SUNGE tungusa wene pangbanga nga gu nyanyakipa sunge namanga areme auru kpotosende. Wangia mo ga Yekova moyambu, mo nabihe ni pa irisa kadu dagba agu aboro yo nasa aboro ni abawiriki. Ono tie, mo ima ida kuti gupai nga, abazakigene gbiati abatungusipai naagbiatiyo agbia na akpakarapai tipa kakuti sunge tungusapai zaaza.

Gu kura abatungusipai nabihe ni kpakarapai tipa ka gbia gu boro ka i afura na ni ho i atungusapai ni kporo na kporo. Nirengo, dungu aboro adunga tii kporo ya. Ho i agbia irakporo ni, gani karagapai nadu ni kina gbegberẽhe kuti gu pangbanga nga ga Kindo. Ono tie, kura abatungusipai kinaho ome apai nafu riyo mbiko i na bakere dagbarago nga ga tungusapai beyo na aboro nakaragapai wenengai, ono i nabaka bangiriyo singia i anyasa ha na tungusapai. Na gu kura aboro kinaho rogo dungurati niima tungusapai tipa dungu agarã kisusi wai i aaberãha, na si ki sayo i zere.

Ya mo si naida si iriwo tirani ka bi gupai nga ga Yekova aboro dunduko nagbiatiyo na agu akpakarapai rengbe ka sayo i zere ti sunge tungusapai? Wagu sa te. Ya mo boro ho dagbarani yo du na gu maabangirise nga apai nika duadu taata tipa ka tungusa ga Mbori pangbanga nga ga bata rogo gu zegino “gbegberẽ ko” nga Satana Bakitingbanga namoipai rogoho re?​—1 Yo. 5:19.

Kangia gini ngbatunga kpakarapai du oni agbia tironi na ni tingba sunge tungusa wene pangbanga, oni du na kido nga Yekova nika undo roni aundo oni dibehe. Ginipai tie rengbe oni ka mangaha tipa ka sa gaoni sunge tungusapai si du zaaza? Ani wisigingo bete agi aberãpai du kusende re.

Rogo agarã dunduko, akutu aboro i abapatiza yo ni aDezire Yekova. Ka si du nga mo kpara gamo raka barambeda fu Mbori na ki zi bapatiza, nirengo, mo nika du na ngbarago ka wirikapai be agu aboro ima kuti sunge tungusapai. Na ka si du nga mo ima dia dungu agarã kuti sunge tungusapa Kindo, anga si rẽarẽ na kingia pa maku tipa ka undo gu vovo aboro re te?

Yesu aima ino gupai nga gako abawiriki aaida na rugute tipa i da ni wene abatungusipai, na ko aima yugo wai fuyo si aaida i mangi gi sunge re. (Rk. 8:1)  Areme a, si naida i raba kura aboro araba i da ni wene abatungusipai.

Ka oni berẽnga gupai nga vovo abatungusipai nika gbia birĩ nga ga tungusapai kina gene tungusapai yo ya. Si naida na rabahe be gu bayugupai du na nyemuse. Ngbatunga gu rabahe re nakoda yugo wai rengbe gu vovo batungusipai re ka (1) mbakada tini ka fura na boro, (2) wai ka tona fugo na irakporo, (3) wai kafu waraga, (4) wai ka karaga tini fuo gu boro du na nyemupai re, na (5) wai ka tona wisigo Ziazia Kekeapai na aboro. Si nawira wa wene sangbanapai ima rengba ka kura ka si du nga gu vovo batungusipai re moiberã ni ka wirika gu boro naraba ni re. (Rk. 6:40) Gu vovo batungusipai re nika duadu na ngbarago ka si du nga gu boro re nika degatuni na ki undo ni ka si aidaha. Gu vovo batungusi re nika gbia undo ka si du nga i na tambua ni na kini fu agu aberãpai rengbe ka undo ni.​—Batu. 4:9, 10.

Wa vura duhe nga oni namanga ome tipa ka fura na irakporo ono ka gene adunga ya, ti kura aregbo gu wenepai rengbe ka manga furoni nga gu wene apai oni apekaha dagbaroni gene tungusapai yo. Oni tingidi gupai nga Yesu akedi gako abawiriki “ni ba ue ue” tipa tungusapai. (Rk. 10:1) Pa mangayo sunge kina sa aima rengba ka sayo i zambuasi akurayo na kini ngarasi yo. Sidu, gu regbo oni adiaha ku gene tungusapai yo na akuaroni aidipase nga momu tipa ka fu ‘wasa dagbaroni.’​—Rom. 1:12.

Gini nga bete agu apai rengbe oni kaa fura tipaha? Ya mo weneapai amangingo furoni gene tungusapai yo barambeda? Ya mo oni gbia nga wenepai ti regbo gaoni wisigopai nisase watadu ti regbo wisigopai nga ga aborokporo? Ya mo oni aginga pai ba dunguratise yo nangarasi roni? Ti kura aregbo, gu boro oni atungusapai na ni rengbe kadu nga gu boro oni naatungusanga pai na ni dedede ya. Ya mo mo iningo wai ni aye ku rogo rengo yo? Ginipai nasa ni niidi kuti gupai nga gere nga ga Yekova riigbu? Gini amomu du beni watadu gini apai ni agbianga ti ni na ni? Isoke oni rengbe ka pekapa agu apai oni agbia tironi na ni a funi. Ka oni vura gbiatironi na kina ginipai vurũ gene tungusapai yo, tungusapai na wirina nga momu tipa ‘ka nyakasa tironi dagbaroni.’​—1 Tesa. 5:11.

