Yaʼab baʼax k-kanik tiʼ le baʼalcheʼoboʼ

«Wa taak a wojéeltik wa baʼaxeʼ, beet uts a kʼáatik tiʼ le baʼalcheʼoboʼ, letiʼobeʼ jeʼel u kaʼansikechoʼobeʼ, kʼáat xan tiʼ le chʼíichʼoʼoboʼ, letiʼobeʼ jeʼel u yaʼalikoʼobtecheʼ. Wa maʼeʼ chʼaʼ en cuenta le luʼumoʼ letiʼeʼ jeʼel u kaʼansikecheʼ, le kayoʼob xanoʼ jeʼel u yaʼalikoʼobtecheʼ» (JOB 12:7, 8).

TSʼOʼOK u máan kʼiin káajak u kaanbal le científicoʼob yéetel le ingenieroʼob tiʼ le paakʼaloʼob yéetel tiʼ le baʼalcheʼoboʼ, tiʼ le baʼax ku beetkoʼoboʼ ku yaʼalaʼal biomimética. Letiʼobeʼ jach ku xakʼaltikoʼob bix yanil le baʼalcheʼob wa uláakʼ baʼaloʼoboʼ, tsʼoʼoleʼ ku copiarkoʼob utiaʼal u beetkoʼob túumben máquinaʼob wa utiaʼal u maas maʼalobkíintkoʼob le yanoʼoboʼ. Le táan a xakʼaltik le xookaʼ, tukulte: «¿Máax unaj u alabartaʼal yoʼolal bix beetaʼanil le baʼalcheʼoboʼ?».

U xiikʼ wa u aleta le ballena jorobadaoʼ

¿Baʼax jeʼel u kanik le ingenieroʼob aeronáuticoʼob (máaxoʼob ku beetkoʼob aviónoʼob wa uláakʼ baʼaxoʼob ku volaroʼob) tiʼ le ballena jorobadaoʼ? Yaʼab baʼax ku kaʼankoʼob. Le clase ballenaaʼ ku chukik tak 30 toneladas u aalil, kex 12 metros u chowakil, óoliʼ totojkil u wíinklil yéetel u nukuch aletaobeʼ ku meyajtiʼ bey xiikʼoʼobeʼ. Kex beyoʼ séeb u péek, jeʼex kéen jaankeʼ ku bin tuʼux u muchʼmuba yaʼab kayoʼob. Yáax baʼax ku beetkeʼ ku bin tu taamil le jaʼoʼ, kéen káajak túun u naʼakleʼ ku formartik junpʼéel remolino yéetel ku jóoʼsik u yóom le jaʼoʼ. Le remolino ku beetkoʼ maʼ jach nojochiʼ, ichileʼ kex metro y medio u kóochil yéetel tiʼ ku kʼalik le kayoʼoboʼ. Kéen tsʼoʼokok túuneʼ ku japik u chiʼ utiaʼal u túutsʼlukʼtik le kayoʼoboʼ.

Le científicoʼoboʼ maʼ tu naʼatkoʼob kaʼach baʼaxten kex totojkil u wíinklil le ballenaoʼ ku páajtal u tsʼáaik vueltas teʼ lugar tuʼux yanoʼ. Ka tsʼoʼokeʼ tu yiloʼobeʼ le baʼax áantik utiaʼal u tsʼáaik vueltasoʼ letiʼe u formail u aletaoʼ. Junpʼéel u jáal le aletaoʼ maʼ lisoiʼ yaan bey u mejen kojoʼobeʼ.

Le kéen káajak u báaboʼobeʼ le baʼaloʼob bey mejen kojoʼoboʼ ku beetik u maas yantal u muukʼ utiaʼal u séeb péek. Le revista Natural Historyoʼ ku yaʼalikeʼ le mejen baʼaloʼob bey kojoʼoboʼ ku yáantaj utiaʼal u séeb máan le jaʼ yóokʼol u aletaoʼ. Wa minaʼan le mejen baʼaloʼob tu aleta le ballenaoʼ bejlaʼa maʼ tu páajtal u tsʼáaik vueltas yéetel u séeb péekeʼ.

