怜恤“各种各样嘅人”
耶稣教导门徒点样传讲好消息嘅时候，佢知道唔系所有人都钟意听王国嘅信息。（路加福音10:3,5,6）我哋做传道工作嗰时，可能会遇到一啲粗暴无礼嘅人。佢哋嘅反应使我哋好难向佢哋表现怜恤。
一个有怜恤之心嘅人，见到其他人需要帮助，就会体恤佢哋并乐意伸出援手。不过，如果我哋开始对传道对象失去怜恤之心，噉我哋可能亦都开始失去我哋嘅热心，唔能够有效噉传道。正如一团火得到更多氧气就会越烧越旺，我哋不断培养怜恤就会更加热心参与传道工作！（帖撒罗尼迦前书5:19）
喺唔容易应付嘅情况下，我哋可以点样培养怜恤之心？接住落嚟，我哋会讨论三个值得效法嘅榜样——耶和华、耶稣同使徒保罗。
效法耶和华，表现怜恤
几千年来，耶和华因为自己嘅圣名受到羞辱而一直保持忍耐。但系，“忘恩负义嘅恶人，佢都善待”。（路加福音6:35）耶和华系仁慈嘅上帝，因为佢耐心对待所有人，希望“各种各样嘅人”都能得救。（提摩太前书2:4）虽然上帝憎恨恶事，不过喺佢眼中，人系好宝贵嘅，佢唔想任何人失去生命。（彼得后书3:9）
耶和华知道撒但成功蒙骗咗好多人。（哥林多后书4:3,4）呢啲不信嘅人因为自细被灌输好多错误嘅道理同思想，所以唔容易接受真理。耶和华好想帮助呢啲人。我哋点知道呢？
请考虑吓耶和华对古代尼尼微人嘅睇法。虽然佢哋凶残成性，但系耶和华对约拿讲：“呢座尼尼微大城，入面有超过十二万嘅人连左手右手都分唔清，……唔通我唔应该顾惜咩？”（约拿书4:11）耶和华怜悯呢啲唔认识佢嘅尼尼微人，所以差派约拿向佢哋发出警告。
我哋同耶和华一样，好重视其他人嘅生命。即使一个人并冇马上对圣经嘅信息作出回应，我哋仲系可以效法耶和华，努力尝试帮助佢认识真理。
效法耶稣，表现怜恤
耶稣同天父一样，见到嗰啲喺属灵上饥渴嘅人，“就怜悯佢哋，因为佢哋俾人剥削，四处流离，好似冇牧人嘅绵羊一样”。（马太福音9:36）耶稣睇出，佢哋喺灵性上得唔到饱足嘅背后原因系，宗教领袖教导佢哋错误嘅道理，而且恶待佢哋。虽然耶稣知道好多人会因为各种原因而唔接受真理，佢依然“教导佢哋好多事”。（马可福音4:1-9）
唔好因为对方反应冷淡就感到灰心
一个人对圣经真理嘅态度可能会因为情况而改变
如果有人唔想听我哋传讲嘅信息，我哋就唔应该只系睇表面，而系要谂吓点解对方有噉嘅反应。有啲人对圣经同基督教有负面嘅睇法，系因为佢哋睇到一啲自称基督徒嘅人做坏事；有啲人系因为听到对见证人嘅错误宣传；有啲人就因为担心自己接受我哋嘅信息会被人取笑。
有啲人对王国信息反应冷淡，可能系因为佢哋曾经遭遇不幸，喺感情上受过创伤。一个叫金美嘅特派传道员话：“喺我哋嘅某啲地区，好多人因为战争而变得一无所有。佢哋觉得前路茫茫，变得灰心沮丧，对人失去信心。喺呢度，经常有人想阻止我哋传道。甚至有一次，我喺传道嗰阵受到袭击。”
