1, 2. ¿Baʼaxten yaan horaeʼ jeʼel k-tuklikeʼ Jéeobaeʼ maʼ tu núukik k-oración?

 «SEN kiʼimakchajak a wóol ikil a meyajtik Jéeoba, letiʼ túuneʼ yaan u tsʼáaiktech baʼaxoʼob ku tsʼíiboltik a puksiʼikʼal» (Sal. 37:4). ¡Jach táaj jatsʼuts le promesaaʼ! Chéen baʼaleʼ, ¿tu séebaʼanil wa ken u tsʼáatoʼon Jéeoba le baʼax k-kʼáatiktiʼoʼ? ¿Baʼaxten maʼalob ka tuukulnakoʼon tiʼ le preguntaaʼ? Koʼox tuukul tiʼ le ejemploʼobaʼ. Juntúul kiik maʼ tsʼokaʼan u beeleʼ ku yaʼalik tiʼ Jéeoba taak u bin teʼ Escuela utiaʼal Máaxoʼob Kʼaʼaytik le Reinooʼ, pero ku yilkeʼ tsʼoʼok u máan yaʼab añoseʼ maʼ tu invitartaʼal. Juntúul sukuʼun táankelmeʼ kʼojaʼan yéetel ku kʼáatik tiʼ Jéeoba ka tsʼaʼakak utiaʼal ka maas áantajnak teʼ múuchʼuliloʼ, chéen baʼaleʼ maʼ tu yutstal. Juntúul sukuʼun yéetel u yatan xaneʼ ku kʼáatkoʼob tiʼ Jéeoba ka áantaʼak u hijoʼob utiaʼal maʼ u náachtal tiʼ letiʼ, pero le xiʼipaloʼ ku xuʼulul u adorartik Jéeoba.

² Maʼ xaaneʼ techeʼ yaan baʼax tsʼoʼok a kʼáatik tiʼ Jéeoba, pero maʼ u núukiʼ. Leloʼ jeʼel u beetik a tuklikeʼ Jéeobaeʼ ku núukik u oración u maasil, pero le a tiaʼaloʼ maʼ tu núukik. Yoʼolal leloʼ jeʼel u káajal a tuklikeʼ: «Míin maʼ tu núukik tumen yaan baʼax kʼaas in beetmaj». Jach bey úuchik tiʼ juntúul kiik ku kʼaabaʼtik Janiceoʼ. b Letiʼ yéetel u yíichameʼ tu yaʼaloʼob tiʼ Jéeobaeʼ taak u binoʼob Betel. Janiceeʼ ku yaʼalik: «Jach tin tuklaj maʼ tun xáantal kéen tʼaʼankoʼoneʼ, chéen baʼaleʼ máan le mesesoʼoboʼ, máan le añosoʼoboʼ mix juntéen tʼaʼanoʼon». Janiceeʼ ku seguer  u yaʼalik: «Jach tristechajen yéetel maʼ tin naʼatik baʼaxten maʼ tʼaʼanoʼoniʼ. Kin tuklik kaʼacheʼ míin yaan baʼax kʼaas in beetmaj. Si tin waʼalaj tiʼ Jéeoba jach baʼax in kʼáatiʼ, le oʼolal maʼ tin naʼatik baʼaxten maʼ tu núukaj in oracióniʼ».

3. ¿Baʼax ken k-il teʼ xookaʼ?

³ Maʼ xaaneʼ yaan kʼiineʼ k-tuklik: «¿Jach wa tu jaajil ku yuʼubik Jéeoba in oraciónoʼob?». Jujuntúul tiʼ le máaxoʼob meyajt Dios úuchjeakiloʼ taakchaj xan u yojéeltikoʼob u núukil le preguntaaʼ (Job 30:20; Sal. 22:2; Hab. 1:2). ¿Baʼax jeʼel u yáantkech utiaʼal a creertik ku yuʼubik Jéeoba a oraciónoʼobeʼ? (Sal. 65:2). Utiaʼal k-núukikeʼ yáaxeʼ yaan k-xakʼaltik le óoxpʼéel baʼaloʼobaʼ: 1) ¿Baʼax k-páaʼtik ka u beet Jéeoba? 2) ¿Baʼax ku páaʼtik Jéeoba ka k-beete? 3) ¿Baʼaxten yaan horaeʼ ku kʼaʼabéettal k-kʼexik jujunpʼéel tiʼ le baʼaloʼob k-kʼáatik ich oraciónoʼ?

