SI ANGIA tonatona kitö nga ga gu garã nangia 1970. Mi api rii ba rogo kura bambungua sa Amerika yo. Gu kumba naangerafuo aborokaza anaawisigo re tingbafuo aminiti 30 tipa ka bi bakio wai kure aora ti genehe. Mi angia gu banzengere garãre adu nga 20 mi aawoka be kere kaza. Gu kumba naangerafuo aborokaza re nga gu ko garãko akii ti gimi tooni ko adu rogo bakabangirise. Ho bete kaza atona ka zereda ni mi aya, “Mo aabingo boro mbata ni nakpi te nga wo te?” Kpakpuko yo aima ariatihe, na ko aya, “Oó, mi aabingo ni te.”

Ti gu regbo re, mi aainongo ginipai nika du tipa gi raka kumbatayo te. Ono ginipai nasa re mi du bambungua yo? Sidu, mi naida ka penga bete gu pangbanga foro du tipa gimi raka.

Mi ati na kaza ho mi aamangasunge ni ba gba aboro yo ti regbo gu vura nangia ga aVietnam. Mi aagbia ngbarago ti undo aborokaza gbiati agu aboro okõ na kidu na gu sasa nga ga da ni gu munganga nagba aborokaza. Mi ada Vietnam yo rogo Bamburu 1969. Wakina gu vovo aboro dunduko nanaaye, i ambu poso fere sa tipa mi inidi tire na wai du rago na wai apai amanga wa ka mi rengbe ka gu inido tire na gu saa nga ga gu rago re gbiati gu kere faarago nadu yo.

Nibasa tifuo mi ndu tipa sunge ku rogo gu ba i anaahusa aboro kaza rogoho, dungu atiara vura nga gu nahi be agu aboro okõ ada. Mi aima kpinyemu songoda agu apai nga ga birĩ-zogarago na mi aima kpinyemu mangasunge, sidu, mi aidi ka rimo sunge nibasa. I anaambakada agu aboro na okõ na ki oro nayo ku rogo gu wiri tooni bambu i ambakadihe rogo marã yo ni ba gba aborokaza nga gu nadu na guhe rogoho napida yuge. Yo nga ha re, munganga adu yo nga gu ko nagba aborokaza, gu boro narũ boro na zeresi, gu boro nagiriso oro, gbiati gu kura boro nga gu ni nata kaa ngerafuo aborokaza, i adunguratiyo dunduko ku rogo wiri fitikiri ba tipa kaa manga ome ka batasa raka aboro. Mi abi gupai nga gu kura atindiro adu kinaho rogo kikindigi bibiri amangu nga gu i aazoganga ha rogo atiara ya. I aya fere wẽ agu amangu re na agu abarapa aboro rogoho nga gu nakafu tingba vura yo. Wo du mi ainidi tire na agu apai nga ga vura.

Ho mi adu ni ni paranga boro, mi aima inido tire tooni na agu arengo aDezire Yekova aayugoho. Nina anaawirika Baibiri na aDezire Yekova, ono ri aamanganga sonakumbatayo ki da ti zio bapatiza te. Mi aima kpinyemu sungo pati ga nina wirika Baibiri. Ti kina gu bangisa regbo re, mi aasusa pati Bambu Kindo ani na kumbaku nina. Mi asanako nga, “Gini ba tigaha nga gu du yo re?” Ko akaragapai nga, “Ka mo aambedinga na agu aboro re ya!” Mi adi gako rugute kugume mbiko mi aima kpinyemu kumbaku nina na kidu na kido kutiko. Sidu, mi aambedanga berewe na aDezire Yekova te.

Tingbafuo mi yego Vietnam yo, mi abihe nga mi naida aida na Mbori rogo gimi raka yo. Berãpa gu kere apai namangi aima du na maapai kurire berãre yo. Si aangera wa boro ho narugu ti ni na gupai nzunzu naamanga Vietnam yo te. Mi natingidapa agu aboro nakuru ku bangiri gene ka yugo gayo gberãrago i aayamba agu abanzengere nga ga Amerika yo nga aimi rukutu agude mbiko agu apangbanga i aagiaha nga i nayepa goro rukutu agude yo ti regbo vura.

