•  Chop tzón diitz par saló 2

•  Cós ni rasac ni sieed ló la Biblia 3-5

  •  Discurs 3

  •  Guiyopyno cós ni rasac ni sieed de Dios 4

  •  Textos ni golno ló la Biblia 5

•  Gacno toib galán mextra 6-14

  •  Gosaló goniné buñ 7

  •  Buny revisit 8

  •  Bisuidy buñ 9

  •  Golexa ni ronylo crer 10

  •  Discurs 11

  •  Ni guitnéni 12

  •  Tipnés mod ni guinino xtiitz Dios 13

  •  Mod ni guiquiinno videos né publicaciones 14

•  Mod non guibanyno 15-16

  •  Reunión ro rasuidyno ni ná la Biblia 16

•  Chop tzón diitz par guilox 17

•  Diitz ni racné né consej 18

•  Tiemp 19

•  Visit xtuny superintendente de circuit 20

•  Xomal de samblia 21

•  Xomal ni gac Memorial 22

•  Superintendente de reunión Mod nabanyno né mod ronyno Xchiin Dios 23

•  Presidente xtuny reunión Mod nabanyno né mod ronyno Xchiin Dios 24

•  Ni radudy consej 25

•  Stipnés salas 26

•  Videos 27

1. Instrucciones ni sieed ló document reʼ sacnéni guirá ni tudy ló reunión Mod nabanyno né mod ronyno Xchiin Dios. Guirá buñ ni tudy non goʼolyibu instrucciones ni noʼ par ganyibu ximod tudyibu asignación xtunyibu, mod sieed ló Ni non gonyno ló reunión Mod nabanyno né mod ronyno Xchiin Dios né ló guiich reʼ. Non guiruʼno a guiráxadit publicadores par guitudyibu discurs né stipnés asignación. Stipnés buñ ni diti rony falt ló reunión láaca labúu tudyibu pal racacuentyibu ni rasuidy la Biblia né nabanyibu xomod ná la Biblia. Pal toib buñ raniiny gac matricular antes de gacbu publicador, superintendente xtuny reunión Mod nabanyno né mod ronyno Xchiin Dios non guibiʼ pal rony cumplirbu né requisitos ni ranabni, de ngú gaibybu buñcu pal rony cumplirbu láani. Ndeʼ non gacni nisló buñ ni casuidy láabu ni ná la Biblia (o nisló bixiosbu o xinaʼbu ni nac Testigo). Requisitos reʼca ranabni órni toib ná guidxin gac publicador ni diti ma goyonis (od cap. 8 párr. 8).

2. Ti minut. Después ni gony cantarno né gac oración, presidente xtuny reunión saniʼbu xi láani tudy ló reunión ni ma yaaca saló. Sabeʼ loguiaʼbu puntos ni más gacné herman.

 3. Discurs: (10 minut). Ló guiich ni laa, Ni non gonyno ló reunión sitnéni tema né chop o tzón puntos ni más rareʼ loguiaʼ. Discurs reʼ toib anciano o siervo ministerial ni nantzay rasuidy, non guitudy láani. Órni saló golno toib libro xtuny la Biblia, sabiʼno toib video. Herman ni guitudy discurs reʼ labúu guisetlabu ximod radzak video reʼ né temacu, per non guicaabu cuidad guisetlabu ni ná xquiichno, Ni non gonyno ló reunión. Láaca pal napbu tiemp, non guiquimbu retrat, dibuj né texto ni napni, portín radzakni né información ni guisuidyno.

 4. Guiyopyno cós ni rasac ni sieed de Dios: (10 minut). Asignación reʼ gacni por galrranabdiitz né galrracapy né diti guiquiinlo introducción nili conclusión. Toib anciano o siervo ministerial ni nantzay rasuidy, guitudy láani. Herman reʼ non gonybu chop galrranabdiitz ni sitnéni. Láaca láabu non ganbu pal goʼolbu guirá textos ni sieed loni. Herman ni ná gony comentar gonybu láani galaʼ minut o menos.

 5. Textos ni golno ló la Biblia: (4 minut). Asignación reʼ toib hermano non guitudy láani, né diti cuéxabu ni toib diitz órni salóbu né órni guilox goʼolbu. Presidente xtuny reunión reʼ gacnébu guirá herman ni goʼol, par guieen ni cayoʼolyibu, ganyibu goʼolyibu modpa sieed ló guiich, goʼolyibu láani nayadit, goʼolyibu xomod rooy buñ diitz, guiquiinyibu xirudxyibu galán. Raquiin goʼolyibu tzagaa diti goʼolyibu naguel né láaca raquiin guiniʼyibu fuers par labúu guieen buñ láani. Rioʼ ór tipnés textos más sioʼlni, por ngú superintendente xtuny reunión Mod nabanyno né mod ronyno Xchiin Dios, guibiʼbu pal hermano reʼ labúu goʼol láani.

