Tin kanaj máax kun beetik u yantal justicia

Tsikbaltaʼab tumen Ursula Menne

Desde tin chan chichnil kin tsʼíiboltik ka beetaʼak justicia tiʼ tuláakal máak. Yoʼolal leloʼ ka nojochchajeneʼ kʼaʼalen tumen le régimen comunista yaan Alemania orientaloʼ. Teʼ cárcel tin kanaj bix kun xuʼulsbil le injusticiaoʼ. Yaan in jáan tsikbaltikteʼex.

SÍIJEN tu añoil 1922 tu kaajil Halle, Alemania. Le kaajaʼ tiaʼan kex 200 kilómetros tu noojol-chikʼinil Berlíneʼ, tsʼoʼoleʼ maas tiʼ 1,200 años yaantiʼ. Junpʼéel tiʼ le lugaroʼob xan tuʼux káaj le protestanteʼoboʼ. In wíitsʼin Kätheeʼ síij tu añoil 1923. In papá kaʼacheʼ soldado yéetel in maamaeʼ ku kʼaay kaʼach tiʼ junpʼéel teatro.

Tiʼ in papá tin heredartaj in tsʼíiboltik u yantal justicia. Por ejemploeʼ le ka xuʼul u beetik u soldadoileʼ tu tsʼáaj u tienda. Chéen baʼaleʼ como le máaxoʼob ku binoʼob maan jach óotsiloʼoboʼ jach yaʼab u pʼaaxoʼob, le oʼolal in papáeʼ quebrarnaji. Le baʼax úuch tiʼ in papáoʼ unaj kaʼach u kaʼansikteneʼ maʼ chéen chʼaʼabil u yáantik máak u maasiliʼ. Chéen baʼaleʼ wa táankelem máakeʼ jach istikyaj u jóoʼsik tu tuukul le baʼax u kʼáat u beetoʼ.

Teen yéetel in wíitsʼin Kätheeʼ t-heredartaj tiʼ k-maama u jatsʼutstal k-uʼuyik paax, k-kʼaay yéetel k-óokʼot. Jach kiʼimak k-óol kaʼach t-paalil, pero tu añoil 1939, kʼexpaj k-kuxtal.

Jach kʼaschaj tuláakal baʼal

Le yaanten 15 añosoʼ jóokʼen tin xookeʼ ka ooken in kan ballet tiʼ junpʼéel escuela. Teʼeloʼ tin kanaj danza expresionista (ich alemáneʼ ausdruckstanz) letiʼe ku yóokʼostik kaʼach Mary Wigmanoʼ. Teʼ clase óokʼotaʼ le bix u péeksik u wíinklil máakoʼ ku yeʼesik bix u yuʼubikuba. Tin kanaj xan in pintart cuadros yéetel uláakʼ baʼaloʼob. Jach tin disfrutartaj in kuxtal tin paalil yéetel tin x-lóoʼbayanil, pero tu añoil 1939, káaj le Segunda Guerra Mundialoʼ. Tsʼoʼoleʼ tu añoil 1941, tsaʼay tuberculosis tiʼ in papáeʼ ka kíimiʼ. Leloʼ jach tu beetaj u yaatal in wóol.

Táaj kʼaas le baʼax úuch teʼ guerraoʼ. Kex chéen 17 años yaanteneʼ tin tsʼáaj cuenta jach tsʼoʼok u kʼastal le yóokʼol kaabaʼ. Tak le máaxoʼob maʼatech u baʼateloʼob kaʼachoʼ káaj u yoksikubaʼob teʼ guerraoʼ. Suukchaj k-ilik yaʼab máak ku kíimil yéetel u pʼáatal minaʼan le baʼaxoʼob kʼaʼabéet tiʼ máakoʼ. Óolak láaj júutuk k-otoch le ka wáakʼ junpʼéel bombaoʼ, tsʼoʼoleʼ yaʼab tiʼ k-láakʼtsiloʼobeʼ kíimoʼob teʼ guerraoʼ.

Tu añoil 1945 ka tsʼoʼok le guerraoʼ teen, in maama yéetel Kätheeʼ láayliʼ tiaʼanoʼon kaʼach Halleeʼ. Teʼ kʼiinoʼoboʼ tsʼoʼok in beel yéetel anchaj juntúul in chaambal. Chéen baʼaleʼ como yaanten kaʼach yaʼab problemas yéetel in wíichameʼ t-chʼaʼtuklaj k-pʼatikba. Utiaʼal túun in líiʼsik in chan hijaeʼ káaj in meyaj de bailarina yéetel in pintartik cuadros.

