Le Bibliaoʼ ku líiʼsik k-óol yéetel ku tsʼáaiktoʼon muukʼ tumen ku yáantkoʼon wa yaan baʼax ku yúuchultoʼon bey xan wa yaan baʼax preocuparkoʼon. Tsʼoʼoleʼ ku tsʼáaiktoʼon junpʼéel esperanza tumen ku yaʼalikeʼ maʼ tun xáantaleʼ yaan u xuʼulsaʼal tiʼ tuláakal le baʼaxoʼob beetik k-muʼyajoʼ.

Tuláakloʼon yaan hora ku yúuchultoʼon junpʼéel baʼal ku beetik u yaatal k-óol, chéen baʼaleʼ le máaxoʼob yaantiʼob junpʼéel kʼojaʼanil jeʼex le depresión wa le ansiedadoʼ mantatsʼ yaachajaʼan u yóoloʼob. ¿Bix jeʼel u yáantaʼaloʼob tumen le baʼax ku yaʼalik le Bibliaoʼ?

• Le Bibliaoʼ ku yáantik máak tuukul tiʼ baʼaloʼob jatsʼutstak, beyoʼ maʼ tu chʼíikil máak u tukult baʼaxoʼob beetik u yaatal u yóol (Filipenses 4:8). Ku líiʼsik u yóol máak yéetel ku beetik u tranquilizarkuba (Salmo 94:18, 19).

• Ku yáantik máak utiaʼal maʼ u tuklik mix baʼal u biilal yéetel ka u yileʼ koʼoj u tojol tu táan Dios (Lucas 12:6, 7).

• Ku yeʼesik tiʼ máakeʼ maʼ tu juunal yaniʼ yéetel ku yáantik máak u yileʼ Dioseʼ ku naʼatik bix u yuʼubikuba (Salmo 34:18; 1 Juan 3:19, 20).

• Le Bibliaoʼ ku yaʼalikeʼ maʼ tun xáantaleʼ mix máak ken u kʼaʼajs le baʼaloʼob beetik u yaatal u yóoloʼ (Isaías 65:17; Apocalipsis 21:4). Le jatsʼuts esperanzaaʼ jeʼel u tsʼáaik tiʼ máak u muukʼil utiaʼal maʼ u pʼatkuba tiʼ le kʼojaʼanil yaantiʼoʼ.