Gucané Biblia laacabe para bichaacabe

¿XI GUCANÉ ti gunaa guibani nayecheʼ neca nabé biʼniʼ sufrir dxi nahuiiniʼ? ¿Xi gucané ti hombre ni nabé rucaalú gobiernu guchaa ne gaca ti xpinni Cristu? Gudiʼnu lugar güinécabe ni laanu.

«Gucalaʼdxeʼ nibaneʼ nayecheʼ» (INNA LEZHNINA)

IZA GÚLEBE: 1981

PADÉ LAABE: RUSIA

NI NAQUIIÑEʼ GÁNNALUʼ: BIʼNIʼ SUFRIRBE DXI NAHUIINIBE

MODO BIBANEʼ DXIQUÉ: Cumu qué runadiaga bixhozeʼ ne jñaaʼ la? nga runi zacaca guleʼ. Nabé nayecheʼ bibánidu, peru dxi napaʼ xhoopaʼ iza la? guca divorciar bixhozeʼ ne jñaaʼ. Neca nahuiineruaʼ la? bieneʼ xii nga cayaca ne nabé bininani naa. Despué de guca divorciar bixhozeʼ ne jñaaʼ la? biaanané bixhozeʼ bizanaʼ ni jma huaniisi ne gulézacabe ndaaniʼ guidxi Troick, ne naa ne jñaaʼ yendézadu guidxi Cheliabinsk. Ra gudiʼdiʼ tiempu bichaganáʼ jñaaʼ sti biaje. Nabé guxhudxi padrastru stinneʼ ne riguíñebe laadu.

Lu iza 1993, beeda gatiʼ bizanaʼ ni huaniisi. Nabé gucanadu. Nga runi bizulú guxhudxi jñaaʼ ne laaca gudíñebe naa ne bininabe naa. Cumu racala’dxe’ guibánidu nayecheʼ ne gannaxhiisaadu la? guyaaʼ stale yu’du’, peru qué ñanda ñacanécabe naa.

XIMODO GUCANÉ BIBLIA NAA PARA BICHAAʼ: Dxi napaʼ 13 iza, bidxaagaʼ ti dxaapahuiiniʼ ni naca testigu stiʼ Jehová ne ruíʼnebe naa ca historia ni riete lu Biblia. Nabé guyuuladxeʼ ca historia stiʼ Noé ne Job purtiʼ bí’nica’ ni ná Dios neca gudíʼdicaʼ ra nagana. Qué nindaa bizuluáʼ bineʼ estudiar Biblia ne ca Testigu ne guyaaʼ ca reunión stícabe.

Bisiideʼ stale cosa galán lu Biblia. Ne nabé biecheʼ ora gunnaʼ napa Dios ti lá (Salmo 83:18). Laaca nabé bidxagayaaʼ pabiáʼ biaʼsi riníʼ Biblia xi zazaaca «lu ca últimu dxi» riʼ (2 Timoteo 3:1-5). Ne guizáʼ biecheʼ ora gunnaʼ ziasa ca binni ni maʼ guti ne ¡zuuyaʼ bizanaʼ sti biaje! (Juan 5:28, 29.)

Cumu qué riuula’dxi’ jñaaʼ ne padrastru stinneʼ guneʼ estudiar Biblia ne ca testigu sti Jehová la? bicaacabe naa gusaanaʼ de guneʼ estudiar. Peru cumu nabé riuuladxeʼ ni caziideʼ que la? qué ñuneʼ ni nácabe.

Nabé nadipaʼ modo bicaalú familia stinneʼ naa. Peru bidxaagaluáʼ sti guendanagana, gutiʼ bizanaʼ ni jma nahuiiniʼ ni riniáʼ reunión. Neca nabé naná ra cadideʼ que la? qué nusaana ca Testigu naa. Gúcacabe nacha’hui’ ne gunnaxhiicabe naa. Raqué nga bidieeʼ cuenta rusiidicabe ni dxandíʼ, nga runi guyuaanisaʼ lu iza 1996 casi testigu stiʼ Jehová.

XI MAʼ GULEENDUÁʼ: Bichaganaʼyaʼ Dmitry ne maʼ zinedu xhoopaʼ iza de bichaganadu. Rúnidu dxiiñaʼ ra sucursal stiʼ ca testigu stiʼ Jehová ni nuu San Petersburgo. Ne laaca maʼ runi respetar bixhozeʼ ne jñaaʼ ni runeʼ cré.

¡Nuaa’ nayecheʼ purtiʼ binebiaʼyaʼ Jehová! Ne maʼ guleenduáʼ stale cosa galán purtiʼ cayuneʼ ni nabe.

«Nabé biyubeʼ gannaʼ respuesta stiʼ stale pregunta» (RAUDEL RODRÍGUEZ RODRÍGUEZ)

IZA GÚLEBE: 1959

PADÉ LAABE: CUBA

NI NAQUIIÑEʼ GÁNNALUʼ: BICAALUBE GOBIERNU

MODO BIBANEʼ DXIQUÉ: Guleʼ ndaaniʼ guidxi La Habana (Cuba) ne biniiseʼ ndaaniʼ ti colonia nabé pobre ra ridinde binni lu calle. Dxi joven naa la? gudxiteʼ stale deporte ra ridinde binni, tobi de laani nga yudo.

