1. Ginipai du nyemuhe rogoraniyo dunduko, na si nakoda ginipai?

WAI du mo nidu ho bangiri gu boro mo naini ni na kini irisi ni ago ni ti rimoro watadu, gu gberẽ agberã gbe nga ho ni ainongo ro ni ya? Gipai re ima rengba ka ye na gberãrago kuti boro. Tipagine? Si wo mbiko gupai nga ani dunduko ni basasa na nyemu gupai rogoraniyo nga aboro ini rani. Anga gupai gbua du ani na nyemuhe nga aboro ini rani te; ani naida gupai a nga aboro ini gini ngbatunga aboro nga ani gbiati agu apai ani namangihe.​—Geda 11:16; Eyo. 31:6.

2, 3. Wai du rengbe nyemu gupai nga aboro ini rani kada ni irairaha? (Oni bi gu sura duti tonatonaha.)

² Ono tie, wakina gu kura apai du nyemuhe rogoraniyo, gu nyemupai du ani na ni tipa aboro ini rani ima rengba kada ni irairaha mbiko gaani zangarengba. Si ima rengba ka sarani ani du na nyemu gupai nga aboro ini rani rogo gu gene arẽnga ya. Ga Satana zegino nasa aboro i du na nyemu gupai nga rimoyo naawo na aboro iniyo, na si kini gbeberã aboro kusayo ti gu boro nzunzu rẽ tipa aboro ini ni na kini fu iriso funi, nga gu Barani du ngbangbaturũ yo nga Yekova Mbori.​—Yugo. 4:11.

 ³ Ti rago Yesu, gu gene kura abarumbatayo rogo pambori aaida aboro iniyo ngbaha adu ni irairaha. Yesu afu zahe fu apefuoko ki ya: “Oni bánda tironi be abakeapai, nga agu yo nakpi nyemu ka ata na gbanga remu, ki nikpi nyemu aboro poi kuti yo bangbeahe yo, ki nikpi nyemu ambata irisa rogo abambutiria yo, na bairisa kporo pumbo yo.” Ko ape gupai berewe nga: “I ambusa yo ambusa bakere.” (Rk. 20:46, 47) Ono tie, Yesu atambua rungorungo dekurugbo nga guri si aangera wa ka i ya aboro aainongo pa gu gari tooni gamahe ri afuhe te. (Rk. 21:1-4) Ga Yesu bipai tipa ino boro adu ziazia gbe kia ti ga kura aboro. Gi kekeapai re nika undo rani ani du na ruru bipai, nga gu bipai Yekova Mbori aida na ni.

4. Da duhe ni wenepai kisusi ni ini rani, na tipagine?

⁴ Gini ngbatunga ino boro ngba kisusi si aida ani mangi bakere asadatise tipaha? Anga si nga gu ngbatunga ino boro aboro aida i ini yo mbiko bakere wirikapai, diabese rogo sunge bagaahe yo gbiati ino ngi mbaro te. Kuba gure, si nga gu ino boro Pauro asakipai tipaha furani ho ko aya ni wẽ: ‘Awere oni naye ki ini Mbori. Mbori naini roni kina ha dũ, wiri oni pa sa tironi berewe wãi fu gu kungba tata apai adu nga na ome ya, nga gu oni akpi nyemu ka du ni akanga fu he berewe?’ (Gara. 4:9) Nairiwo gu bawene pa momu ngaha kadu ni agu aboro ‘Mbori naini yo,’ nga gu Bakerepa Bazogo nga ga zegino dũ. Ko na nyemu kadu na mbembedi pagume na ani. A wa kura wene bawirikipai sa agumbaha, ani “nada ni agu aboro ko aberã payo gbe.” Ho Yekova aino rani ni ni abakureako, gure nga ani ima gbia ndu gupai ani araka ti ni, bambiko ko akusi rani ani du ni abakureako.​—Batu. 12:13, 14.

5. Wai du rengbe ani ka sa gupai nga Mbori ini rani?

⁵ Moize aima gbia ngbatunga gu maku re. Ho ko azungodi Yekova ni nga ko mbugene fuko tipa ko ini Gako agene wenengai gbe, Yekova akaragapai fuko ki ya: “Mi amánga kina gu pai re gumba mo ho; bambiko mo ngba bangire, mi ini ro ti rimoro.” (Gate 33:12-17) Wakina gure a, ani ima rengba ka gbia bawene amaku ho Yekova aino rani ni basasa. Ono wai du rengbe ani ka sa gupai nga Yekova ini rani? Ani rengbe ka mangaha ni kpi ani nyemu ko na ki kpara gaani raka fuko.​—Oni gedi 1 AKorindo 8:3.

6, 7. Ginipai rengbe ka sarani ani zanga gaani pagume na Yekova?

