Guibanyno ló Gudxlio sacroyen né goxt ló dzú ni sietra

Órni rabilo dibuj ni sieed ló guiich reʼ, ¿xí rasacloʼ? ¿Diti nainy looy guibanylo sacró né galnasác mod rabilo reʼ la? Scú láani. Pero, ¿nosi ló xpensaryno noʼ guiluladxno que sioʼ dzú scú gacni la?

Xidal buñ scú rony xpensary. Portín ló dzú reʼ rabino pór cós mal: guerr, galrralán, galguitz, rioʼx buñ, né stipnés cós mal. Ná scú nacní ló xtzúno, raluladxno que sadxin dzú ma diti sioʼni. Biblia ná dzú ni sietra sioʼ «toib guibá copy né toib Gudxlio copy ni goníbu [Dios] guiduidybu lóono, ro guirá buñ gony xinésni» (2 Pedro 3:13; Isaías 65:17).

Órni Biblia rasetlaa «guibá copy» né «gudxlio copy» diti raduidyni diitz guibá o Gudxlio ni rabino. Gudxlio né guibá ni rabino goyaʼ tzaayni, né Biblia ná diti sioʼ dzú sanitlóni (Salmos 89:36, 37;104:5). Diitz «gudxlio copy» láani ngú guirá buñ ni rony xinésni ni guibany ló Gudxlio reʼ, né diitz «guibá copy», gacni toib Gobierno sin galkié ni gony mandary guirá buñ ni guibany ló Gudxlio reʼ. Pero, ¿nigulú raluladxlo que ló Gudxlio reʼ tzó buñ tzaay, ni rarexa «gudxlio copy» ni guibany sacroyen, né goxt ló dzú ni sietra la?

Buny xpensarylo, ni ma bisetlano ngú ni goniiny Jehová ñony ló Gudxlio reʼ. Láabu golóbu Adán né Eva lainy toib lagary sacroyen ni góc laa Edén ro Jehová biduidy toib dxiin sacró layibu «Tzó xidal xiinnto, guidalto ló Gudxlio, né gannto guirá ni noʼ loni» (Génesis 1:28). Scú láani, xpensary Jehová ngú que ñoʼ xiinyibu né mod reʼ ñonyibu que guidopynac ló Gudxlio ñac toib lagary móz. Ná layibu diti bisobbu ni goní Dios  mod reʼ biduidyibu diitz que diti labúu nabanyibu tipzó, pero ni goniiny Jehová ñac ló Gudxlio reʼ diti noʼ chú racaa láani. ¡Né ndeʼ non gacni ro guibanyno sacroyen né goxt ló dzú ni sietra! (Isaías 55:11.)

Órni looy raninélo Dios xomod bisuidy Jesús xpiin, né ranaplo guieed Gobierno xtuny Dios, ni looy canaplo ngú que Gobierno reʼ cueʼ guirá cós mal né gony mandary guirá buñ ni guibany sacroyen né goxt ló dzú ni sietra (Mateo 6:9, 10). Labúu gapnó confianz que Dios guicapy ni ranapno láabu, portín Xtiitzbu ná: «Guirá buñ ni rony xinésni, xtunybu sac Gudxlio, né sabanyibu loni tipzó» (Salmo 37:29).

Guibanyno sacroyen né goxt ló dzú ni sietra

Gobierno xtuny Dios saduidy xiroʼ galnasác lóono, né sácni más galán ló dzú cú, modreʼ sabanyno xomod gonini Jehová dzú ni bisaʼbu buñ gudxlio. Galrrianladx ma diti sioʼni, né ma diti sioʼ buñ ni cué tiplad a stipnés, guirá buñ ni guiguaʼ cú, sioʼ ximigyibu ni nigulú sonladxibu. Dios raby lóono ló Biblia «ma diti sioʼ guerr ló guidopynac Gudxlio». «Gudxrop né gudxrop ma diti sadíilyibu, ma diti sioʼyibu puext par tzeyibu guerr.» (Salmo 46:9; Isaías 2:4.)