遇到噉样嘅情况，金美点样继续对人表现怜恤呢？佢话：“我喺受到恶待嘅时候沉思箴言19:11。经文话：‘人洞悉事理，就唔会轻易发怒’。谨记地区嘅人嘅背景，帮助我对佢哋培养怜恤。我喺传道嗰时遇到嘅人唔系个个都态度恶劣嘅。我哋喺嗰个地区都揾到一啲好好嘅续访。”
我哋可以问吓自己：“假如我唔认识真理，耶和华见证人向我传道嗰时，我会有乜嘢反应？”如果有人经常同我哋讲耶和华见证人嘅坏话，我哋会点谂呢？喺噉嘅情况下，我哋可能都会对见证人有唔好嘅态度，需要对方向自己表现怜恤。耶稣话，我哋希望人点样对待我哋，我哋就要点样对待人。所以，即使唔容易，我哋都要努力理解对方嘅感受，向佢哋表现耐心。（马太福音7:12）
效法保罗，表现怜恤
即使有啲人猛烈反对保罗，保罗依然向呢啲人表现怜恤。点解？佢冇忘记以往自己系点样嘅人。佢话：“我之前亵渎上帝，迫害人，凌辱人，不过后来得蒙慈悲，因为我先前无知，由于不信先至做出呢啲事。”（提摩太前书1:13）佢知道，耶和华同耶稣向佢表现咗极大嘅慈悲。佢明白点解有啲人要阻止佢传道，因为佢曾经都同佢哋有一样嘅谂法。
有时，保罗会遇到一啲深受错误教义影响嘅人。佢有咩反应？使徒行传17:16话，保罗喺雅典嘅时候，“睇见满城都系偶像，心里激动”。不过，保罗就用偶像作为话题做咗一个美好嘅见证。（使徒行传17:22,23）佢调整自己嘅传道方式，向唔同背景嘅人传道，“无论如何都要救啲人”。（哥林多前书9:20-23）
我哋向嗰啲反应冷淡或者相信错误道理嘅人传道嗰阵，可以效法保罗，向佢哋“传讲美事嘅好消息”。（以赛亚书52:7）一个叫多萝茜嘅姊妹话：“喺我哋嘅地区，好多人认为上帝系一个又挑剔又苛刻嘅神。我首先会称赞佢哋相信上帝，然后请佢哋留意圣经提到上帝有边啲仁爱嘅特质以及佢对未来嘅应许。
“总要以善胜恶”
随住呢个制度嘅终结临近，我哋会睇见人嘅性情变得“越来越坏”。（提摩太后书3:1,13）我哋唔应该因为世人有噉样嘅态度就失去喜乐，唔再对人表现怜恤。耶和华会赐力量俾我哋，使我哋能够“以善胜恶”。（罗马书12:21）一个叫洁西卡嘅先驱姊妹话：“我经常遇到一啲高傲嘅人。佢哋嘲笑我哋同埋我哋传讲嘅信息。有时都几烦嘅。我同人开始交谈之前会作一个默祷，祈求上帝帮助我用佢嘅观点嚟睇对方。噉样做，使我唔再只系注重自己嘅感受，而系会谂吓点样帮助对方。”
我哋继续寻找嗰啲秉性适宜得永生嘅人
随住时间过去，有啲人会接受我哋嘅帮助，愿意学习圣经真理
传道嘅时候，我哋应该尽力鼓励弟兄姊妹。洁西卡话，同弟兄姊妹一齐传道嗰阵，如果有唔愉快嘅经历，佢会尽量唔去谂呢件事，而系转换话题，例如帮助同工积极噉谂吓，坚持传道会有乜嘢美好结果。
耶和华好清楚我哋传道嗰阵遇到嘅挑战。佢睇到我哋效法佢向人表现慈悲，一定感到好开心！（路加福音6:36）当然，耶和华唔会永无止境噉表现怜恤。我哋确信，佢会喺最适当嘅时候毁灭呢个邪恶制度。呢一日到嚟之前，我哋要继续迫切噉向人传道。（提摩太后书4:2）愿我哋继续热心执行传道职务，对“各种各样嘅人”表现怜恤。
