Cadi jneza ruuyaʼ modo ruzuchaahuiʼ xcaadxi

EILEEN BRUMBAUGH GUNÍʼ NI BIZAACA

BINIISEʼ ndaaniʼ ti religión casi stiʼ ca amish ne ca menonita, laani nga Antigua Orden de Hermanos Bautistas Alemanes [ni binibiáʼcabe casi dunkers]. Biasastí religión riʼ Alemania lu iza 1708, ca dxi peʼ maʼ bizulú cahuinni pietismo sti biaje. The Encyclopedia of Religion ná: «Nabé binibiáʼcabe pietismo riʼ purtiʼ gucaneni binni gudii cuenta caquiiñeʼ gánnacaʼ de Cristu». Ne nga bicaa ni orden que guseendaʼ misioneru lu campaña ndaaniʼ gadxé gadxé guidxi.

Lu iza 1719 bedané Alexander Mack ti grupu de binni Pensilvania, Estados Unidos, ne laabe nácabe xaíque sticaʼ. De raqué biree xcaadxi grupuhuiiniʼ ne maʼ cada tobi gudixhe ximodo gusiene ca ni bisiidiʼ Alexander Mack. Naa la? guyuaaʼ lade ti grupuhuiiniʼ ra nuu biaʼ cincuenta binni, nabé bisisácadu guidúʼndadu Biblia ne bínidu stipa pur chinándadu casi peʼ ná yu’du’ que gúnidu.

Chonna generación de familia stinneʼ nabé yenándacaʼ ni ná religión riʼ ne ribánicaʼ modo peʼ rusiidiʼ ni. Guyuaanisaʼ dxi napaʼ 13 iza ne biziideʼ cadi jneza iquiiñeʼ teléfono, radiu o intiica electrodoméstico, ne ninca gusayaʼ carru o tractor. Ndaaniʼ guidxihuiiniʼ ra nabézadu riʼ nabé sencíu racu ca gunaa lari, qué rugadu guicha íquedu, siempre nuchiʼdu íquedu, ne ca hombre qué rugacaʼ guicha ruaacaʼ. Ni guníʼ íquedu nga para cadi gácadu parte de guidxilayú riʼ, cadi naquiiñeʼ gácudu lari ni racu binni yanna, nin iquiiñedu maquillaje nin oro, purtiʼ para laadu la? zacá nga rudxiibaʼ binni laca laa.

Laaca bisiidicabe laadu nabé risaca guni respetardu Biblia, purtiʼ laani nga nácani alimentu espiritual stidu. Guiráʼ siadóʼ ante guideʼdu la? raca reunirdu ndaaniʼ sala para gucaʼdiágadu guʼndaʼ bixhozeʼ ti capítulo de lu Biblia ne guni comentarbe de laani. Despué, ruzuxíbidu para guni orar bixhozeʼ. Ne últimu la? ruundaʼ jñaa Padre Nuestro. Ma’ cabezasiá’ ora gúnidu ni, purtiʼ óraca riuu interu familia stinneʼ juntu para guiníʼ íquedu cosa espiritual.

Gulézadu ti ranchu ni nuu gaxha de Delphi (Indiana), raqué bidxíʼbadu guiráʼ clase cosecha, despué rinéducani ndaaniʼ ti carretón para chigutódocani ndaaniʼ guidxi, rutódocani lu calle ne ra lidxi binni. Guníʼ íquedu laaca cayúnidu ni ná Dios nga ora cayúnidu dxiiñaʼ, ngue runi, nabé gucuá íquedu gúnidu ni, menu si domingu, purtiʼ dxi ca cadi naquiiñeʼ gúnidu dxiiñaʼ nadipaʼ. Peru cumu stale cosa nuu ni gaca ra ranchu que la? guca nagana para laadu cadi gúnidu dxiiñaʼ dxi riʼ.

Bichaganaʼyaʼ ne gupaʼ xiiñeʼ

Lu iza 1963, dxi napaʼ 17 iza, bichaganaʼyaʼ James, tobi de religión stinneʼ, laabe la? maca dede bisabuelo stibe naca de religión riʼ. Nabé de llenu guyuʼdu purtiʼ rábidu laani nga religión ni rusiidiʼ ni dxandíʼ.