⁶ Ono tie, si naida ani banda gaani pagume na gu Barani du ngbangbaturũ yo nga gu du na nyanyakipaha. Wakina agu aKristano naadu Garatia yo nga aguyo Pauro akepai fuyo, si naida ani ne du ni akanga fu gu “kungba tata apai adu nga na ome ya” nga ga gi zegino re, kodihe na gbata taarimo rogoho. (Gara. 4:9) Agu aKristano naadu rogo bambata sa kama agarã aima manga sonakumbatayo ki dati gupai nga Mbori ini yo. Ono tie, Pauro ape gupai nga agu awirina re ‘asa tiyo berewe’ fuo kungba tata apai. Gure wa ka i ya Pauro aaya fuyo wẽ: “Wa oni naima ye ki da ane, tipagine oni akaraga tironi ti ni berewe sa gu kungboapai adunga sunge ti ni ya oni aima mbuhe ni giironi?”

⁷ Ya mo ngbatungapai wa gure rengbe ka manga rani areme? Ii, si ima rengba ka manga rani. Ho ani aini Yekova ni, si rengbe kadu nga ani aima mbupa gu worimo du rogo ga Satana zegino wakina Pauro. (Oni gedi AFiripoio 3:7, 8.) Si ima rengba kadu nga ani aima mbupa bakere wirikapai, wene sunge marã, watadu amomu nga ga manga bakere marã. Si ima rengba kadu nga ani adu na tandu ta bia watadu ngimbaro nga gu naima rengba sa rani ani du na worimo gbiati kumuko, ono ani ki ima mbupaha dunduko.  (Eb. 11:24-27) Nairiwo wai rengbehe kadu ni pa zanga tatamana ka ani abihe nga ani aima zanga amomu ho ani amangi gu wene adiaberã re ni! Ngbatunga gu berãpai re ima rengba ka sarani ani gbata agu apai ani aima diaberã nga si du dagba gu “kungba tata apai adu nga na ome ya” nga ga gi zegino re. *

8. Ginipai nika nyakasa gu nyemupai du ani na ni tipa Yekova ini rani?

⁸ Wai du rengbe ani ka nyakasa gu nyemupai du ani na ni tipa Yekova ini rani angianga zegino ya? Tipa ka mangaha wo, si naida ani tingidi nyanyakipa arengo ue. Bambataha nga, Yekova naino agu aboro nairisoko ni ruruyo ti aregbo dũ. (Oni gedi AEbere 6:10; 11:6) Ko nabi gako amoyambu dunduko na nyanyakipa yo, na ko nabihe ni “ingapai” ka ko zanga maaberãko fuo agu aboro du ni ruruyo fuko. Yekova ti aregbo dũ ima ‘ino agu aboro nga gako yo.’ (2 Tim. 2:19) Ko “ini ga ruru aboro gene” na ko ima ino wai ka batasa yo be aʹasada.​—Tam. 1:6; 2 Pet. 2:9.

9. Oni funga akpiapai nga gu nayugo wai Yekova nayugu gupai nga ko nabi gako aboro na nyanyakipa payo.

⁹ Ti kura aregbo, Yekova aima yugo gupai rogo kparakpara agene yo nga ko nabi gako aboro na nyanyaki payo gbe. (2 Peka 20:20, 29) Ni kpiapai, oni bingo wai Yekova abatasi gako aboro Zamba Baime yo ho ga Faro nyanyaki riivura aadofuo yo ni. (Gate 14:21-30; Tam. 106:9-11) Gupai re aima iriwo gbe si ki sa gupai nga aboro nifura kindi tipaha rogo gu papara zegino re agarã wa 40 kusa. (Yos. 2:9-11) Nairiwo wai duhe ni pa ngarasaro furani ka tingidipa agu agene Yekova ayugu gako nyemuse gbiati ome ngbaha wa gure wa ani aambeda kuti gu zubohe nga ga Gogo boro Magogo nga gu i aima gumbapaha kumbatayo bakuru kusayo! (Yeze. 38:8-12) Ti gu regbo re, ani nika du na bakere ngbarago nga ani aidi gaani Mbori ini rani angianga zegino ya.

10. Gini kura nyanyakipa rengo si aida ani moihe ku berãrani yo?

¹⁰ Si naida a ani moi gu ue nyanyakipa rengo ku berãrani yo nga: Yekova ima rengba ka yugo gupai nga ko ima ino rani rogo agu agene yo ani arengbanga ka berãpaha ya. Agu aboro namanga weneapai tipa gupai nga aboro biyo na ni, i nape gupai fuyo nga i agbianga mosoro be Yekova te. Tipagine? Bambiko, ho aboro atambuayo ni, gure nga i ima gbia gayo mosoro. (Oni gedi Matayo 6:1-5.) Ono tie, Yesu ape gupai nga agu aboro agbianga taarimo tipa gu weneapai i amangaha fu aboro ya, Bako ‘nabi gayo apai ni gbuko.’ Ko nabi gu gayo mangaapai re na kini fu mosoro fuyo ni basasa dunduko. Ono tie, Yekova nafu mosoro furani rogo agu agene yo ani arengbanga ka berãpaha ya. Ani furanga tipa bete akpiapai.

