1. ¿Baʼax u kʼáat Isaías ka u naʼat le israelitaʼoboʼ?

 PROFETA Isaíaseʼ tu yaʼaleʼ Jéeobaeʼ letiʼe «Dios chúukaʼan u yóoloʼ» wa u Diosil le jaajoʼ. Le tʼaan chúukaʼan óolal meyajnaj tiʼ Isaíasoʼ ich hebreoeʼ u kʼáat u yaʼal «amén» (Isa. 65:16). Le tʼaan aménoʼ u kʼáat u yaʼal «ka béeyak» wa «jach beyoʼ». Teʼ Bibliaoʼ yaʼab u téenel ku chíikpajal le tʼaan aménoʼ utiaʼal u yaʼalaʼal Jéeoba yéetel Jesúseʼ ku yaʼalikoʼob u jaajil. Isaíaseʼ u kʼáat kaʼach ka u naʼat le israelitaʼob lelaʼ: Jéeobaeʼ mantatsʼ ku béeykuntik baʼax ku yaʼalik. Tuláakal le baʼax tsʼoʼok u béeykuntik Jéeoba tak beoraaʼ ku yeʼesik jach tu jaajil beyoʼ.

2. ¿Baʼaxten k-creertik yaan u béeykuntik u promesaʼob Jéeoba yéetel baʼax preguntailoʼob kun núukbil teʼ xookaʼ?

² ¿K-confiar wa tiʼ le promesaʼob u beetmaj Jéeobaoʼ? Kex 800 años u yaʼal Isaías le tʼaanoʼobaʼ apóstol Pabloeʼ tu yaʼaleʼ jeʼel u páajtal k-confiar tiʼ le promesaʼob u beetmaj Jéeobaoʼ, tu yaʼalaj: «Dioseʼ junpuliʼ maʼ tu páajtal u tuus» (Heb. 6:18). Tukult lelaʼ: tiʼ junpʼéel u sayabil jaʼeʼ maʼ tu páajtal u jóokʼol chʼujuk jaʼ yéetel chʼóochʼ jaʼiʼ, ¿máasaʼ? Bey u yúuchul yéetel Jéeoba xanoʼ como letiʼ u sayabil le jaajoʼ maʼ tu páajtal u tuus. Yoʼolal leloʼ k-creertik yaan u béeykuntik tuláakal le baʼax ku prometerkoʼ. Teʼ xookaʼ yaan k-núukik le preguntaʼobaʼ: ¿Baʼax u prometermaj Jéeoba? ¿Baʼax eʼesik jach tu jaajil yaan u béeykuntik le baʼax u prometermoʼ?

3. 1) ¿Baʼax promesail beetik u kiʼimaktal k-óol? (Apocalipsis 21:​3, 4). 2) ¿Baʼax ku yaʼalik jujuntúul máakoʼob kéen k-xoktiʼob le tekstooʼ?

³ Le promesa ken k-xakʼalt beoraaʼ jach ku beetik u kiʼimaktal u yóol le máaxoʼob meyajtik Diosoʼ (xok Apocalipsis 21:​3, 4). Jéeobaeʼ ku prometerkeʼ «maʼ tun yantal kíimil, mix okʼol, mix kʼiʼinamil». Le tekstoaʼ suuk u meyajnaktoʼon teʼ kʼaʼaytaj utiaʼal k-líiʼsik u yóol le máakoʼoboʼ bey xan utiaʼal k-eʼesiktiʼob bix le kuxtal kun antal teʼ Paraísooʼ. Pero yaan tiʼ le letiʼobeʼ ku yaʼalik: «Jatsʼuts le baʼax ku yaʼalikoʼ, pero kensa wa ka úuchuk».

4. 1) ¿Baʼax u yojel Jéeoba kun úuchul teʼ kʼiinoʼobaʼ? 2) ¿Chéen wa tu yaʼalaj Jéeoba le promesaʼoboʼ?

