1-2. Tipagine rengbe ani kaa bihe ti ni wa Yekova akaraganga pai kuti gaani akparakpee te?

 “GA NGBARAGO dú rogo Yekova yo a, ko afú agu ahe foro du nyemu he kpotoro yo.” (Tam. 37:4) Nga gi bawene kidohe! Ono ya mo si naida ani berẽ gupai nga Yekova nika fu agu ahe furani dunduko ani asanako tipaha ni kina ipo? Tipagine du gi sanahe re ti ni na nyanyakipaha? Ani bingo agi akpiapai re. Wirina nga nakuparanga namanga kparakpee tipa wa ka ri du na rengba ka ndu tipa Gu Sukuru Du Tipa Abatungusipa Kindo. Ono dungu agarã ima susa, na i ata yamba nga ri kindi tipa gu sukuru re te. Paranga wirina sana Yekova tipa ko husi ko be kere kaza tipa wa ka ko du na rengba ka manga bakere apai rogo dungurati. Ono ko ahunga te, gako kaza nagberã kina kumbatayo. Agu avunguagude nga aKristano namanga kparakpee nga wiriyo nye rogo rengo yo. Ono wiriyo kini diberã ka mbu iriso Yekova.

² Isoke mo aima sana Yekova a tipa pai, ono ka mo agbianga guhe mo nasanahe tipaha ya. Ni sangbanaha, mo ima rengba kada kuti gu digisopai nga, Yekova nakaragapai kina kuti ga kura aboro akparakpee, ono ko akaraganga pai kuti gamo te. Watadu mo ima rengba ka berã gupai nga, si ima rengba kadu nga mo ima manga gupai du ni irairaha. Wirina du rimori nga Janice b aima bi tiri wo. Ri na kumbari amangi kparakpee fu Yekova tipa gayo nyemupai nangia ga mangasunge Betere yo. Ri aya: “Mi aima du na gu kido nga si adianga regbo te ani ki tona mangasunge Betere yo.” Ono tifuo dungu agarã kusa, i aayambanga agi arogotise re kindi ku Betere yo te. Janice aya: “Rago aima gberã tire na ka mi ainongo gupai ka mi mangihe ya. Mi abaki bangire tipa ginipai mi namangihe ka ba gberãrago ti Yekova. Mi aima manga akparakpee ni badunguhe tipa ka ndu ku Betere yo. Tipagine ko aakaraganga pai ti ni kuti gimi akparakpee ya?”

3. Gini apai ani nika sakapai tipaha rogo gi kekeapai re?

 ³ Ti kura aregbo, ani ima rengba kaa bakabangirani singia Yekova nadegatuko kuti gaani akparakpee. Zavura gu ruru akumba naadu mbata kusayo aima du na gu bakabangirise re. (Eyo. 30:20; Tam. 22:2; Abak. 1:2) Ginipai rengbe ka fu gu kido foro nga Yekova nika karagapai akaraga kuti gamo akparakpee? (Tam. 65:2) Tipa ka karagapai kuti gu sanahe re, si nika ida ani gbia karagapai mbata kuti agi asanahe re: (1) Ginipai Yekova nika mangaha? (2) Ginipai Yekova aida ani mangihe? (3) Tipagine si narengbe ka ida ti ni ani mangi kparakpee tipa kurapai kia?

4. Ringbisihe kuti Yeremaya 29:12, ginipai Yekova akidohe ka mangaha?

⁴ Yekova ima kidohe tipa ka degatuko kuti gaani akparakpee. (Oni gedi Yeremaya 29:12.) Gaani Mbori ima kpinyemu rani mbiko ani nairiso ko ni rururani, sidu, ko ambunga degatuko kuti gaani akparakpee te. (Tam. 10:17; 37:28) Ono tie, gipai re ayugongo gupai nga ko nika fu agu ahe dunduko furani ani asanako tipaha te. Si ima rengba ka ida ani sungudi da kina rogo vovo zegino tipa ka gbia bete agu ahe ani asanahe tipaha.

