Ni rinabadiidxaʼ ca ni ruundaʼ

Pa Biblia qué ruzeeteʼ de brindis, ¿xiñee qué runi brindar ca testigu stiʼ Jehová?

Maʼ xadxí nga runi brindar binni né copa de vinu (o xiixa ni napa alcohol) neca gadxé gadxé modo rúnicabe ni la? peru nabé stale lugar runi brindar binni. Guzéʼtenu ti ejemplu, stale biaje ora rúnicabe ni, ruquiidicabe ca copa stícabe, ne ni cayuni brindar ca rabi tuuxa chuʼ nayecheʼ, chuʼ nazaaca ne guibani xadxí o xiixa zacagá. Ne ca ni cayuni brindarnebe ca riniʼcaʼ salud o biaʼsi ni nabe ca ne rindísacaʼ copa sticaʼ ne reʼcaʼ caadxi vinu. Neca stale binni ruuyaʼ gastiʼ naca pa guni brindarcaʼ la? peru ca testigu stiʼ Jehová nápacaʼ razón para cadi gúnicaʼ ni.

Cadi purtiʼ qué racalaʼdxiʼ ca xpinni Cristu chuʼ binni nayecheʼ ne nazaaca. Ne grupu ni zániru ni guyuu lu primé siglu que peʼ bicaa ti carta ra nuu ca congregación, sicaríʼ raca traducir ca últimu diidxaʼ stini «chuʼtu nazaaca», «chuʼtu galán» o «sicarú guiaanatu» (Hechos 15:29). Ne laaca guyuu caadxi xpinni Dios dxiqué gúdxicaʼ ca rey guyuu tiempu que: «Guibani señor stinneʼ xadxí», ne laaca guniʼcaʼ: «¡Guibániluʼ xadxí rey!» (1 Reyes 1:31; Nehemías 2:3).

Peru ¿paraa bizulú costumbre de guni brindar binni yaʼ? La Atalaya 1 de marzo de 1968 bizeeteʼ ca diidxaʼ ni zeeda lu Encyclopædia Britannica (1910), tomo 13, yaza 121, ná ni: «Costumbre ni napa binni de guni brindar, zándaca zeeda ni de ca costumbre ni gupa ca religión ni guyuu dxiqué purtiʼ laacaʼ biʼniʼ brindarcaʼ pur ca dios que ne pur ca ni maʼ guti. Casi ca griegu ne ca romanu la? gúpacaʼ costumbre ora gocaʼ [ruxhiicaʼ vinu o licor] para ca dios sticaʼ ne ora runi celebrarcaʼ xiixa la? runi brindarcaʼ pur laacabe ne pur ca ni maʼ guti». Laaca bizeeteʼ enciclopedia que: «Costumbre ni gúpacabe riʼ beeda gaca ni casi ti sacrificiu ne zándaca laaca biʼniʼ brindárcabe pur guendanazaaca stiʼ tuuxa ni nabani».

¿Ñee laaca zacá ruuyacabe ni yanna la? Obra International Handbook on Alcohol and Culture, ni biree lu iza 1995, ná: «[Naca brindis ca] costumbre ni bisaanacabe dxiqué ra ruxhiicabe xiixa casi ti sacrificiu para ca dios stícabe: casi rini o vinu para gaca cumplir xiixa deseu stícabe, o rúnicabe ti oración né chupa chonna si diidxaʼ ne riníʼcabe “¡guibániluʼ xadxí!” o “¡chuʼluʼ nazaaca!”».

Naquiiñeʼ gánnanu cadi purtiʼ si biʼniʼ o biquiiñeʼ ca ni qué runi adorar Dios xiixa lu ca costumbre ni gúpacaʼ dxiqué guininu qué zanda iquiiñeʼ o gapa ca ni dxandíʼ xpinni Cristu ni tiempu riʼ. Guzéʼtenu ti ejemplu, Biblia ruzeeteʼ ti cuananaxhi láʼ granada. Ti enciclopedia nabé runibiáʼ binni ni caníʼ de Biblia ná: «Zándaca nuu religión ni qué ñuni ni ná Dios dxiqué biquiiñecaʼ granada ca casi ti símbolo nabé risaca». Neca zacá, biʼniʼ mandar Dios iquiiñecabe granada casi ti adorno para ugaandacabe ñee xhaba sumo sacerdote, ne laaca ngueca modelu biquiiñecabe para bizuchaahuicabe ca columna de cobre stiʼ templu ni bicuí Salomón que (Éxodo 28:33; 2 Reyes 25:17). Yanna, guzéʼtenu de aníu ni riquiiñecabe ora richaganácabe. Dxiqué la? gupa ni ti significadu para ca religión ca. Peru stale binni qué ganna xi para biquiiñecabe ni dxiqué, nga runi tiempu riʼ ruuyacabe ni casi xiixa ni rusihuinni maʼ bichaganáʼ tuuxa.

