Mi aima kpinyemu kusikusiahe mbure kindi ni gude. Gimi aborokporo anaagbia ngbarago ti ndu kaa biko bawene wene abure gbiati gu wene angirimo du pati gaani gbata nga Jyväskylä, du Central Finland yo. Mi nga gu boro a naima kpinyemu anya. Ho mi adu ni kindi ni gude, mi anaida kaa dungo agu apusu gbiati ango dunduko mi anaabi ra! Ono ho mi asono ni, rago anaagberã tire ka bi gu gene aboro anaarungosi anya ngbaha dedede. Tifuo bete regbo, mi arimi gu riigbu du tipa banda gu rengo nga ga anya, yo mi agbia agu aboro ni nakpinyemu anya wa kina re.

Ani anaamanga tua tipa gu rengo nga ga anya. Ani akparaka atingidapai na ki ndu ka yugo gaani gberãrago rogo agu aba i abaga mange anya rogoho gbiati agu aba i amanga kasifu tira rogoho. Ani akusi kura vovo riigbu du tipa banda anya. Mbiko gu nyanyaki diandue ani amangihe tipa ka manga gi ariapai re, ani adu dedede rogo kpakarapai yo be agbia-ngbi. I azire na ki ndu na mi ku ngbanga yo bara dunguhe.

Kurii gu bakabangirise mi adu na ni tipa anya, mi adu berewe na gberãrago mbiko gu kura kpakaraapai namanga rogo zegino. Ni yangaraha, mi aye ka rimiso tire kurogo dungu ariigbu kodihe na Amnesty International gbiati Greenpeace. Mi afu tire na omere dunduko ka songoda agu apai i amangaha. Mi anafu tire ka undo rungorungo aboro, agu aboro du rogo kere gomoro, na kini songodi gu rengo nga ga agu aboro adunga gene beyo ya.

Ono tie, yeeye, mi aye ka ino gupai nga mi aarengbanga ka manga ariapai rogo zegino te. Wa vura duhe nga agu ariigbu re aima rengba ka mbakada bete akpakarapai, ome kikindigi apai aagberã kina kumbatayo. Si adu wa ka i ya ome gbegberẽ apai adu na ome kurii zegino naabaha na boro ho naberã pa mangapai kuti ni te. Mi abi tire nga ome re ima nyasa.

Pa du mi na bakere gberãrago mbiko gupai nga mi aarengbanga ka undo te, asa re mi tona ka berãpa Mbori gbiati Baibiri. Mi aima wirika Baibiri mbata kusayo na aDezire Yekova. Wa vura duhe nga mi aima ino gupai nga aDezire Yekova nga wene sino aboro na i aima yugo gupai fere nga i ima kpinyemu re, mi aadunga nga regerege ka aria gu gene raka mi aaraka ngbaha te. Bara gere, apai adu kia.

Mi adi gimi Baibiri na ki tona ka gedaha. Si aima fu bakere wasa fere. Mi abi badungu apangbanga rogo Baibiri nga gu nayugo wai furani si aida ani mangipai na anya ngba wene gene. Ni kpiapai, Asanza 12:10 naya, “ruru boro naberã pa gani nya.” Mi aye ka ino gupai a nga anga Mbori du naye na agu akpakarapai du rogo zegino te. Kuba gure, gaani akpakarapai nakio na kini gberẽ kina kumbatayo mbiko aboro apekanga fuo gako arugapai te. Ho mi awiriki pa ga Yekova nyemuse ni na gako gbanga hipai si aima zio kpotore yo.—Atambuahe103:8-14.

Bara ti gu regbo re, mi abi kekeapai rogo gu buku nga Gini Apai Nzunzu Ziazia Kekeapai Ayugoho? nga gu naya i atumongo tipaha te, fuani mi ki sanahe tipaha. Na fuoho aima nga te aDezire Yekova ni arogotise ki ye ku kpure yo tipa ka wirika Baibiri na mi nga gu mi aima idaha. Mi atona ka ndu a tipa agu adunguratise nga ga aKristano ku Bambu Kindo yo. Ni sangbana gipai re, gu rengo nga ga Baibiri atona ka rimo ku kpotore yo.

Mbiko gu undo nga ga Baibiri, mi adu na rengba ka manga bakere ariapai. Mi ambu vugundö gbiati bakere mbirabuda. Mi atona ka mbakada tire wenengai na ki mbu gbegberẽ afugo. Na mi aaria gu bipai mi adu nani tipa agbiangbi. (ARomo 13:1) Na mi ambu gu gi gbegberẽ gene raka mi aarakaha nga gu mi aima kpinyemuhe gbe.

Gupai nanyaki fere mi mangi ariapai rogoho nga ka sonosa ruru bipai tipa gu riigbu nabi pa gu rengo nga ga anya. Gi ariapai re amanganga wa ikpirogumba te. Ti bambataha, mi abi gupai nga si nika du wa ka i ya mi nasamungu kuti gu riigbu nga gu nabi pa gu rengo nga ga anya ka mi mbu gu sunge re. Ono tie, mi aye ka ino gupai nga kina ga Mbori Kindo sa nga gu ndikidi maabangirise nika manga ariapai rogo gi gaani zegino re. Mi ima diaberã ka fu tire na omere du ka songoda gu Kindo re na ka undo kura aboro i wirikipai tipaha.—Matayo 6:33.

Wa mi angia gu boro naida ka manga ariapai, mi anaakparaka aboro kurogo abadona ue ni kina ipo—nga weneyo na gbegberẽ yo—na mi aima du nga regerege ka manga gbegberẽ fu agu aboro mi anaabiyo ni gbegberẽ aboro. Mbiko gu undo nga ga Baibiri, mi adunga berewe na gbegberẽ sogote rogore yo kuti kura aboro te. Kuba gure, mi naasada ka sonosa gu nyemuse nga ga aKristano fu aboro dunduko. (Matayo 5:44) Gene sa dagba agu agene yo mi ayugo gi nyemuse re ngbaha, nga ka tungusa wene pangbanga tipa ga Mbori Kindo. Mi na ngbarago ka bi wai gi bawene sunge re afu bee sa zereda na ngbarago gbiati ndikidi maabangirise fu aboro.

Mi ima gbia zereda nga ga berãseyo nimbu mi apai ku be Yekova yo. Mi ima ida kuti gupai nga, wa du ko ni Bakusiahe, ko ambunga anya gbiati aboro i nirungosi yo nyeanye kindi te. Kuba gure, vurube gako Kindo, i nika mbakada agu apai dunduko i nagberesi he barambeda. (Yesaya 11:1-9) Si nafu bakere ngbarago fere angianga ka ino kina agu arengo dunduko nika manga ya ono ka undo kura aboro a i moi gayo idapase kuti ni. Mi abingo ho berewe nga si naida mi mangi ariapai rogo zegino te.