Gucané Biblia laacabe para bichaacabe

¿XI JMA bisiecheʼ ti empresariu escocés que carrera risaca ni gupa? ¿Xi gucané ti hombre de Brasil para gunda bisaana de gaca inmoral ne de cubaʼ cocaína? ¿Xi gucané ti joven esloveno gusaana de xhudxi yaʼ? Gudiʼnu lugar gábicabe ni laanu.

«Ruluíʼ gastiʼ cayaadxaʼ lu xquendanabaneʼ» (JOHN RICKETTS)

IZA GÚLEBE: 1958

PADÉ LAABE: ESCOCIA (REINO UNIDO)

NI NAQUIIÑEʼ GÁNNALUʼ: GÚCABE TI EMPRESARIU RISACA

MODO BIBANEʼ DXIQUÉ: Guizáʼ galán modo biniiseʼ purtiʼ qué ñaadxaʼ gastiʼ naa. Cumu guca bixhozeʼ oficial stiʼ ejércitu británico la? ngue runi gadxé gadxé lugar rindeza familia stinneʼ. Gulézadu Escocia ne laaca guyuʼduʼ Inglaterra, Alemania, Kenia, Malasia, Irlanda ne Chipre. Dxi napaʼ xhono iza maʼ gadxé gadxé internadu stiʼ Escocia bineʼ estudiar ne despué gucaʼ graduar ra Universidad stiʼ Cambridge.

Dxi bisaaʼ 20, bizuluáʼ bineʼ dxiiñaʼ de ni bineʼ estudiar que, xhono iza gucaʼ pretroleru. Primé bineʼ dxiiñaʼ América del Sur, despué maʼ África ne últimu Australia Occidental, ne raqué gupaʼ ti empresa de inversión ni bituaaʼ despué.

Pur bueltu ni gupaʼ ra bituaa’ ni que, gunda gucaʼ jubilar dxi napaʼ 40 iza. Cumu jma maʼ napaʼ tiempu la? guizáʼ bineʼ viajar. Chupa biaje bidieeʼ buelta enteru guidxi Australia lu motocicleta ne bidieeʼ buelta Guidxilayú. Ruluíʼ gastiʼ cayaadxaʼ lu xquendanabaneʼ.

XIMODO GUCANÉ BIBLIA NAA PARA BICHAAʼ: Dede ante gacaʼ jubilar, biale de naa gudieeʼ xquixe peʼ Dios pur modo nabaneʼ que. Ngue runi bizuluáʼ guyaaʼ ndaaniʼ yu’du’ Anglicana, ra maca guyaaʼ dxi nahuiineʼ. Peru raqué huaxiéʼ rusiidicabe de ni zeeda lu Biblia. Despué guyaaʼ lade ca mormón, peru qué ñuuladxeʼ purtiʼ huaxiéʼ rusisácacabe ni zeeda lu Biblia.

Ti dxi málasi bixhidxináʼ ca testigu stiʼ Jehová ra puertaʼ lidxeʼ. Nagueendaca bidieeʼ cuenta lu Stiidxaʼ Dios nga zeeda guiráʼ ni runi crécabe. Tobi de ca textu ni biindanécabe naa nga 1 Timoteo 2:3, 4 ra ná ni racala’dxi’ Dios nga guilá «guiráʼ xixé binni ne guiziidiʼ chaahuicaʼ ni dxandíʼ». Guizáʼ bidxagayaaʼ purtiʼ biiyaʼ cadi racala’dxi’ si ca Testigu guiziidiʼ binni ni zeeda lu Biblia, sínuque guiziidicaʼ ni dxandíʼ.

Ra bineʼ estudiar Biblia né laacabe maʼ gunda biziideʼ chaahueʼ ni dxandíʼ. Riecheʼ purtiʼ biziideʼ stale cosa, casi tobi de laani nga gadxé nga Dios ne gadxé nga Jesús ne cadi nácacabe trinidad (Juan 14:28; 1 Corintios 11:3). Binitesiá’ tiempu ra gucalaʼdxeʼ ñeneʼ ti creencia ni cadi dxandíʼ ne ni nagana para guiene binni. ¡Jma huaʼ fácil guiene binni ni dxandíʼ de Dios!

