UTIAʼAL LE TSʼOKAʼAN U BEELOʼOBOʼ
3. Respetartabaʼex
¿BAʼAX TÁAKAʼANIʼ?
Le íichamtsil yéetel le atantsil ku respetarkubaʼoboʼ ku paklan kaxtik u yutsiloʼob kex yaan hora maʼ de acuerdo yaniloʼob yoʼolal wa baʼaxiʼ. Le libro Diez claves para transformar tu matrimonio ku yaʼalik: «Le íichamtsil yéetel le atantsil ku paklan respetarkubaʼoboʼ maʼ tu pʼatkoʼob le problemas chéen beyoʼ, baʼaxeʼ ku yilik u tsikbaltikoʼob utiaʼal u yutskíintikoʼob».
LE BIBLIAOʼ KU YAʼALIK: «Máax yaan u yaabilajeʼ [...] maʼ tu kaxtik chéen u yutsil» (1 Corintios 13:4, 5).
«Kin tuklikeʼ utiaʼal in weʼesik kin respetartik in wataneʼ unaj in weʼesiktiʼ in yaabiltmaj, maʼ in beetik u yaatal u yóol mix in beetik baʼaloʼob jeʼel u taasiktoʼon problemaseʼ» (Micah).
¿BAʼAXTEN KʼAʼABÉET?
Le íichamtsil yéetel le atantsil maʼ tu respetarkubaʼoboʼ ku chʼinchʼin aʼalik baʼaloʼob tu baatsiloʼob yéetel ku yaʼalikoʼob baʼaloʼob ku beetik u yaatal u yóoloʼob. Le especialistaʼoboʼ ku yaʼalikoʼobeʼ le máaxoʼob beyoʼoboʼ jeʼel u kʼuchul u kʼiinil u divorciarkubaʼobeʼ.
«Wa ka chʼinchʼin aʼalik baʼaloʼob tiʼ a watan yéetel ka burlarkaba tiʼeʼ jeʼel a beetik u yaatal u yóoleʼ yéetel jeʼel u kʼuchul u kʼiinil u xuʼulul u confiar tiʼ techeʼ» (Brian).
¿BAʼAX JEʼEL A BEETKEʼ?
TUUKULNEN TIʼ LELAʼ
Kʼaʼajs bix úuchik a tsikbal yéetel a núup yéetel bix ta tratartil teʼ semana máanoʼ. Kéen tsʼoʼokkeʼ ka núukik le preguntaʼobaʼ:
-
¿Jaytéen tin criticartaj yéetel jaytéen tin waʼalaj baʼaloʼob utiaʼal u kiʼimaktal u yóol?
-
¿Bix úuchik in weʼesik kin respetartik?
MÚUL TSIKBALTEʼEX LELAʼ
-
¿Baʼaxoʼob jeʼel k-aʼalik yéetel k-beetik utiaʼal k-eʼesik k-respetartikbaeʼ?
-
¿Baʼaxoʼob beetik k-uʼuyik bey maʼ táan k-respetartikbaiʼ?
BEETEʼEX LELAʼ
-
Cada juntúuleʼ u tsʼíibt óoxpʼéel baʼaloʼob u kʼáat ka u beet u núup utiaʼal ka eʼesaʼak respeto tiʼ. Le kéen tsʼoʼokkeʼ le baʼax tu tsʼíibtaj le íichamtsiloʼ ku tsʼáaik tiʼ u yatan yéetel le baʼax tu tsʼíibtaj le atantsiloʼ ku tsʼáaik tiʼ u yíicham. Tu tsʼookeʼ tsʼáa a wóol utiaʼal a beetik le baʼax tu tsʼíibtaj a núupoʼ.
-
Beet junpʼéel lista tiʼ le jatsʼuts modos yaan tiʼ a núupoʼ yéetel aʼaltiʼ jach jatsʼuts a wilik le modos yaantiʼoʼ.
«Utiaʼal in weʼesik kin respetartik in wíichameʼ unaj in weʼesiktiʼ in yaabiltmaj yéetel in kʼáat ka kiʼimakchajak u yóol. Yaan horaeʼ tak yéetel baʼaloʼob maʼ sen nuuktakeʼ jeʼel u páajtal a weʼesik ka respetartik a núupeʼ» (Megan).
Maʼ xaaneʼ ka tuklikeʼ ka respetartik a núup, chéen baʼaleʼ, ¿jach wa tu jaajil ku yuʼubik ka respetartik?
LE BIBLIAOʼ KU YAʼALIK: «Búukbesabaʼex xan yéetel utsil, yéetel kabal óolal, yéetel jeetsʼel óolal bey xan yéetel paciencia» (Colosenses 3:12).