11. Wai du Yekova afu taarimo fu gu paranga dee nangia Maria?

¹¹ Ho regbo ada ni tipa i vungu wiri Mbori ni boro, Yekova asia ngasu paranga dee naadu na umbasitise rimori angia Maria ri du ni navungu gu kparakpara gude re. Maria aaraka rogo gu umba gbata nangia Nazareta, nga gu naadu tuturũ ti Yerusarema na gaha bawene yekaru. (Oni gedi Ruka 1:26-33.) Tipagine Yekova asia Maria ti ni tipa gi momu re? Gu maraika nga Gaburere ape gupai furi nga ‘Mbori angba na’ ri. Maria ayugupa gari padu wenengai rogo toro yo ho ri afura ni kusa fu gumeri nangia Erizabeta. (Rk. 1:46-55) Nirengo, Yekova aima  digo nibi Maria, na ki fu gu momu furi ri aaberãnga paha ya mbiko gari padu ni ruruse.

12, 13. Rogo gini gene Yesu agbia taarimo ti gu regbo i avunguko na ti gu regbo i andu na ko ku yekaru yo fuo arame 40 kusa?

¹² Ho Maria avungu Yesu ni, Yekova aafunga gu taarimo nga ga inopa vunga ko fu gu nyanyakipa aboro watadu abazogo naadu Yerusarema yo na Betereme yo te. Amaraika akuru fu kungbo ababanda avusende payo aanyakanga ya nga aguyo naabanda gayo avusende nvuoyo kusayo ti Betereme. (Rk. 2:8-14) Agi ababanda akandoro re kini ndu ka bi gu fogogude re. (Rk. 2:15-17) Si nawira gupai nirengo gbe nga rago aima ngba ti aMaria na Yosefa na iriwoapai aima ti tiyo ka bi gupai nga Yesu agbia taarimo rogo ngbatunga gene wa gure! Oni bingo gu kparakparapai du dagba ga Yekova gene mangaapai na ga Bakitingbanga gene mangaapai. Ho Satana akedi abinza akerekuru ni i ndu ka bi Yesu na avunguko, Yerusarema naabaha adu ni fudifudihe mbiko pangbanga vunga Yesu. (Mt. 2:3) Ni sangbana gipai re, dungu rukutu agude akpiki.​—Mt. 2:16.

¹³ Arame biama bawe fuo vungayo Yesu, si aidi gupai nga Maria ndu ka fu motumo fu Yekova yekaru yo Yerusarema yo, nga gu baturõho na Betereme adu wa amairo sita (Akirometere 9). (Rk. 2:22-24) Wa aMaria na Yosefa gbiati Yesu aandu koyo, si ima rengba kadu nga ri aabakabangiiri abaka singia aboromotumo ainopa ga Yesu bangiriba kumbatayo ki fu taarimo fuko. Yesu aima gbia taarimo yo, ono angianga rogo gu gene Maria arengbe ka berãpaha ya. Kuba gure, Yekova amangisunge na kumba nga guko naadu ‘ni ruruko, ki niberẽ ga Mbori pai aberã gbe,’ rimoko angia Simona, gbiati dekurugbo nangia Ana, ni denebi garãri adu nga 84 i takipande gupai nga gi gude re nika da ni gu Masiya watadu Kristo i akidopa ko.​—Rk. 2:25-38.

14. Gini amaku Maria agbiaha be Yekova?

¹⁴ Na Maria tigari? Ya mo Yekova aandu kindi kumbatayo kaa fu taarimo fu Maria tipa pa ngerari fuo Wiriko na ki sonosi ko ngba wene gene? Ii, ko aima mangaha wo. Mbori asa gupai nga i kepa gari mangaapai gbiati afugori rogo Ziazia Kekeapai yo. Si nawira gupai nga, Maria aadunga na rengba kaa ta na Yesu ti regbo gako tungusapai nga gu ko amangihe tipa garã biata na beberehe te. Si rengbe kadu nga Maria anye kina Nazareta yo mbiko gupai nga ri angia dekurugbo. Ono ka si vura du nga ri aima zanga kura dungu amomu, ri adu kinaho ti gu regbo Yesu akpi. (Yo. 19:26) Ono tie, kusa, Maria adu kina Yerusarema yo na kura abawiriki rogo agu aʹuru naambeda kuti Pendekote ti gu regbo ziazia toro azoro kurii abawiriki. (Amo. 1:13, 14) Si nawira gupai gbe nga ri adu kina dagba agu aboro i ambedi yo. Kangia wo du si adu, gure nga ri aima gbia gu momu nga ga du ngbangbaturũ yo na Yesu nyeanye kindi. Nairiwo gu bawene mosoro ngaha re tipa gari wene sunge!

