Mo moingo kpia gu undo ku berãro yo ka aboro gbiaha ka si du nga zogarago nika du sa tipa zegino dunduko. Areme dungu aboro nambu mbiko i nga airarungo, aguyo kidu nga airakumuko. Ono gu zogarago du na nunga aboro nabihe nga agu ahe aboro aidaha kina beyo. Ya mo mo na berãha nga regbo aduho wiri aboro ni ka kusa gu ngbatunga zogarago re?​—Mo gedi Yeremaya 10:23.

Kuru apangbanga nayugoho nga, azogarago aadunga na diabese nibipa ngerafuo aboro te, gu susi asusa gbe nga rungorungo aboro. Kura azogarago narungosi aboro. (Batungusipai 4:1; 8:9) Ono gu Mbori Du na Tanduapai Dũ ima kidohe nga ko nika ye na gu zogorago nika diaba azogarago dũ. Gaha Bazogo nika ngera angera fuo aboro.​—Mo gedi Yesaya 11:4; Daniere 2:44.

Yekova Mbori ima sia Wiriko nga Yesu, ko nga wene Bazogo. (Ruka 1:31-33) Ho Yesu adu ni auru kpotosende, ko adu na nyemu ka undo aboro. Wangia ko Bakindo, ko nika koda ngbatunga aboro dunduko na ki di aima tiyo dunduko kusayo.​—Mo gedi Atambuahe 72:8, 12-14.

Ya mo aboro dunduko idi na Yesu ni gayo bazogo? Oó. Ono Yekova na zerangbaduse. (2 Petero 3:9) Ko mbu regbo fu aboro i idi Yesu ni gayo Bazogo. Fuo regbo ngbutuko, Yesu nika nyasariipa gbegberẽ aboro na ki ye na zereda na ngbabase ku auru kpotosende dunduko.​—Mo gedi Mika 4:3, 4.