Le ka tsʼoʼok le guerraoʼ jóoʼsaʼab kanpʼéel jaats tiʼ Alemania. Le kaaj tuʼux kajaʼanoʼon kaʼachoʼ pʼáat tu kʼab le Unión Soviéticaoʼ, bey úuchik k-pʼáatal yáanal le gobierno comunistaoʼ. Tu añoil 1949, le Alemania orientaloʼ suunaj bey República Democrática Alemanaeʼ.

Le gobierno comunistaoʼ

Teʼ kʼiinoʼob jeʼeloʼ kʼojaʼanchaj in maama le beetik káaj in atendertik. Tsʼoʼoleʼ káaj xan in meyaj tu oficinail le gobiernooʼ. Maʼ xáanchaj ka káaj in biskinba yéetel junjaats paalaloʼob taak u yeʼeskoʼob tuláakal le injusticiaʼob ku beetik le gobierno comunistaoʼ. Por ejemploeʼ juntúul xiʼipaleʼ maʼ chaʼab u xokik u universidadiʼ tumen u papá kaʼacheʼ tiaʼan tu partido le naziʼoboʼ. Teneʼ in kʼaj óol le xiʼipaloʼ tumen suuk kaʼach k-muchʼikba kʼaay yéetel paax. Kin tuklik kaʼach: «¿Baʼaxten letiʼ boʼotik le baʼax tu beetaj u papáoʼ?». Jujunpʼíitil joʼopʼ in maas biskinba yéetel le máaxoʼob tiaʼanoʼob tu contra le gobiernooʼ. Káaj xan in táakpajal tiʼ marchaʼob, yéetel juntéenjeakeʼ tin takʼaj juʼunoʼob ku tʼaanoʼob tu contra le gobierno tu escalerail le tribunaloʼ.

U tsʼookeʼ como kin meyaj de secretaria teʼ Comité Regional de Pazoʼ, kin tsʼíibtik cartaʼob ku bin tu contra le baʼax kin creerkoʼ. Juntéenjeakeʼ chéen yoʼolal políticaeʼ le Comitéoʼ tu yaʼalaj ka túuxtaʼak juʼunoʼob tu yotoch juntúul máak tsʼoʼok u chʼíijil. Le máakaʼ kajaʼan teʼ tuláakʼ junjaats u luʼumil Alemaniaoʼ. Letiʼobeʼ taak kaʼach u beetkoʼob utiaʼal u tuklaʼaleʼ le máakoʼ táan u tsʼáaikuba tu contra le gobiernooʼ. Jach tu molestarten le baʼax taak u beetkoʼoboʼ, le oʼolal tin taʼakaj tuláakal le juʼunoʼob teʼ oficina utiaʼal maʼ u túuxtaʼaloʼoboʼ.

«U maas kʼasaʼanil» le koʼoleloʼob tu tsʼáajten esperanzaoʼ

Tu mesil junio tiʼ 1951, ook kaʼatúul máakoʼob tin oficinaeʼ ka tu yaʼaloʼob: «Yaan k-biskech kʼalbil». Tu bisenoʼob teʼ cárcel kʼaj óolaʼan bey Roter Ochse (Buey Rojo). Ka máan junpʼéel añoeʼ taʼak in pool tumen kin tsʼáaikinba tu contra le gobiernooʼ. Juntúul xiʼipal aʼal tiʼ le Stasioʼ (policía secreta) teen takʼ le juʼunoʼob tu escalerail le tribunaloʼ. Maʼ maʼalob bix úuchik in juzgartaʼaliʼ tumen mix máak tsʼíibt le baʼax tin waʼalaj utiaʼal in defenderkinbaoʼ. Aʼalaʼabeʼ seis años kin kʼalbil cárcel. Le kʼalaʼanenoʼ kʼojaʼanchajeneʼ ka bisaʼaben tu hospitalil le cárceloʼ, teʼeloʼ yaan kaʼach uláakʼ 40 koʼoleloʼobiʼ. Pero le ka tin wilaj jach kʼasaʼanoʼobeʼ sajakchajeneʼ ka binen áalkabil in paʼa le joonaj utiaʼal u jeʼebeltenoʼ.

