Yaan «u kaʼa kuxkíintaʼal le kimenoʼob[oʼ]» (Hechos 24:15, Túumben Luʼum).

Ku líiʼsik a wóol kéen kíimik máax a yaabiltmaj (2 Corintios 1:3, 4).

Ku yáantkech utiaʼal maʼ a sajaktal tiʼ le kíimiloʼ (Hebreos 2:15).

Ku yáantkech a creert yaan a kaʼa ilik le máaxoʼob tsʼoʼok u kíimloʼoboʼ (Juan 5:28, 29).

Jeʼeleʼ, ilawil baʼaxten:

• Dios tsʼaamil le kuxtaloʼ. Le Bibliaoʼ ku yaʼalikeʼ Jéeoba Dios «u sayabil le kuxtaloʼ» (Salmo 36:9; Hechos 17:24, 25). Wa letiʼ tsʼaamil le kuxtaloʼ jeʼel u páajtal xan u kaʼa sutik u kuxtal le kimenoʼoboʼ.

• Úuchjeakileʼ Dioseʼ yaan máaxoʼob tu kaʼa kuxkíintaj. Le Bibliaoʼ ku tʼaan tiʼ ocho u túulaliʼ, ichiloʼobeʼ tiaʼan mejen paalaliʼ, chʼijaʼanoʼob, xiiboʼob yéetel koʼoleloʼob. Yanoʼobeʼ táant u kíimloʼob ka kaʼa kuxkíintaʼaboʼobeʼ, baʼaleʼ juntúuleʼ kanpʼéel kʼiin kíimik ka kaʼa kuxkíintaʼabi (Juan 11:39-44).

• Dioseʼ jach u kʼáat u kaʼa kuxkíint le kimenoʼoboʼ. Letiʼeʼ u pʼekmaj le kíimiloʼ, ku yilik bey juntúul enemigoeʼ (1 Corintios 15:26). Jach u kʼáat u luʼs le kíimiloʼ, lelaʼ yaan u beetik kéen u kaʼa kuxkíint le máakoʼob way Luʼumeʼ (Job 14:14, 15).