Kex le Biblia maʼ junpʼéel libro ku tʼaan tiʼ bix unaj u tsʼaʼakal máakeʼ jach ku tsʼáaik maʼalob consejoʼob jeʼel u yáantik le máaxoʼob yaantiʼob ansiedad, depresión wa uláakʼ kʼojaʼaniloʼob jeʼex lelaʼ. Koʼox ilik jujunpʼéel tiʼ le consejoʼob ku tsʼáaikoʼ.

«Le máaxoʼob toj u yóoloʼoboʼ maʼ kʼaʼabéettiʼob juntúul doctoriʼ, chéen baʼaleʼ le máaxoʼob kʼojaʼanoʼoboʼ kʼaʼabéettiʼob» (MATEO 9:12).

Le Bibliaoʼ ku yaʼalikeʼ yaan horaeʼ kʼaʼabéet u bin máak yiknal doctor. Yaʼab máakoʼobeʼ ikil u beetkoʼob leloʼ ku yuʼubikoʼob maas tranquiloʼob tumen ku yáantaʼaloʼob u naʼatoʼob baʼax kʼojaʼanil yaantiʼob yéetel baʼax unaj u beetkoʼob.

«Maas maʼalob jun chan súutuk jeʼelel ke yaʼab meyaj» (ECLESIASTÉS 4:6).

Wa ku suuktal a tsʼoʼoksik a wenel, ka beetik ejercicio yéetel ka kanáantik baʼax ka jaantikeʼ leloʼ jeʼel u yáantkech utiaʼal a wuʼuyikaba maas maʼalobeʼ.

«Junpʼéel puksiʼikʼal kiʼimak u yóoleʼ bey junpʼéel tsʼaakeʼ, pero le máax yaachajaʼan u yóoloʼ ku pʼáatal minaʼan u muukʼ» (PROVERBIOS 17:22).

Utiaʼal u jéetsʼel u tuukul máak yéetel utiaʼal ka yanak kiʼimak óolal tiʼeʼ, maʼalob ka u xok tekstoʼob tiʼ le Biblia jeʼel u líiʼsik u yóoloʼ bey xan u tsʼáaik metas ichil u kuxtal. Wa ka tuukul  tiʼ le baʼaloʼob maʼalobtak yaantech beora bey xan wa ka tsʼáaik ta pool yaan u kʼuchul u kʼiinil u xuʼulul a problemaseʼ leloʼ jeʼel u yáantech utiaʼal a seguer a aguantartik le baʼaxoʼob táan u yúuchultechoʼ.

«Le máax maʼ tu taaskuba nojbaʼaliloʼ ku yeʼesik yaan u naʼat» (PROVERBIOS 11:2).

Maʼalob ka a chaʼa a wáantaʼal tumen u jaajileʼ maʼ tu páajtal a beetik tuláakal baʼal chéen ta juunal. Maʼ xaaneʼ a amigoʼob yéetel a láakʼtsiloʼobeʼ taak u yáantkechoʼob pero maʼ u yojloʼob bix jeʼel u beetkoʼobeʼ. Le oʼolaleʼ aʼaltiʼob baʼax jeʼel u páajtal u beetkoʼob utiaʼal u yáantkechoʼobeʼ. Maʼ a tsʼíikil wa maʼ tu beetkoʼob jeʼex a kʼáateʼ, baʼaxeʼ tsʼáa u diosboʼotikil tiʼob.

«Tin tsʼáaj cuenta maʼ normal le baʼax ku yúuchultenoʼ, le oʼolaleʼ binen consultar. Le doctoraoʼ tu yáanten in naʼat bix le kʼojaʼanil yaantenoʼ yéetel baʼax tratamientoʼob yaan utiaʼal le kʼojaʼanilaʼ» (Nicole, a yaan trastorno bipolar tiʼ).

«In xokik le Biblia sáamsamal desde temprano yéetel in watanoʼ jach ku yáantken utiaʼal in tuukul tiʼ baʼaloʼob maʼalobtak bul kʼiin. Tsʼoʼok in wilkeʼ teʼ kʼiinoʼob jach lubaʼan in wóoloʼ seguro yaan u yantal junpʼéel teksto kéen u líiʼs in wóol» (Peter, yaan depresión tiʼ).

«Jach suʼlaken kaʼach in tsikbalt le baʼax ku yúuchultenoʼ. Chéen baʼaleʼ le ka tin tsikbaltaj tiʼ juntúul in amigaeʼ letiʼeʼ jach tu chʼenxikinten yéetel tu yeʼesajten yaabilaj. Leloʼ tu yáanten utiaʼal in wuʼuyikinba maas maʼalob yéetel utiaʼal in wilik maʼ tin juunal yanileniʼ» (Ji-yoo, yaantiʼ junpʼéel kʼojaʼanil ku kʼaabaʼtik trastorno alimentario).

«Le Bibliaoʼ tsʼoʼok u yáantken utiaʼal in wilik tak bukaʼaj meyaj jeʼel u páajtal in beetkeʼ yéetel utiaʼal in tsʼáaik cuenta de ke kʼaʼabéet in jeʼelel. Tsʼoʼok xan u yáantken utiaʼal in wilik baʼax jeʼel in beetik utiaʼal maʼ u sen afectarken le problemas yaantenoʼ» (Timothy, yaantiʼ junpʼéel kʼojaʼanil ku kʼaabaʼtik trastorno obsesivo compulsivo).