⁴ Jéeobaeʼ tu beetaj u tsʼíibtik apóstol Juan bix le kuxtal kun antal teʼ Paraísooʼ. Desde teʼ tiempo jeʼeloʼ letiʼeʼ u yojel teʼ kʼiinoʼobaʼ yaan k-tsikbaltik tiʼ le máakoʼob yoʼolal le jatsʼuts promesaaʼ. Pero u yojel xaneʼ yaʼab máakoʼobeʼ yaan u difíciltaltiʼob u creerkoʼob wa yaan u béeytal (Isa. 42:9; 60:2; 2 Cor. 4:​3, 4). ¿Baʼax jeʼel k-beetik utiaʼal k-áantik le máakoʼob u creertoʼob yaan u béeytal baʼax ku yaʼalik Apocalipsis 21:​3, 4? ¿Baʼax jeʼel k-beetik utiaʼal ka maas confiarnakoʼon tiʼ le promesa u beetmaj Jéeobaoʼ? Jéeobaeʼ maʼ chéen tu yaʼalaj le promesaoʼ, baʼaxeʼ tu yaʼalaj baʼaxten jeʼel u páajtal k-creertik yaan u béeytaleʼ. Koʼox ilik baʼaxoʼob eʼesik yaan u béeytal.

5. ¿Baʼax tekstoil eʼesik yaan u béeykuntik u promesaʼob Jéeoba yéetel baʼax ku yaʼalik le tekstooʼ?

⁵ Teʼ versículoʼob ku segueroʼ Jéeobaeʼ ku yeʼesik jach tu jaajil yaan u sutik paraísoil le Luʼumaʼ, ku yaʼalik: «Le Máax kulukbal teʼ trono xanoʼ tu yaʼalaj: ‹¡Ilawile! Teneʼ táan in túumbenkuntik tuláakal baʼal›. Tu yaʼalaj xan: ‹Tsʼíibt le tʼaanoʼobaʼ tumen jach jaajtakoʼob yéetel yaan u béeytaloʼob›. Ka tu yaʼalajten: ‹¡Tsʼoʼok u béeytaloʼob! Teen le Alfa yéetel le Omegaoʼ, teen u káajbal yéetel u xuul›» (Apo. 21:​5, 6a).

6. ¿Bix u yáantkoʼon Apocalipsis 21:​5, 6 k-creert jach tu jaajil yaan u béeykuntik u promesaʼob Jéeoba?

⁶ Le baʼax tu yaʼalaj Jéeoba teʼ tekstoʼobaʼ jeʼel u páajtal u yaʼalaʼaleʼ bey jeʼex ka u firmart junpʼéel juʼun eʼesik jach tu jaajil yaan u béeykuntik le baʼax u prometermoʼ. b Le promesa u beetmaj Jéeobaoʼ ku chíikpajal tiʼ Apocalipsis 21:​3, 4, yéetel teʼ versículo 5 yéetel 6 ku firmartik wa ku asegurartik jach tu jaajil yaan u béeykuntik. Beoraaʼ koʼox xakʼaltik le tʼaanoʼob meyajnaj tiʼ Jéeoba teʼ versículoʼobaʼ.

7. ¿Baʼaxten especial le baʼax ku yaʼalaʼal tu káajbal le versículo 5?

⁷ Le versículo cincooʼ ku káajal yéetel le tʼaanoʼobaʼ: «Le Máax kulukbal teʼ trono xanoʼ tu yaʼalaj» (Apo. 21:5a). Le tʼaanoʼobaʼ jach especialoʼob tumen ku yeʼesik jach nukaʼaj tʼaan Jéeoba. Lelaʼ juntéen tiʼ le óoxtéen ku yaʼalik u libroil Apocalipsis tʼaanaj Jéeobaoʼ. Jeʼex k-ilkoʼ le máax asegurartik le promesaʼobaʼ Jéeoba, maʼ juntúul ángel jach yaan u poderiʼ mix Jesúsiʼ. Le oʼolal jeʼel u páajtal k-creertik yaan u béeytaleʼ tumen «letiʼeʼ maʼ tu páajtal u tuus» (Tito 1:2). Leloʼ ku yeʼesikeʼ jeʼel u páajtal k-confiar tiʼ baʼax ku yaʼalik Apocalipsis 21:​5, 6.

8. ¿Baʼax ku yaʼalik Jéeoba utiaʼal u yeʼesik yaan u béeykuntik u promesa? (Isaías 46:10).

⁸ Beoraaʼ koʼox xakʼaltik le tʼaan «¡Ilawile!» (Apo. 21:5). Le tʼaan ich griego ku meyaj  utiaʼal u yaʼalaʼal «¡Ilawile!» jach yaʼab u téenel ku chíikpajal tiʼ u libroil Apocalipsis. Junpʼéel libroeʼ ku yaʼalikeʼ le tʼaan jeʼelaʼ suuk u meyaj «utiaʼal u taaktal u yojéeltaʼal le baʼax kun aʼalbiloʼ». ¿Baʼax túun aʼalaʼabi? Dioseʼ tu yaʼalaj: «¡Ilawile! Teneʼ táan in túumbenkuntik tuláakal baʼal». Kex todavía maʼ u béeykunt Jéeoba le baʼaloʼobaʼ letiʼeʼ ku yaʼalik bey táan u beetkeʼ tumen jach seguro yaan u béeykuntik (xok Isaías 46:10).