Le guardiaoʼ tu yaʼalajten: «¿Baʼax a kʼáat?».

Teneʼ tin waʼalajtiʼ: «¡In kʼáat jóokʼol wayeʼ, kʼaleneʼex chéen tin juunal, pero in kʼáat jóokʼol wayeʼ!». Chéen baʼaleʼ le guardiaoʼ maʼ tu beetaj u cuentail le baʼax tin waʼalajtiʼoʼ. Maʼ xáanchaj ka tin wileʼ yaan juntúul koʼolel maʼ bey jeʼex u maasiloʼoboʼ. Letiʼeʼ bey kiʼimak u yóoleʼ yéetel bey yaan jeetsʼelil tiʼeʼ, le oʼolal binen kutal tu yiknal.

Chéen baʼaleʼ jach tu beetaj u jaʼakʼal in wóol le baʼax tu yaʼaloʼ, letiʼeʼ tu yaʼalaj: «Maas maʼalob ka a kanáantaba wa yaan a kutal tin wiknal. U maasil le koʼoleloʼoboʼ ku yaʼalikoʼobeʼ teen u maas kʼasaʼanil tumen u testigoen Jéeoba».

Teneʼ maʼ in wojel kaʼach wa u testigoʼob Jéeobaeʼ ku yilaʼaloʼob bey u enemigoʼob le gobiernooʼ. Baʼax in wojleʼ es ke tin paalileʼ ku bin kaʼatúul j-xoknáaloʼob tiʼ le Biblia (bey kʼaj óolaʼanil kaʼach u testigoʼob Jéeobaoʼ) u xíimbaltoʼob in papáoʼ. In papáeʼ ku yaʼalik kaʼach: «Jach jaaj baʼax ku yaʼalik le j-xoknáaloʼob tiʼ le Bibliaoʼ».

Le ka tin kʼaj óoltaj Berta Brüggemeiereʼ jach kiʼimakchaj in wóol, hasta okʼolnajen. Tin sen kʼáatajtiʼ ka u kaʼansten máax Jéeoba. Jach yaʼab k-tsikbal kaʼachi, yaʼab baʼaloʼob tiʼ le Biblia tu kaʼansajtenoʼ. Por ejemploeʼ tu kaʼansajteneʼ Jéeobaeʼ letiʼe u jaajil Diosoʼ, u pʼeek u baʼateʼel máak, ku yeʼesik yaabilaj bey xan justicia. Tin kanaj xaneʼ Dioseʼ yaan u yutskíintik tuláakal le baʼaxoʼob tsʼoʼok u kʼaskúuntik wíinikoʼ. Jeʼex u yaʼalik Salmo 37:10, 11: «Ichil junpʼíit kʼiineʼ maʼ kun antal kʼasaʼan máakoʼob. [...] Pero le utsul máakoʼoboʼ yaan u pʼáatloʼob way luʼumeʼ, jach yaan u kiʼimaktal u yóoloʼob tumen mix baʼal kun beetik u chiʼichnaktaloʼob».

Kin jóokʼol cárcel

Cinco años tin beetaj cárcel, tu añoil 1956 chaʼab in jóokʼol. Cinco días jóokʼkeneʼ ka binen Alemania occidental. Teʼ kʼiinoʼoboʼ tsʼokaʼaniliʼ u yantal kaʼatúul in hijaʼobeʼ Hannelore yéetel Sabine, letiʼobeʼ binoʼob tin wéetel. Tin divorciartinba, tsʼoʼoleʼ káaj in xook tu kaʼatéen yéetel u testigoʼob Jéeoba. Tin kaneʼ utiaʼal in beetik baʼax u kʼáat Jéeobaeʼ kʼaʼabéet in beetik jujunpʼéel kʼeexoʼob ichil in kuxtal. Tin tsʼáaj in wóol in beete, le oʼolal tu añoil 1958, okjaʼanajen.