Qué nindaa maʼ bizuluáʼ guyaaʼ reunión stiʼ ca Testigu, bidxagayaaʼ pabiáʼ nacháʼhuicabe ne rúnicabe stipa chinándacabe ca principiu ni zeeda lu Biblia. Guizáʼ nacha’hui’ ca binni que ne runi respetarcaʼ Dios. Ra biiyaʼ dxandíʼ nadxiisaacabe bidieeʼ cuenta nuucabe ndaaniʼ religión ni rusiidiʼ ni dxandíʼ (Juan 13:35).

XI MA’ GULEENDUÁʼ: Despué de guyuaanisaʼ binebiaʼyaʼ Diane, ti gunaa nuu xpiaaniʼ ni biniisi ndaaniʼ ti familia testigu stiʼ Jehová. Guyuuladxeʼ laabe purtiʼ nápabe stale cualidad galán, ngue runi despué bichaganadu. Beeda gácabe ti ndaayaʼ stiʼ Jehová para naa, purtiʼ qué nusaanabe de ñacanebe naa.

Biale de ladxidoʼdo chigacanedu ra nuu jma necesidad, ngue runi, lu iza 2010 yendézadu Belice, Centro América, raríʼ runi predicardu binni ni nadxii Dios ne ni racala’dxi’ guiziidiʼ jma de laabe.

Yanna ra maʼ biziideʼ ni dxandíʼ de Dios ne de Biblia maʼ nuudxí ladxiduáʼ ne ra maʼ nacaʼ precursor maʼ gunda gucaniáʼ stale binni gunibiáʼ Stiidxaʼ Dios. Gástiruʼ sti cosa ni jma rusiecheʼ naa que guuyaʼ pabiáʼ racané Biblia binni guchaa xquendanabani cásica bichaa ni stinneʼ. Yanna huaxa maʼ bidxelaʼ ximodo gudieeʼ xquixe peʼ Jehová pur xquendanabaneʼ.

«Guizáʼ nacha’hui’ gúcacabe né naa» (MAURÍCIO ARAÚJO)

IZA GULEBE: 1967

PADÉ LAABE: BRASIL

NI NAQUIIÑEʼ GÁNNALUʼ: GÚCABE TI BINNI IMMORAL

MODO BIBANEʼ DXIQUÉ: Biniiseʼ ndaaniʼ ti guidxihuiiniʼ stiʼ São Paulo ni láʼ Avaré, stale de ca binni nabeza lugar riʼ nabé pobre laacaʼ.

Guti bixhozeʼ ante galeʼ. De nahuiineʼ racuá’ xhaba jñaa ora qué guinni ra lídxidu, ne despué maʼ bineʼ casi runi ti gunaa ne pur ngue maʼ binibiáʼ binni naa casi muxeʼ. Ra gudiʼdiʼ tiempu maʼ gupaʼ relación sexual né xcaadxi hombrehuiiniʼ dede né hombre huaniisi.

Ra jma maʼ ziniiseʼ biree huaxhinni para guyubeʼ hombre ne gunaa gataniáʼ, guyaaʼ ndaaniʼ ca bar ca ndaaniʼ ca antro dede né ndaaniʼ yu’du’. Ora raca carnabal racuá’ xhaba gunaa ne ruyaaʼ samba lu ca desfile ni raca. Guizáʼ guyuulaʼdxiʼ binni modo biyaaʼ.

Lade ca xhamiguaʼ guyuu muxeʼ, prostituta ne ni riguʼbaʼ droga. Caadxi de laacabe bicaacabe naa cubaʼ crack (cocaína en piedra), ne qué nindaa maʼ beeda gácani ti bisiu para naa. Guyuu biaje gudubaniáʼ ni laacabe guidubi gueelaʼ ne nuu tiru stúbesiaʼ guduubaʼ ni guidubi dxi. Guizáʼ flacu guyuaaʼ dede guníʼcabe napaʼ sida.

XIMODO GUCANÉ BIBLIA NAA PARA BICHAAʼ: Ca dxi que binebiaʼyaʼ ca testigu stiʼ Jehová. Guizáʼ nacha’hui’ gúcabe né naa, biindanécabe naa ca diidxaʼ ni zeeda lu Romanos 10:13 ra ná «guiráʼ tu guinabaʼ gacané Jehová laa ne iquiiñeʼ labe la? zalá». Raqué nga bidieeʼ cuenta nabé nga risaca iquiiñeʼ lá Dios. Guyuu biaje despué de cubaʼ crack guidubi gueelaʼ, ruxheleʼ ventana stinneʼ ruuyadxiéʼ guibáʼ ne dede ruunaʼ rinabaʼ Jehová gacané naa.

