Silvia, juntúul x-enfermeraeʼ, ku yaʼalik: «In wéet xokoʼob kaʼacheʼ kex yaan u religionoʼobeʼ ku tuusoʼob tiʼ u examenoʼob yéetel ku drogarkubaʼob. Le religionoʼ junpuliʼ maʼ tu taasik uts tiʼ u kuxtaloʼob.»

Juntúul máak ku kʼaabaʼtik Lioneleʼ ku yaʼalik: «In wéet meyajoʼobeʼ ku tuusoʼob yéetel ku yaʼalikoʼob kʼojaʼanoʼob utiaʼal maʼ u binoʼob meyaj. Utiaʼaloʼobeʼ le religionoʼ chéen bey junpʼéel nuʼukul utiaʼal u jatsʼutskíintik u yotochoʼobeʼ».

Yaʼab máakeʼ maʼ tu yáantaʼal tumen u religión utiaʼal ka u bis junpʼéel toj kuxtal. Letiʼobeʼ «jach u tsʼaamaj u yóoloʼob u adorartoʼob Dioseʼ» baʼaleʼ «yéetel u kuxtaloʼobeʼ [ku] yeʼeskoʼob maʼ beyiʼ» (2 Timoteo 3:5). U nuuktakiloʼob ichil u religionoʼobeʼ maʼ toj u kuxtaloʼobiʼ yéetel maʼatech u kaʼanskoʼob bix u yaʼalik le Biblia unaj u kuxtal máakoʼ. Le beetik yaʼab máakoʼobeʼ maʼ tu creertikoʼob wa ku chʼaʼik en cuenta Dios le bix u kuxtaloʼoboʼ.

Le Bibliaoʼ ku yeʼesikeʼ Dioseʼ ku yaatal u yóol wa ku kiʼimaktal u yóol yoʼolal le bix k-kuxtaloʼ. Le israelitaʼoboʼ «tu beetoʼob u muʼyaj» Dios úuchik maʼ u yuʼubikoʼob u tʼaan (Salmo 78:40). Baʼaleʼ ken u kʼex u kuxtal juntúul kʼasaʼan máakeʼ ku yantal junpʼéel nojoch «kiʼimak óolal teʼ kaʼan[oʼ]» (Lucas 15:7). Ken kʼuchuk máak u kʼaj óolt u jatsʼuts modos Dioseʼ ku maas nojochtal le yaabilaj ku yuʼubik tu yoʼolaloʼ, ku yaabiltik baʼax u yaabiltmaj Dios yéetel ku pʼektik baʼax u pʼekmaj Dios (Amós 5:15).

Le periódico Deseret Newsoʼ (tiʼ Salt Lake City, Utah, Estados Unidos) tu yaʼaleʼ u j-jaajkunajoʼob Jéeobaeʼ «ku yáantik máak utiaʼal ka yanak kiʼimak óolal ichil u familia, utiaʼal u beetkuba meeyjil bey xan utiaʼal u bisik junpʼéel toj kuxtal». Le periodicooʼ tu yaʼalaj xan: «Maʼalob u nuʼuktik u kuxtaloʼob. Ku creertikoʼobeʼ le tsʼuʼutsʼ chamaloʼ, le káaltaloʼ, le drogaʼoboʼ, u báaxal máak yoʼolal taakʼin, le núupkʼeban yéetel le homosexualidadoʼ ku náachkuntik máak tiʼ Dios».

¿Baʼax utsil ku taasik tiʼ u j-jaajkunajoʼob Jéeoba u kaanbaloʼob tiʼ u jatsʼuts modos Dios? Silvia, le x-enfermera t-yáax aʼaloʼ, ku yaʼalik: «Teʼ kúuchiloʼob jeʼex le tuʼux kin meyajoʼ jach suuk u yúuchul ookoliʼ. U jaajileʼ chéen chʼaʼabil jeʼel u káajal u beetik máak xan beyoʼ. Baʼaleʼ in wojéeltik bix jeʼel u yuʼubikuba Jéeoba * wa ka ookolnakeneʼ ku yáantken utiaʼal maʼ in beetik. Jach kiʼimak in wóol yéetel maʼalob yanil in conciencia». Silviaeʼ ku creertikeʼ úuchik u tsʼáaik ichil u kuxtal le baʼax ku kanik tu religionoʼ tsʼoʼok u maʼalobkíintik bix u kuxtal.