«Cadi xadxí de guti bixhozeʼ, gudxi xheelaʼ naa napa sti gunaa. Ti dxi maʼ nin ñábibe naa, bitópabe xhábabe ne bisaanabe naa né guiropaʼ xiiñidu.» Neca bidxela Janet ti dxiiñaʼ, qué ñaxa biaʼ caquiiñeʼ para ganda quixe ca gastu stiʼ. Peru cadi nga si gucuá íquebe. Sicaríʼ guniʼbe: «Nabé gucuá iqueʼ naasiáʼ chiguneʼ guiráʼ dxiiñaʼ que, ngue runi guyuaaʼ xhaataʼ xizaa ne bisidxaga ni naa. Bineʼ sentir naa napaʼ donda pur qué rudieeʼ ca xiiñeʼ ni rudii xcaadxi binni xiiñiʼ. Dede yanna riuuaruáʼ xizaa xi riníʼ ique binni de naa ne ca xiiñeʼ. Ñee riníʼ íquecabe qué ñuneʼ xiixa para nulaʼyaʼ xquendaxheelaʼ la?».

Racané oración Janet para gatadxí ladxidóʼ, ne chuʼ gaxha de Dios. Laabe guniʼbe: «Huaxhinni nga jma nagana rácani para naa. Cumu maʼ dxí doʼ nuu la? riníʼ iqueʼ stale cosa. Ni racané naa ti ganda gaseʼ nga guneʼ orar ne guundaʼ Biblia. Ti textu jma riuuladxeʼ nga Filipenses 4:6 ne 7 ra na: “Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa. Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu”. Huadideʼ gueelaʼ sin gaseʼ puru maʼ cayuneʼ orar, ne huayuneʼ sentir ximodo riguixhedxí Jiobá ladxiduáʼ».

Lu ti libana bidii Jesús lu ti dani, bisiidibe ximodo guni orarnu, ne bizeetebe caadxi diidxaʼ ni riguixhedxí ladxidoʼno ora maʼ cadídinu intiica guendanagana riguu xizaa laanu. Laabe guniʼbe: «Maca nanna Bixhoze tu xii nga caquiiñe tu ante inaba tu ni laa» (Mateo 6:8). Neca zacá, Dios ribeza guinábanu cani laa. Cadi guiaandaʼ laanu racané oración laanu para guidxíñanu Dios. Xi zabeendunu pur nga yaʼ. Sicaríʼ na Biblia: «Laa zadxiña gaxha de laatu» (Santiago 4:8).

Peru cadi para gábisinu Jiobá xi cayácanu nga guni orarnu. Cumu rucaadiágabe guiráʼ ni guiniʼné  laabe la? laaca rápabe cani runi cré zacanebe laacaʼ (Salmo 65:2). Nga runi, Jesús bisiidiʼ ca discípulo stiʼ «iníʼ né cabe Dios sin iree cabe gana» (Lucas 18:1). Cadi gusaana de guinábanu Dios guluíʼ laanu xi gúninu ne gacané laanu, purtiʼ laabe zacanebe laanu. Cadi guiaandaʼ laanu racaláʼdxibe gacanebe laanu ne zúnibe ni. Pa qué gusaana de guni orarnu Dios zusihuínninu runi crenu zacanebe laanu, purtiʼ nápanu fe (1 Tesalonicenses 5:17).

Para gápanu fe Dios la? primeru naquiiñeʼ gunibiáʼ chaahuinu laabe (Juan 17:3). Ra guidúʼndanu Biblia rizíʼdinu ximodo laabe ne xi riníʼ íquebe, ne rizíʼdinu rizaaláʼdxibe cada tobi de laanu. Peru cadi chupa chonna cosa si nga guizíʼdinu de Dios. Naquiiñeʼ gunibiaʼnu laabe cásica runibiaʼnu ti xhamígunu. Nánnanu cadi casi zeʼ binni raca xhamigu stobi, sínuque ridiʼdiʼ tiempu. Zacaca nga rizaaca né Dios, para gápanu fe ne confianza laabe caquiiñeʼ gunibiáʼ chaahuinu laabe ne gúninu stipa pur gúninu ni riuuláʼdxibe ne guidúʼyanu ximodo racanebe laanu (2 Corintios 10:15; Juan 8:29). Fe casi ni bizéʼtenu ca nga ni huayacané Janet para cadi chuʼ xhaatapeʼ xizaa.

Sicaríʼ guníʼ Janet: «Ora guuyaʼ ximodo huayapa Jiobá laadu riguidxi fe stinneʼ. Bíʼnicabe laadu stale cosa ni cadi jneza ne ruluíʼ qué ñanda nudxíʼludu cani. Despué de bineʼ orar Jiobá stale, bidieeʼ cuenta modo biʼniʼ chaahuibe ca guendanagana stinneʼ ne qué niníʼ iqueʼ pa zaqué ñúnibe ni. Cada biaje guneʼ orar para gudieeʼ xquíxepeʼ laabe, riníʼ iqueʼ guiráʼ ni huayúnibe pur naa. Racanebe naa órapeʼ caquiiñeʼ ni. Laaca huayacanebe naa guidxelaʼ ca xpinni Cristu ni dxandíʼ xhamiguaʼ ne nuucaʼ listu para gacanecaʼ naa ne nácacaʼ ti ejemplu para ca xiiñeʼ. *

»Yanna maʼ rieneʼ xiñee guníʼ Jiobá lu Malaquías 2:16 nanalaʼdxiʼ gaca divorciar binni. Ni jma runiná binni nga gucheené xheelaʼ laa. Neca maʼ gudiʼdiʼ iza de bisaana xheelaʼ naa, nuu tiru runeʼ sentir nuaaʼ stubeʼ ne qué risacadiáʼ. Ora guneʼ sentir zacá, runeʼ xiixa pur sti binni ti gusiaandaʼ yuubaʼ ca». Zacá nga runi Janet para cadi guixeleʼ de binni casi modo rudii Biblia conseju (Proverbios 18:1). *

Sicaríʼ na Janet: «Nabé ratadxí ladxiduáʼ gannaʼ naca Dios “bixhoze ca hombrehuiiniʼ ni maʼ guti bixhoze ne juez stiʼ ca viuda”. Laabe qué ziuu dxi gusaanabe laadu casi biʼniʼ xheelaʼ» (Salmo 68:5). Nanna Janet qué rutiidiʼ Dios laanu lu guendanagana para guʼyaʼ pa dxandíʼ nadxiinu laa, sínuque rudii laanu guendabiaaniʼ ne «enda nandxóʼ» stiʼ para cadi chuʼ xhaatapenu xizaa (Santiago 1:5, 13; 2 Corintios 4:7).

Peru xi gúninu pa nuu xquendanabáninu ra naxoo ne pur nga riuʼnu xizaa yaʼ.