Tipa ka mbiisa gu gimi gomoro nga ga toro, mi atona ndu tipa irisombori ku rogo akanisa ni bakiakia. Mi aima digo nidu na nyemu Mbori ti aregbo dũ ono rago aangbanga tire na agu apai mi abihe rogo akanisa te. Ni yangaraha, mi andu ku rogo gu ga aDezire Yekova Bambu Kindo nadu Delray Beach, Florida yo. Rago Poso du nadu rogo Wegebe 1971.

Ho mi arimi ni, gu gumbapai du tipa aboro dũ aambeda ka nyasa, sidu, mi asungu tipa wisigo Ngbaõbambu Sinziri nga gu nangbefuo ho. Mi atingidanga pa gu riipai i aawisigo ho te, ono mi natingidapa wai kindi rukutu agude aazara gayo aBaibiri tipa ka biko averesi. Gupai re nzunzu aima zeresa ngbare! Mi asungu zaa kini degeture na ki nibi gupai naasusa. Ho mi aguari ni Bambu Kindo yo ka ga, gu kura wirina garãko adu wa 80 aye fuo re. Rimoko angia Jim Gardner. Ko azadi buku ngbabeko kekepai adu ti ni nga The Truth That Leads to Eternal Life na ko asanahe nga, “Ya mo mo naida na gi buku re?” Ani amangi mbakadapai tipa ka tona gaani bambata wirika Baibiri Rago Biama wiso.

Mi adu na sunge rogo gu yuru nangia ga Rago Poso re. I adi re tipa sunge rogo gu bambungua nadu Boca Raton, Florida yo, mi aamangasunge yo rogo gu bambu nga ga tunguatungua akaza. Mi anaatona sunge sa bawe na sa nga ga yuru ki da kuti sa saba nga ga wiso. Wadu he nga yuru du nadu rago aniongo aonga kii, mi adu na rengba ka geda gu buku nga the Truth. Gu dee naangera kurii agu aboro nangera fuo aborokaza aye fuo re na ki gbe gu buku re bere, ri abi kpotoho na ki tangbari nga, “Mo adanga ni Dezire Yekova te, nga wo te?” Mi agbe gi buku i ayambaha nga Truth beri na ki ya, “Mi gidihe gbua ki da beberehe, na si nangera wa mi nika daada ni Dezire Yekova!” Ri aguari patire na mi anyasi geda gu buku re rogo gu yuru re.

Mi atona gi bambata wirika Baibiri na Wiriba Gardner nisana mi ko na gu sanahe nga, “Sidu, ginihe tie ani nika wirikaha?” Ko akaragapai nga, “Gu buku nga gu mi afuhe foro re.” Mi aya fuko we, “Mi ima gedaha dunduko.” Wiriba Gardner akaragapai zezeredi ki ya, “Si wenengai, ani bingo kina gu bambata kapita re.” Kina ngbare nazere ka bi gu badungu apai mi awirikihe nga gu mi aainongo ho ya ti gu regbo mi agedihe nisare. Ko asa re mi gedi dungu averesi rogo gimi Baibiri nga King James Version. Niyangaraha, mi aawirikapai tipa ndikidi Mbori nga Yekova. Wiriba Gardner nga gu ko mi akpinyemuko kini yambu ko nga Jim, awisigi akapita biata nga ga gu buku nga the Truth na mi rogo gu wiso re. Fuo gure, aRago aBiama wiso dunduko ani anaawisigo akapita ni babiata. Mi anaagbia ngbarago ni bakerehe gbe ti agu awisigopai re. Si aima du ni bakere pa momu fere gu mbedimbedi wirina nga gu ko naima ino Charles T. Russell yugupai fere!