Para lu iza 1975 la? maʼ nápadu xhoopaʼ xiiñidu, ne lu iza 1983 gule últimu, ne raqué bizaacabe gadxe. Rebecca nga ba’du’ ra guiropa, ne laasibe dxaapahuiiniʼ. Nabé bínidu dxiiñaʼ ne huaxiéʼ bínidu gastu, gúpadu ti vida sencíu. Bínidu stipa pur gusíʼdidu ca xiiñidu ca principiu ni zeeda lu Biblia ni bisiidiʼ bixhózedu ne jñaadu laadu ne xcaadxi binni de religión stidu que.

Para religión stinneʼ que nabé risaca nga modo guzuchaahuiʼ binni. Cumu qué zanda gánnadu xi nuu ndaaniʼ ladxidóʼ binni la? guníʼ íquedu zanda gánnanu ximodo peʼ laacabe pur modo ruzuchaahuicabe. Ngue runi, pa tuuxa guni esponjar guicha ique o gacuʼ ti vestidu ni napa dibuju ni runi llamar atención la? rusihuinni rudxiibaʼ laca laa. Dede guyuu biaje jma bisaca ximodo guzuchaahuidu que ni ná Biblia.

Ni bizaaca ndaaniʼ cárcel

Ra maʼ ziluxe iza 1960, bieguyoo xcuñaduá’ Jesse, purtiʼ qué ninabe ñebe lu ejércitu, ne laabe laaca ndaaniʼ religión stidu biniisibe. Raqué binibiaʼbe ca testigu stiʼ Jehová. Laacaʼ laaca riníʼ íquecaʼ cadi jneza cheʼ binni lu guerra purtiʼ cadi nga rusiidiʼ ca principiu zeeda lu Biblia (Isaías 2:4; Mateo 26:52). Nabé byuíʼcabe diidxaʼ de lu Biblia, ne biiyabe ca cualidad galán ni napa ca Testigu. Despué de biindaʼ chaahuibe ni ná lu Biblia, guyuunísabe casi ti testigu stiʼ Jehová. Guizáʼ bichiichi ngue laadu.

Byuiʼné Jesse xheelaʼ de ni maʼ biziidiʼ ne biiyabe cadi guiaadxaʼ revista Tore sti’ ni rapa ne ¡Gutaná! laa. Ra biindaʼ James ca ni gucané ni laa chuula’dxi’ guiziidiʼ jma de lu Biblia. Nabé riuuláʼdxibe ca cosa ni racané laabe guidxíñabe gaxha de Dios, purtiʼ neca racaláʼdxibe gúnibe ni ná, peru runi sentirbe nuube zitu de laa.

Gudxi ca xaíque stidu laadu zanda guidúʼndadu revista stiʼ ca amish, ca menonita o stiʼ Antigua Orden que, peru guníʼ íquedu nácacabe parte de guidxilayú riʼ. Nabé guníʼ bixhozeʼ mal de ca Testigu ne gúdxibe laadu qué chuʼ dxi guidúʼndadu revista Torre stiʼ ni rapa o ¡Gutaná! Ngue runi, ora biiyaʼ cayuundaʼ James ca ni la? guizáʼ bidxiicheʼ purtiʼ guníʼ iqueʼ zaguítecabe laabe.

Ni dxandíʼ la? maca napa James duda de caadxi cosa ni rusiidicabe ni cadi zeeda lu Biblia, casi tobi de laani nga nácabe ti pecadu nga guni binni dxiiñaʼ nadipaʼ domingu. Bisiidiʼ Antigua Orden que, zanda ugué’cabe nisa yuze stícabe, peru cadi naquiiñeʼ gáxhacabe guixi, ne qué ñanda nuluíʼ ca xaíque stiʼ yu’du’ que laabe paraa zeeda ni lu Biblia. Ngue runi, laaca maʼ bizulú gupaʼ duda de ca ni rusiidicabe que.

