AGU abipai du tipa unga na kpio ni badunguhe na ni kparakakparakaha. Gu kura aboro naberã gupai nga fuo kpio i nikaa raka araka, rogo kura ngbatunga he yo kia watadu rogo kura ba. Agu akurayo naberã gupai nga i nika vungayo i raki berewe. Wa vura duhe wo, agu akurayo naberã gupai gbua nga, kpio nga yangada apai dunduko.

Mo ima rengba ka du na gamo ida nibipa gipai re, nibipa wai i asonosi ro watadu gamo sino ngbatunga. Wa duhe nga agu abipai du tipa gupai ni naamanga fuo kpio ni kparakakparakaha, ya mo boro ho watadu ba rengbe ani ka ngera ku rogoho tipa ka gbia ruru akaragapai nga gu du ni rengo kuti agi asanahe naima fuda dungu aboro re?

Tipa dungu agarã, abarumbatayo rogo apambori aima yugo gu ida nga he kinaho rogo boro yo nga mbisimo akpinga ya. Rogo kikindigi apambori wa gu nga ga—aKristano, aHindu, aYudo, aMasarami, gbiati agu akuraha—apefuoho ima ida kuti gupai nga mbisimo akpingo te, i naya si nabata abata be gu kpio nga ga borose na kini raki rogo ngbii atoro. ABaddhists, tigayo idi kuti gupai nga, i navunga boro avunga berewe fuo kpio, ome watadu gu ome nga ga berã du rogo boro yo nandu ku rogo gu bawene rago du rimoho nga Nirvana.

Rii mburu agi ayugopai re, badungu aboro rogo zegino ima ye ka ida kuti gupai nga kpio nazaka gene tipa kura raka rogo kura zegino. Tipa kura aboro, kpio nga nyanyakipa pai tipa ka aria raka, na si kini du fuyo wa ka i ya kpio nga papara ga Mbori ringbisapai. Ono ginipai Ziazia Kekeapai apehe tipa gipai re? Ani nahõpai bero mo gedinga gu kekeapai naye fuo gere. Kina iriwo gu karagapai du tipa gipai re rengbe ka ti tiro.