Tingbafuo bete aposo, i aidihe fere mi da ni batungusi wene pangbanga. Jim aima undo re na gu badungu abakabangirise mi adu na ni, kodihe na gu kpakarapai nga ga tungusapai kporo na kporo. (Amokedi 20:20) Wa ani aamangasunge tungusapai wa sa na Jim, mi aima ye ka gbia bakere ngbarago ti sunge tungusapai. Mi nabi sunge tungusapai kindi ni gu bakere pa momu du bere. Nga gu bakere pangbarago ka du ni ga Yekova badiasunge!—1 Koro 3:9.

Awere, mi naida ka penga pa gimi bambata nyemuse tipa Yekova furoni. (Yugo. 2:4) Gu nyemuse tipa Yekova re aundo re mi so vura kuti tingidapa gu kere gbegberẽ apai namangi ti regbo vura gbiati ti gu kura aasada.—Yes. 65:17.

Mi natingidapa gu nyanyakipa uru nadu rogo 1971. I ado re barambeda ti gu regbo re rogo gu ba mi aaraka rogoho na avungure kusayo. Kumbaku nina aaidanga gu boro nga Dezire Yekova kpuko yo te! Marã aakiongo bere ti gu regbo re te. Gu bambungua mi aamangasunge rogo yo aatumo re tingbafuo aposo ue dunduko, na mi aima gbarasa bakere marã gbe kuti ngbeka aroko tipa wa ka mi rengbe ka mangasunge tungusapai na kini ngere wenengai wa gu boro naru kuba Yekova. Bete Marã adu kinaho mi anaaigoru, ono si adu beenge yo Michigan yo rogo gu gbata mi asono rogoho. Sidu, si aidi mi niira zagiyo rogo gimi tarambiri tipa bete a’uru. Mi anaakpe rire na kini mbidi ime rogo agu abambu agino nadu babaga giazi yo.

Rogo kura uru sa ti gu regbo mi aaraka rogo gimi tarambiri, mi ada Bambu Kindo yo bete asa mbata fu gu dunguratise nga ga tungusapai tona. Gu regbo re du gu saa mi anaamangasunge kuti ni bambungua yo anyasi ti ni. Ho mi asungu ni gii Bambu Kindo yo rogo gu ba boro aarengbanga ka bire rogoho ya, tingidapa agu apai namangi Vietnam yo—wagu nga, gia fuo kpoto aboro ho i azoyo ni, na bi kure si niiuka bangiri oro yo atona ka du na bakere maapai kurire. Berãre yo, mi anaagia na kini bi paranga akumba i nizungadi re nga, “Ya mo mi abata? Ya mo mi abata abata nzunzu?” Mi aima ino gupai nga i nika kpiakpi, ono mi aasadi ka fu wasa fuyo wa omere arengbe na ni zanga pe gu rengo du ho fuyo. Ho mi asungu ni yo, nunga gipai re aima zio re nikerehe.

Ho mi aamanga kparakpee ni, kina aume naa uka kpakpure yo. (Tam. 56:8) Mi atona ka berã dudunguro tipa gu maabangirise nga ga zingabekpio. Fuo gure , mi ada kuti gupai nga: Vurube zingabekpio, Yekova Mbori nika nyasa riipa gu kere imo aboro mi abihe gbiati gu imisiri si naye na ni fere gbiati gu kura aboro. Mbori nika zingisa gu paranga akumba re azingisa be kpio, na i nika du na gu momu nga ga wirika rengo tipa pa Mbori. (Amokedi 24:15) Tigu regbo re, kpotoreyo ahi be nyemuse tipa Yekova na gu nyemuse re aima du na bakere maapai kurire gbe. Gu uru re aima nye ni nyanyakipa uru fere. Natona ti gu regbo re ka ndu kumbatayo, mi namanga ai gupai rengbe omere na ni, gu susi gbe nga ho mi anduni rogo akpakarapai, mi aidanga bangire go ti gi bambata nyemuse tipa Yekova te.