Cumu xadxí guníʼ íquedu nuudu ndaaniʼ religión stiʼ Dios, ne nánnadu xi zanda guizaacadu pa gusaanadu ni la? guca nagana para laadu guixéledu de laani. Peru maʼ bizulú bichiiñaʼ conciencia stidu laadu purtiʼ nuudu ndaaniʼ ti religión ni qué rusiidiʼ casi peʼ ná lu Biblia, ngue runi, lu iza 1983, bicaʼdu ti carta ra cusiénedu xi pur chigusaanadu religión que, ne gunábadu laacabe guiuundaʼ ni nezalú guiráʼ ca binni ni rié ra yu’du’ que. Ne pur ngue, guníʼcabe maʼ cadi nácadu de religión que.

Biyúbidu religión ni rusiidiʼ ni dxandíʼ

De raqué maʼ biyúbidu religión ni rusiidiʼ ni dxandíʼ. Bidu’ya’ chaahuidu tuu nga ca binni ni runi ni rusiidiʼ. Ca religión ni rié lu guerra la? qué lica nuyúbidu ñánnadu de laacaʼ. Peru nabé guyuuláʼdxidu ca religión sencíu, purtiʼ guníʼ íquedu ca binni ni racu lari sencíu ne napa ti vida sencíu la? ca nga nga ca ni cadi naca parte de guidxilayú riʼ. Ngue runi, lu iza 1983 hasta 1985 bi’ni’ viajardu interu guidxi Estados Unidos para guidúʼyadu xi runi cré cada religión, casi ca menonita, cuáqueros ne xcaadxi yu’du’ «sencíu».

Ca dxi que nabé yeganna ca testigu stiʼ Jehová laadu ra ranchu stidu ni nuu gaxha de Camden (Indiana). Neca rucaadiágadu laacabe la? peru rinábadu laacabe gúʼndacabe ca textu que de lu Biblia stiʼ King James Version (Versión del Rey Jacobo). Bineʼ respetar laacabe purtiʼ qué riécabe lu guerra, peru guca nagana para naa gucaadiaʼgaʼ laacabe purtiʼ qué rácucabe lari sencíu para gusihuínnicabe cadi nácacabe parte de guidxilayú. Ngue runi, qué ñuuyaʼ laacabe casi religión ni rusiidiʼ ni dxandíʼ. Guníʼ iqueʼ orgulloso ca binni ni qué racu lari casi rácudu, ne ca ni napa cosa risaca rusihuínnicaʼ guizáʼ rudxiibacaʼ laca laacaʼ.

Guizáʼ bidxiicheʼ dxi bizulú James guyé reunión ne chupa chonna de ca xiiñidu. Bi’ni’ invitarbe naa chinia’ laabe, peru qué nina’ya’. Ti dxi gúdxibe naa: «Neca cadi nuuluʼ de acuerdu né ni runi crécabe la? gudáʼ lii piou’ gú’yalu’ ximodo runi tratársaacabe», purtiʼ nga nga ti cosa ni guyuuláʼdxibe de ca Testigu.

Últimu la? guyaaʼ ra Yoo stiʼ Reinu, peru né stale cuidadu. Gucuaʼ vestidu sencíu stinneʼ ne guluaaʼ cofia o gorro que iqueʼ. Ne chupa chonna de ca xiiñeʼ la? guyecaʼ xieeñeecaʼ ne laaca gúcuca’ lari sencíu sticaʼ. Peru neca zaqué, guyé ca Testigu yegudiinaca’ laadu, ne bi’ni’ tratarcaʼ laadu né stale cariñu. Óraque guníʼ iqueʼ: «Biaa, gadxé ndaʼ laadu. Peru neca zacá, cayuni aceptárcabe laadu».

Neca guizáʼ bidxagayaaʼ pabiáʼ nadxiisaacabe la? peru guyaaʼ para si chiguuyaʼ, ngue runi, qué nuzuhuaaʼ ora ruzuhuaacabe ne qué ñuundaʼ ca cánticu stícabe. Ora riluxe ca reunión que guizáʼ runeʼ pregunta laacabe de ca cosa ni rabeʼ cadi cayúnicabe jneza o de ni ná xiixa textu de lu Biblia. Neca huaxiéʼ galán modo gunieniaʼ laacabe la? peru guiráʼ ca hermanu ni gunabadiidxaʼ que bisihuínnicaʼ dxandíʼ rizaaláʼdxicaʼ naa. Ne laaca nabé bidxagayaaʼ purtiʼ ora rinabadiidxaʼ laacabe xiixa la? casi ngueca ricabi guirácabe naa. Guyuu biaje bicaacabe ca respuesta que, nabé guyuuladxeʼ ngue purtiʼ zanda guundaʼ ca ni despué.

