼ junpʼéel botellaiʼ. Jach in wojel in taʼak kaʼach wa kalaʼanen, mix máak jeʼel u yaʼalik wa tsʼoʼok in wukʼik u litrosil vino wa cerveza xaʼakʼtaʼan yéetel vodka. Jach chéen yoʼolal u book in chiʼ ku yuʼubaʼal yaan baʼax tsʼoʼok in wukʼik kaʼachi.

Yaʼab u téenel le kéen xiʼiken discoteca yéetel in amigoʼobeʼ maas yaʼab in wukʼik teen ke letiʼob. Kex beyoʼ tu tsʼookeʼ teen áantkoʼob tumen letiʼobeʼ maʼ tu páajtal mix u waʼataloʼob. Juntéenjeakeʼ tin wuʼuyaj u yaʼalik juntúul tiʼ in amigoʼobeʼ teen bineʼ beyen junpʼéel barril maʼ tu yuʼubik u chuʼupuleʼ. Le baʼax tu yaʼaloʼ jach náakʼten tumen tu luʼumil Esloveniaeʼ bey u yaʼalaʼal baʼal tiʼ le máakoʼob jach yaʼab u yukʼikoʼoboʼ.

Yoʼolal le baʼax úuchoʼ kulajen in tukult baʼax táan in beetik yéetel in kuxtal. Káaj in wuʼuyikeʼ jach mix baʼal in biilal.

BIX TU KʼEXIL IN KUXTAL LE BIBLIAOʼ: Óoliʼ teʼ kʼiinoʼob jeʼeloʼ tin tsʼáaj cuentaeʼ juntúul tiʼ in wéet xookoʼobeʼ kʼexpaj u modos, maas tranquilo in wilik kaʼachi. Taakchaj in wojéeltik baʼaxten tu kʼexaj u modos. Le oʼolal tin invitartaj u yukʼ café utiaʼal k-tsikbal. Letiʼeʼ tu yaʼalajteneʼ táan u xokik le Biblia yéetel u testigoʼob Jéeobaoʼ. Tsʼoʼoleʼ tu tsolajten jujunpʼéel tiʼ le baʼaxoʼob táan u kanikoʼ. Como mix baʼal in wojel yoʼolal religióneʼ tuláakal le baʼax tu yaʼalajtenoʼ jach túumben in tiaʼalte. Joʼopʼ in bin teʼ reuniónoʼob ku beetik le Testigoʼoboʼ yéetel káaj xan in xokik le Biblia tu yéeteloʼoboʼ.

Bey úuchik in kanik baʼaloʼob jach jatsʼutstakoʼ. Por ejemploeʼ tin kaneʼ le Bibliaoʼ ku yaʼalik kuxaʼanoʼon «tu tsʼook kʼiinoʼob» (2 Timoteo 3:1-5). Tsʼoʼoleʼ tin kanaj xaneʼ Dioseʼ yaan u láaj xuʼulsik le kʼasaʼan máakoʼoboʼ, chéen baʼaleʼ le utsul máakoʼoboʼ yaan u pʼáatloʼob kuxtal tiʼ junpʼéel jatsʼuts paraíso way Luʼumeʼ (Salmo 37:29). Yoʼolal le baʼax tin kanoʼ taakchaj in kuxtal jeʼex u yaʼalik Dios utiaʼal ka kuxlaken ichil le máaxoʼob utsoʼob ku yaʼalik le Bibliaoʼ.

Le ka joʼopʼ in tsikbaltik tiʼ in amigoʼob baʼax táan in kanikeʼ joʼopʼ u burlarkenoʼob. Bey úuchik in tsʼáaik cuenta maʼ maʼalob amigoʼobiʼ. Tsʼoʼoleʼ tin tsʼáaj cuenta xaneʼ káaj in wukʼik tumen joʼopʼ in biskinba yéetel máaxoʼob maʼ unajiʼ. Letiʼobeʼ chéen ku páaʼtkoʼob ka kʼuchuk fin de semana utiaʼal u káaltaloʼob.

Tin chʼaʼtuklaj u xuʼulul in biskinba tu yéeteloʼob ka joʼopʼ in kaxtik amigoʼob ichil u testigoʼob Jéeoba. Letiʼobeʼ ku líiʼskoʼob in wóol, tsʼoʼoleʼ u yaabiltmoʼob xan Dios yéetel ku tsʼáaik u yóoloʼob kuxtal jeʼex u yaʼalik letiʼoʼ. Jach tu yáantenoʼob, le oʼolal ka máan kʼiineʼ hasta páajchaj u xuʼulul in káaltal.

UTSILOʼOB TSʼOʼOK U TAASIKTEN: Jach kin tsʼáaik gracias tiʼ Jéeoba tumen bejlaʼeʼ maʼ kʼaʼabéet in káaltal utiaʼal in wuʼuyik kiʼimak in wóoliʼ. Wa maʼ tu xuʼulul in káaltal kaʼacheʼ kensa bix kun tsʼoʼokolten kaʼachi. Chéen baʼaleʼ bejlaʼeʼ maas maʼalob in wuʼuyikinba.

Tsʼoʼok u máan siete años káajak in meyaj teʼ sucursal yaan tiʼ u testigoʼob Jéeoba tuʼ luʼumil Esloveniaoʼ. Úuchik in kʼaj óoltik Jéeobaeʼ bejlaʼeʼ jach yaan u biilal in kuxtal.