Dioseʼ jach taak u yáantkech
LE Bibliaoʼ tiʼ Dios u taal, le oʼolal le consejoʼob ku tsʼáaikoʼ jach jeʼel u yáantkecheʼ. Kex le Biblia maʼ junpʼéel libro ku tʼaan tiʼ bix u tsʼaʼakal máakeʼ, le consejoʼob ku tsʼáaikoʼ jeʼel u yáantkech wa yaantech junpʼéel kʼojaʼanileʼ. Jeʼel xan u yáantkech wa yaan baʼax beetik a wuʼuyik mix baʼal a biilaleʼ, u yaatal a wóol wa u lúubul a wóoleʼ.
Le Bibliaoʼ ku yaʼalikeʼ como Jéeoba Dios a beetmiloʼoneʼ ku naʼatik jach tu beel bix k-uʼuyikba. Le kaʼapʼéel tekstoʼobaʼ jeʼel u líiʼskoʼob a wóoleʼ tumen ku yeʼesikeʼ Dioseʼ jach u kʼáat u yáantoʼon.
«Jéeobaeʼ naatsʼ yanil tiʼ le máaxoʼob ku muʼyajoʼoboʼ, ku yáantik le máaxoʼob yaachajaʼan u yóoloʼoboʼ» (SALMO 34:18).
«Teen, Jéeoba a Dioseʼ, in machmaj a x-noʼoj kʼab, teen aʼaliktech: ‹Maʼ a chʼaʼik saajkil. Teneʼ jach tu jaajil yaan in wáantkech›» (ISAÍAS 41:13).
¿Bix jeʼel u yáantkoʼon Jéeoba wa yaantoʼon junpʼéel kʼojaʼanil jeʼex le depresión wa le ansiedadoʼ? Le uláakʼ xookoʼob ku taasik le revistaaʼ ku yaʼalikeʼ Dioseʼ jach u kʼáat u yáantoʼon yéetel ku yaʼalik bix u beetik.
a U kaabaʼ Dioseʼ Jéeoba (Salmo 83:18).