6. Quins minut. Sección reʼ sacné lóono par guinino xtiitz Dios né guisuidytzayno buñ. Pal raquiinni, ancianos labúu guicaʼyibu toibtica de asignaciones reʼ. Tigaaga buñ ni guitudy asignación non coʼbu cuent lesiony xtuny follet Gacno toib galán mextra o Gondxiʼ buñ ni rarecaa lainy paréntesis ni cá cueʼ asignación ló Ni non gonyno ló reunión. Sioʼ ór sioʼ tipnés asignación ro herman guiniʼ chop tzón roʼ. Asignación reʼ toib anciano o siervo ministerial ni nantzay rasuidy non guitudy láani (bibiʼ  párrafo 15 ro sieed mod gonyibu láani).

 7. Gosaló goniné buñ: Asignación reʼ guitudy toib hermano o hermana láani. Pal toib hermano guitudy láani, diti tudynébu toib buñgonaʼ, per pal nacyibu famil, labúu tudyibu. Labúu cuuyibu o guisagaʼyibu. (Par ganlo más ximod non guitudylo asignación reʼ, bibiʼ  párrafos 12 né  13).

 8. Buny revisit: Asignación reʼ guitudy toib hermano o hermana láani. Pal toib hermano guitudy láani, diti tudynébu toib buñgonaʼ (km 5/97 p. 2). Labúu cuuyibu o guisagaʼyibu. Ni nap asignación reʼ non guislooy lóono xi labúu guinino órni guibiguetno ronoʼ buñ ni bicadiagtzay lóono. (Par ganlo más ximod non guitudylo asignación reʼ, bibiʼ  párrafos 12 né  13).

 9. Bisuidy buñ: Asignación reʼ guitudy toib hermano o hermana láani. Pal toib hermano guitudy láani, diti tudynébu toib buñgonaʼ (km 5/97 p. 2). Labúu cuuyibu o guisagaʼyibu. Asignación reʼ nacni toib curso bíblico ni ma gosaló. Diti fuerspa gonybu toib introducción o toib conclusión, labúu gonybu láani pal cayonybu dxiin loni. Láaca diti fuerspa goʼolbu guidopyca información ni sitnéni, ná labúu gonybu láani.

 10. Golexa ni ronylo crer: Órni nacni toib discurs, toib hermano non guitudy láani. Órni nacni toib demostración, toib hermano o hermana labúu guitudy láani. Pal toib hermano guitudy láani, diti tudynébu toib buñgonaʼ, per pal nacyibu famil, labúu tudyibu. Ni guitudy asignación reʼ non guiyopybu mod guicapybu galrranabdiitz de temacu, non gonybu láani nayaa né guiquimbu información ni sieed ló guiich ni ma cuaʼbu. Ma láabu ganbu pal guiniʼbu laa guiich ni caquiimbu.

 11. Discurs: Asignación reʼ toib hermano non guitudy láani né gonybu láani xomod toib discurs. Órni discurscu guireʼni ló toib número de apéndice A ni sieed ló follet Gondxiʼ buñ, ni guitudy discurscu non cueʼ loguiaʼbu ximod labúu guiquiin publicadores textos ni sitnéni ló predicación. Por ejemplo, labúu cuéxabu xi radudy diitz toib versículo, pu ór labúu guiquiinno láani, né ximod guiquiinno láani órni guininéno buñ. Órni guireʼni ló toib número de toibtica lesiony de follet Gondxiʼ buñ, ni guitudy láani non guiniʼ ximod guiquiinno número cu ló predicación. Labúu cueʼ loguiaʼbu toib ejemplo ni rarecaa ló número 1 de lesionycu, o versículos ni sieed loni.