¿Bix u yáantaj le bix u meyaj u aleta le ballenaoʼ? Wa ka beetaʼak u xiikʼ le aviónoʼob jeʼex u aleta le ballenaoʼ, maʼ tun kʼaʼabéettal u tsʼaʼabal u aleronesil wa uláakʼ baʼaloʼob controlartik le iikʼoʼ. Tsʼoʼoleʼ maas maʼalob kun meyaj yéetel maʼ tun séeb kʼastal. Juntúul biomecánico ku kʼaabaʼtik John Longeʼ, ku yaʼalikeʼ «maʼ xaaneʼ maʼ tun xáantaleʼ yaan u káajal u tsʼaʼabal u mejen koj u xiikʼ le aviónoʼob jeʼex le yaan tu aleta le ballena jorobadaoʼ».

U xiikʼ le gaviotaoʼ

Le ingenieroʼoboʼ suuk u copiarkoʼob u xiikʼ le chʼíichʼoʼob utiaʼal u beetkoʼob u xiikʼ le aviónoʼoboʼ, pero maʼ sen úucheʼ tu yiloʼob bix jeʼel u maas maʼalobkíintikoʼobeʼ. Le revista New Scientistoʼ ku yaʼalikeʼ le investigadoroʼob yanoʼob tiʼ u Universidadil Floridaeʼ tu beetoʼob junpʼéel avión ku páajtal u manejartaʼal yéetel control remoto. Tsʼoʼoleʼ ku páajtal u beetik baʼaloʼob jeʼex le gaviotaoʼ, u pʼáatal teʼ kaʼan kex maʼ táan u meyajoʼ, u yéemel chʼichʼikaʼan yéetel u naʼakal tu séebaʼanil.

Le gaviotaʼoboʼ jach jatsʼuts bix u tsʼáaikoʼob vueltas teʼ kaʼanoʼ tumen jach maʼalob bix u wutsʼik u xiikʼoʼob. Le revistaoʼ ku yaʼalik xaneʼ «utiaʼal u copiartaʼal bix u wutsʼik u xiikʼ le gaviotaoʼ, tsʼaʼab junpʼéel chan motor tuʼux conectartaʼan alambreʼob beetik u péek u xiikʼ le aviónoʼ». Le bix beetaʼanil u xiikʼ le chan aviónaʼ ku yáantaj utiaʼal u pʼáatal teʼ kaʼan kex maʼ táan u meyajoʼ yéetel u yéemel chʼichʼikaʼan tu yáam le edificioʼoboʼ. Le Fuerzas Aéreas tiʼ Estados Unidosoʼ taak u manikoʼob le clase aviónaʼ tumen jeʼel u yáantaj utiaʼal u kaxtaʼal veneno yéetel uláakʼ baʼaloʼob séeb u kíimsik máak.

U kʼaboʼob le gecoo’

Yaʼab baʼax jeʼel u páajtal xan k-kanik tiʼ le baʼalcheʼob ku máanoʼob way luʼumeʼ. Jeʼex le gecooʼ junpʼéel clase juuj ku páajtal u naʼakal tiʼ pakʼoʼob yéetel u machkuba ichil u techoil le najoʼoboʼ. Desde úuchjeakil ku beetik u jaʼakʼal u yóol máak le baʼax ku beetik le chan baʼalcheʼaʼ (Proverbios 30:28). ¿Bix u beetik le baʼaloʼobaʼ?

U kʼaboʼob le gecooʼ maʼ tataʼkiliʼ. Le baʼax beetik u machkuba tiʼ baʼaloʼob jach tsʼitsʼiʼkil jeʼex le vidriooʼ letiʼe mejen baʼaloʼob bey tsoʼots yaan tu táan u kʼab yéetel tu yookoʼoboʼ. Le kéen xíimbalnak tuʼux tsʼitsʼiʼkiloʼ, le mejen baʼaloʼob bey tsoʼotsoʼ ku machkuba yéetel le tuʼux ku xíimbaloʼ hasta bey ku táakʼaleʼ. Le muukʼ wa le baʼax beetik u machkubaoʼ ku kʼaabaʼtik Van der Waals. Chéen baʼaleʼ wíinikeʼ maʼ tu páajtal u yuʼubik le clase muukʼaʼ. Jeʼex k-ilkoʼ le baʼax áantik le geco utiaʼal u machkuba jeʼel tuʼuxakoʼ letiʼe u milesil mejen tsoʼots yaan tu tʼaan u kʼaboʼ.