9. 1) ¿Máakalmáak le kaʼapʼéel baʼaloʼob ken u beet Jéeobaoʼ? 2) ¿Baʼax kun úuchul tiʼ le «kaʼan» yéetel le «luʼum» yanoʼob teʼ kʼiinoʼobaʼ?

⁹ Beoraaʼ koʼox tʼaan tiʼ uláakʼ baʼal ku yaʼalik Apocalipsis 21:5: «Táan in túumbenkuntik tuláakal baʼal». Le baʼax ku yaʼalik le tekstoaʼ ku yeʼesikeʼ Jéeobaeʼ yaan u beetik kaʼapʼéel baʼal: yaan baʼaxoʼob ken u jeelinte yéetel yaan baʼaxoʼob ken u yutskíinte. Yáaxeʼ koʼox tʼaan tiʼ le baʼaloʼob ken u jeelintoʼ. Apocalipsis 21:​1, ku yaʼalik: «Le kaʼan yéetel le luʼum yanoʼob kaʼachoʼ tsʼoʼok u pʼáatal minaʼanoʼob». Le ‹kaʼan tsʼoʼok u pʼáatal minaʼanoʼ› ku representartik le gobiernoʼob yanoʼob yáanal u páajtalil Satanás yéetel u demonioʼoboʼ (Mat. 4:​8, 9; 1 Juan 5:19). Le Bibliaoʼ yaan horaeʼ kéen u yaʼal le tʼaan luʼumoʼ táan u tʼaan tiʼ le máakoʼob kajaʼanoʼob way Luʼumeʼ (1 Cró. 16:31; Gén. 11:1). «Le luʼum yanoʼob kaʼach» ku yaʼalik u libroil Apocalipsisoʼ ku representartik le kʼasaʼan máakoʼob yanoʼob teʼ kʼiinoʼobaʼ. Le oʼolal Jéeobaeʼ maʼ ken u yutskíint le «kaʼan yéetel le luʼum yanoʼob kaʼachoʼ», baʼaxeʼ yaan u xuʼulskoʼob yéetel yaan u jeelintkoʼob. Letiʼeʼ yaan u tsʼáaik «junpʼéel túumben kaʼan yéetel junpʼéel túumben luʼum». Lelaʼ u kʼáat u yaʼaleʼ Jéeobaeʼ yaan u tsʼáaik junpʼéel túumben gobierno yéetel yaan u kajtal chéen utsul máakoʼob way Luʼumeʼ.

10. ¿Baʼax uláakʼ ken u túumbenkunt Jéeoba?

¹⁰ ¿Bix uláakʼ ken u ‹túumbenkuntil tuláakal baʼal› Jéeoba? (Apo. 21:5). Letiʼe kéen u yutskíint le Luʼum tuʼux kajaʼanoʼonaʼ yéetel letiʼe kéen u pʼat perfectoil wíinikoʼ. Jeʼex tu yaʼalil profeta Isaíaseʼ le Luʼumaʼ yaan u suut junpʼéel jatsʼuts paraísoil jeʼex le yaan kaʼach tu jardínil Edéneʼ, toʼon xaneʼ yaan k-túumbenkuntaʼal tumen yaan u pʼáatal jach maʼalob k-wíinklil. Tsʼoʼoleʼ Jéeobaeʼ yaan tsʼakik le máaxoʼob chʼóopoʼoboʼ, le kóoktakoʼoboʼ, le móochoʼoboʼ yéetel yaan u kaʼa kuxkíintik le máaxoʼob kimenoʼoboʼ (Isa. 25:8; 35:​1-7).