¿Xi zanda guininu de ora reʼ binni vinu para guni adorar ca dios stiʼ yaʼ? Guzéʼtenu ti ejemplu, ti biaje ca xpinni Siquem, ca ni runi adorar Baal, «guyuucaʼ ndaaniʼ templu stiʼ dios sticaʼ ne gudocaʼ, güeʼcaʼ ne gunábacaʼ mal para Abimélec», xiiñiʼ Gedeón (Jueces 9:22-28). ¿Ñee rábiluʼ niná ti xpinni Jehová ñeʼné laacabe dede ninabaʼ ti dios falsu ñuniná Abimélec la? Sicaríʼ bicaa profeta Amós de caadxi israelita ni bidxiidéchecaʼ Jehová, nabe: «Cueʼ guiráʼ ca altar ráʼtacabe, ne vinu ni réʼcabe ndaaniʼ templu stiʼ ca dios stícabe gucuaacabe ni de ca binni ni bicaacabe multa» (Amós 2:8). ¿Ñee nuxhii ti xpinni Dios vinu nezalú xcaadxi dios para nusisácabe laacaʼ o ñeʼbe ni nezalucaʼ la? (Jeremías 7:18.) ¿Ñee niná ti xpinni Jehová nindisaʼ copa de vinu stiʼ para ninabaʼ ti dios gacané tuuxa o cuʼ ndaayaʼ laa la?

Nabé risaca gánnanu guyuu biaje gundísanaʼ ca xpinni Jehová guibáʼ para guinábacaʼ guizaaca xiixa cosa galán. Peru bíʼnicabe ni para guiniʼnécabe Dios ni dxandíʼ. Guzéʼtenu ti ejemplu, Biblia ná: «Bizuhuaa Salomón nezalú altar stiʼ Jehová. Ne gundisanabe guibáʼ, nabe: “Jehová, Dios stiʼ Israel, gástiruʼ sti Dios casi lii [...]. Bicaadiaga laacabe dede guibáʼ ra nabézaluʼ. Bicaadiaga ne biʼniʼ perdonar laadu”» (1 Reyes 8:22, 23, 30). Zacaca «bisisaca Esdras Jehová [...], ne guidubi guidxi que bicabi: “¡Amén! ¡Amén!”, ne gundisanacaʼ. Óraque bizuxíbicaʼ ne gudixhe íquecaʼ layú nezalú Jehová» (Nehemías 8:6; 1 Timoteo 2:8). Rihuinni dxíchica cadi gundisanáʼ diʼ ca xpinni Jehová guibáʼ para guinábacaʼ xiixa dios ni rudii suerte (Isaías 65:11).

Tiempu riʼ, stale binni runi brindar ne para laacabe la? cadi canábacabe ndaayaʼ stiʼ tuuxa dios, peru laaca qué randa rusiénecabe xiñee rindísacabe copa de vinu stícabe guibáʼ. Neca qué ganna binni xi pur runi ni la? qué rucaa diʼ nga ca xpinni Cristu gúnicaʼ casi cayúnicabe ca.

Nánnanu nuu stale cosa ni runi binni ni qué runi ca testigu stiʼ Jehová. Guzéʼtenu ti ejemplu, stale binni runi saludar xiixa stiʼ xquidxi, casi bandera, ne para laacabe la? cadi cayuni adorárcabe ni. Qué rucueeza ca xpinni Cristu laacabe de gúnicabe ni, peru laacaʼ qué runi saludarcaʼ bandera. Pa nanna ti Testigu pora chigaca xiixa ceremonia la? nuucabe qué riécabe o rápacabe stale cuidadu para cadi guni ofendércabe ca ni nuu lugar ca. Modo tiica si guizaaca ni, maʼ gudixhe ique ca xpinni Dios cadi guni saludarcaʼ xiixa stiʼ xquídxicaʼ purtiʼ pa gúnicaʼ ni, zucheenecaʼ ca principiu zeeda lu Biblia (Éxodo 20:4, 5; 1 Juan 5:21). Dxandíʼ, stale binni ni runi brindar qué ruuyacabe ni casi xiixa ni zeeda de ca religión ca. Peru neca zacá, qué runi brindar diʼ ca xpinni Cristu purtiʼ zeeda ni de ca religión ni cadi dxandíʼ ne purtiʼ sin gudiicabe cuenta canábacabe xiixa guibáʼ casi ora ninábacabe ñacané ti stipa ni qué rihuinni laacabe (Éxodo 23:2).