Tsʼoʼok in beel tu kaʼatéen, pero teʼ vezaʼ yéetel juntúul u testigo Jéeoba ku kʼaabaʼtik Klaus Menne. Jach t-difrutartaj le kʼiinoʼob tsʼokaʼan k-beeloʼ, tsʼoʼoleʼ anchaj kaʼatúul k-paalal Benjamin yéetel Tabia. Tsʼoʼok u máan 20 años kíimik Klaus tiʼ junpʼéel accidente, tak bejlaʼa viudaeneʼ. Le oʼolal jach ku líikʼil in wóol in wojéeltik yaan u kaʼa líiʼsaʼal le kimenoʼob tiʼ junpʼéel paraíso way Luʼumeʼ (Lucas 23:​43; Hechos 24:15). Uláakʼ baʼax líiʼsik in wóoleʼ letiʼe in wilik táan u meyajtaʼal Jéeoba tumen tuláakal in paalaloʼoboʼ.

Bejlaʼeʼ in wojel chéen Jéeoba jeʼel u beetik u yantal justiciaeʼ. Letiʼeʼ u yojel baʼax k-muʼyajtik beoraaʼ bey xan le baʼaxoʼob t-muʼyajtaj úuchjeakiloʼ. Le baʼaloʼob beyaʼ maʼ tu páajtal u yojéeltik wíinik. Le baʼaxoʼob kin kanikoʼ jach ku beetik u yantalten jeetsʼelil, maases le kéen in wil u beetaʼal injusticia. Eclesiastés 5:8, ku yaʼalik: «Wa ka wilik táan u pechʼ óoltaʼal le óotsiloʼob yéetel maʼ tu beetaʼal justicia mix tu beetaʼal baʼax toj teʼ luʼum tuʼux kajaʼanechoʼ, maʼ u jaʼakʼal a wóol tu yoʼolal le baʼax ku yúuchloʼ tumen le máax yaantiʼ autoridad ku beetik u kʼasaʼaniloʼ táan u jach ilaʼal tumen juntúul máax maas kaʼanal yanil tiʼ letiʼ. Le máaxoʼob yaan autoridad tiʼoboʼ mantatsʼ yaan uláakʼ máakoʼob maas kaʼanal yaniloʼob tiʼ letiʼob». Jéeobaeʼ letiʼe máax maas yaan autoridad tiʼoʼ, le oʼolal le Bibliaoʼ ku yaʼalik: «Mix baʼal ku páajtal u taʼakal tiʼ letiʼ, baʼaxeʼ láaj jéechkab yéetel jeʼekʼab tu táan u yich, tumen tiʼ letiʼ kun kʼubbil cuenta» (Hebreos 4:13).

Baʼaxoʼob tsʼoʼok in wilik ichil in kuxtal

Le kéen kʼáataʼakten bix le kuxtal tu kʼiinil le naziʼob yéetel le comunistaʼoboʼ, suuk in waʼalik: «Jach maʼ chéen chʼaʼabiliʼ». Le kaʼapʼéel gobiernoʼoboʼ tsʼoʼok u yeʼesikeʼ wíinikeʼ maʼ tu páajtal u gobernarkuba chéen tu juunal. Jach jaaj baʼax ku yaʼalik le Bibliaoʼ: «Máakeʼ mantatsʼ ku pechʼ óoltik u yéet máakil utiaʼal u beetik kʼaas tiʼ» (Eclesiastés 8:⁠9).

Tin x-chʼúupalileʼ kin tuklikeʼ u gobierno wíinik ken u luʼs le injusticiaoʼ. Pero beoraaʼ in wojel chéen u gobierno Dios jeʼel u beetik tuláakal baʼal tubeeleʼ. Letiʼeʼ yaan u yeʼesik justo le kéen u xuʼuls tuláakal le máakoʼob kʼasaʼanoʼoboʼ yéetel le kéen u gobernart Jesús le Luʼumaʼ. Le Bibliaoʼ ku yaʼalik yoʼolal Jesús: «Ta yaabiltaj le justiciaoʼ ka ta pʼektaj baʼax kʼaas» (Hebreos 1:9). Jach kin tsʼáaik u graciasil tiʼ Jéeoba úuchik u tsʼáaikten u páajtalil in kʼaj óoltik le rey jach u yaabiltmaj le justiciaoʼ. Kin tsʼíiboltik u kʼuchul u kʼiinil k-antal yáanal u páajtalil le gobiernooʼ.

[Oochel]

Yéetel in hija Hannelore yéetel Sabine le ka kʼuchoʼon Alemania occidentaloʼ

[Oochel]

Yéetel in hijo Benjamin bey xan yéetel Sandra, u yatan