4. Jeʼex u yaʼalik Jeremías 29:​12, ¿baʼax u prometermaj Jéeoba?

⁴ Jéeobaeʼ ku prometertik yaan u chʼenxikintik k-oraciónoʼob (xok Jeremías 29:12). Como jach u yaabiltmaj le máaxoʼob meyajtikoʼ ku yuʼubik tuláakal u oraciónoʼob (Sal. 10:17; 37:28). Pero leloʼ maʼ u kʼáat u yaʼal wa yaan u tsʼáaiktoʼon tuláakal le baʼax k-kʼáatiktiʼoʼ. Maʼ xaaneʼ jujunpʼéel tiʼ le baʼaxoʼob k-kʼáatik tiʼ Jéeobaoʼ hasta teʼ Paraíso ken u tsʼáatoʼonoʼ.

5. ¿Baʼax ku chʼaʼik en cuenta Jéeoba táanil tiʼ u núukik k-oración? Tsole.

⁵ Jéeobaeʼ utiaʼal u núukik k-oracióneʼ táanil yaan u yilik wa maʼ tu bin tu contra le baʼax u chʼaʼtukultmoʼ (Isa. 55:​8, 9). Junpʼéel tiʼ le baʼaxoʼob u chʼaʼtukultmaj Jéeobaoʼ letiʼe ka chuʼupuk le Luʼum yéetel máakoʼob kiʼimak u yóoloʼob yéetel ku chaʼik u gobernartaʼaloʼob tumen letiʼoʼ. Chéen baʼaleʼ Satanáseʼ tu yaʼaleʼ maas maʼalob jeʼel u bin tiʼ wíinik wa ka u gobernartuba tu juunaleʼ (Gén. 3:​1-5). Utiaʼal túun u yeʼesik Jéeoba maʼ jaaj le baʼax tu yaʼalaj le Kʼaasilbaʼaloʼ tu chaʼaj u gobernarkuba tu juunal máak. Le oʼolal teʼ kʼiinoʼobaʼ jach yaan problemas (Ecl. 8:9). Pero Jéeobaeʼ maʼ beora ken u yutskíintik tuláakal le problemas yanoʼ. Wa ka u beete jeʼel u tuklaʼaleʼ jach maʼalob u gobernar wíinik yéetel jeʼel u páajtal u yutskíintik tuláakal le problemas yaan way yóokʼol kaabeʼ.

6. ¿Baʼaxten maʼalob ka k-kʼaʼajseʼ Jéeobaeʼ u yaabiltmoʼon yéetel ku beetik baʼax toj?

⁶ Jéeobaeʼ maʼ junpʼéeliliʼ bix u núukik k-oraciónoʼobiʼ. Por ejemploeʼ le ka sen kʼojaʼanchaj rey Ezequíaseʼ tu kʼáataj tiʼ Jéeoba ka tsʼaʼakak. Jéeoba túuneʼ tu beetaj le baʼax tu kʼáatoʼ (2 Rey. 20:​1-6). Chéen baʼaleʼ le ka orarnaj apóstol Pablo utiaʼal ka luʼsaʼak le «kʼiʼix» chʼíikil tu bakʼeloʼ, lelaʼ maʼ xaaneʼ junpʼéel kʼojaʼanil, Jéeobaeʼ maʼ tu beetiʼ (2 Cor. 12:​7-9). Kʼaʼajak xan toʼon le baʼax úuch tiʼ apóstol Santiago yéetel Pedrooʼ. Letiʼobeʼ táan u kaxtaʼal bix u kíimsaʼaloʼob kaʼach tumen rey Herodes. Le múuchʼulil túunoʼ orarnaj yoʼolal Pedro yéetel maʼ xaaneʼ bey xan yoʼolal Santiago. Apóstol Santiagoeʼ kíimsaʼabiʼ, pero Pedroeʼ maʼ, Jéeobaeʼ tu beetaj junpʼéel milagro utiaʼal u salvartik (Hech. 12:​1-11). Maʼ xaaneʼ jeʼel k-tuklikeʼ: «¿Baʼaxten Jéeobaeʼ tu salvartaj Pedro, pero maʼ tu salvartaj Santiagoiʼ?». Le Bibliaoʼ maʼ tu yaʼalik. c Chéen baʼax k-ojleʼ es ke Jéeobaeʼ «mix juntéen ken u beet baʼax kʼaas» (Deu. 32:4). Letiʼeʼ u yaabiltmaj tu kaʼatúulil le apóstoloʼoboʼ (Apo. 21:14). Maʼ xaaneʼ yaan kʼiineʼ Jéeobaeʼ maʼ ken u núuk k-oración jeʼel bix táan k-páaʼtikoʼ. Chéen baʼaleʼ k-ojleʼ yaan u núukik k-oración jeʼel bix maas maʼalob u  yilkeʼ tumen letiʼeʼ u yaabiltmoʼon yéetel ku beetik baʼax toj (Job 33:13).

