Ora guizaaca xiixa desgracia, laadu, ca testigu stiʼ Jiobá nagueendaca racanedu xcaadxi Testigu ni caquiiñeʼ gacanécabe laacaʼ. Cani rúnidu pur laacabe rusihuínnicani dxandíʼ nadxiisaadu (Juan 13:34, 35; 1 Juan 3:17, 18). Ximodo racanésaadu yaʼ.

Racanedu laacabe né bueltu. Ca xpinni Cristu de Antioquía biseendacaʼ bueltu para gucanecaʼ xcaadxi xpinni Cristu de Judea dxi guca ti gubiña neza ra nabézacaʼ (Hechos 11:27-30). Zacaca nga rúnidu yanna, ora rizaaca xiixa desgracia paxaraa rudiʼdu bueltu ra ridagulisaadu para gacanedu xcaadxi Testigu (2 Corintios 8:13-15).

Rigacanedu. Ca binnigola ni nabeza lugar ra bizaaca xiixa desgracia ruyúbicabe cada tobi de ca binni ridagulisaa para gúʼyacabe pa qué nizaacacaʼ xiixa. Nuu ti grupu de binnigola ni racané, riguixhe ximodo guicaacabe ni gócabe, nisa guécabe, lari gácucabe, medicina iquiiñecabe, ne guʼyaʼ paraa zanda guiaanacabe. Stale Testigu ni nanna dxiiñaʼ ni riquiiñeʼ para cuí yoo o para cuí Yoo stiʼ Reinu rinábacaʼ chigacanecaʼ ca lugar ra bizaaca xiixa desgracia ne laacaʼ xcuéntacaʼ gastu sticaʼ. Cumu nuudu tobi si ne maʼ nánnadu gúnidu dxiiñaʼ juntu la? randa riniibidu nagueenda ora caquiiñeʼ gacanedu. Dxandíʼ, «ca hermanu» stidu nga racanedu, peru laaca racanedu xcaadxi binni ora randa, neca de gadxé religión laacaʼ (Gálatas 6:10).

Riquiiñedu ni rusiidiʼ Biblia para quixhedxidu ladxidóʼcabe. Ora guizaaca xiixa desgracia, ni jma riquiiñeʼ binni nga chuʼ tu quixhedxí ladxidóʼ. Ora cazaaca binni zacá, Jiobá, Dios stidu ni riguixhedxí ladxidóʼ binni, rudii stipa laacabe (2 Corintios 1:3, 4). Nga runi, riuudu ra nuu ca binni ni cayacaná ladxidóʼ pur xiixa desgracia ne ruluidu laacabe ca ndaayaʼ ni zeeda lu Biblia, ra na maʼ qué zandaa zabee Reinu stiʼ Dios yuubaʼ ne guiráʼ ni cayuniná binni yanna (Apocalipsis 21:4).

• Xiñee nagueendaca racanesaa ca testigu stiʼ Jiobá ora guizaaca xiixa desgracia.

• Ximodo riquiiñedu Biblia para quixhedxidu ladxidóʼ ca binni ni bilá de xiixa desgracia.