Aboro naamanga kere apai ba vura yo. Kinawo mi anidu a. Ono mi agbia undo ni berã mi kurii agu averesi ue ni ngbaangba tire gbe. Bambataha nga Yugoti 12:10, 11, nga gu naya wẽ ani adianga be Bakitingbanga sa kina mbiko gupai ani agumbaha ni dezire te ono ani nadia adia beko a mbiko gu kure nga ga Wiri Kandoro. Ue he nga AGaratio 2:20. Rogo gu veresi re mi ima ino gupai nga Kristo Yesu akpi ‘tipa re.’ Yekova nabi re rogo gu kure yo nga ga Yesu, na Ko ima mbupai fere ti agu apai mi namangihe. Pa ino mi gi rengo re ima undo re mi du na gigiri sangbakpotoreyo na si ki fõ re mi mangi ome wa rengbe ome re na ni ka undo kura aboro i ye ka ino gu rengo du tipa gaani Mbori inapai nga Yekova!—Eb. 9:14.

Ho mi angerani kusayo rogo gimi raka yo, mi na bakere tambuahe fu Yekova tipa wai ko nangere fuo re ti aregbo dũ. Ni kpiapai, ni gu uru Jim aini gupai nga mi naraka rogo gimi tarambiri, ko apepa re fu gu wirina ni dee nadu na kporo beri na dungu arogoyo. Mi aima ida kuti gupai nzunzu nga Yekova amangisunge na Jim gbiati gu wene wirina ni dee re tipa ka fu ba fere mi ni sungu rogoyo. Yekova nga boro weneringise! Ko nangera angera fuo ruru airisiko.

Rogo Merekoko 1971, si aidi gupai nga mi ga ku Michigan yo ka ngerafuo kura sunge bagaahe nadu yo. Mbata fu mi guari rogo gu dungurati nga Delray Beach nadu Florida yo, mi ahiisi mburu gi tarambiri yo na awaraga, fuoho, mi ki tona nduge ku nodiyo rogo gu gene naakura rogo arago wa agbata 75. Mbata fu mi guari rogo gu dagbarago nga ga Georgia, agu awaraga nadu rogo gimi tarambiri aima nyasa. Mi anaatungusa wene pangbanga nga ga Kindo zaaza rogo ai ngbatunga ba. Mi anaaru pati abambukiso kini fuku atrakte fu agu akumba nanaasungo rogo aba ongoda. Da kuti gi regbo re, mi ainongo ho singia agu atunga mi amihe re akuru ki sono te.—1 Kor. 3:6, 7.

Ono tie, mi naida ka pe gupai nga, ho mi awiriki rengo awirika ni, mi anaatungusa nga pai na birĩ te, gbe ho mi anaafura ni fu mbembedi agumere. Bambiko gupai nga gi bambata nyemuse tipa Yekova aakiaki rogore yo gbe wa we, mi adu na wingbaduse ka tungusapai fuyo, ono mi anaatungusapai nga kpadio zanga birĩ. Mi aima kpinyemu aunvurami nga John gbiati Ron ni bakerehe gbe, na mi aasadi ka tungusapai fuyo ngbaome. Ono kusa, mi aye ka hõmbupai tipa gu gene mi amangipai ngbaha. Ono wa si avura du yo, mi aamanga kparakpee kindi tipa yo tipa pa i idi rengo. Natona ti gu regbo re ka ndu kumbatayo, Yekova aima yugopai fere, na mi namangapai na birĩ ho mi atungusapai ni na kini yugupai.—Koro. 4:6.