5. Ginipai du berã Yekova yo ho ko adegatuko ni kuti gaani akparakpee? Oni sakingo rogoyo.

⁵ Yekova na kina gako ringbisapai berãko yo ho ko adegatuko ni kuti gaani akparakpee. (Yes. 55:8, 9) Papara gu gako ringbisapai re nakoda gupai nga ka hiiso kpotosende na agu aboro nika du na ngbarago ni kodikodi yo tii gako zogarago. Satana ape gupai nga, ka aboro aazoga tiyo, i nika du na bakere ngbarago. (Bam. P. 3:1-5) Tipa ka yugo gupai nga Bakitingbanga nga iraziree, Yekova ambu aboro i zogo tiyo. Ono ga aboro zogarago ima ye na dungu agi akpakarapai ani agbiatirani na ni areme re. (Batu. 8:9) Ani ima rugatirani na gupai nga Yekova adia nga agi akpakarapai re dunduko kusayo ti gi regbo re te. Ka ko di agu akpakarapai re dunduko kusayo awere, agu aboro aidanga kuti Mbori ya ima rengba ka berã gupai nga aboro du namangapai kuti gayo akpakarapai. I ima rengba ka berã gupai nga aboro ima rengba ka zoga tiyo kidu na diabese.

6. Tipagine si aida ani du ti ni na gu kido nga Yekova nikaa manga apai ti aregbo dunduko rogo nyemuse yo na ni ruruhe?

⁶ Yekova ima rengba ka karagapai kuti bangisa kparakpee ngba dungu agene. Ni kpiapai, ho Bakindo Izikiya aawoka ni nikerehe, ko azungodi Yekova ko husi ko. Yekova akaragapai fuko na ki husi ko. (2 Aba. 20:1-6) Ono ho gu mokedi nangia Pauro azungodi Yekova ni ko di ‘kiwe ti kpotoko,’ yo kusayo, isoke kaza kpotose, Yekova aadianga gu kpakarapai re kusayo te. (2 Kor. 12:7-9) Oni bingo gu kpiapai a nga ga agu amokedi nangia Yakoba na Petero. Bakindo Erode aaida ka imo yo dunduko. Dungurati amangi kparakpee tipa Petero na si nawiraha wa i aima mangaha tipa Yakoba a. Ono tie, i aima imo Yakoba, na maraika ki batasi Petero ngba iiriwo gene. (Amo. 12:1-11) Ani ima rengba ka bakabangirani nga, ‘Tipagine Yekova abatasi Petero ti ni ka ko abatasanga Yakoba ya?’ Baibiri apenga ndu gupai si amangi ti ni wo te. c Gupai rengbe ani kadu na kido kuti ni nga, ga Yekova agene ti aregbo dunduko “zanga irairapai.” (Pa Rug. 32:4) Na ani ima ino gupai nga Yekova aima kpinyemu aPetero na Yakoba dunduko ue. (Yugo. 21:14) Ti kura aregbo, Yekova ima rengba ka zanga karagapai kuti gaani akparakpee kuti wai ani amaabangirani tipaha. Ono mbiko gupai nga ani na kido nga Yekova ninaamanga apai ti aregbo dunduko rogo nyemuse yo na ni ruruhe, ani akpakananga he tipa gu gene ko asia ka karagapai kuti gaani akparakpee ngbaha te.​—Eyo. 33:13.

7. Ginipai ani aˈasada ka nehe, na tipagine?

 ⁷ Ani naˈasada ka ne gupai nga ka ringbisa gupai du tipa rani na ga kura aboro. Ni kpiapai, ani ima rengba ka sana Yekova nga ko undo rani na kurapai, ono ani ima rengba ka zanga gbia guhe ani namangi kparakpee tipaha. Kusa, ani kini ye ka ino gupai nga kura boro amangi kparakpee tipa kina ngbatungapai wa gure na Yekova ki ima karagapai kuti gani kparakpee. Gipai re aima manga gu wirina du rimori nga Anna. Ri amangi kparakpee nga kumbari nangia Matthew, hu be gu kaza nga kansa. Ti kina gu bangisa regbo re, sosono awirina ni adee ue aawoka a kina be kansa. Anna anaamanga kparakpee kakaka tipa Matthew na tipa agi awirina re. Agu awirina re aima hu, ono Matthew aima kpi. Ti bambataha, Anna aabaka kina bangiri singia Yekova naundo agu awirina re i hu. Na ka si du nga Yekova aima undo yo, tipagine ko aakaraganga pai ti ni kuti gari akparakpee na ki husi kumbari ya? Gu rengo duho nga ani ainongo ndu gupai agu awirina re ahu ti ni te. Ono gupai ini ani he nga, Yekova nika dia arungo dunduko kusayo, na ko na bakere nyemu ka zingisa abakureako be kpio.​—Eyo. 14:15.