Ka oni aida ka nye kuti sunge tungusapai zaaza, si naida oni sonosi nyemu wisigopai nisase na ki kpatagara kutini. “Kangara moyambu” nakusa awaraga nga gu nafura tipa apai ni bakiakia.  (Mt. 24:45) Agu apai rengbe mo ka wisigopai tipaha tipa ka ri gu riahe nga toro ima nge. Ani kparianga gu kpiapai rengbe ani ka manga gaani wisigopai nisase tipaha: Tipagine nyakipa sunge tungusapa Kindo ti ni? Oni bi gu sanduki nafura tipa gu nduapai re.

Wisigo oni agu apai du rogo gu sanduki re ima rengba ka fõngbaduroniyo oni tungusipai zaaza. Si adu ni wenepai ka oni moihe ni gupai oni aida ka wisigopai tipaha ka bihe singia nduapai wai rengbe oni ka tangaraha. Fuani tie, oni ki berẽkurii gu nduapai re na agu averesi nasongodaha. Mangaha wo nika saroni oni nye kakaka kuti sunge tungusapai zaaza.

Ga Yekova riigbu dedede nafu agu aberãpai rengbe ka undo rani ani mbakadi gaani gene tungusapai. Ni kpiapai, kupati tungusapai kporo na kporo, ani ima rengba ka tungusapai ni keka ani awaraga, rogo terefuni, bangirini agene na agu aba du na dungu aboro gbiati gu tungusapai adunga kuti arugute he ya na rogo ababagaahe. Ani ima rengba ka mbakada gaani apai tipa ka tungusapai rogo gu dagbarago i atungusanga pai rogoho dedede ya.

Ya mo oni nadia agi aberãpai re kugume? Ya mo oni aasadingo ka mangasunge na agu aberãpai re? Dungu agu aboro asadihe ima du na ngbarago be gu sangbanapai i agbiaha. Oni bingo agi akpiapai re.

Bambata kpiapai nakodapa mangasunge na gu berãpai naye rogo Gaani Sunge Nga ga Kindo tipa wai ka tona wisigo Ziazia Kekeapai na boro. Si asa wirinarani du rimori nga April ri sana gari abadiasunge biata tipa ka tona wisigo Ziazia Kekeapai  na yo. Kina ngbari naazere ho i aidipa wisigo Ziazia Kekeapai ni na ki tona ye tipa gaani adunguratise.

Gu ue kpiapai nabipa kparaka gaani amagazini. I nangarasa rani dedede ani gbata agu aboro rengbe kura kekeapai rogo gaani awaraga ka ngbatiyo. Babi adungurati sa Amerika yo ape gupai nga ko afu gu Awake! naafura tipa ndu atarambiri fu agu aboro naangera kuriipa baga ndu atarambiri rogo gu dagba rago re. Ko gbiati diako akparaka gu magazini naadu na gu kekeapai naya “Understanding Your Doctor” fu amunganga bangeyo aima susa 100 rogo gayo dagbarago. Ko aya: “Gipai re aundo rani ani ini wai ka tona fugo na boro na ki fu gaani waraga funi. Fuo inido ani tirani na agi aboro re, si asa rani ani nifura na yo dedede.”

Biata kpiapai nabipa tungusapai na terefuni. Wirinarani nga Judy ake waraga fu gaani rii-basunge nga ga zegino ka yugo gari tambuahe tipa wai i angarasi aboro tipa tungusapai na terefuni. Ri ape gupai nga, nari du garãri nga 86, ninaawoka dedede naatungusapai na terefuni na gipai re nasari ri du na bakere ngbarago ho ri awisigopai ni na kura boro du garãni nga 92!

Agu aberãpai i afuhe rogo gaani awaraga yo naundo aundo. Oni mangisunge na ni! Si ima rengba ka undo roni oni du na ngbarago na ki kpatakara kuti sunge tungusapai.

Anga du ani na diabese rogo gaani tungusapai naruriipa bange agu awaraga ani akparakaha, bange agu aboro ani awisigopai na yo, watadu agu aboro ani naundo yo i da ni ga Yekova amoyambu te. Bange aboro wai Noa aundo yo dagba agumeko yo i da ni airisi Yekova? Wa si avura duwo, ko angia gu batungusipai naadu na diabese. Gupai nyakipaha nga mangasunge fu Yekova ni ruru rani.​—1 Kor. 4:2.

Dungu abatungusipai bi gupai nga tipa ka du zaaza gene tungusapai yo, si naida i moi agu asásá rẽarẽ. Gini nga bete agi asásá re? Bete agu aberãpai re gu du rogo gi sanduki re.

Mbiko gu undo nga ga Yekova, oni gbata wai rengbe gaoni tungusapai kadu na wene sangbanaha. Ho oni ka dani ti gaoni asásá, oni nika du na ngbarago na ki gbia wasa ka ino gupai nga oni namanga gupai rengbe omeroni na ni tipa ka tungusa wene pangbanga.

Rengo ngaha nga, tungusa wene pangbanga nga taatapai te. Wa vura duhe wo, gu kura apai kinaho rengbe oni ka mangaha kadu ni zaaza abatungusipa Kindo. Oni fura dagba tironi na gu boro oni atungusapai na ni, oni wisigipai dedede, na kini mangi agu aberãpai kangara moyambu afuhe na ki moi agu asásá rengbe oni ka da ti ni. Kurigure, oni tingidi gupai nga Mbori ima fu nyanyakipa momu furoni nga ga tungusa wene pangbanga ni gako Dezire. (Yes. 43:10) Nairiwo gu ngbarago oni ka gbiaha re a wa oni ka nye zaaza kuti ngba tungusapai!