Lu verano iza 1985 guyuudu ti asamblea stiʼ ca testigu stiʼ Jehová ni guca Memphis (Tennessee). Guiradu gúcudu lari sencíu stidu, ne James la? ziuularuʼ guicha ruaaʼ. Lu intermediu stiʼ asamblea que, qué lica ñaanadu stúbidu, purtiʼ apena guiree tobi maʼ zeeda stobi para güiné laadu diidxaʼ. Guizáʼ guyuuláʼdxidu purtiʼ bisihuínnicabe rizaaláʼdxicabe ne nadxiicabe laadu ne gúcacabe hospitalariu né ladu. Laaca guizáʼ bidxagayaadu purtiʼ tobi si ni runi crécabe ne nuucabe unidu, gastiʼ naca xi guidxi rápacabe reunión stícabe.

Cumu guizáʼ guyuulaʼdxiʼ James modo bizaalaʼdxiʼ ca Testigu laadu la? bi’ni’ aceptarbe guʼndanécabe laabe de lu Biblia. Peru biindabe ni né stale cuidadu para chuʼbe seguru de ni caziidibe (Hechos 17:11; 1 Tesalonicenses 5:21). Ra maʼ bi’ni’ estudiar James Biblia bidii cuenta maʼ bidxelaʼ religión ni rusiidiʼ ni dxandíʼ. Peru naa la? qué guidxelaʼ xi guneʼ purtiʼ neca racala’dxe’ guneʼ ni jneza, qué racala’dxe’ guibaneʼ modo nabani binni, peru laaca qué gapaʼ gana guihuinneʼ mundana. Despué maʼ né naa ribiéʼ ora maʼ cayuni estudiárcabe, peru riguixheʼ Biblia lu ñee, ti ladu ca nexheʼ King James Version ne sti ladu ca Traducción del Nuevo Mundo para guuyaʼ pa cadi caguítecabe naa ne pa tobi si rusiidiʼ ca ni.

Ni gucané naa gacaʼ convencer

Ra maʼ bi’ni’ estudiárnedu ca Testigu, bizíʼdidu naca Bixhózedu ni nuu guibáʼ ti Dios si, ne cadi chonna binni, ne qué gápanu ti alma ni qué rati, sínuque laanu nga alma (Génesis 2:7; Deuteronomio 6:4; Ezequiel 18:4; 1 Corintios 8:5, 6). Laaca bizíʼdidu cadi naca infiernu ca ti lugar ra cayaʼquiʼ, sínuque laani nga baʼ ra rigaachiʼ guiráʼ ca ni maʼ guti (Job 14:13; Salmo 16:10; Eclesiastés 9:5, 10; Hechos 2:31). Ra maʼ bizíʼdidu xii nga infiernu bidiʼdu cuenta cadi dxandíʼ ni bisiidiʼ religión ra guyuʼdu que laadu, purtiʼ nin laacaʼ qué ñánnacaʼ xi peʼ nga infiernu.

Peru bineʼ dudaruaʼ pa ca Testigu nga religión ni rusiidiʼ ni dxandíʼ, purtiʼ cadi nabánicabe ti vida sencíu, ti cosa nabé risaca para naa. Ngue runi, para naa la? nácarucabe parte de guidxilayú. Peru laaca nannaʼ cayúnicabe ni ná mandatu ni bidii Jesús de gaca predicar ca diidxaʼ nacubi stiʼ Reinu ra nuu guiráʼ binni, ngue runi, maʼ qué guidxelaʼ xi guneʼ (Mateo 24:14; 28:19, 20).