7. ¿Baʼax maʼ unaj k-beetkiʼ yéetel baʼaxten?

⁷ Unaj k-ilik maʼ k-comparartikba yéetel u maasil. Por ejemploeʼ maʼ xaaneʼ k-kʼáatik tiʼ Jéeoba wa baʼax, chéen baʼaleʼ k-ilkeʼ maʼ tu núukik k-oración. Pero kéen tsʼoʼokkeʼ k-ojéeltikeʼ juntúul sukuʼuneʼ tu kʼáataj xan le baʼax t-kʼáatoʼ, pero k-ilkeʼ letiʼeʼ bey núukaʼab u oracióneʼ. Lelaʼ bey úuchik tiʼ juntúul kiik ku kʼaabaʼtik Anna. Letiʼeʼ jach ku orar kaʼach utiaʼal ka utsak Matthew, u yíicham. Le sukuʼunoʼ yaan cáncer tiʼ kaʼachi. Teʼ kʼiinoʼob jeʼeloʼ Annaeʼ ku orar xan yoʼolal kaʼatúul kiikoʼob tsʼoʼok u chan antal u jaʼabiloʼob yaan xan cáncer tiʼob. U yíicham le kiikoʼ kíimiʼ, pero le kaʼatúul kiikoʼoboʼ utschajoʼob. Annaeʼ káaj u tuklikeʼ wa Jéeoba tsʼak le kaʼatúul kiikoʼoboʼ, ¿baʼaxten túun maʼ tu tsʼakaj u yíichamiʼ? U jaajileʼ maʼ k-jach ojel bix utschajik le kaʼatúul kiikoʼoboʼ, chéen baʼax k-ojleʼ Jéeobaeʼ yaan u kʼuchul u kʼiinil u luʼsik tuláakal le baʼaxoʼob beetik k-muʼyajoʼ. Tsʼoʼoleʼ letiʼeʼ ku tsʼíiboltik u kaʼa kuxkíintik le máaxoʼob chúukpaj u yóol u meyajtoʼoboʼ (Job 14:15).

8. 1) Jeʼex u yaʼalik Isaías 43:​2, ¿bix u yáantkoʼon Jéeoba? 2) ¿Bix u yáantkoʼon le oración utiaʼal k-aktáantik nukuch problemasoʼ? (Ilawil le video Le oraciónoʼ ku yáantkoʼon k-aktáant k-problemaʼob).

⁸ Jéeobaeʼ yaan u yáantkoʼon mantatsʼ. Jéeobaeʼ juntúul taatatsil jach u yaabiltmoʼon, le oʼolal maʼ uts tu tʼaan u yilik k-muʼyajiʼ (Isa. 63:9). Kex beyoʼ maʼ tu luʼsiktoʼon tuláakal le problemas ku keʼetel yéetel ríoʼob wa kʼáakʼoʼ (xok Isaías 43:2). Jéeobaeʼ ku prometerkeʼ le kéen k-máans problemaseʼ letiʼeʼ yaan u yáantkoʼon. Maʼ ken u chaʼa tiʼ mix baʼal ka u náachkuntoʼon tiʼ letiʼ. Tsʼoʼoleʼ Jéeobaeʼ ku tsʼáaiktoʼon u espíritu santo utiaʼal k-aktáantik le baʼax ku yúuchultoʼonoʼ (Luc. 11:13; Fili. 4:13). Jeʼex k-ilkoʼ Jéeobaeʼ mantatsʼ yaan u tsʼáaiktoʼon le áantaj kʼaʼabéet utiaʼal k-aguantartik jeʼel baʼaxak ka úuchuktoʼoneʼ yéetel utiaʼal ka chúukpajak k-óol k-meyajte. d

