UTIAʼAL TAATATSILOʼOB
7. Kaʼans u beet baʼax maʼalob
¿BAʼAX TÁAKAʼANIʼ?
Le baʼaloʼob maʼalobtak ku kaʼansaʼal tiʼ máak tu chichniloʼ letiʼe baʼax ken u yáant ichil u kuxtaloʼ. Por ejemploeʼ wa teech honradoecheʼ le xan ken a kaʼans tiʼ a paalal.
Juntúul máak kaʼansaʼan baʼaloʼob maʼalobtak tiʼeʼ jach j-meeyjil, maʼalob u tratartik tuláakal máak yéetel ku chʼaʼik en cuenta u maasil. Le jatsʼuts modosoʼobaʼ maas séeb jeʼel u kanik máak desde tu paalileʼ.
LE BIBLIAOʼ KU YAʼALIK: «Kaʼans le xiʼipal teʼ bej tuʼux unaj u binoʼ, beyoʼ tak kéen chʼíijkeʼ maʼ ken u pʼat le bejoʼ» (Proverbios 22:6).
¿BAʼAXTEN KʼAʼABÉET?
Teʼ kʼiinoʼobaʼ maas jach kʼaʼabéet u kaʼansaʼal baʼaloʼob maʼalobtak tiʼ le paalaloʼoboʼ. Karyn, juntúul maamatsileʼ ku yaʼalik: «Le celularoʼoboʼ séeb jeʼel u kʼaskúuntik u tuukul le paalaloʼoboʼ, tumen kex kulukbaloʼob t-tséeleʼ jeʼel u chaʼantikoʼob baʼaloʼob kʼaastak sin ke k-tsʼáaik cuentaeʼ».
LE BIBLIAOʼ KU YAʼALIK: Le nukuch máakoʼoboʼ «sáamsamal táan u yilik u yiijtal u tuukuloʼob. Bey túunoʼ letiʼobeʼ jeʼel u páajtal u kʼaj óoltikoʼob baʼax maʼalob bey xan baʼax maʼ maʼalobiʼ» (Hebreos 5:14).
Jach kʼaʼabéet u yeʼesik máak jatsʼuts modos. Por ejemploeʼ le kéen a kʼáat wa baʼaxeʼ unaj a weʼesik jatsʼuts modos yéetel unaj a tsʼáaik u diosboʼotikil. Unaj xan a chʼaʼik en cuenta u maasil kex bejlaʼeʼ óoliʼ mix máak beetik beyoʼ. Le máakoʼoboʼ maases chéen chʼiikiloʼob tiʼ baʼaloʼob jeʼex le celularoʼoboʼ.
LE BIBLIAOʼ KU YAʼALIK: «Le baʼax a kʼáateʼex ka beetaʼakteʼex tumen le máakoʼoboʼ teʼex xaneʼ bey unaj a beetkeʼextiʼoboʼ» (Lucas 6:31).
¿BAʼAX JEʼEL A BEETKEʼ?
Pʼat claro tiʼ a paalal baʼax maʼalob yéetel baʼax maʼ maʼalobiʼ. Tsʼoʼok u yilaʼaleʼ wa le taatatsiloʼob ku kaʼansik tiʼ u paalaloʼob maʼ maʼalob ka núup chilak le máaxoʼob maʼ tsʼokaʼan u beeloʼoboʼ, ku yáantaj utiaʼal maʼ u beetkoʼob beyoʼ.
JEʼEL U PÁAJTAL A BEETIK LELAʼ: Wa ka wuʼuyik junpʼéel noticia tuʼux ku yaʼalaʼal kíimsaʼab wa máaxeʼ, jeʼel u páajtal a kʼáatik tiʼ a hijo lelaʼ: «¿Baʼaxten ta tʼaan jach kʼasaʼan le máakoʼoboʼ?».
«Utiaʼal u chʼaʼtuklik juntúul paal u beetik baʼax maʼalobeʼ, táanil unaj u kaʼansaʼal tiʼ baʼax uts yéetel baʼax kʼaas» (Brandon).
Kaʼanstiʼob u yeʼesoʼob jatsʼuts modos. Kex chichan le paalaloʼoboʼ jeʼel u kankoʼob u yeʼesoʼob jatsʼuts modos yéetel u tsʼáaikoʼob u diosboʼotikileʼ. Junpʼéel libroeʼ ku yaʼalikeʼ le paalaloʼoboʼ maʼ unaj u tuukuloʼob chéen tu yoʼolaloʼobiʼ. Unaj u kaʼansaʼaltiʼobeʼ kʼaʼabéet u chʼaʼikoʼob en cuenta u maasil, jeʼex le máaxoʼob yanoʼob ichil u familiaʼoboʼ, u yéet xookoʼob wa uláakʼ máakoʼob (Parenting Without Borders [Padres sin fronteras]).
JEʼEL U PÁAJTAL A BEETIK LELAʼ: Tsʼáa wa baʼax meyajil u beet a paalal, beyoʼ yaan u kankoʼob u kʼaʼanaʼanil u yáantkoʼob u maasil.
«Wa a paalal ku suuktal u beetkoʼob wa baʼax meyajil ta wotocheʼ le kéen kajlakoʼob tu juunaloʼobeʼ maʼ istikyaj ken u beetoʼob wa baʼax meyajiliʼ» (Tara).