Bidieeʼ cuenta guizáʼ riuubaʼ ladxidóʼ jñaaʼ gu’ya’ modo nabaneʼ que, ngue runi gudixhe iqueʼ gusaanaʼ de cubaʼ droga. Qué nindaa bizuluáʼ bineʼ estudiar Biblia né ca testigu stiʼ Jehová. Gúdxicabe naa zacané estudiu que naa gusaanaʼ bisiu ni napaʼ que, ne zaqué guca ni.

Ra jma maʼ ziziideʼ de lu Biblia, bieneʼ naquiiñeʼ guchaaʼ modo nabaneʼ. Ni jma guca nagana para naa nga gusaanaʼ de gacaʼ muxeʼ, purtiʼ de nahuiineʼ maca nacaʼ ni. Bidieeʼ cuenta ni caquiiñeʼ guneʼ nga gusaanaʼ de guidxaagaʼ ca xhamiguaʼ, ngue runi maʼ qué ñaaʼ bar ne maʼ qué nizayaʼ huaxhinni.

Guizáʼ nagana guca para naa gusaanaʼ ca ni, peru gutadxí ladxiduáʼ ora riníʼ iqueʼ rizaalaʼdxiʼ Jehová naa ne rusisaca ca stipa ni runeʼ (1 Juan 3:19, 20). Cumu lu iza 2002 maʼ bisaanaʼ de gacaʼ muxeʼ la? maʼ gunda guyuaanisaʼ casi testigu stiʼ Jehová.

XI MA’ GULEENDUÁʼ: Guizáʼ bidxagayaa jñaaʼ ora biʼyaʼ modo bichaaʼ que, ngue runi laaca bizulube bi’ni’ estudiarbe Biblia. Ni triste nga gúpabe ti infartu cerebral. Peru neca zacá cadi cusaanabe de guiziidibe de Jehová ne de gannaxhiibe laa.

Ma’ raca xhono iza de riquiiñeʼ tiempu stinneʼ para gusiideʼ xcaadxi binni ni dxandíʼ zeeda lu Biblia. Neca guiráʼ dxi rudxieeluáʼ ca deseu malu ni gupaʼ dxiqué, peru ratadxí ladxiduáʼ gannaʼ pa qué guneʼ ca ni la? ziechené Jehová naa.

Yanna ra maʼ nuaa’ gaxha de Dios ne maʼ nabaneʼ modo riuuláʼdxibe la? racané ni naa gusisacaʼ xquendanabaneʼ. Yanna huaxa maʼ zanda guinieeʼ maʼ nacaʼ ti hombre nayecheʼ.

«Nabé güeeʼ xhaataʼ dxiqué» (LUKA ŠUC)

IZA GÚLEBE: 1975

PADÉ LAABE: ESLOVENIA

NI NAQUIIÑEʼ GÁNNALUʼ: GÜEʼ XHAATABE NISA DXUʼNI

MODO BIBANEʼ DXIQUÉ: Guleʼ ndaaniʼ ti guidxihuiiniʼ ni láʼ Liubliana, capital stiʼ Eslovenia. Guizáʼ galán bibaneʼ dxi nahuiineʼ, peru bichaa ni dxi napaʼ tapa iza purtiʼ biiti bixhozeʼ laca laa. Pur ni bizaaca que, gupa xidé bi’ni’ jñaaʼ dxiiñaʼ nadipaʼ para gusiniisi naa ne bicheʼ, ne para cadi guiaadxaʼ laadu gastiʼ.

Dxi napaʼ 15 iza yendezaʼ ra lidxi jñaabiidaʼ. Cumu stale de ca xhamiguaʼ nabeza neza ra lídxibe que, ne jma rudiibe lugar guireeʼ que jñaa la? ngue runi guyuuladxeʼ chindezaniáʼ laabe. Ne dxi maʼ napa 16 iza la? bieeguaʼ ti grupu de binni ni rixudxi guiráʼ fin de semana. Bidieeʼ lugar bigaa guicha iqueʼ, nabé feu modo gucuáʼ lari ne qué nindaa maʼ guduubaʼ gueza.

Bineʼ prueba gadxé gadxé droga, peru ni jma guyuuladxeʼ nga gueeʼ nisadxuʼniʼ. Nin qué nindaa maʼ cadi chupa chonna copa de vinu si güeeʼ, sínuque jma de ti botella. Nin qué rihuinni ora maʼ naxhudxeʼ, pa ñaca cadi pur bi stinneʼ la? guirutiʼ nudii cuenta pa maʼ güee’ panda litru vinu o cerveza nuchaʼ vodka.