Ni gucané naa cadi gusaanaʼ de guiziideʼ nga guendarannaxhii ni bisihuinni ca Testigu laadu. Ne maʼ interu peʼ congregación que gucané para gunda bichaa xfamiliaʼ. Stale de ca hermanu que beeda gánnacaʼ laadu, neca para si gueedasícabe leche ne dxita, peru ngue gucané laadu gudiʼdu cuenta pabiáʼ nacháʼhuicabe. Cada tidiʼ ti hermanu ra lídxidu, neca nánnacabe maʼ nuu tu runi estudiarné laadu la? peru riuucabe, neca para si ugapadiúxicabe laadu. Ngue peʼ nga ni caquiiñedu purtiʼ zaqué gunda binibiaʼdu laacabe ne gucané ni laadu gudiʼdu cuenta dxandíʼ peʼ rizaaláʼdxicabe ne nadxiicabe laadu.

Cadi ca hermanu de congregación si stidu nga bi’ni’ tratarcaʼ laadu galán. Dxi peʼ napaʼ duda de ximodo nga naquiiñeʼ guzuchaahuiʼ tuuxa la? bedaganna ti Testigu de ti congregación ni nuu gaxha naa láʼ Kay Briggs. Laabe la? rácube lari sencíu ne qué riquiiñebe maquillaje. Nabé galán bineʼ sentir né laabe, ne pur ngue gunda byueniáʼ laabe diidxaʼ. Sti biaje bedaganna hermanu Lewis Flora naa. Laabe laaca biniisibe ndaaniʼ ti religión ni racu lari sencíu. Bidiibe cuenta napaʼ duda, ngue runi bicaabe ti carta de chii yaza ra nuaa’ para quixhedxibe ladxiduáʼ. Guizáʼ biinaʼ pur ni bíʼnibe que, ne stale biaje maʼ biindaʼ carta ca.

Gunabaʼ ti superintendente viajante láʼ O’Dell gusiene naa Isaías 3:18-23 ne 1 Pedro 3:3, 4. Ne gudxeʼ laabe: «Cadi ná ca versículo riʼ para ganda gusiéchenu Dios naquiiñeʼ gácunu lari sencíu la?». Óraque nabe: «¿Ñee malu nga iquiiñeʼ binni cofia la? ¿Ñee ti pecadu nga guiuuda’ trenza ique binni la?». Ndaaniʼ religión ra guyuaaʼ ni láʼ Antigua Orden que rugú’dadu trenza ique ca dxaapahuiiniʼ stidu, ne ca gunaa riuu cofia íquecaʼ, ngue runi, rabeʼ cadi malu ni. Guizáʼ bidxagayaaʼ purtiʼ gupa superintendente riʼ paciencia naa ne guca nacha’hui’ né naa.

Chaahuiʼ chaahuiʼ maʼ gucaʼ convencer, neca guyuuruʼ xiixa ni huaxiéʼ guyuuladxeʼ: Igá guicha ique ca gunaa ca. Bisiene ca ancianu naa nuu gunaa jma rigaa guicha ique que xcaadxi, peru ¿ñee pur nga jma risácacabe la? Laaca gucanécabe guieneʼ pabiáʼ risaca guicaanu en cuenta conciencia stinu ora guzuchaahuinu, ne bidiicabe naa información para guʼndaʼ ra lidxeʼ.

Bínidu ni bizíʼdidu

Biyúbidu tuu nga ca ni runi ni jneza ne bidxéladu laacaʼ. Jesús guníʼ: «Sicaríʼ nga zanna binni nácatu discípulo stinneʼ: pa nadxiisaatu» (Juan 13:35). Guyuʼdu seguru ca testigu stiʼ Jehová nga ni rusihuinni dxandíʼ nadxii binni. Neca zacá, nabé guca confundir guiropaʼ xiiñidu huaniisi, Nathan ne Rebecca, purtiʼ laaca guyuunísacabe ndaaniʼ religión ni láʼ Antigua Orden que, peru despué, yendá ca ni dxandíʼ rusiidiʼ Biblia ni bisíʼdidu laacabe que ndaaniʼ ladxidóʼcabe, ne guyuuláʼdxicabe pabiáʼ nadxiisaa ca Testigu.