8. (a) Ringbisihe kuti Yesaya 43:2, waigu Yekova aundo rani? (b) Waigu rengbe kparakpee ka undo rani ho ani agbiatirani ni na kere akpakarapai? (Oni bi gu vidio nga, Kparakpee Naundo Rani Ani Hi Akpakarapai.)

⁸ Yekova nikaa undo rani ti aregbo dunduko. Wangia Yekova gu Barani nga boro nyemuse, ko akpingo nyemu kaa bi rani ani ni igirã te. (Yes. 63:9) Wa vura duhe wo, ko akánga na akpakarapai dunduko ti mangaha rani te, nga gu rengbe yo ka ringbisaha kuti aime watadu mirãwe te. (Oni gedi Yesaya 43:2.) Ono tie, ko ima kidohe ka undo rani ani ‘susi rogoho.’ Na ka ani vura kaa susa kina rogo gini akpakarapai awere, ko ambungaha si gbarasi gaani pagume na ko te. Yekova nafu gako ziazia toro furani a du na bakere ome ti ni si undo rani ani hipai. (Rk. 11:13; Frp. 4:13) Ni sangbanaha, ani ima rengba kadu na gu kido nga, ko nikaa fu kina boro guhe furani ani aidaha ti aregbo dunduko tipa wa ka ani du na rengba ka hipai na ki nye ni rururani fuko. d

9. Ringbisihe kuti Yakoba 1:6, 7, tipagine si aida ani du na gu kido ti ni nga Yekova nika undo rani aundo?

⁹ Yekova naida gupai nga ani kido kuti ko. (Eb. 11:6) Ti kura aregbo, ani ima rengba ka bihe nga gaani akpakarapai ima kpakara ni kerehe tipa ka hihe. Ani ima rengba ka tona du na kapa singia Yekova aundo rani. Ono Baibiri nakido rani nga mbiko ga Mbori ome, ani ima rengba ka ‘gu ri ngapa.’ (Tam. 18:29) Kuba gupai nga ka mbu kapa si naasona, si naida ani mangi kparakpee ni idapase na kidu na gu kido nga Yekova nika karagapai akaraga kuti gaani akparakpee.​—Oni gedi Yakoba 1:​6, 7.

10. Oni funga kpiapai tipa wai rengbe ani ka mangapai na ngbanya kuti gaani akparakpee.

¹⁰ Yekova naida gupai nga ani naamangapai ringbisihe kuti gaani akparakpee. Ni kpiapai, wirina ima rengba ka sana Yekova ko undo ko ko gbia regbo ba gako sunge marã yo tipa wa ka ko du na rengba kadu pati bakere dunguratise. Waigu Yekova narengbe ka karagapai kuti gu kparakpee re? Ko ima rengba ka fu wingbaduse fu gu wirina re tipa ko ndu fuo gako bairasunge. Ono si nikaa ida aida gu wirina re ndu fuo gako bairasunge na ki sana ni. Si ima rengba ka ida ko sanahe bara dunguhe. Zavura ko ima rengba ka sanahe ka mangasunge kuba kura boro. Na ka si aaidaha aida wo, ko ima rengba ka sanahe tipa ka dia regbo ti sunge ka i atumongo ko ya.