   12. Ni guitnéni: Instrucciones de párrafo reʼ né párrafo ni sieed raquiinni par asignaciones «Gosaló goniné buñ» né «Buny revisit». Ni guitudy asignación reʼ, guiniʼbu toib galnigolú senciy ni nainy buñcu gan, né par labúu gooybu diitz stoib ór. Publicador non cuubu xi tema guiquimbu ni labúu gacné buñ de lagary ro rabésbu. Láabu guiniʼbu pal guiquimbu o yaca toib publicación o video ni sieed ló kit de enseñanza. Xalagary guitudybu toib presentación de memory, non guisuidybu ximod saló guininébu buñ, xomod ni tzoʼbu xalagary buñ, né guiniʼbu xomod órni raninébu buñ.

   13. Tipnés mod ni guinino xtiitz Dios: Ni guitudy asignación reʼ, guiquimbu tzón modreʼ par guiniʼbu xtiitz Dios. Por ejemplo:

1.  (1) Yoʼ por yoʼ: Ndeʼ raguiñani tanli órni rioʼno lidx buñ (órni raninéno buñpa, por teléfono, o racaʼno guiich lóbu) né órni rooyno diitz né buñ ni goninéno modreʼ.

2.  (2) Rotísi lagary: Ndeʼ raguiña órni raquiinno oportunida par guininéno buñ de la Biblia, laʼga noʼ ni cayonyno, por ejemplo órni raninéno buñ ló dxiin, órni noʼno lainy yolayscuel, órni raninéno xpesinno, laʼga soʼno lainy camión, né stipnés lagary.

3.  (3) Locay: Ndeʼ raguiña órni ranino xtiitz Dios né camionguien, né órni ranino xtiitz Dios ló negosy, locay, lainy parque, ro rasagaʼ camión né stipnés lagary ronoʼ buñ.

 14. Mod ni guiquiinno videos né publicaciones: Órni labúuni, tigaaga publicador gan pal guiquimbu toib video o toib publicación o yaca. Pal asignación cu sitnéni toib video o pal ni guitudy láani ná guiquiin toib video, non guisetlabu né gonybu tipnés galrranabdiitz de videocu, per diti guicaʼbu guii láani.

15. Sección reʼ rasalóni né toib canción. Ló 15 minut ni sieed sitnéni toib o chop asignación ni gacné a herman guibanyibu mod ná Xtiitz Dios. Pal diti cá chú ni merpa guitudy láani, asignación reʼ toib anciano o siervo ministerial ni nantzay rasuidy guitudy láani, per asignación ni laa, «Ro raquiin gony herman dxiin», nosi anciano non guitudy láani. Órni guiniʼ herman chop tzón roʼ, hermano ni guitudy asignación reʼ, non gonybu galrranabdiitz ló guidopyca asignación xtunybu, diti nosi ni sieed loni. Órni salóbu guiniʼbu non guiniʼbu chop tzón roʼ, par gapbu tiemp guiniʼbu cós ni rareʼ loguiaʼ né par guiniʼ herman chop tzón roʼ. Pal sitnéni toib entrevista, pal labúuni ni gac entrevistar non tudybu ló plataforma né diti desde xalagarybu.

  16. Reunión ro rasuidyno ni ná la Biblia (30 minut). Asignación reʼ toib anciano ni nantzay rasuidy non guitudy láani (lainy tipnés congregaciones ro diti noʼ xidal ancianos, labúu guiquiinyibu siervos ministeriales ni nantzay rasuidy). Ancianos ni noʼ lainy congregación non guiniʼ chú ministerial ni nan rasuidy gony láani. Herman ni rabúyibu diti non tudyibu tiemp, guiquintzayibu textos né gacnéyibu herman par guieen ximod racnéni layibu. Par labúu gonyibu láani, sacnéni layibu guisuidyibu información ni rasetlaa ximod guitudy buñ asignación ro herman raniʼ chop tzón roʼ (w23.04 p. 24, box). Órni herman reʼ ma golexatzay guirá información reʼ, ma diti rac fuers guisaʼbu 30 minut. Pal labúuni, tigaaga xomal gadzéga herman guitudy asignación reʼ né gadzéga herman goʼol párrafos. Pal presidente ranab gonybu láani más naguel, hermano reʼ non gan ximod gony láani. Toib mod ni gonybu láani ngú diti goʼolbu tipnés párrafos.

