U kíimil Jesuseʼ letiʼe baʼax maas kʼaʼanaʼan tsʼoʼok u yúuchloʼ tumen chéen tu yoʼolal jeʼel u yantaltoʼon le kuxtal unaj u yantal desde tu káajbaloʼ. Wíinikeʼ maʼ beetaʼab yéetel u tsʼíibolal u beetik baʼaloʼob kʼaastakiʼ, mix utiaʼal u kʼojaʼantal wa u kíimiliʼ (Génesis 1:31). Yoʼolal Adán, le yáax wíinikoʼ, ook le kʼeban way yóokʼol kaabeʼ. Baʼaleʼ Jesuseʼ tu tsʼáaj u kuxtal utiaʼal u salvartikoʼon tiʼ le kʼeban yéetel tiʼ le kíimiloʼ. (Xok Mateo 20:28; Romailoʼob 6:23.)

Dioseʼ tu yeʼesaj nojoch yaabilaj le ka tu túuxtaj u Hijo kíimil t-oʼolal way Luʼumeʼ (1 Juan 4:9, 10). Utiaʼal u kʼaʼajsaʼaleʼ Jesuseʼ tu yaʼalaj tiʼ u disipuloʼob ka u beetoʼob junpʼéel janal maʼ sen nojochiʼ, yéetel ka meyajnaktiʼob chéen waaj yéetel vino. Wa k-beetik cada jaʼab le kʼiinbesajaʼ yaan k-eʼesik kiʼimak k-óol yoʼolal le yaabilaj tu yeʼesajtoʼon Dios yéetel Jesusoʼ. (Lucas 22:19, 20.)

Ka tu yáax aʼalaj Jesús tiʼ disipuloʼob ka u kʼaʼajsoʼob úuchik u kíimileʼ tʼaanaj xan tiʼ junpʼéel núuptʼaan wa acuerdo (Mateo 26:26-28). Yoʼolal le núuptʼaanaʼ letiʼob yéetel uláakʼ máakoʼobeʼ yaan u páajtal u beetik u reyil yéetel u sacerdoteiloʼob tu tséel Jesús teʼ kaʼanoʼ. Bejlaʼeʼ u millonesil máakoʼob kʼaʼajsik úuchik u kíimil Jesús, baʼaleʼ chéen le máaxoʼob ku táakpajloʼob tiʼ le núuptʼaan unaj u jaantkoʼob le waaj yéetel u yukʼikoʼob le vinooʼ. (Xok Apocalipsis 5:10.)

Tsʼoʼok óoliʼ dos mil jaʼaboʼob káajak u yéeyaʼal tumen Jéeoba máaxoʼob kun gobernar yéetel Jesucristo (Lucas 12:32). Le máakoʼobaʼ jach junpʼíitoʼob tu tséel le máaxoʼob kun pʼáatloʼob kuxtal minaʼan u xuul way Luʼumeʼ. (Apocalipsis 7:4, 9, 17.)