11. Tipagine si aida ani naadogoda kparakpee ti ni tipa gupai du na nyanyakipaha furani?

¹¹ Yekova naida gupai nga ani naadogoda kparakpee adogoda tipa gupai du na nyanyakipaha  furani. (1 Tesa. 5:17) Wa gu pai Yesu apehe, si nayugo gupai nga gu kura ahe kinaho ani asanahe tipaha i nikaa funga ha furani ni kina wiri ipo ya. (Rk. 11:9) Sidu, ka omeroni batingo ya! Oni naamanga kparakpee kina boro kpotoroni yo na dedede. (Rk. 18:1-7) Ho ani andu ni kumbatayo kindi kaa manga kparakpee tipa pai, ani nayugo gupai fu Yekova nga, gupai ani amanga kparakpee tipaha re na nyanyakipaha nzunzu furani. Ani nayugo gupai a nga, ani na idapase nga ko ima rengba ka undo rani.

12. (a) Gini sanahe sa si aida ani sana tirani na ni nibipa agu ahe ani asanahe tipaha, na tipagine? (b) Waigu rengbe ani ka bi gupai nga gaani akparakpee nayugo irisa fu Yekova? (Oni bi gu sanduki nga, “ Ya mo Agu Apai mi Asanahe Tipaha Nayugo Irisa fu Yekova?”)

¹² Ka si du nga ani agbianga guhe ani nasanahe tipaha te, ani ima rengba ka sana tirani na asanahe biata. Bambataha nga, ‘Ya mo mi namanga kparakpee tipa gupai ruaru?’ Dedede, ani ninaaberã gupai nga ani ima ino gupai ngba gbe tipa rani. Ono agu ahe ani asanahe tipa ha ima rengba ka zanga undo rani tipa gbanga regbo. Ka si du nga ani namanga kparakpee tipa kpakarapai, wene gene tipa ka mangapai kuti gu kpakarapai re ima rengba kadu ho susi gu ani amanga kparakpee tipaha re. Na gu kura apai ani asanahe tipaha ima rengba ka zanga du na ngbanya dagbaha na gupai Yekova akpinyemuhe. (1 Yo. 5:14) Ni kpiapai, oni bingo gu kpiapai nga ga agu avunguagude i nipe payo kusayo. I asana Yekova ko banda wiriyo ku rogo rengo yo. Gipai re ima rengba kaa ngera wa gi sanahe re ruaru. Ono Yekova aziongo ai boro ngbaome dagbarani yo ni irisi ko te. Ko naida ani dunduko, kodihe na awirani sia ka irisoko. (Pa Rug. 10:12, 13; 30:19, 20) Sidu, kuba gure, agu avunguagude re ima rengba ka sana Yekova tipa ko undo yo i zi ngbadu wiriyo yo u kpinyemu Yekova na ki da ni bakurea Ko.​—Snz. 22:6; Ef. 6:4.

13. Ringbisihe kuti AEbere 4:16, gini regbo Yekova nika undo rani ti ni? Oni sakingo rogoyo.

 ¹³ Ue sanahe rengbe kadu nga, ‘Ya mo si nga ga Yekova regbo ko karagapai kuti gupai mi asanahe tipaha?’ Ani ima rengba ka bihe nga ani naida karagapai kuti gaani akparakpee ni kina boro ipo. Ono nirengo, Yekova ima ino gu bawene regbo si aida ko undo rani ti ni. (Oni gedi AEbere 4:16.) Ho ani agbianga guhe ni ani nasanahe tipaha ni kina ipo ya, ani ima rengba ka berã gupai nga ga Yekova karagapai nga ‘Oó.’ Ono ga Yekova karagapai ima rengba kadu nzunzu nga ‘Awere te.’ Ni kpiapai, oni berẽnga kusayo tipa gu paranga wirina namangi kparakpee tipa ka hu be gako kaza. Ka Yekova amangi iiriwopai ka husa ko, ka Satana aima rengba ka pe gupai nga gu wirina re nandu kindi kumbatayo kaa iriso Yekova mbiko Yekova ahusi ko. (Eyo. 1:9-11; 2:4) Kurigure, Yekova ima maa regbo tipa ka husa akaza dunduko ti ni. (Yes. 33:24; Yugo. 21:3, 4) Da kina ti gu regbo re, ani arengbanga ka berã gupai nga Yekova nika manga iiriwopai ka husa rani be gaani akaza te. Sidu, gu wirina re ima rengba ka sana Yekova tipa ome na zereda nga ga berãse yo tipa ko hi gako kaza na kini ndu kindi kumbatayo kaa iriso Yekova ni ruruko.​—Tam. 29:11.