17. Tzón minut. Herman ni nac presidente gonybu repas tipnés puntos ni bisuidyno ló reunión. Láaca guisetlabu ni tudy stoib xomal, modreʼ herman sony pensary loni. Pal noʼ más tiemp, labúu guisetlabu laa herman ni tudy stoib xomal. Pal diti scú láani, presidente labúu guidudy anunys o goʼol tipnés guiich, presidente non gony láani órni ma guilox reunión. Tipnés información ni raquiin gan herman xomod: ór par guireʼyibu yoʼ por yoʼ né chú guisiá salón, diti non guiniʼyibu láani ló plataforma, anunys reʼ sacáni ló tablero. Pal diti noʼ tiemp par goʼolbu anunys o goʼolbu guiich ni raquiin gan herman, presidente sanab guirá herman ni tudy ló reunión «Mod non guibanyno» gonyibu láani más dop (bibiʼ  párrafos 16 né  19). Reunión reʼ guiloxni né canción né guinabno lóo Jehová.

18. Órni guilox tigaaga asignación, presidente napbu midid timinut par gony felicitarbu herman né guidudybu consej ni sieed ló lesiony ni cuaʼbu. Órni presidente guiniʼ chú láabu tudy, diti guiniʼbu ló xi lesiony cayony herman reʼ dxiin. Órni guilox toib asignación né después ni ma buny felicitarbu herman, labúu guisetlabu ló xi lesiony buny herman reʼ dxiin né cuéxabu xigony galán bunybu láani, o guiniʼbu pu labúu gony herman reʼ dxiin par gonybu láani más galán. Presidente láaca guisetlabu tipnés cós ni gacné a herman reʼ o ni gacné a herman ni dxee ló reunión. Órni guilox reunión o stoib ór, herman ni raquiin galrracné labúu guininé presidente láabu tiplad né gaiby láabu tipnés consej ni gacné láabu ni sieed ló follet Gondxiʼ buñ, follet Gacno toib galán mextra, o libro ni laa Benefíciese, ná pal nacni ló lesiony ro cayonybu dxiin o ló stoib (ló  párrafos 19,  24, né  25 sadzelo más información ni rasetlaa xi dxiin rony toib presidente xtuny reunión Mod nabanyno né mod ronyno Xchiin Dios né xi dxiin rony herman ni radudy consej).

19. Guirá asignación diti non tudyni tiemp (ndeʼ láaca raguiña chop tzón diitz ni guiniʼ herman ni nac presidente). Ná ló guiich Ni non gonyno ló reunión raniʼ balac gacla tigaaga asignación, pal herman ni guitudy láani ma goniʼbu guiráni, diti rac fuers coʼbu stidxo loni par guisaʼbu tiemp. Pal toib hermano radudy tiemp, herman ni radudy consej guininé láabu tiplad (bibiʼ  párrafos 24 né  25). Guidopyca reunión, canciones né oración non gaclani ti ór né cuarenta y cinco minut.

20. Órni congregación gap visit sácni xomod sieed ló programa Ni non gonyno ló reunión. Nosi ló «Reunión ro rasuidyno ni ná la Biblia» diti sasuidyno láani xomalcu. Toib discurs ni guitudy superintendente de circuit sioʼ xalagaryni, né saclani 30 minut. Antes ni tudy discurs reʼ, presidente gonybu toib repas ni ma bisuidyno né guiniʼbu xi láani tudy stoib xomal, guitudybu anunys né goʼolbu guiich ni raquiin gan herman né después guiniʼbu que superintendente de circuit ma coʼ discurs. Después ni guilox discurs reʼ, superintendente de circuit guisloʼox reunión reʼ né canción ni ma golúbu. Labúu guinabbu toib herman gony oración. Diti sioʼ ni tudy ló sala B ló diitz ni raniʼ congregación ló xomal de visit. Grupos ni raniʼ stipnés diitz labúu gapyibu xireuniónyibu órni congregación ro radopyibu nap visit. Per órni superintendente de circuit coʼ discurs de servicio non tzeeyibu ronoʼ sala principal par guicadiagyibu discurs reʼ.

21. Xomal ni rioʼ samblia, diti sioʼ ni toib reunión. Herman non gaibyibu congregación que ma tigaaga herman guisuidy ni tudy ló reunión o gonyibu láani né xfamilyibu.