11. Jéeobaeʼ ¿baʼax tu yaʼalaj tiʼ Juan ka u beete yéetel baʼaxten?

¹¹ ¿Baʼax uláakʼ eʼesik yaan u béeykuntik u promesa Jéeoba? Letiʼeʼ tu yaʼalaj tiʼ Juan: «Tsʼíibt le tʼaanoʼobaʼ tumen jach jaajtakoʼob yéetel yaan u béeytaloʼob» (Apo. 21:5). Jéeobaeʼ maʼ chéen tu yaʼalaj tiʼ Juan ka u «tsʼíibt le tʼaanoʼobaʼ», baʼaxeʼ tu yaʼalajtiʼ baʼaxten kʼaʼabéet u beetik. Tu yaʼalaj: «Tumen jach jaajtakoʼob yéetel yaan u béeytaloʼob». Lelaʼ u kʼáat u yaʼaleʼ Jéeobaeʼ jach tu jaajil ku béeykuntik baʼax ku yaʼalik. Jach kiʼimak k-óol úuchik u tsʼíibtik Juan le baʼaxoʼob aʼalaʼabtiʼoʼ tumen beyoʼ ku páajtal k-ojéeltik yaan u yantal junpʼéel paraíso yéetel bix le jatsʼuts bendiciónoʼob ken k-kʼamoʼ.

12. ¿Baʼaxten Jéeobaeʼ ku yaʼalik: «¡Tsʼoʼok u béeytaloʼob!»?

¹² ¿Baʼax uláakʼ tu yaʼalaj Jéeoba? Tu yaʼalaj: «¡Tsʼoʼok u béeytaloʼob!» (Apo. 21:6). Kex todavía maʼ béeychajak le baʼax u yaʼalmaj Dios yoʼolal le Paraísooʼ letiʼeʼ ku yaʼalik bey tsʼoʼok u béeytaleʼ utiaʼal u yeʼesik deporsi yaan u béeytal. ¿Baʼax uláakʼ tu yaʼalaj Jéeoba utiaʼal u maas eʼesik ku béeykuntik baʼax ku yaʼalik?

13. ¿Baʼaxten Jéeobaeʼ ku yaʼalik: «Teen le Alfa yéetel le Omegaoʼ»?

¹³ Jeʼex tsʼoʼok k-yáax aʼalikoʼ tiʼ le baʼaxoʼob tsʼaʼab u yil Juanoʼ Jéeobaeʼ óoxtéen tʼaanaji (Apo. 1:8; 21:​5, 6; 22:13). Tiʼ le óoxtéen tʼaanajoʼ tu yaʼalaj: «Teen le Alfa yéetel le Omegaoʼ». Teʼ abecedario griegooʼ le yáax letraoʼ u kʼaabaʼeʼ Alfa yéetel le u tsʼook letraoʼ u kʼaabaʼeʼ Omega. Leloʼ ku yeʼesikeʼ le kéen u yaʼal Jéeoba letiʼ «le Alfa yéetel le Omegaoʼ», ku tsʼáaik naʼatbileʼ le kéen u káajs junpʼéel baʼaleʼ yaan u tsʼoʼoksik.

14. 1) ¿Baʼax kʼiin ka tu yaʼalaj Jéeoba «Alfa» yéetel baʼax kʼiin ken u yaʼal «Omega»? 2) ¿Baʼax ku asegurartiktoʼon Jéeoba teʼ Génesis 2:​1-3?

¹⁴ Jéeobaeʼ le ka tsʼoʼok u beetik Adán yéetel Evaeʼ tu yaʼalajtiʼob baʼax u tukultmaj utiaʼal wíinik bey xan utiaʼal le Luʼumaʼ. Le Bibliaoʼ ku yaʼalik: «Dioseʼ tu bendecirtoʼob táan u yaʼalik: ‹Yanchajak a paalaleʼex yéetel yaʼabchajkeʼex, chupeʼex le luʼumaʼ yéetel kanáanteʼex›» (Gén. 1:28). Le ka tu yaʼalaj Jéeoba le tʼaanoʼobaʼ bey ka u yaʼal «Alfaeʼ» tumen teʼ súutukil káaj u béeykuntik le baʼax u chʼaʼtukultmoʼ. Yaan u kʼuchul u kʼiinileʼ u paalal Adán yéetel Eva ku yuʼubikoʼob tʼaanoʼ yaan u chupikoʼob le Luʼumaʼ yéetel yaan u sutkoʼob paraísoil, teʼ kʼiin jeʼeloʼ Jéeobaeʼ yaan u yaʼalik «Omega». Le ka tsʼoʼok u beetik Jéeoba «tuláakal le baʼaxoʼob yanoʼob teʼ kaʼanoʼoboʼ bey xan teʼ luʼumoʼ» tu yaʼalaj junpʼéel baʼal eʼesik mantatsʼ ku béeykuntik baʼax ku yaʼalik, lelaʼ tiaʼan tiʼ Génesis 2:​1-3 (xoke). Jéeobaeʼ tu yaʼaleʼ le día sieteoʼ santo. ¿Baʼaxten túun ku yaʼalaʼal santo? Tumen Jéeobaeʼ tu separartaj le día jeʼeloʼ utiaʼal u béeykuntik le baʼax u chʼaʼtukultmaj utiaʼal wíinik bey xan utiaʼal le Luʼumoʼ. Le oʼolaleʼ le ka tu yaʼalaj santo le día sieteoʼ bey táan u yaʼalik tu  tsʼoʼokbal le kʼiin jeʼeloʼ yaan u láaj u béeykuntik le baʼax u prometermoʼ.