14. Ginipai oni awirikaha ti ga Janice kpiapai?

¹⁴ Oni tingidinga pa gu kpiapai nga ga Janice, namangi kparakpee tipa ka mangasunge Betere yo. Tifuo agarã bisue, ri aye ka rugatiri na gupai nga Yekova aima karagapai kuti gari kparakpee ono ngba kura gene kia ti wai ri aamaa bangiri tipaha. Ri aya: “Yekova amangisunge na gu regbo re tipa ka yugo dungu apai fere na ka undo re mi da ni wene Kristano. Si aaida gimi kido kuti ko sono. Si aaida mi wiriki wai ka wisigo Baibiri sirisiri. Na si aaida mi wiriki gupai nga mi ima rengba kadu na ngbarago rogo ai gu ba mi airiso Yekova rogoho.” Kusa, i ayambu Janice na kumbari tipa i mangi sunge biko adungurati. Ho Janice angera ni kusayo, ri aya:  “Yekova aima karagapai kuti gimi akparakpee, ono angianga ngba gu gene mi aaberãpa ha ngbaha ya. Si aima dia re na gbanga regbo mi rugutire na gupai nga agu akaragapai Yekova afuhe angia bawene gamahe. Mi na bakere tambuahe nga mi adu na gi momu re.”

15. Tipagine si naima rengba ka ida ti ni ti kura aregbo ka zanga pe kina boro pa wai ani aida i karagapai kuti gaani akparakpee? (Oni bi asura a.)

¹⁵ Biata sanahe rengbe kadu nga, ‘Ya mo mi rengbe ka manga kparakpee tipa kurapai kia?’ Si ni wenepai ka pe kina boro gupai ani aidaha rogo kparakpee yo. Ono ti kura aregbo, si ima rengba kadu ni wenepai ka zanga pe kina boro pa wai ani aida Yekova karagapai kuti gaani akparakpee, tipa wa ka ani rengbe ka ino gupai Yekova aidaha tipa rani. Oni bingo gu kpiapai nga ga gu nakuparanga naamanga kparakpee tipa ka ndu tipa Gu Sukuru Du Tipa Abatungusipa Kindo. Ri aaida ka ndu tipa gu sukuru re tipa wa ka ri du na rengba ka mangasunge rogo gu ba du na bakere zingo abatungusipai rogoho. Sidu, wa ri nikaa ndu kumbatayo kindi kaa manga kparakpee tipa i yambu ri tipa gu sukuru re, ri ima rengba a ka sana Yekova ko undo ri ri inipa kura agene rengbe ri ka kiiso gari sunge tungusapai ngbaha. (Amo. 16:9, 10) Na ri ima rengba ka mangapai kuti gupai ri amanga kparakpee tipaha ni sana ri babi adungurati singia dungurati ho mbembedi nga gu naida na dungu abazakigene. Watadu ri ima rengba ka ke waraga fu be-basunge tipa ka sanahe tipa gu ba si aida na dungu abatungusipa Kindo rogoho. e

16. Ginipai rengbe ani kadu na kido tipaha?

¹⁶ A wa ani nawirikihe, ani ima rengba kadu na gu kido nga Yekova nika karagapai akaraga kuti gaani akparakpee ngba gu gene nga ga nyemuse na si kidu ni ruruhe. (Tam. 4:3; Yes. 30:18) Ti kura aregbo, ani ima rengba ka zanga gbia gu karagapai ani amaabangirani tipaha. Ono Yekova ambunga degatuko kuti gaani akparakpee te. Ko ima kpinyemu rani ni bakerehe. Na ko ambunga rani te. (Tam. 9:10) Oni naandu kindi kumbatayo kaa ‘kída kuti ko na arago dunduko,’ kini uka kpotoroni yo fuko rogo kparakpee yo.​—Tam. 62:8.