Le Bibliaoʼ ku tʼaan tiʼ bix úuchik u yuʼubikuba yaʼab xiiboʼob yéetel koʼoleloʼob. Maʼ xaaneʼ toʼoneʼ táan k-uʼuyikba jeʼex tu yuʼubiluba jujuntúul tiʼ letiʼobeʼ.

Tuláakloʼon k-kʼáat ka naʼataʼak bix k-uʼuyikba, maases wa yaantoʼon junpʼéel kʼojaʼanil ku beetik k-sen preocupar wa u yaatal k-óol. Kéen k-xok le Bibliaoʼ yaan k-tsʼáaik cuentaeʼ yaan máaxoʼob tu máansoʼob le baʼaxoʼob ku yúuchultoʼonoʼ yéetel yaan k-ilkeʼ yaʼab baʼaloʼob jeʼel k-kanik tiʼ letiʼobeʼ.

• ¿Yaan wa kʼiin tsʼoʼok a wuʼuyik maʼ tu páajtal u seguer a aguantartik baʼax ku yúuchultech? Le Bibliaoʼ ku tʼaan xan tiʼ máaxoʼob bey tu yuʼubilubaʼoboʼ jeʼex Moisés, Elías yéetel Davideʼ (Números 11:14; 1 Reyes 19:4; Salmo 55:4).

• Le Bibliaoʼ ku tʼaan tiʼ Ana, juntúul koʼolel jach «táaj lúub u yóol» tumen maʼ tu páajtal u yantal u paalal yéetel ku sen burlartaʼal yoʼolal leloʼ (1 Samuel 1:6, 10).

• Maʼ xaaneʼ yaan kʼiineʼ jeʼel k-uʼuyikba jeʼex Jobeʼ. Le Bibliaoʼ ku yaʼalikeʼ kex yanchaj u fe tiʼ Dioseʼ jach lúub u yóol, hasta tu yaʼalaj: «Jach in pʼeek kuxliken, maʼ in kʼáat ka seguernak in kuxtaliʼ» (Job 7:16).

Tuláakal le máaxoʼob tsʼoʼok k-aʼalikaʼ kaʼa kiʼimakchaj u yóoloʼob. Le baʼaxoʼob tu beetoʼoboʼ jeʼel xan u yáantkoʼon teʼ kʼiinoʼobaʼ utiaʼal u kaʼa kiʼimaktal k-óol.