15. ¿Baʼax jeʼel u beetik u tuklaʼal maʼ ken u béeykunt Jéeoba le baʼax u chʼaʼtukultmoʼ?

¹⁵ Adán yéetel Evaeʼ maʼ tu yuʼuboʼob u tʼaan Diosiʼ ka túun kʼebanchajoʼob, bey úuchik u máanskoʼob le kʼeban tiʼ u paalaloʼoboʼ (Rom. 5:12). Yoʼolal le baʼax úuchaʼ, ¿yaan wa túun u páajtal u chupik Jéeoba le Luʼum yéetel máaxoʼob ku yuʼubikoʼob tʼaan yéetel perfectoʼoboʼ? ¿Yaan wa u páajtal u yaʼalik Jéeoba «Omega» wa u béeykuntik le baʼax u chʼaʼtukultmoʼ? Maʼ xaaneʼ Satanáseʼ tu tukleʼ tsʼoʼok u ganar, tumen tu tukleʼ maʼ xaaneʼ Jéeobaeʼ maʼ yaʼab baʼal jeʼel u páajtal u beetkeʼ. Le Kʼaasilbaʼaloʼ tu tukleʼ wa Jéeoba ku xuʼulsik Adán yéetel Eva yéetel ku tsʼáaik uláakʼ pareja tu jardínil Edéneʼ jeʼel u páajtal u yaʼalik tuusnaj Jéeobaeʼ. ¿Baʼaxten? Tumen teʼ Génesis 1:​28, ku yaʼalikeʼ Jéeobaeʼ tiʼ Adán yéetel Eva tu yaʼalaj u paalal kun chupik le Luʼumaʼ.

16. ¿Maʼ xaaneʼ baʼaxten tu tuklaj Satanás jeʼel u páajtal u yaʼalikeʼ Jéeobaeʼ maʼatech u béeykuntik baʼax ku yaʼalik?

¹⁶ ¿Baʼax wal uláakʼ tu tuklaj Satanáseʼ? Maʼ xaaneʼ letiʼeʼ tu tukleʼ Jéeobaeʼ jeʼel u chaʼik u yantal u paalal Adán yéetel Evaeʼ, pero le u paalaloʼoboʼ mix bikʼin ken pʼáatkoʼob perfectoil (Ecl. 7:20; Rom. 3:23). Wa ka úuchuk beyoʼ Satanáseʼ jeʼel kaʼach u yaʼalikeʼ Jéeobaeʼ maʼatech u béeykuntik baʼax ku yaʼalik. ¿Baʼaxten? Tumen le baʼax u chʼaʼtukultmaj Diosoʼ maʼ kun béeychajal kaʼachi. Le Luʼumaʼ maʼ kun chuʼupul yéetel máaxoʼob perfectoʼob.

17. ¿Baʼax tu beetaj Jéeoba utiaʼal u yutskíintik le baʼaxoʼob tu kʼaskúuntaj Satanás yéetel le yáax máakoʼoboʼ, yéetel baʼax kun úuchul kéen tsʼoʼokok? (Ilawil xan le dibujooʼ).