¿Ku yáantkoʼon wa túun k-ojéeltik leloʼ? Ku yáantkoʼon, tumen wa ka beetaʼak junpʼéel baʼal ka u machuba tubeel jeʼex u kʼab le gecooʼ jeʼel u jeelintik le velcro wa contacteloʼ. Le velcrooʼ copiartaʼan tiʼ junpʼéel clase xíiw. * Teʼ revista The Economistoʼ juntúul investigadoreʼ tu yaʼaleʼ «jach jeʼel u yáantik le doctoroʼob utiaʼal u tsʼakikoʼob máak wa ka beetaʼak junpʼéel cinta ka táakʼak jeʼex le gecooʼ tumen minaʼan químicosiʼ».

¿Máax unaj u alabartaʼal?

Le NASAOʼ (Administración Nacional de Aeronáutica y del Espacio de Estados Unidos) táan u beetik junpʼéel robot ocho u yookoʼob jach chíikaʼan tiʼ le síinaʼanoʼ. Jujuntúul ingenieroʼob finlandiailoʼobeʼ tu beetoʼob xan junpʼéel tractor seis u yookoʼob. Uláakʼ jaats investigadoroʼobeʼ tu beetoʼob baʼaloʼob jaaytak ku kʼáalal yéetel ku jeʼepajal chíikaʼan tiʼ u yich le pinooʼ. Yaan junpʼéel empresaeʼ táan u beetik junpʼéel coche chíikaʼan tiʼ le kay ku kʼaabaʼtik pez cofreoʼ, le kayaʼ jach séeb u péek ichil le jaʼoʼ. Le científicoʼob xanoʼ táan u yilkoʼob bix beetaʼanil junpʼéel clase concha ku kʼaabaʼtik oreja de mar utiaʼal u beetkoʼob chalecos antibalas maas chichtakoʼob yéetel sáaltakoʼob.

Como jach maʼalob bix beetaʼanil le baʼaloʼob yaan way Luʼumeʼ le científicoʼoboʼ tu beetoʼob junpʼéel catálogo tuʼux yaan u milesil le baʼaxoʼob tsʼoʼok u copiarkoʼob tiʼ le baʼalcheʼoboʼ yéetel uláakʼ baʼaxoʼob yaan way Luʼumeʼ. Le revista The Economistoʼ tu yaʼaleʼ le investigadoroʼoboʼ jeʼel u páajtal u yilkoʼob teʼ catálogo bix jeʼel ‹u maas maʼalobkíintkoʼob le meyaj ku beetkoʼoboʼ›. Le baʼaxoʼob yaan teʼ catálogooʼ ku yaʼalaʼaltiʼ «patentes biológicas». Le tʼaan patenteoʼ u kʼáat u yaʼaleʼ juntúul máak wa junpʼéel empresaeʼ ku registrartik bey letiʼ u yuumil le baʼax tu inventartoʼ. Le revista The Economistoʼ ku yaʼalik xan: «Le kéen u yaʼal le científicoʼob ‹patentes biológicas› tiʼ le baʼax u beetmoʼoboʼ ku yeʼeskoʼobeʼ maʼ jach letiʼob inventartiʼ, tu copiartoʼob tiʼ le baʼaxoʼob yaan way Luʼumeʼ».

¿Bix úuchik u yantal le jatsʼuts baʼaloʼob yaan way Luʼumeʼ? Le investigadoroʼoboʼ ku yaʼalikoʼobeʼ kex jach maʼalob le baʼaloʼobaʼ chéen tiʼ evolución u taaloʼob. Chéen baʼaleʼ yaan uláakʼ científicoʼob xaneʼ yaanal baʼax ku creerkoʼob. Tu añoil 2005 teʼ periódico The New York Timesoʼ, le microbiólogo Michael Behe tu tsʼíibtaj: «Tuláakal le baʼaxoʼob yanoʼ jach maʼalob bix beetaʼanil, yaan baʼax jach claro u yeʼesik. Jeʼex wa ka wilik juntúul baʼalcheʼ chíikaʼan tiʼ juntúul pato, ku báab yéetel ku yawat jeʼex le patooʼ, ¿máasaʼ maʼ ken a waʼal wa yaanal baʼalcheʼ? Yaan a waʼalikeʼ juntúul pato». ¿Baʼax tu yóotaj u yaʼal le científicooʼ? Tu yaʼaleʼ: «Jach claro u yilaʼal anchaj máax beetik, maʼ chéen bey anchajik le baʼaloʼoboʼ».

