Xquíxepeʼ lii pur guleeluʼ tiempu biindaluʼ folletu riʼ ti gunibiáʼ chaahuiluʼ laadu, gánnaluʼ xi dxiiñaʼ rúnidu ne gúʼyaluʼ ximodo runi ca testigu stiʼ Jiobá dxiiñaʼ. Ribézadu gacaneni lii gudiiluʼ cuenta laasidu nga rúnidu ni na Jiobá yanna. Runi invitardu lii cadi gusaana de guiziidiluʼ jma de Dios. Guniʼné ca binnilídxiluʼ ne ca xhamíguluʼ de ni caziidiluʼ ne cadi gusaana de guidagulisaaneluʼ laadu (Hebreos 10:23-25).

Ra jma maʼ ziziidiluʼ de Jiobá jma zudiiluʼ cuenta pabiáʼ nadxiibe lii. Ne zucaani lii guʼnuʼ stipa pur gannaxhiiluʼ laabe cásica nadxiibe lii (1 Juan 4:8-10, 19). Yanna, ximodo zanda gusihuínniluʼ nadxiiluʼ Dios guiráʼ dxi yaʼ. Xiñee galán gúniluʼ ni na ca ley stiʼ Jiobá ra na ximodo naquiiñeʼ guibani binni yaʼ. Xi zacané lii chuuláʼdxiluʼ gunineluʼ laadu ni na Dios yaʼ. Binni ni cusiidiʼ lii de Biblia zacané lii guicábiluʼ ca guendarinabadiidxaʼ riʼ, zacá zacanebe lii ne binnilídxiluʼ para «cadi ixele tu de Dios ni nadxii laatu laga cabeza tu [...] enda nabani ni qué zaluxe» (Judas 21).

De guidubi ladxidoʼdo rinábadu lii cadi gusaana de saluʼ lu neza ra zaziidiluʼ ni dxandíʼ. Zabeenduluʼ ni galán pa guʼndanécabe lii sti libru ni láʼ «Cadi guixélenu de Dios ni nadxii laanu».