¹⁷ Maʼ xaaneʼ Satanáseʼ pʼáat jaajap u chiʼ le ka tu yuʼubaj bix ken u yutskíintil Jéeoba le baʼax tu kʼaskúuntaj Adán yéetel Evaoʼ (Sal. 92:5). Tsʼoʼoleʼ le ka tu chaʼaj u yantal u paalal Adán yéetel Evaeʼ, Jéeobaeʼ tu yeʼesaj maʼatech u tuus yéetel mantatsʼ ku béeykuntik baʼax ku yaʼalik. ¿Bix túun tu beetil? Letiʼeʼ tu beetaj u yantal junpʼéel «chʼiʼibal» kun salvartik u paalal Adán yéetel Eva ku yuʼubkoʼob tʼaanoʼ (Gén. 3:15; 22:18). Satanáseʼ junpuliʼ maʼ máan tu tuukul wa Jéeobaeʼ yaan u túuxtik u Hijo utiaʼal u salvartik wíinik. ¿Baʼaxten? Tumen Jéeobaeʼ tu túuxtaj u Hijo yoʼolal yaabilaj (Mat. 20:28; Juan 3:16). Chéen baʼaleʼ Satanáseʼ kʼasaʼan, minaʼan u yaabilaj Jach yaʼab utsiloʼob ken u taas le boʼol tu tsʼáaj Jéeobaoʼ tumen tu tsʼoʼokbal le 1,000 añosoʼ u paalal Adán yéetel Eva ku yuʼubikoʼob tʼaanoʼ  yaan u kajtaloʼob teʼ Paraísooʼ. Bey kun béeytal le baʼax u chʼaʼtukultmaj Jéeoba desde tu káajbaloʼ. Teʼ kʼiin jeʼeloʼ Jéeobaeʼ yaan u yaʼalik «Omega».

18. ¿Máakalmáak le óoxpʼéel baʼaloʼob eʼesik Jéeobaeʼ yaan u béeykuntik u promesa? (Ilawil xan le cuadro « Óoxpʼéel baʼaloʼob eʼesik yaan u béeykuntik Jéeoba u promesa»).

¹⁸ Teʼ xookaʼ tsʼoʼok k-ilik yaʼab baʼaloʼob eʼesik le Luʼumaʼ yaan u suut paraísoil. ¿Baʼax jeʼel k-aʼalik tiʼ u maasil utiaʼal k-eʼesik jach tu jaajil yaan u béeytal le promesaaʼ? Yáaxeʼ jeʼel u páajtal k-aʼalikeʼ Jéeoba beetik le promesaaʼ. U libroil Apocalipsiseʼ ku yaʼalik: «Le Máax kulukbal teʼ trono xanoʼ tu yaʼalaj: ‹¡Ilawile! Teneʼ táan in túumbenkuntik tuláakal baʼal›». Jéeobaeʼ ku tsʼíiboltik u béeykuntik u promesa, yaantiʼ u naʼatil yéetel u poderil utiaʼal u beetik. U kaʼapʼéel baʼax jeʼel k-aʼalikeʼ es ke Jéeobaeʼ cada ken tʼaanak tiʼ u promesaʼobeʼ ku yaʼalik bey tsʼoʼok u yúuchloʼobeʼ. Letiʼeʼ ku yaʼalik beyaʼ: «Tsʼíibt le tʼaanoʼobaʼ tumen jach jaajtakoʼob yéetel yaan u béeytaloʼob. [ . . . ] ¡Tsʼoʼok u béeytaloʼob!». U yóoxpʼéel baʼax jeʼel k-aʼalikeʼ Jéeobaeʼ le kéen u káajs junpʼéel baʼaleʼ ku tsʼoʼoksik. Leloʼ bey u yeʼesik le ka tu yaʼalaj: «Teen le Alfa yéetel le Omegaoʼ». Jéeobaeʼ yaan u yeʼesikeʼ Satanáseʼ ku tuus yéetel maʼ tu páajtal u kʼatkuba tu beel.

19. ¿Baʼax jeʼel a beetik wa yaan máax maʼ tu creertik yaan u suut le Luʼum junpʼéel paraísooʼ?

¹⁹ Kʼaʼajaktoʼoneʼ cada ken k-tsikbalt tiʼ u maasil yoʼolal bix u yeʼesik Dios yaan u béeykuntik baʼax ku yaʼalikeʼ ku muʼukʼaʼantal k-fe tiʼ u promesaʼob Jéeoba. Le beetkeʼ wa le ken tsʼoʼokok k-xokik tiʼ wa máax le baʼax ku yaʼalik Apocalipsis 21:4 ku yaʼaliktoʼon: «Jatsʼuts le baʼax ku yaʼalikoʼ, pero kensa wa ka úuchuk». ¿Baʼax jeʼel u páajtal k-beetkeʼ? Jeʼel u páajtal k-xokik yéetel k-tsoliktiʼ le versículo 5 yéetel 6. Tsʼoʼoleʼ k-eʼesiktiʼ bix u asegurartik Jéeoba yaan u béeykuntik le baʼax ku prometerkoʼ. Letiʼeʼ bey u firmarmaj yéetel u sellarmaj u promesaʼobeʼ (Isa. 65:16).