22. Pal Memorial riabni lainy xomal, ma diti sapno reunión Mod nabanyno né mod ronyno Xchiin Dios.

23. Nacbu toib anciano ni ma golú cuerpo de ancianos. Hermano reʼ guicaa cuidad gacni mod ná guirá instrucciones ni noʼ. Non gooybu diitz né herman ni radudy consej par gonyibu dxiin galán. Órni guidxin guiich Ni non gonyno ló reunión, gonybu toib programa ro guicaʼbu chú gap asignación ló chop beʼocu. Ni tudy ló sección «Mod non guibanyno» né ni gac presidente xtuny Reunión, non gacyibu herman ni ma buny aprobar ancianos (bibiʼ  párrafos 3-16 né  24). Órni superintendente xtuny reunión, gony programa de asignación, non guicaabu cuidad íz né experiencia ni nap herman, pal labúu cuéxabu tema ni guicaʼbu. Non gonycuentbu asignación reʼ tzón xomal antes. Asignaciones ni guitudy publicador, non guireʼni ló guiich né guiquimbu formulario ni laa, Ni guituidylo ló reunión Mod ronyno Xchiin Dios (S-89). Láaca non guicaabu cuidad que programacu guicáni ló tablero.

24. Cada xomal, toib anciano gac presidente ló guidopy reunión Mod nabanyno né mod ronyno Xchiin Dios (pal lainy congregación noʼ goxeʼsi ancianos, asignación reʼ toib siervo ministerial ni nantzay labúu gony láani). Presidente non guisuidybu xquiichbu par guiniʼbu chop tzón roʼ órni saló reunión né órni guiloxni, ngúca non gonybu órni guislooybu toib video ni guiquiinno yoʼ por yoʼ. Láabu raniʼbu laa guirá ni ratudy asignaciones, né pal goxeʼsi ancianos noʼ, presidente láaca labúu guitudybu tipnés asignaciones ló reunión reʼ, máspa órni radudy toib video ni diti nap galrranabdiitz. Órni presidente guiniʼ laa stoib herman ni tudy diti gaclabu. Guirá ancianos guiniʼ chú labúu gac presidente ló reunión. Guirá herman ni ma golúyibu gac presidente sac turnaryibu. Sioʼ ór, lainy toib congregación raquiin que hermano ni nac superintendente seguidca gacbu presidente. Pal toib anciano ratudy «Reunión ro rasuidyno ni ná la Biblia», láaca labúu gacbu presidente. Ranabdo lóoto gapto cuidad que anciano ni gac presidente labúu guidudybu consej né gacnébu herman ni gap asignaciones. Herman reʼ láaca non guicaabu cuidad que reunión reʼ guiloxni xorpani (bibiʼ  párrafos 17 né  19). Pal presidente nainy gony láani né noʼ xiroʼ lagary ló plataforma labúu guiquimbu toib micrófono de pedestal né desde cú guiniʼbu chú herman tudy, laʼga herman ni tudy caguaʼtzay ló plataforma. Par diti guisnit presidente más tiemp, looca plataforma non guisagaʼ toib mexh né toib xilet par cuu presidente laʼga herman cayoʼol la Biblia né laʼga cadudy sección «Gacno toib galán mextra».

25. Pal labúuni, toib anciano ni nantzay ragoʼ discurs non gony láani. Pal raquiinni, anciano reʼ guidudybu consej a ancianos né siervos ministeriales ni guitudy asignación ló reunión Mod nabanyno né mod ronyno Xchiin Dios, ni coʼ discurs, ni coʼ reunión ro rasuidyno Guiich ni caniʼ, ni coʼ «Reunión ro rasuidyno ni ná la Biblia», o ni goʼol párrafos (bibiʼ  párrafo 19). Pal lainy congregación noʼ xidal ancianos ni nantzay ragoʼ discurs né nac galán mextra, labúu guidzaʼbu cada íz par guidudybu consej. Diti raquiin guidudybu consej guirá ór órni toib anciano o ministerial guitudy toib asignación.

26. Pal noʼ xidal herman ni ratudy asignación, congregación labúu guiquiin stipnés salas. Tigaaga sala non gap toib herman ni guidudy consej: né pal labúuni non gacbu toib anciano. Pal nigolú raquiinni, toib siervo ministerial ni nantzay rasuidy, labúu gony láani. Guirá ancianos non guiniʼ chú guidudy consej lainy toib sala né pal raquiin guidzaʼyibu. Herman ni radudy consej non gony mod ná  párrafo 18. Sanabyibu herman tzee lainy stipnés salas órni guilox asignación ni laa, «Guiyopyno cós ni rasac ni sieed de Dios» ni sieed ló sección «Cós ni rasac ni sieed ló la Biblia». Órni guilox reunión ni laa, «Gacno toib galán mextra» guiráyibu guibiguetyibu lainy sala principal.

27. Ló reunión reʼ sabiʼno tipnés videos, ni noʼ ló aplicación JW Library^®.

© 2023 Watch Tower Bible and Tract Society of Pennsylvania

S-38-ZPL 11/23