U jaajileʼ unaj u reconocertaʼal u meyaj le ingenieroʼob maas maʼalobkíintik bix u meyaj wa baʼaxoʼ. Jeʼex le ku maas maʼalobkíintkoʼob u xiikʼ junpʼéel aviónoʼ, le ku beetkoʼob junpʼéel cinta maas maʼalob u táakʼal yéetel maas suaveoʼ bey xan le ku beetkoʼob junpʼéel coche maas maʼalob u meyajoʼ. Chéen baʼaleʼ wa juntúul máak ku copiartik junpʼéel baʼal, pero ku yaʼalik letiʼ beeteʼ táan u yookol.

Yaan máakoʼobeʼ utiaʼal u maas maʼalobkíintkoʼob le meyaj ku beetkoʼoboʼ ku copiarkoʼob le baʼaxoʼob yaan way Luʼumeʼ, pero maʼ tu jóokʼol tiʼob igual. Tsʼoʼoleʼ ku yaʼalikoʼobeʼ le baʼaxoʼob yaan way Luʼumeʼ anchaj yoʼolal evolución. ¿Jaaj wa le baʼax ku yaʼalikoʼobaʼ? Wa le copia kʼaʼabéetchaj u beetaʼal tumen juntúul máak yaan u naʼateʼ, ¿kux túun le baʼalcheʼob yéetel le baʼaxoʼob yaan way Luʼumoʼ? ¿Máax unaj u alabartaʼal? ¿Le máax beet u copiailoʼ wa le máax beet u originaliloʼ?

Yaan Máax beet tuláakal baʼal

Le kéen tuukulnakoʼon tiʼ bix beetaʼanil tuláakal baʼaleʼ k-uʼuyikba jeʼex le salmistaaʼ, letiʼeʼ tu yaʼalaj: «Jéeoba Dios, ¡yaʼab nukuch baʼaloʼob a beetmaj! Le baʼaxoʼob a beetmoʼ ku yeʼeskoʼob jach yaan a naʼat. Le luʼumaʼ chuup yéetel tuláakal le baʼaxoʼob a beetmoʼ» (Salmo 104:24). Apóstol Pablo xaneʼ tu yaʼalaj: «Tumen le u jatsʼuts modos Dios maʼ tu páajtal u yilaʼaloʼ chíikaʼan u yilaʼal desde ka beetaʼab yóokʼol kaab, tumen yoʼolal le baʼaxoʼob u beetmoʼ jeʼel u páajtal u tsʼaʼabal cuentaeʼ le páajtalil yaantiʼoʼ minaʼan u xuul, tsʼoʼoleʼ le baʼaloʼobaʼ ku yeʼeskoʼob letiʼ u jaajil Dios» (Romanos 1:20).

Chéen baʼaleʼ yaan máaxoʼob ku respetarkoʼob baʼax ku yaʼalik le Bibliaoʼ ku yaʼalikoʼobeʼ tiʼ Dioseʼ meyajnaj le evolución utiaʼal u beetik tuláakal baʼaloʼ. ¿Jach wa jaaj? ¿Letiʼe wa baʼax ku kaʼansik le Bibliaoʼ?

[Nota]

[Uláakʼ baʼax ku tsoʼolol]

¿Bix úuchik u yantal le jatsʼuts baʼaloʼob way Luʼumeʼ?

[Uláakʼ baʼax ku tsoʼolol]

¿Máax u yuumil le baʼaxoʼob yaan way Luʼumeʼ?

[Cuadro/​Oochel]

Wa le copia kʼaʼabéetchaj u beetaʼal tumen juntúul máak yaan u naʼateʼ, ¿kux túun le baʼalcheʼob yéetel le baʼaxoʼob yaan way Luʼumoʼ?

Le científicoʼoboʼ u kʼáat u copiartoʼob bix beetaʼanil u kʼab le gecooʼ. Maʼatech u suciotal, maʼ tu pʼatik huellas yéetel óoliʼ tiʼ tuláakal baʼal ku páajtal u machkuba.

Le aviónaʼ ku páajtal u wutsʼik u xiikʼ tumen copiartaʼab tiʼ le gaviotaoʼ.

Le kay ku kʼaabaʼtik pez cofreoʼ jach séeb u péek, le beetik táan u beetaʼal junpʼéel coche chíikaʼan tiʼ.

