Biblia maca guníʼ, gati si Cristu ziasa binni ni gusiguii ne zusiidiʼ ni cadi zeeda lu Stiidxaʼ Dios lade ca primé xpinni Cristu (Hechos 20:29, 30). Ngapeʼ nga ni bizaaca: ca maestru ni qué rusiidiʼ ni dxandíʼ biguuchacabe cani bisiidiʼ Jesús né cani runi cré binni ni qué runi ni na Dios, ne zacá biʼniʼ yuudxucabe cani bisiidiʼ Cristu (2 Timoteo 4:3, 4). Ne ni maʼ bidúʼyanu riʼ, xiñee rábidu jneza nga modo riénedu cani rusiidiʼ Biblia yaʼ.

Bidxiña dxi gusihuinni Jiobá xii nga ni dxandíʼ. Dios maca guníʼ «zadale ca binni ni ganna xii nga ni dxandíʼ» lu ca últimu dxi (Daniel 12:4). Lu iza 1870, guyuu caadxi binni ni biyubi ganna ni dxandíʼ ne bidiicaʼ cuenta cadi zeeda stale de cani rusiidiʼ ca yuʼduʼ ca lu Biblia. Nga gucané laacabe guyúbicabe guiene chaahuicabe xipeʼ nga rusiidiʼ Stiidxaʼ Dios ne gucané Jiobá laacabe guiénecabe ni.

Biyubi caadxi hombre nayá ladxidóʼ guiene chaahuicaʼ Biblia. Ca binni ni bizulú biʼndaʼ Biblia primé que, biquiiñecaʼ ti modo cásica ni riquiiñedu yanna riʼ: biindacabe Biblia pur tema. Ora qué ganda guiénecabe xiixa relatu ni zeeda lu Biblia, ruyúbicabe sti relatu ni zanda gacané laacabe guiénecabe ni, ne ora maʼ biiyacabe biaʼsi zaqué nga rusiidiʼ Biblia la? maca zigucaacabe ni. Racá ridúʼyanu laaca Biblia bisiene laacabe cani cadi cayénecabe, casi tupeʼ nga láʼ Dios ne gunna chaahuicabe stale cosa de Reinu stibe, ne cani naguixhe íquebe gúnibe para binni ne para Guidxilayú. Ne laaca biénecabe ximodo nuu ca gueʼtuʼ ne ziuu ti dxi zandisaʼ Dios laacaʼ. Guiráʼ cani bíʼndacabe ne cani biénecabe gucanécani laacabe gusaana de guni crécabe caadxi cosa cadi jneza ne gusaana de gúnicabe cani (Juan 8:31, 32).

Lu iza 1879 biénecabe maʼ naquiiñeʼ gusiidicabe binni de guiráʼ guidxi xii nga ni dxandíʼ. Laaca lu iza que nga bizulú guleecabe revista Torre stiʼ ni rapa. Ni caníʼ de Reinu stiʼ Jiobá, ne dede yanna riquiiñedu revista riʼ para gusíʼdidu binni. Yanna, lu chupa gayuaa cuarenta guidxi ne jma de gadxe gayuaa cincuenta diidxaʼ rusíʼdidu binni cani dxandíʼ zeeda lu Biblia. ¡Qué huayuu dxi ganna binni de Stiidxaʼ Dios casi cayánnacaʼ ni yanna!

• Xi bizaaca né cani rusiidiʼ Stiidxaʼ Dios guti si Cristu.

• Ximodo gunda biene ca primé xpinni Cristu cani dxandíʼ rusiidiʼ Stiidxaʼ Dios.