Junpʼéel jatsʼuts baʼal ku yuʼubik máak tu yoʼolal u maasil. Máax ku yaabilajeʼ ku yeʼesik yéetel baʼax ku beetik bey xan yéetel baʼax ku yaʼalik, kex ka yanak u tsʼáaik juntséelil le baʼax uts tu tʼaanoʼ.

Moiseseʼ tu yaabiltaj Dios. ¿Bix tu beetil? Kʼaʼajaktoʼon le baʼax ku yaʼalik le Biblia teʼ 1 Juan 5:3: «U yaabiltaʼal Jajal Dioseʼ u yuʼubajtʼantaʼal u yaʼalmaj tʼaanoʼob». Moiseseʼ tu beetaj tuláakal le baʼax u yaʼalmaj Diosoʼ: bin tʼaan tu táan Faraón u reyil Egipto yéetel tu tichʼaj u xóolteʼ tu tojil le chak kʼáaʼnáaboʼ. Kex chéen chʼaʼabil wa kex talameʼ Moiseseʼ «tu láaj beetaj jeʼel bix aʼalaʼabiktiʼ[oʼ]» (Éxodo 40:16).

Moiseseʼ tu yaabiltaj u yéet israelitailoʼob. Letiʼobeʼ tu tsʼáajoʼob cuentaeʼ Jéeoba yéey Moisés utiaʼal u nuʼuktikoʼob, le oʼolal taal u kʼáatoʼob áantaj tiʼ. Le Bibliaoʼ ku yaʼalik: «Le israelitaʼoboʼ [...] waʼalajoʼob tu táan [Moisés] bul kʼiin» (Éxodo 18:13-16). Chéen máans ta tuukul bix tu yuʼubiluba Moisés le ka tsʼoʼok u yuʼubik bul kʼiin le jejeláas talamil yaan tiʼ cada israelitaoʼ. Baʼaleʼ Moiseseʼ kiʼimak u yóol u yáantkoʼob tumen jach u yaabiltmoʼob.

Moiseseʼ ku yuʼubik baʼax talamil yaan tiʼ le máaxoʼob u yaabiltmoʼ yéetel ku payalchiʼ tu yoʼolaloʼob. ¡Tak tu yoʼolal le máaxoʼob beet baʼax kʼaas tiʼoʼ! Jeʼex le ka tutukchiʼinaj Míriam (María) tu contraoʼ, Jéeobaeʼ tu beetaj u tsaʼayal lepra tiʼ Míriam. Baʼaleʼ tu lugar u kiʼimaktal u yóoleʼ Moiseseʼ payalchiʼinaj tu yoʼolal u kiik beyaʼ: «[Dios,] kin kʼáat óoltiktech ka a beet u yutstal» (Números 12:13). ¿Máasaʼ chíikaʼan jach tu jaajil yaan u yaabilaj Moisés?

Toʼoneʼ jeʼel u páajtal k-beetik jeʼex Moisés wa k-muʼukʼaʼankúuntik le yaabilaj k-uʼuyik yoʼolal Diosoʼ. Le yaabilajaʼ yaan u péeksikoʼon k-uʼuy u tʼaan «yéetel tuláakal [k-]puksiʼikʼal» (Romailoʼob 6:17). Wa k-beetik beyoʼ yaan k-kiʼimakkúuntik u yóol Jéeoba (Proverbios 27:11). Tsʼoʼoleʼ wa k-meyajtik Dios yéetel yaabilajeʼ, yaan u kiʼimaktal k-óol k-beetik le baʼax maʼaloboʼ (Salmo 100:2).

Jeʼex Moiseseʼ toʼoneʼ jeʼel u páajtal xan k-eʼesik yaabilaj tiʼ u maasil kex ka yanak k-tsʼáaik juntséelil le baʼax uts t-tʼaanoʼ. Ken náatsʼak k-amigoʼob wa k-láakʼtsiloʼob utiaʼal u yaʼalikoʼobtoʼon baʼax chiʼichnakkúuntikoʼobeʼ, tumen k-yaabiltmoʼobeʼ yaan k-chʼenxikintik baʼax ku yaʼalikoʼob, yaan k-naʼatik bix u yuʼubikubaʼob, yéetel yaan k-eʼesiktiʼob jach kʼaʼanaʼanoʼob k-tiaʼal.

Jeʼex Moiseseʼ toʼoneʼ jeʼel u páajtal k-payalchiʼ yoʼolal le máaxoʼob k-yaabiltmoʼ. Yaan kʼiineʼ jeʼel k-uʼuyik bey maʼ tu páajtal k-beetik mix baʼal utiaʼal k-áantkoʼobeʼ. Jeʼel tak u kʼuchul k-aʼaliktiʼobeʼ: «Loʼobaleʼ taak in wáantikech, baʼaleʼ chéen payalchiʼ jeʼel u páajtal in beetik ta woʼolaleʼ». Baʼaleʼ kʼaʼajaktecheʼ «le payalchiʼ ku beetaʼal yéetel kʼub óolal tumen juntúul máak utseʼ jach nojoch u páajtalil» (Santiago 5:16). Le payalchiʼoʼ jeʼel u péeksik Jéeoba u beet wa baʼax tu yoʼolal wa máaxeʼ kex wa maʼ u tukultmaj u beetik kaʼachiʼ. ¿Máasaʼ jach nojoch áantaj jeʼel k-tsʼáaik tiʼ máaxoʼob k-yaabiltmaj wa k-payalchiʼ tu yoʼolaloʼobeʼ? *

¿Máasaʼ jach yaʼab baʼax k-kanik tiʼ Moisés? Kex chéen juntúul wíinik kaʼach jeʼexoʼoneʼ, jach maʼalob bix tu yeʼesil oksaj óolal, kabal óolal yéetel yaabilaj. Wa k-beetik jeʼex letiʼeʼ yaʼab utsil ken u taas tiʼ toʼon bey xan tiʼ uláakʼ máakoʼob (Romailoʼob 15:4).