Casi Rebecca la? maca racaláʼdxibe gaca xhamígube Dios. Ngue runi, ora biziidibe cadi maca gudixhe diʼ Dios ximodo gaca conducta stiʼ binni o ximodo guibani despué la? jma fácil guca para laabe guni orarbe laa. Ra biziidibe cadi naca Dios chonna binni ni nuu lu Trinidad, gucané ni laabe chuʼbe jma gaxha de laa ne gúʼyabe laa casi ti persona real ni zanda chinándabe ejemplu stiʼ (Efesios 5:1). Guizáʼ biéchebe, purtiʼ zanda iquiiñebe lá Dios para guiníʼnebe laa, ne cadi ca título ni biquiiñecabe dxiqué. Ra biziidibe ximodo zanda guni orarbe Dios, ne ra gúnnabe naguixhe ique guni Guidxilayú riʼ ti paraísu para ganda guibani binni luni para siempre la? gucané ni laabe chuʼbe jma gaxha de Dios ni bizáʼ laanu (Salmo 37:29; Apocalipsis 21:3, 4).

Ca privilegiu ni nápadu

Lu verano iza 1987, naa ne James, ne gaayuʼ xiiñidu ni huaniisi: Nathan, Rebecca, George, Daniel ne John la? guyuunísadu casi testigu stiʼ Jehová. Ne despué, lu iza 1989, guyuunisa Harley, ne Simon guyuunisa lu iza 1994. Né stale gana cayuni familia stinneʼ dxiiñaʼ ni bisaana Jesús guni ca xpinni, cayuni predicárcabe ca diidxaʼ nacubi ne galán stiʼ Reinu.

Gaayuʼ hombre huaniisi stidu —Nathan, George, Daniel, John ne Harley—, ne Rebecca, baʼdudxaapaʼ stidu la? maʼ bí’nica’ dxiiñaʼ ti tiempu ndaaniʼ sucursal stiʼ ca testigu stiʼ Jehová ni nuu Estados Unidos. George la? nuuruʼ raqué (maʼ ziné catorce iza), ne Simon, cadi xadxí peʼ de cayuni dxiiñaʼ raqué, purtiʼ lu 2001 que bireebe de scuela. Guiráʼ xiiñidu naca ancianu o siervu ministerial ndaaniʼ xiixa congregación stiʼ ca testigu stiʼ Jehová. Ne xheelaʼ naca ancianu de congregación ni nuu Thayer (Misuri), ne naa la? qué rusaanaʼ de guneʼ predicar.

Nápadu chonna nietu —Jessica, Latisha ne Caleb—, riéchedu guidúʼyadu cusiidiʼ bixhózecabe ne jñaacabe laacabe gannaxhiicabe Jehová. Guiradu riuʼdu nayecheʼ purtiʼ bichiña Jehová laadu ra nuu, ne gucané laadu guidxéladu religión ni rusihuinni nadxiisaacaʼ.

Riénedu ca binni ni racala’dxi’ guni ni ná Dios, peru raca nagana para laacaʼ guibánicaʼ modo ná Biblia pur modo biniisicaʼ. Ribézadu guedandá dxi guni sentírcabe guendanayecheʼ ni runi sentirdu yanna ra riuudu de yoo pur yoo, peru cadi para chigutoʼdo ca ni rudxíʼbadu, sínuque para chiguni predicardu stiidxaʼ Reinu ne de ca ndaayaʼ ni guedané. De ridá nisa luáʼ ora guietenalaʼdxeʼ pabiáʼ naro’ba’ paciencia ne guendarannaxhii bisihuinni guidxi ni ziné lá Jehová laadu.

[Imagen]

Dxi napaʼ biaʼ gadxe iza, ne dxi maʼ huaniiseʼ

[Imagen]

Ra nacu James, George, Harley ne Simon lari sencíu sticaʼ

[Imagen]

Biree foto stinneʼ lu ti periódicu ra ziaaʼ luguiaa ziniaʼ ca ni bidxíʼbadu lu layú

[Ra gucuaacabe imagen]

Journal and Courier (Lafayette, Indiana)

[Imagen]

Familia stidu yanna