STALE xpinni Cristu qué rúnicaʼ Navidad. Peru ¿ñee raca arrepentírcabe purtiʼ maʼ qué rúnicabe ni la? ¿Ñee ribánacabe gúnicabe xiixa cosa la? ¿Riníʼ ique ca xiiñicabe cuníticaʼ xiixa galán la? Guidúʼyanu xi ná caadxi testigu stiʼ Jehová de gadxé gadxé guidxi.

Rietenaláʼdxidu Jesús. «Huaxiéʼ guyaaʼ yu’du’ ante gacaʼ testigu stiʼ Jehová. Guyaaʼ ni ora si raca Navidad o Pascua, ne laaca cadi guiráʼ biaje. Peru nin ca dxi que, qué niníʼ iqueʼ de Jesús. Yanna ra maʼ qué runeʼ celebrar Navidad la? chupa biaje lu semana raca reunirniáʼ congregación stinneʼ ne racaniáʼ xcaadxi binni ganna ni rusiidiʼ Biblia de Jesús». (EVE, AUSTRALIA).

Rudiʼdu regalu. «Guizáʼ riecheʼ ora rudiicabe naa xiixa regalu ni cadi cabezaʼ. Riuuladxeʼ ca sorpresa ca, ne laaca riuuladxeʼ guneʼ xiixa dibuju o tarjetahuiiniʼ para gusigaʼdeʼ xcaadxi binni, purtiʼ zacá runeʼ sentir nayecheʼ ne ngaca laacabe». (REUBEN, IRLANDA DEL NORTE).

Racanedu xcaadxi binni. «Riuuláʼdxidu gúnidu guendaró para ca ni huará. Nuu biaje rinedu postre, guieʼ o xiixa regaluhuiiniʼ ni gacané laacabe guni sentírcabe galán, ne zanda gúnidu ni ora tiica si». (EMILY, AUSTRALIA).

Riuʼdu tobi si né familia stidu. «Ora riuu ca familia ca tobi si para gaca distraerca’ la? rapa ca xcuidi ca jma oportunidad de gunibiáʼ chaahuicaʼ ca stiuca’, ca bixhozebiidacaʼ ne ca xprímucaʼ. Cumu maʼ qué rúnidu ca saa ne ca costumbre ca la? nga runi ora rigánnadu ca familia stidu, nánnacaʼ rúnidu ni purtiʼ nadxiidu laacaʼ ne cadi pur obligación». (WENDY, ISLAS CAIMÁN).

Ruyúbidu chuʼ paz. «Guizáʼ stale cosa runeʼ ora raca Navidad dede qué rapaʼ tiempu para guiníʼ iqueʼ de paz. Peru yanna maʼ nuudxí ladxiduáʼ purtiʼ maʼ biziideʼ ni cayuni prometer Biblia para guiráʼ binni ne nannaʼ zanda guibani ca xiiñeʼ ndaaniʼ ti guidxilayú jma galán». (SANDRA, ESPAÑA).