9. Jeʼex u yaʼalik Santiago 1:​6, 7, ¿baʼaxten unaj k-confiar yaan u yáantkoʼon Jéeoba?

⁹ Jéeobaeʼ ku páaʼtik ka confiarnakoʼon tiʼ letiʼ (Heb. 11:6). Maʼ xaaneʼ yaan kʼiineʼ jeʼel k-tuklikeʼ le problemas k-aktáantikoʼ jach táaj nuuktak yéetel jeʼel u káajal k-tuklik Jéeobaeʼ maʼ tu páajtal u yáantkoʼon. Chéen baʼaleʼ le Bibliaoʼ ku yaʼaliktoʼoneʼ yéetel u poder Dioseʼ hasta jeʼel u páajtal k-naʼakal «tiʼ junpʼéel kaʼanal pakʼeʼ» (Sal. 18:29). Le oʼolaleʼ maʼ unaj u kaʼapʼéeltal k-tuukuliʼ, baʼaxeʼ unaj k-orar yéetel tuláakal k-puksiʼikʼal, yéetel unaj k-confiar de ke Jéeobaeʼ yaan u núukik k-oraciónoʼob (xok Santiago 1:​6, 7).

10. Aʼal junpʼéel ejemplo tiʼ baʼax jeʼel u beetik máak kéen tsʼoʼokok u orareʼ.

¹⁰ Jéeobaeʼ ku páaʼtik ka k-beet tuláakal le baʼax yaan t-kʼaboʼ. Koʼox tuukul tiʼ juntúul sukuʼun taak u bin tiʼ junpʼéel asamblea regional. Letiʼeʼ ku orar utiaʼal ka áantaʼak u kʼáat permiso tiʼ u patrón. ¿Bix jeʼel u núukik Jéeoba u oración le sukuʼunoʼ? Maʼ xaaneʼ jeʼel u yáantik utiaʼal maʼ u chʼaʼik saajkil tʼaaneʼ. Chéen baʼaleʼ le sukuʼunoʼ kʼaʼabéet xan u tsʼáaik u parte tumen yaan u kʼaʼabéettal u bin tʼaan yaʼab u téenel yéetel u patrón. Maʼ xaaneʼ hasta jeʼel u yóotik u kʼex u díail u meyaj yéetel wa máaxeʼ, wa u yaʼalik maʼ u boʼotaʼaltiʼ le kʼiin maʼ tun bin meyajoʼ.

11. ¿Baʼaxten maʼ unaj u xuʼulul k-orariʼ?

¹¹ Jéeobaeʼ ku páaʼtik maʼ u xuʼulul k-orar yoʼolal le baʼaxoʼob preocuparkoʼonoʼ (1 Tes. 5:17). Le baʼaxoʼob tu yaʼalaj Jesúsoʼ tu tsʼáaj  naʼatbileʼ yaan kʼiineʼ Jéeobaeʼ maʼ ken u jáan núuk k-oración (Luc. 11:9). Pero maʼ unaj u lúubul k-óoliʼ, baʼaxeʼ unaj k-tsʼáaik k-óol orar (Luc. 18:​1-7). Le kéen orarnakoʼon yaʼab u téenel yoʼolal wa baʼaxeʼ k-eʼesik tiʼ Jéeobaeʼ importante k-ilik le baʼax k-kʼáatiktiʼoʼ yéetel k-creertik jach tu jaajil letiʼeʼ jeʼel u páajtal u yáantkoʼoneʼ.

12. 1) ¿Tiʼ baʼax preguntailoʼob maʼalob ka tuukulnakoʼon yéetel baʼaxten? 2) ¿Bix jeʼel k-eʼesik respeto tiʼ Jéeoba kéen orarnakoʼoneʼ? (Ilawil le cuadro « ¿Kin weʼesik wa respeto tiʼ Jéeoba kéen in kʼáattiʼ wa baʼax?»).