Sadxin dzú guidopynac ló Gudxlio gacni toib lagary móz. Biblia ná: «Yoolaʼ né yoovich sabaladxni, né láach yoolaʼ sabaladxni né sial guieʼ móz lagarycu. [...] Ló yoovich sioʼ nís, né ló yoolaʼ sioʼ xidal lagary ro guidaa nís. Né yoo ni bispiich galnalaʼ sadxin sácni ro ralainy bixil né yoovich cú sadxin sácni xomod ro radaa nís» (Isaías 35:1, 6, 7).

Ló Gudxlio móz cú sioʼno goxt. Ma diti sioʼ chú sadudy galrralán por ni riatz galrro. «Gudxlio saduidy guirá clas galrro ni labúu guaano», ná Biblia (Salmo 67:6; 72:16). Guiráyibu sabaladxyibu né dxiin ni gonyibu,  xomod ná Jehová: «sasaʼyibu yoʼ né saquiinyibu láani, sasaʼgayibu cuánnax né soyibu xcaani [...] Diti sasaʼgayibu cuánnax né stoib gua xcaani» (Isaías 65:21, 22).

Órni guibanyno sacroyen né goxt ló dzú ni sietra cú, guirá buñ sioʼ liich né ma diti saguaʼ montónyibu toibsi lagary, ma diti sabésyibu lainy yoo balaʼac, Dios ma goní: «sasaʼyibu yoʼ né saquiinyibu láani [...]. Diti sasaʼyibu yoʼ né stoib saquiin láani». Biblia láaca naa: «Diti gonyibu dxiin nadip sin guicáyibu xitcal» (Isaías 65:21-23). Lagary cú guirá buñ ni gony dxiin sabaladxyibu por ni guiduidyni. Diti sioʼ chú saxacladx.

Conforma dzú, Gobierno xtuny Dios sony que nimal né saʼ nimal saguaʼyimu toibsi né láaca buñ né nimal guiguaʼ toibsi xomod gocni lainy lagary sacroyen ni góc laa Edén. Biblia ná: «Lob saguaʼyimu toibsi lagary né xiil por tidxósi tiemp, né betz sasaladx cué toib chiv, yósien né toib betz ons lassien, né toib nimal nadann guiguaʼyimu toibsi; né toib mbioxien gap layimu» (Isaías 11:6-9; Oseas 2:18).

Buny xpensarylo, lainy Gudxlio móz láaca sial buñ de bisaʼ clas galguitz láaca siaal buñ gop né buñ xot né stipnés clas mal xomod ndeʼ! Xtiitz Dios raby lóono: «Ni toib buñ guiniʼ: Caxoʼya» (Isaías 33:24). «[Dios] sasiá nís ni rareʼ bisalóto, galgoity ma diti sioʼni más, ma diti sioʼ ni guisac maláy, láaca má diti sioʼ ni guicalas rudx, láaca diti sioʼ ni tuidy ló galrrioop. Cós ni ma góc ma goduidyni» (Revelación 21:4).

 Xí labúu gonylo par guibanylo lagary cú

Guirá galnasác ni ná Dios guibanyno sacroyen né goxt dzú ni sietra, ro guirá cós gac xinésni nigulú ma bidxiinni lainy xcalnabanylo. Ná noʼ ni diti raluladx portín ronybu xpensarybu que nigulú sacróni par gacni nigulú, guirá galnasác reʼ sacaʼno láani portín ni guiduidy guirá ndeʼ ngú Dios ni bisaʼ né nadxi lóono (Salmo 145:16; Miqueas 4:4).

Scú laani, pal guibanyno lainy toib lagary móz dzú ni sietra, noʼ cós ni non gonyno. Jesús goní ni más rasac ni non gonyno órni goninébu Dios: «Ni guibanyno tipzó ndeʼ raduidy diitz, guisuidybu de looy, toib Dios ni rony xinésni né láaca guisuidybu de xiinlo Jesucristo ni bixel lo» (Juan 17:3).

Pal nigulú náni lóono guibanyno sacroyen né goxt dzú ni sietra ló Gudxlio ni guiduidy Dios lóono, nír guisuidyno xí ngú ni náni láabu né non gonyno láani, portín lóono nánno que «gudxliogoxreʼ caduidy xtzúni né guirá cós mal ni noʼ lainy xcalnabany buñ, pero ni rony ni ná Dios guibany tipzó». Pal gonyno scú, ni Bisaʼ né ni nadxi lóono saduidy xiroʼ galnasác ni diti sadopy (1 Juan 2:17).