Cumu riuuladxeʼ chaaʼ scuela la? biseendaʼ bixhozeʼ ne jñaaʼ naa universidad. Raqué bidieeʼ cuenta cadi jneza runi mandar ca políticu ca ne bicaaluaʼ gobiernu. Málasi ti dxi naa ne ti xcompañeruaʼ gudíñedu ti policía, gúxhadu laabe guiibaʼ stibe ne nabé bininadu laabe. Pur ngue biseguyoocabe laadu ne guníʼ autoridad naquiiñeʼ gátidu. ¡Qué guirá guidxagayaaʼ napaʼ 20 iza, ne mápeca chiguuticabe naa!

Dxi maʼ nuaa’ ra cárcel la? guníʼ iqueʼ xi guneʼ para cadi guʼyaʼ ca binni que cadxibeʼ ora maʼ chiguuticabe naa. Peru laaca biyubeʼ gannaʼ respuesta stiʼ stale pregunta, casi xiñee rizaaca stale cosa ni cadi jneza ne pa ziuu dxi zabáninu jma galán.

XIMODO GUCANÉ BIBLIA NAA PARA BICHAAʼ: Ra gudiʼdiʼ tiempu bichaacabe condena stidu ne biseguyoocabe laadu treinta iza. Raqué nga binebiaʼyaʼ caadxi testigu stiʼ Jehová ni biseguyoocabe pur ni runi crecaʼ. Nabé bidxagayaaʼ pabiáʼ nadxibalúcabe ne nacháʼhuicabe. Neca cadi jneza bi’ni’ autoridad ra biseguyoo laacabe, qué nidxiichicabe ne qué nidaacabe xiana.

Bisiene ca testigu stiʼ Jehová naa xi chiguni Dios despué. Biquiiñecabe Biblia para biluíʼcabe naa zaca Guidxilayú riʼ ti paraísu, maʼ qué ziuu cosa malu ne zabani binni ni runi puru si ni jneza ndaaniʼ ni (Salmo 37:29).

Nabé guyuuladxeʼ ni caziideʼ que, peru guníʼ iqueʼ qué ziuu dxi gaca casi laacabe purtiʼ zaca nagana para naa gusaana de chuaaʼ lu política, nga runi bizuluáʼ biindaʼ Biblia stubeʼ. Ora biluxe ni la? bidieeʼ cuenta ca testigu stiʼ Jehová si nga religión ni runi ni ná Biblia casi bi’ni’ ca xpinni Cristu ni bibani lu primé siglu.

Gucané Biblia naa guchaaʼ modo naa. Ma’ qué ninieeʼ diidxaʼ guidxa, maʼ qué niguʼbaʼ gueza ne maʼ qué ñuaaʼ lu política. Guca ni nagana, peru gucané Jehová naa guchaaʼ modo nabaneʼ.

Peru huayaca nagana para naa gusaana de guidxiicheʼ nagueenda. Guiráʼ dxi rinabaʼ Jehová gacané naa gucueezaʼ laca naa. Ti textu ni huayacané naa nga Proverbios 16:32, ra ca ná: «Jma risaca ti binni ni rindaa para guidxiichi que ti binni ni napa poder, ne jma risaca ti binni ni rucueeza laca laa que tobi ni runi ganar ti guidxi».

Lu iza 1991 guyuaanisaʼ casi testigu stiʼ Jehová ne guca ni ndaaniʼ cárcel ra nuaa’ que. Ti iza despué bindaacabe naa ne caadxi hombre ni deguyoo ne biseendacabe laadu España, purtiʼ nápadu familia raqué. Ora yendayaʼ guidxi que, bizuluáʼ guyaaʼ guiráʼ ca reunión, nachaʼhui ca hermanu que purtiʼ nabé galán bidxaagalúcabe naa casi ñaca maʼ xadxí de racabiaʼdu, ne cadi ngasi laaca gucanécabe naa guiaaʼ lugar que.

XI MAʼ GULEENDUÁʼ: Yanna huaxa nabaneʼ nayecheʼ, maʼ bichaganaʼyaʼ, naa ne xheelaʼ nápadu chupa xiiñidu ne rúnidu ni ná Jehová. Nabé riuuladxeʼ gacaniáʼ binni guiziidicaʼ ni dxandíʼ rusiidiʼ Biblia. Ora rietenalaʼdxeʼ bilá ñuuticabe naa pur ca cosa ni bineʼ dxi naca joven, rudieeʼ xquixe peʼ Jehová purtiʼ binebiaʼyaʼ laa. Ne cadi ngasi laaca rudieeʼ xquixe peʼ laabe purtiʼ yanna maʼ napa ti esperanza. Ma’ racalaʼdxeʼ gaca Guidxilayú riʼ ti paraísu, gaca ni jneza ne maʼ cadi gatiʼ binni (Apocalipsis 21:2, 4).

[Ni caníʼ/Epígrafe]

«Nabé biecheʼ ora gunnaʼ napa Dios ti lá»

[Imagen]

Naa ne xheelaʼ nabé riuuláʼdxidu gusíʼdidu de Jehová ca binni ni qué runadiaga