Ho mi atingidapa gi nyemuse ni tipa Yekova, bangire agonga a ti gu kura aboro mi nakpinyemuyo rogo gi raka yo te. Gu kura boro mi nakpinyemu ni nga diare nga Susan. Mi aima ino gupai nga mi naida badiarogatise aida nga gu ni nika undo re tingba mangasunge Kindo. Susan nga gu dee naima nyaka rogo toroyo. Mi natingida gupai atingida nga rogo kura uru sa mi andu ka bi ri ho ani aambakada pa rogotise ni. Susan asungu pangbadimo ga avunguri bambu, Cranston Rhode Island yo. Ri aageda Ngbaõbambu Sinziri wa sa na gari Baibiri. Gupai nangba angba tire gbe nga, ri aageda gu kura kekeapai ni du vuru Ngbaõbambu Sinziri yo na kini gedi agu averesi nadu yo. Mi aberẽ gupai nga, ‘Gu dee re ima nyaka rogo toro yo!’ Ani amangi rogatise rogo Banduru 1971, na mi na bakere ngbarago nga, natona kina ti gu regbo re, ri aima ka kuti re na kini songodi re. Gupai ngba angba tire gbe tipa ri nga, wa vura duhe nga ri ima kpinyemure, ri ima kpinyemu Yekova kisusi.

Gu maku Susan gbiati re agbiaha nga ani avungu agude ue nga, Jesse gbiati Paul. Wa i aasona, Yekova adu na kina yo. (1 Sam. 3:19) Mbiko wa i asa rengo ni gayo, i asa Susan gbiati re ani du na bakere ngbarago. I nandu kindi kumbatayo kaa iriso Yekova bambiko i natingida pa gayo bambata nyemuse tipa ko. I dunduko naima du tingba mangasunge Kindo ti aregbo dũ susi agarã 20. Berewe a, mi na bakere ngbarago tipa adia awire ue nga Stephanie na Racquel nga aguyo mi abiyo wa ndikidi awire ni adegude. Awiri ue dunduko narogo agu adee naima nyaka rogo toro yo nga agu yo naima kpinyemu Yekova Mbori na kpotoyo yo dũ na mbisimo yo dũ.—Ef. 6:6.

Tingbafuo gi bapatiza, mi amangisunge tipa agarã 16 rogo gu ba nga Rhode Island, mi asonosi wene abakure yo nadu na nyanyaki payo. Mi natingida pa gu wene badungu apai atingida nga ga agu abaakumba nadu ni wene kpiapai ani anaamangasunge sa na yo. Kurii gure, mi na bakere tambuahe fu agu ababiapai ninaata ata nga agu yo ka mi agedanga yo ya naima du na bakere maapai kurire. Nga gu bakerepa momu tipa ka mangasunge wasa na agu akumba naima bandapa gayo bambata nyemuse tipa Yekova! Rogo 1987, ani aga ku North Carolina yo tipa ka mangasunge rogo gu ba du na bakere zingo rogoho, na ani asonosi gu kura nyanyakipa abakure a yo. *

Rogo Buza 2002, Susan gbiati re aidi gu yambahe nga gu nadu tipa ka da ni papara agu avuru Betere nga ga Patterson nadu Amerika yo. Mi aamangasunge rogo gu Rondo Nga ga Sunge Tungusapai, na Susan kini mangisunge bazunda aroko yo. Ri aima kpinyemu mangasunge yo! Fuo gure, rogo 2005, mi agbia gu momu nga ga mangasunge ni Boro Riigbu Bipasunge. Mi aabitire nga mi arẽnga na gu sunge re te. Diare aima du rogo bakere bakabangirise na berãpa agu asunge si nika ye na ni gbiati agu ata si akodaha. Ta na tiara nga gupai nanaangbanga ti Susan ya, ono si aidi ani ta ni bakerehe gbe na tiara! Susan ape gupai nga, gu wene afugo ngarasaro gu kura adia agu awirina naamangasunge rogo Riigbu Bipasunge afuhe furi ni nyemuse aima undori ri diberã kaa songoda re wa omeri arengbe na ni. Ri ima mangaha wo nirengo, na mi ima kpinyemuri tipa gupai re.

Rogo gi basunge, mi na badungu asura nga gu ke re ake kirikiri du na nyanyakipaha fere! Si natingida re na pa gu wene raka mi nagbia ngbarago ti ni. Mi ima gbia wene amosoro tipa manga mi bakere asadatise tipa ka tingida pa gi mi bambata nyemuse tipa Yekova!