[Máax tsʼáaik le fotooʼ]

Avión: Kristen Bartlett/​University of Florida; u yook geco: Breck P. Kent; pez cofre yéetel coche: Mercedes-Benz USA

[Cuadro/​Oocheloʼob]

U YOJEL U NUʼUKTUBAʼOB

Le bix u nuʼuktikuba yaʼab baʼalcheʼoboʼ ku yeʼesik «jach yaan u naʼatoʼob» (Proverbios 30:24, 25). Koʼox ilik bix u nuʼuktikuba kaʼatúuliʼ.

▪ Jach maʼalob u nuʼuktikuba le síinikoʼoboʼ Le kéen jóokʼok u kaxt u janal le síinikoʼoboʼ, ¿bix u kaxtikoʼob u bejil u suutoʼob? Junmúuchʼ investigaroʼobeʼ tu yiloʼobeʼ yaan síinikoʼobeʼ ku pʼatik u bookoʼob teʼ bejoʼ, tsʼoʼoleʼ u forma le bej ku beetkoʼoboʼ ku yáantaj xan utiaʼal maʼ u saʼatloʼob kéen suunakoʼob tuʼux kajaʼanoʼoboʼ. Le revista New Scientisto’, tu yaʼaleʼ le síinik ku kʼaabaʼtik faraónoʼ ku káajal u beetkoʼob mejen bejoʼob desde teʼ tuʼux kajaʼanoʼoboʼ, le bej túunoʼ ku bin u xaʼaykuba, u kóochileʼ de 50 yéetel 60 grados. ¿Baʼaxten ku tsʼáaikoʼob u forma le bejoʼoboʼ? Tumen le kéen kʼuchuk tuʼux xaʼaypajaʼan le bejoʼ le síinikoʼ ku chʼaʼik le bej maas kóomoʼ, le bejaʼ letiʼe kun bisik teʼ tuʼux kajaʼanoʼ. Le revistaoʼ ku yaʼalik xaneʼ «le forma yaan tiʼ le bej ku beetik le síinikoʼoboʼ ku yáantaj utiaʼal maʼ u saʼatloʼob tumen kex ka confundirnakoʼobeʼ ku páajtal u kaʼa chʼaʼikoʼob le bej unaj u biskoʼoboʼ tumen u xaʼaymuba le bejoʼ».

▪ Le baʼax nuʼuktik le chʼíichʼoʼoboʼ Yaʼab chʼíichʼoʼobeʼ kex jach náach tuʼux u taaloʼob yéetel kex jeʼel bixak le tiempooʼ, ku kʼuchloʼob jach tu yorail teʼ tuʼux unaj u binoʼoboʼ. ¿Bix u yojéeltikoʼob baʼax bejil unaj u chʼaʼikoʼob? Le científicoʼoboʼ tsʼoʼok u yilkoʼobeʼ le chʼíichʼoʼoboʼ ku yuʼubikoʼob junpʼéel muukʼ yaan teʼ Luʼumaʼ, le muukʼaʼ ku kʼaabaʼtik campo magnético. Chéen baʼaleʼ le revista Scienceoʼ, ku yaʼalikeʼ «le campo magnéticooʼ maʼ mantatsʼ ku yeʼesik tuʼux yaan xaman utiaʼal u nuʼuktikubaʼobiʼ». ¿Baʼax áantik le chʼíichʼoʼob utiaʼal maʼ u saʼatloʼoboʼ? Yaan junpʼéel baʼal ichil u wíinkliloʼob áantkoʼob u nuʼuktubaʼob, le baʼalaʼ sáamsamal ku kʼexpajal bix u meyaj según tuʼux ku tʼúubul le Kʼiinoʼ. Pero le tuʼux ku tʼúubul le Kʼiinoʼ ku kʼexpajal según baʼax tiempo tiʼ le año yanoʼonoʼ. ¿Baʼax uláakʼ áantkoʼob? Le investigadoroʼoboʼ ku yaʼalikoʼobeʼ ichil u wíinklil le chʼíichʼoʼobaʼ yaan junpʼéel «reloj eʼesik tiʼob baʼax kʼiin unaj u binoʼob táanxel tuʼux».

¿Máax kaʼans le síinikoʼob u beetoʼob le mejen bejoʼoboʼ? ¿Máax tsʼáa tu wíinklil le chʼíichʼoʼob le chan baʼal bey reloj utiaʼal u nuʼuktikubaʼoboʼ? ¿Chéen wa bey anchajikoʼoboʼ wa yaan Máax beetoʼob?

[Máax tsʼáaik le fotooʼ]

© E.J.H. Robinson 2004