¹² Wa maʼ u tsʼáatoʼon Jéeoba le baʼax k-kʼáatik ichil k-oraciónoʼ maʼalob ka tuukulnakoʼon tiʼ le óoxpʼéel preguntaʼobaʼ. Yáax: «¿Maʼalob wa le baʼax kin kʼáatik tiʼ Jéeobaoʼ?». U suukileʼ k-tuklikeʼ jach k-ojel baʼax kʼaʼabéettoʼon. Pero maʼ xaaneʼ le baʼax k-kʼáatikoʼ maʼ ken u taastoʼon utsil le kéen máanak kʼiin. Maʼ xaaneʼ táan k-máansik junpʼéel problema yéetel k-kʼáatik tiʼ Dios ka u yutskíint jeʼel bix k-kʼáat toʼonoʼ. Pero yaan horaeʼ le baʼax k-kʼáatikoʼ ku bin tu contra u voluntad Dios. Yéetel maʼ xaaneʼ yaan junpʼéel forma bix maas maʼalob jeʼel u yutstal le problemaoʼ (1 Juan 5:14). Koʼox tuukul tiʼ le taatatsiloʼob t-aʼalaj teʼ yáax párrafooʼ. Letiʼobeʼ orarnajoʼob utiaʼal maʼ u náachtal u hijoʼob tiʼ Jéeoba. Le baʼax tu kʼáatoʼoboʼ bey maʼalobeʼ. Chéen baʼaleʼ u jaajileʼ Jéeobaeʼ maʼatech u obligartik mix máak utiaʼal ka u meyajte. Letiʼeʼ u kʼáateʼ tu juunal máak ka u chʼaʼtukult wa yaan u meyajtik wa maʼ (Deu. 10:​12, 13; 30:​19, 20). ¿Baʼax túun jeʼel u kʼáatik le taatatsiloʼob tiʼ Jéeobaoʼ? Jeʼel u páajtal u kʼáatkoʼobeʼ le baʼax ku kaʼanskoʼob tiʼ u hijoʼoboʼ ka kʼuchuk tu puksiʼikʼal, beyoʼ le xiʼipaloʼ yaan u yaabiltik Jéeoba yéetel yaan u amigotik (Pro. 22:6; Efe. 6:4).

13. Jeʼex u yaʼalik Hebreos 4:​16, ¿baʼax súutukil ken u yáantoʼon Jéeoba? Tsole.

 ¹³ Maʼalob ka tuukulnakoʼon xan tiʼ le u kaʼapʼéel preguntaaʼ: «Utiaʼal Jéeobaeʼ, ¿u súutukil wa utiaʼal u tsʼáaikten le baʼax kin kʼáatkoʼ?». Maʼ xaaneʼ k-kʼáat ka u núuk Jéeoba tu séebaʼanil k-oración. Chéen baʼaleʼ chéen letiʼ u yojel baʼax súutukil maas maʼalob ka u beete (xok Hebreos 4:16). Wa maʼ tu tsʼáaiktoʼon Jéeoba tu séebaʼanil le baʼax k-kʼáatiktiʼoʼ, maʼ xaaneʼ jeʼel k-tuklikeʼ táan u yaʼaliktoʼon: «Maʼ ken in tsʼáatech». Pero maʼ xaaneʼ Jéeobaeʼ táan u yaʼaliktoʼon: «Todavía maʼ kʼuchul u yorailiʼ». Koʼoneʼex tuukul tiʼ le táankelem xiʼipal t-aʼalaj teʼ yáax párrafo ku orar utiaʼal ka tsʼaʼakakoʼ. Wa ka u tsʼak Jéeoba le xiʼipaloʼ Satanáseʼ tsʼoʼok u yaʼalik kaʼacheʼ le xiʼipaloʼ chéen ku meyajtik Dios tumen tsʼaʼaki (Job 1:​9-11; 2:4). Kʼaʼajaktoʼoneʼ yaan u kʼuchul u kʼiinil u luʼsaʼal le kʼojaʼaniloʼob tumen Jéeobaoʼ (Isa. 33:24; Apo. 21:​3, 4). Le oʼolal toʼoneʼ maʼ t-páaʼtik ka u beet Jéeoba junpʼéel milagro utiaʼal u tsʼakikoʼon. ¿Baʼax túun jeʼel u páajtal u kʼáatik le xiʼipal tiʼ Jéeobaoʼ? Ka tsʼaʼabak muukʼ tiʼ yéetel jeetsʼelil utiaʼal u seguer u meyajtik Jéeoba kex kʼojaʼan (Sal. 29:11).

14. ¿Baʼax k-kanik tiʼ u ejemplo Janice?