15. Ho Yesu adu ni auru kpotosende ane, wai du Yekova ayugu gupai nga ko nabi ko na nyanyakipa ko gbe?

¹⁵ Yesu aadunga na nyemu ka gbia taarimo be agu abarumbatayo rogo pambori watadu agu abarumbatayo nga ga birĩ zogarago yo naadu ti ragoko te. Ono nairiwo wai si adu ni pa ngarasaro ho Yekova ayugu gupai ni bara biata ti aregbo ni bakiakia nga ko nabi Yesu na nyanyakipa ko gbe ni fura ko fuko ngbangbaturũ yo. Nibasa tingbafuo zio Yesu bapatiza rogo gu di nga Yaradene, Yekova aya: “Wire du re, nyemuko namanga re, ngba ko ti re gbe.” (Mt. 3:17) Si nawira gupai nga Yoane Bafu Bapatiza nangia gu yangara kura boro nagi agu afugo re. Fuo gure, he wa garã sa mbata fu kpi Yesu, gako amokedi biata agi fugo Yekova ko nigumba  gupai tipa Yesu nga: “Wire du re, nyemuko namanga re, ngba ko ti re gbe; oni gí pa ko.” (Mt. 17:5) Ni yangaraha tie, bete auru kusayo mbata fu kpi Yesu, Yekova afura berewe fu gu Wiriko re ngbangbaturũ yo.​—Yo. 12:28.

16, 17. Wai du Yekova afu taarimo fu Yesu rogo gu gene yo ko aaberãnga paha ya?

¹⁶ Wa Yesu avura ino gupai nga ko nika kpi gbegberẽ kpio, i ki kitingbanga ko nga boro gberãngbayo nga ko, ko amangi kparakpee nga gupai Yekova akpinyemuhe mangi angianga gu ko akpinyemuhe ya. (Mt. 26:39, 42) ‘Ko ahi pa wagiwagi ngua ki basa pa gaha zee,’ kini gbata taarimo be Bako angianga be zegino ya. (Eb. 12:2) Wai du Yekova afu gu ngbatunga taarimo re fu Yesu?

¹⁷ Ho Yesu adu ni auru kpotosende, ko ape gupai nga ko naida kadu na gu taarimo ko adu na ni mbata ti gu regbo ko adu na bako ngbangbaturũ yo. (Yo. 17:5) Pai ho nayugo gupai nga ko adu na maabangirise tipa kurapai susi gure te. Ko aadunga na maabangirise tipa gupai nga i “tumbasi” pako berewe ngbangbaturũ yo te. Ono ginipai Yekova amangihe? Ko afu taarimo fu Yesu rogo gu gene yo Yesu aaberãnga paha ya ni zingisako ko ki ‘kiisi pako gbe’ na ki fu guhe fuko kura boro aagbianga mbata ya da kuti gu regbo re, nga gu raka nga ga toro zanga kpio! * (Frp. 2:9; 1 Tim. 6:16) Nairiwo gu bawene mosoro Yesu agbiaha re mbikopa nye ko ni ruruko!

18. Ginipai nika undo rani ani zanga gbata taarimo rogo gi zegino re?

¹⁸ Ginipai nika undo rani ka ani gbatanga taarimo rogo gi zegino re ya? Si naida ani moi gupai ku berãrani yo nga Yekova nabi gako ruru amoyambu na nyanyakipa yo kini fu mosoro fuyo ti aregbo dũ na ko nafu mosoro fuyo dedede rogo agu agene yo i aberãnga paha ya. Da inipa agu amaku ani aberãnga paha ya napido rani kumbatayo? Ono wadu rago re tie, wa ani kaa hi agu akpakarapai na aʹasada nga ga gi gbegberẽ zegino re, si naida ani naatingida gupai ti aregbo dũ nga gi zegino re na ai gu taarimo si narengbe ka fuhe nago ago kusayo. (1 Yo. 2:17) Barani du ngbangbaturũ yo nga Yekova, ‘ni iraira ko ka bangiriko go ti gaani sunge, na ti gu nyemuse ani ayugoho ti rimoko te.’ (Eb. 6:10) Nirengo, ko nika fu taarimo afu furani, isoke rogo agu agene yo ani arengbanga ka berã paha ya!