Ora chuudu discu la? stale biaje naa nga racaniáʼ ca xhamiguaʼ guzuhuaacaʼ neca güeeʼ doble de biaʼ güeeʼ ca. Ti dxi málasi binadiaʼgaʼ caníʼ ca xhamiguaʼ guizáʼ reeʼ xhaataʼ. Nabé bininá ni guníʼcabe que naa, purtiʼ zacá runibiáʼcabe ca binni ni nabé reʼ xhaataʼ nisadxuʼniʼ Eslovenia.

Bicaa ngue naa guiníʼ iqueʼ xi cayuneniáʼ xquendanabaneʼ. Bineʼ sentir qué iquiiñeʼ ne qué risaca guiráʼ ni runeʼ.

XIMODO GUCANÉ BIBLIA NAA PARA BICHAAʼ: Ca dxi queca biiyaʼ modo maʼ bichaaʼ tobi de ca compañeru ni riniáʼ scuela modo laa, jma maʼ nadóʼ rihuínnibe, ngue bicaa naa guneʼ invitar laabe chideʼdu ti café para güidu diidxaʼ ti ratu. Bisiénebe naa bizulube cayuni estudiarbe Biblia né ca testigu stiʼ Jehová ne laaca gúdxibe naa caadxi de ca cosa ni caziidibe. Cumu qué lica huayaaʼ nin ti religión la? para naa nacubi guiráʼ ni caniʼbe que. Ngue runi bizuluáʼ guyaaʼ reunión stiʼ ca Testigu ne bi’ni’ estudiárnecaʼ naa Biblia.

Zacá nga bizulú biziideʼ ca ni dxandíʼ rusiidiʼ Biblia ne nabé guluu ca ni gana naa. Ti ejemplu de laani nga biziideʼ maʼ nabáninu «lu ca últimu dxi» casi ruzeeteʼ Biblia, ne maʼ cadi candaa zabee Dios guiráʼ ca binni malu nuu lu Guidxilayú riʼ ne ca ni nacha’hui’ zápacaʼ oportunidad de guibánicaʼ lu ni para siempre ora maʼ naca ni ti paraísu (2 Timoteo 3:1-5; Salmo 37:29). Ngue runi gudixhe iqueʼ guchaaʼ modo nabaneʼ para guibaneʼ lade ca binni nacha’hui’ ca.

Ora gudxeʼ ca xhamiguaʼ de ca ni caziideʼ que, stale de laacaʼ bi’ni’ búrlacaʼ naa. Peru ngue peʼ nga ni gucané naa gudieeʼ cuenta cadi nácacabe ti buen amigu. Laaca bidieeʼ cuenta bizulú güeeʼ xhaataʼ nisadxuʼniʼ purtiʼ bieeguaʼ ca binni ni cadi naquiiñeʼ guidxaagaʼ. Laacabe nisi maʼ cabézacabe ganda fin de semana para xhúdxicabe.

Gudixheʼ iqueʼ guixeleʼ de laacabe ne gapaʼ xhamiguaʼ lade ca testigu stiʼ Jehová. Purtiʼ cadi riguusicaʼ gana naa, sínuque nadxiicaʼ Dios de guidubi ladxidoʼcaʼ ne rúnicaʼ stipa de guibánicaʼ casi ná ca regla stibe. Ra maʼ bidxaagaʼ laacabe que, gucané ni naa purtiʼ zaqué gunda bisaanaʼ guendarixudxi.

XI MA’ GULEENDUÁʼ: Rudieeʼ xquixe peʼ Jehová purtiʼ yanna maʼ cadi caquiiñeʼ nisadxuʼniʼ para guibaneʼ nayecheʼ. Qué gannaʼ ximodo niluxeʼ pa qué nuchaaʼ modo nabaneʼ que. Ni zanda guinieeʼ nga yanna huaxa guizáʼ maʼ galán nabaneʼ.

Ma’ gadxe iza de napaʼ privilegiu de guneʼ dxiiñaʼ ndaaniʼ sucursal stiʼ ca testigu stiʼ Jehová ni nuu Eslovenia. Gástiruʼ sti cosa ni jma rusiecheʼ naa qué gunebiaʼyaʼ Jehová ne guneʼ xhiiñaʼ.