¹⁴ ¿Kʼajaʼantech Janice le kiik orarnaj tiʼ Jéeoba utiaʼal ka xiʼik meyaj Beteloʼ? Le ka máan cinco añoseʼ letiʼeʼ tu naʼateʼ núukaʼab u oración tumen Jéeoba, chéen baʼaleʼ maʼ jeʼex u tuklik kaʼachoʼ. Letiʼeʼ ku yaʼalik: «Teʼ año jeʼeloʼ Jéeobaeʼ tu kaʼansajten yaʼab baʼaloʼob yéetel tu yáanten in maas jatsʼutskíint in modos. Por ejemploeʼ teneʼ kʼaʼabéet kaʼach in kanik maas confiar tiʼ Jéeoba yéetel in maas xakʼalxook. Kʼaʼabéet xan in kanik kaʼacheʼ jeʼel tuʼuxak yaneneʼ jeʼel u páajtal in meyajtik Jéeoba yéetel kiʼimak óolaleʼ». U yíicham Janiceeʼ invitartaʼab ka u beet u  superintendenteil tiʼ circuito. Janiceeʼ ku yaʼalik: «Jéeobaeʼ tu núukaj in oraciónoʼob, pero maʼ jeʼex in páaʼtik kaʼachoʼ. Máan tiempo hasta ka tin naʼataj jach jatsʼuts bix tu núukil Jéeoba in oraciónoʼ. Jach kin tsʼáaik gracias tiʼ Jéeoba ikil u yeʼesikten u yaabilaj bey xan u yutsil».

15. Kex maʼalob ka k-aʼal tiʼ Jéeoba jach baʼax k-kʼáateʼ, ¿baʼaxten yaan kʼiineʼ maas maʼalob maʼ k-jach beetik beyoʼ? (Ilawil xan le fotoʼoboʼ).

¹⁵ Maʼalob xan ka tuukulnakoʼon tiʼ le u yóoxpʼéel preguntaaʼ: «¿Yaan wa u kʼaʼabéettal in kʼexik jujunpʼéel tiʼ le baʼaloʼob kin kʼáatik ich oraciónoʼ?». U jaajileʼ maʼalob ka k-aʼal tiʼ Jéeoba jach baʼax k-kʼáatiʼ, pero yaan kʼiineʼ maas maʼalob maʼ k-jach beetik beyoʼ. ¿Baʼaxten? Tumen beyoʼ jeʼel u páajtal k-ilik baʼax u kʼáat Jéeoba ka k-beeteʼ. Koʼoneʼex tuukul tiʼ le kiik maʼ tsʼokaʼan u beel ku orar utiaʼal ka invitartaʼak teʼ Escuela utiaʼal le Máaxoʼob Kʼaʼaytik le Reinooʼ. Letiʼeʼ ku tsʼíiboltik u biniʼ tumen u kʼáat bin áantaj tuʼux maas kʼaʼabéet. Kex unaj u seguer u orar le kiik yoʼolal le baʼax u kʼáatoʼ, ¿yaan wa baʼax uláakʼ jeʼel u páajtal u kʼáatik tiʼ Jéeobaeʼ? Maʼ xaaneʼ jeʼel u orar utiaʼal ka áantaʼak u yil bix jeʼel u maas meyajtik Dioseʼ (Hech. 16:​9, 10). Le kéen tsʼoʼokok u orareʼ maʼ xaaneʼ jeʼel u páajtal u kʼáatik tiʼ le superintendente tiʼ circuito tiʼ baʼax múuchʼulil jeʼel u páajtal u bin áantaj bey precursoraeʼ. Jeʼel u páajtal xan u túuxtik junpʼéel carta tiʼ le sucursal utiaʼal u kʼáatik tuʼux maas kʼaʼabéet áantajoʼ. e

16. ¿Baʼax k-ojel ken u beet Jéeoba?

¹⁶ Jeʼex tsʼoʼok k-kanik teʼ xookaʼ, Jéeobaeʼ mantatsʼ ku núukik k-oraciónoʼob yéetel yaabilaj yéetel teʼ súutukil maʼalob u yilkoʼ (Sal. 4:3; Isa. 30:18). Maʼ xaaneʼ yaan kʼiineʼ Jéeobaeʼ maʼ ken u núuk k-oraciónoʼob jach jeʼex táan páaʼtikoʼ. Pero k-ojleʼ letiʼeʼ ku chʼaʼik mantatsʼ en cuentail tuláakal le oraciónoʼob k-beetkoʼ. Letiʼeʼ jach u yaabiltmoʼon yéetel mix bikʼin ken u xúumpʼattoʼon (Sal. 9:10). Le oʼolaleʼ «maʼ u xuʼulul» k-confiar tiʼ Jéeoba yéetel koʼoneʼex aʼaliktiʼ mantatsʼ jach bix k-uʼuyikba (Sal. 62:8).